亂皂𥴊仔店 ⓂⒺⒾⓃⓀⒾⓄⓈⓀ

德國電視台 Der Tricks 抑是 Marktcheck  有一集討論 teh 討論德國若坐飛天車 ê 物價，比如講這禮拜雞襟胸 1 公斤 7.99€，下禮拜 1 公斤 12.99€，然後廠商講遮 ê 價數是一月日 ê 固定價數 hōo gún 翁開始傳世佛經，世世(踅踅)唸「你款物愛斟酌繩前後禮拜。」

巴禮講道，家己攏著，我無興跟綴伊起情緒蛟龍來一个「信這，死了無了拜」就 kā 廚房款 ê 物逐條仔逐條算 hōo 伊參考；串仔罐頭烏露戰爭進前是 0.99€，特價 0.79€，烏露戰爭按 1.29€ 漲懸價到 1.69€，現此時停跤 tī 1.49€，特價 0.99€ ~ 1.19€，串仔罐頭莫 kā 烏露戰爭帶來 ê 運輸算在內，現此時 ê 串仔愈來愈少，起價是合理，總是起甲 1.69€，這交臺灣飼牛業相𫝛按𪜶遐出來是 30 箍台票，行到超市超過 100 箍，這中間 ê 70 外箍，運輸、通路敢有遮爾仔框金，以運輸 15%，通路 15% 來算，猶是無到 70 外箍 ê 消費者價值，總是這个消費者價值就 tshan-tshiūnn 恁認為 ê 俗價，我認為 ê 無價值仝款隨人認定，總是食物這件代，我無遐爾仔無頭腦，畢竟錢四跤我 tsiah 兩跤。我 mā 無總舖師幻想，掠做廚房有厚甲若蠓 ê 家私就𠢕出菜。

串仔算了換雞襟胸，雞襟胸算了無興閣算 hōo 伊捌，「我是活 tī 現實世界 ê 人 m̄ 是活 tī 乞食攑蠓捽，假仙假觸，盤仔假赤鯮。」

本底掠做家己正港是過橋較 tsuē 牽手行路，食鹽較 tsuē 牽食米 ê 伊，鼻仔摸摸挲挲莫閣指正牽手捌算 m̄ 捌除，糶米糴番薯。 

高職進前，臺灣猶無時行家樂福、全聯遮 ê 連鎖賣場，高職畢業臺灣時行若家樂福大賣場 ê「萬客隆」uī-tio̍h 有才調繼續升學讀二專先去做穡趁所費 ê 我 tsiah 有機會踅菜市場交𥴊仔店以外有貼價數單 ê 賣場。 正港出社會遠東愛買、家樂福、大買家齊出場，我猶是佮意踅菜市仔，起因賣場交菜市仔 ê 價數無宛 2 體，唯一 ê 精差是環境無遐爾仔四序，m̄-koh 人情味飽滇甲捷捷有無料 ê 九層塔、蔥仔、芫荽佮總舖師食譜。因為這个採購慣勢 hōo 我認風颱前、風颱後價，著時 、無著時價交過鹹水這三款價數。

「Gún 有一句俗諺語，豬 m̄ 大，大 tuì 狗去，伊 ê 意思是家己向望 ê 代誌無照按算來行，英語有一句林檎佮柳丁(Apples and Oranges)意思是根本無才調互相做比並 ê 代誌，這久 ê 你就是按呢生，交恁爸母無宛 2 體一模模一樣樣，準你認為你無做𪜶 ê 烏面賊 mā 交𪜶正式成做隨人付米，隨人落鼎，你猶是 teh 搬𪜶 ê 章回小說皮猴戲，我理解你交𪜶是臍帶結相連，總是歹勢我已經行出白仁相烏仁 ê 日子，無興交你纏綿 tī 這款人生，我真正無要意成做無翁無猴 ê 老人。」話一講煞我隨 tuì 家己拍噗仔，起因我講遮 ê 話無犀牛照角抑是心狂火著，顛倒是徛懸山看馬相踢，分拆問題 ê 人。

「我只是照家己 ê 想法交你分張我 ê 向望 」伊是銅牙槽鐵喙齒抑是愛吊脰閣搶後跤，tī 好種 m̄ 通斷，歹種 m̄ 通傳 ê 互相熥清飯，熥甲連好喙斗 ê 豬攏 m̄ 食，gún-ê 門扇鬥 buē 峇已經成做我 ê 侘寂 tī 欠點內底揣美感，tī 元神綁青竹掛豬肉。

「Gún 講人𠢕，mā buē 使得交天做對頭，咱家扞鼎 ê 天是我，我這个天萬分尊存你 ê 需求，總是你 ê 顛三倒四，反起反倒 hōo 我感覺你 ê 元神是恁勥母，勥母是你 ê 天，所致你想 bueh kā 我拊掉，tshan-tshiūnn 宇宙烏空按呢，烏空食烏空 hōo 人看 buē 出自來 ê 我，總是失禮，我正港無 kā 恁兜 ê 天看在眼內，總是你 ê 長短跤話，我需要特別劃紅線 hōo 你知影準做鴨母妝金，我 mā 知機彼是扁喙，畢竟我無向望你交我行向田無溝，水無流，無相交插。」

「我無長短跤話，有喙講別人，無喙講家己展家己相諍 m̄ 捌輸，我正經  kan-na kā 心內話講出來...」翁若發見家己講話無中人聽，所致愈講愈細聲。

「牛無力拖橫耙，人無理講橫話，這款問題咱做陣熥甲連豬 to m̄ 食，我 mā 是，隨在你主意，總是我 ê 主意是你 ê 暗時食西瓜，半暝仔反症，我一屑仔攏 buē 要意，起因我是鳥鼠趖竹篙，一目過一目照你意思來完成你 ê 向望。」

歐洲 ê 意大利、葡萄牙、法國、西班牙齊有種米，遮 ê 國家所栽種 ê 米交咱番薯島台灣無相𫝛，總是猶是揣有交脾土相敆 ê 米種，特別是意大利佮葡萄牙。我 tuì 意大利食食文化無研究，總是我印象中有地選擇 ê 意大利米種交咱番薯島相𫝛 tsuē 甲若河溪，價數閣親切可愛。

德國這幾冬食米人口增加，總是𪜶 ê 市場以我個人 ê 觀察猶原保持印度米交泰國米兩類，這个綿豉 ê 固定 m̄ 知是市場做決定抑是進口商做決定。所致準做糙米有我需求 ê 鋅，我 mā 罕得 bué，畢竟印度米交泰國米正港無敆我喙就莫杜猴損五穀，我 mā 貧惰 uī-tio̍h 一包敆家己喙斗 ê 米專工盤兩到三幫車到市區 ê 中國超市款米轉來補喙空。所致生活無法度照家己 ê 四序來行，家己就愛揣四序，像目前生活 tī 愛食肉無愛食海產 ê 德國，罕得食鋅夠額 ê 牛肉就換食雞心豆、燕麥片、優格、腰果、蘑菇、菠薐仔、䆀豆等等來補家己喙白交避免褲袋仔袋磅子帶來 ê 困擾。

囡仔時讀天增歲月人增壽，春滿乾坤福滿門認為伊是自然，這久讀這對聯是自我安慰劑。無 tsiâu-tsn̂g ê 營養交規律 ê 生活慣勢向望家己有機會跟綴天添歲數，我較早睏較有眠。

我 tuì 北非小米一直有興趣，總是一想著伊愛炊我就𤺪。炊這个動作 tuì 我來講就是厚工 ê 代表辭。像炊粿愛浸秫米、挨米、菜頭礤簽、抐米漿...一想著遮 ê 工課我隨放棄，準做逐家齊講好味素。

近來款秮仔見著北非小米，Heidi 分張 ê 北非小米步頻出現 tī 腦海 hōo 我想著伊 ê 好味素，開始認真繩伊 ê 料理手路。總是華文從來 m̄ 捌認真繩，非專文科 ê 德文愈 m̄ 講 ê 以煮米手路鬥「北非小米翕十分鐘」出來 ê 北非小米恐怖甲若 Hermann Hess tī Demian 抑是 Peter Camenzind 是佗一本，我已經無一个印象，總是彼段形容德國太太 kā 米煮甲若 Brei 𫝛款 ê 畫面到今猶原放 buē 記，起因我 ê 北非小米 mā 生做伊剾洗 ê 生張，伊猶原 ē 食得，總是你清楚知影眼前 ê 北非小米 m̄ 是這款面肉。