亂皂𥴊仔店 ⓂⒺⒾⓃⓀⒾⓄⓈⓀ

頂站仔看公視台語台《台灣話話台灣》金山蹦火仔「火光會吸引青鱗仔來倚」，青鱗仔是啥物？隨請巧機仔 kā 我鬥相共，維基百科講伊沙丁魚一款，臺灣魚類資料庫講伊是鯡(hui)魚 ê 一款。

根據維基百科紹介青鱗仔上大到 15 公分，鯡魚上大到 45 公分，沙丁魚體型 ê 盡磅 mā 交青鱗仔相𫝛 15 公分。青鱗仔是沙丁魚抑是鯡魚？據在伊，伊就是魚，一款好食 ê 魚，雖罔到今我 m̄ 捌食過伊，凡勢捌食過，不過伊 tuì 我來講就 tshan-tshiūnn 德國人看我是泰國人，我看德國人是美國人仝款，齊齊是人無宛 2 體，伊就是魚，hōo 我 buē 喙白閣有活力 ê 魚。

頂站仔翁仔姐做陣去 Rastatt 揣朋友，回程看一下仔時間轉到厝準做清彩煠一下麵來食 mā bueh 10 點，我 ê 胃腸無 gún 翁 ê 勇健，食飽隨睏 buē 漚酸水交胃滯滯，隨擲二个方案 hōo 伊選擇 1. 土耳其烘肉店 2. McDonald's，目今學 ē 曉尊存別人 ê 伊選擇食 McDonald's。

人講翁生某旦，食飽相看，目睭安電線，gún 自來往到牽手十外冬 gún-ê 電線宛然德國人頓胸坎講 ê「Gún-ê 工藝經過百外冬猶是健欉，總是每一个年閣有家己 ê boo-lú-tooh(Volt)愛小可仔等一下。」Gún 翁仔姐 ê 電力 tshan-tshiūnn 朋友五百外冬 ê 老厝宅，電力無通仔交新厝宅相比並 m̄-koh 猶 ē 過電。

人講老厝宅有人味，gún 翁仔姐行到這个歲數 mā 算老厝宅，McDonald's 門一拍開無台灣 ê「歡迎光臨麥當勞，這邊可以為你點餐」kan-ta 若詬詬唸 ê 弄舌滿厝間，gún-ê 人味 mā 瞬間焦蔫 kā 櫃檯 ê 工作人員看做看板直接伐向電子點菜機，紲落來揣位等電腦叫號。

離開若廟埕開講 ê 面冊 4 冬，按翁遐得著 ê 點揬 Instagram 使用無到2禮拜致著落吐症(làu-thòo-tsìng)隨註銷保性命，Pixnet 屬我個人消敨齷齪挽瓜揫藤兼自在孤𣮈 ê 天堂，我無交人宣傳 mā 無大四界骨力貼電火柱，除了彼个 uī-tio̍h bua̋i 閣 hőng 掠做我是 buē 曉衰 ê 寄生仔所申請 ê 愛料理(I-Cook)，我合該是一个無網路身份 ê 人。

近來現實人生 kan-ta 一个烏面賊，網路卻有百外烏面賊 ê 翁問我「Gún 德國有開發新 ê 社群，內底 mā 有臺灣人你 bueh 參加 bő？」

「Buaih」

「一秒猶未行到 60 你就應 buaih，網路社群敢有遮爾仔恐怖」翁笑應。

「有人興燒酒，有人興豆腐。我自囡仔 m̄ 捌 hőng 訓練，棚頂媠，棚跤鬼，所致我 tuì 網路親戽戽 ê 熱鬧走腹，句點。」

踅有機超市看來 ê 食譜。

成品完成那食那感覺佗落無合軀隨請教海馬向望伊引𤆬我揣著答案，海馬泅仔泅，泅仔泅，泅到盤底賰沙漠(bo̍k)焦甲無見半隻羊，半枝草，蠍(giat)仔 mā 按沙浮出來喝喙焦喉喝猶是揣無空榫通敆作。

「真失禮，我又閣紮家己 ê 慣勢 hōo 你食糜飯」翁猶未紲我話，蠍仔隨喝揣著水源矣，揣著水源矣。

我 buē 記持濫雞肉....

「一頓無食肉 buē 損我一塊肉」翁笑應「另外，這出菜敢會使得繼續餾。」

緊緊 kā 下昏飯送入腹肚，緊緊換車幫到戲園，緊緊拆一張，緊緊傱入影戲廳對號入座。怪奇，已經 8:20 影戲呔猶未開始？當我認真思考這个問題，四位德國人互相討論號碼問題，煞落來客氣請教我「請問你敢 mā 5 排 6 號？」緊 kā 票撏出來，五个人互相䀐一下，繼續討論敢是工作人員拆 m̄ 著位。我 mā 因為這个現象感覺紅龜生蟲，龜怪，Bridget Jones: Verrückt nach ihm 合該然較合女人脾土，呔討遮 tsuē 男人來贊聲，敢是因為這場是特別場，原音播出。當我成做貓 tuì 戲廳貓貓相。

「你走 m̄ 著廳，這廳 m̄ 是 Bridget Jones」其中一位男子微微笑 kā 手頭 ê 票分 hōo 我看。我 ê 天公伯矣，誠實走 m̄ 著廳，那講歹勢外套捎 leh 隨傱出去揣我 ê 廳。

「你 ê 廳 tī 2 樓」著矣，遮是二樓，呔 m̄ 是我 ê 廳，我 kā 頭閣一斗探入去舊廳，內底 ê 戲迷齊笑講「這廳確定無講英語」我緊說謝斡頭傱向檢查人員「我揣無我 ê 廳。」

凡勢戲園 kan-ta 我一个亞洲人真好認甲，工作人員隨講綴我來 hōo 我一个閬縫攏無有空有榫 kā BJ 自頭看到煞戲。 影戲散場，翁來戲園接我，我 kā 這个過程講 hōo 伊聽，伊笑甲腹肚疼講「你 mā 傷過大目新娘揣無灶。」

「我無大目新娘揣無灶，不過我有穢著恁德國人田螺循舊逝，較行mā 彼逝 ê 癖。」

近來魚指 m̄ 知受著啥物因端影響又閣按漲懸價行向大落價 hōo gún 翁無法度無成做 Hamster 豬仔鼠 kā 冷凍庫櫼甲 buē 喘氣。

「你敢有遮爾仔愛食魚」我問。

「這魚比小白銀(Sprotten)抑是白銀魚(Hering)閣較好味素」伊講。

逐半年愛轉去齒科複診 ê 齒岸發癀(huat-hông)約 tī 後月日，伊知影四常 ē-tàng 喝無閒貼貼無通仔專車駛我去款魚 ê 日子，tī 我 ê 齒科日是走閃 buē 掉 ê 任務，隨趁這个機會先佔先贏。

照我往時 ê 性地，我 ē 六月蚶，開喙臭 kā 伊臭甲哀爸叫母 hōo 伊交我繼續一个斡倒爿，一个斡正爿 ê 睏破草蓆三領，掠你心肝 buē 著 mā 大丈夫 ê 龍鳳生活。

計畫永遠趕 buē 赴變化。安歇日前一暝交翁頓印仔講「來食鰮仔魚意大利麵」隔轉工目蚶猶瞌瞌隨反僥講「我 ê 胃 kā 我講伊今仔日愛食塗肉林檎。」

「你款 ê 早起頓齊好味素」翁講。

「我無確定我款 ê 糜飯敢攏好味素，總是我知機家己 ê 性地，無興成做獨裁者，像恁阿母」我講。

「你 m̄ 是 Roma 羅姆人 mā m̄ 是𪜶魂舒邊 ê 熊➀ 。」

「無剉(錯)，規欉好好，落塗時八字命，臺灣有國際身份問題，恁兜有獨裁者問題，這兩項結做伙相比並，我比你好字運。」

喙咂一喙 Ka-pi 目借烏仁目鏡 ê 妝娗向窗仔外有淡薄仔黃、淡薄仔青、淡薄仔紅、淡薄仔烏 ê 街路金金相，阿章「我朦朧理解到這世界有些假惺惺的東西被裝飾得外表美麗➀」像一粒金含 tī 捎無摠 ê 金色 Blue 透甜蜜。

「這 m̄ 是妝娗悾闇(khong-am)交別人 ê 囡仔死 buē 了 ê 抾空。」

「那些朽木滔滔飄流，那些漩渦讓人頭暈，那些沙蟲瘋狂跳躍，無數蜉蝣和蟲子死得理所當然，屍體覆蓋在河岸邊一層白。它們不會煩惱道德，它們也不雄辯」阿章 ê 話 tshan-tshiūnn 鸕鶿(lôo-tsî)箍頷 kā 我捎無摠 ê 金色 Blue 伴彼暝你 ê m̄ 捌是我上好 ê 食聲齊送 hōo 無聲無說 mā 無照氣象報告來行 ê 頂晡。

金甲若卵包卵仁 ê 天，換一个角度啉咖啡專工按臺灣紮來德國送我 ê 遇見幾乎換個角度看生活 ê Ka-pi 茶甌，查埔囡仔手插胳頭敧一邊，兩蕊比四跤仔閣較細 ê 目睭 m̄ 知 teh 看啥物，我 ê 頭 mā 開始跟綴伊斜(tshiâ)一邊，本底 ê 光炎炎成做軟晡日斜西。詩人交哲學家多數在田野(tiân-iá)，詩文滿喙邊者多數像玲搪著 ê 華僑➁世界 kan-na 一个角度 。

假仙假觸是妝娗甕肚交悾闇上好 ê 欺瞞，hōo 我嫌伊䆀 ê 白銀魚紫頭菜生菜盤是我硬 bueh 笑伊老猴穿花衫 ê 無四配 ê mā kan-ta ē 曉用一个角看世界。電腦拍開，資料匣子展開，三十外張 ê 相片 buē 閣目睭花花，瓠仔看做菜瓜，笑伊是老猴無粉頭 ê 圓仔花 m̄ 知䆀，大紅花䆀 m̄ 知，像某乜人 kā 家己 ê 自本，別人 ê 生份當做是 Hermann Hess Johann 交 Wolfgang von Goethe 來臭頭包頭巾，防蠅(風神)來看人無目的。講人尻川後話抑是嫌人䆀進前愛節家己 ê 斤兩 --- 翻草 1.。

Tī Google 猶末通知我 ê 資料庫 ē 按亞洲中心徙到歐洲中心 ê Ireland tī 華文推薦讀著一篇真有意思 ê 文章 - 你 tī Starbucks 手機仔隨出現 Starbucks 相關 ê 臆你佮意是 m̄ 是 Google teh kā 你監視？

我 tuì 電子科技無一个認捌 mā m̄ 捌愖過這个問題，讀煞這篇文章我又閣成做貓開始斟酌看家己 ê 手機。

拄按臺灣徙來德國 ê 手機是彼款揤 Google tsiah 有法度揣資料 ê Asus，伊 m̄ 捌出現這个問題，所以當食鹹 mā 掛鹹一个錢拍二十四个結 ê 翁冇手 kā 我換 Nokia 我猶是 m̄ 捌張持這个問題，一直到讀著這篇文章，我 tsiah 斟酌綴 leh 觀察新手機仔 ê 世界。

我已經 buē 記得彼篇文章按怎討論這个問題 mā 無興 uī 伊繼續跍踮 Google 撈魚，總是我非常確定這件代誌 tī Google 猶末通知我 ê 資料庫 ē 徙位進前，我 ê Nokia 捷捷出現華文文章，自收著通知遮 ê 華文文章 m̄ 捌閣出現，準做我猶是逐日固定踅臺灣電子報，Google m̄ 捌「臆我佮意」m̄-koh 有按 YouTube 遐連結推薦，像 ió-gà, Pilates 遮 ê 德文文章推薦，不過 mā m̄ 是齊是遮 ê 文章，推薦百百樣，這 m̄ 知佮我無 teh 使用社群媒體像 Meta 遮 ê 敢有相關？

劉靜娟女仕 tī《落西北雨的下晡》〈無愛予伊知影我咧想啥〉寫著上網路搜揣烘碗機，紲落來踅到佗見到佗，其中寫著 Meta(面冊) hōo 我成做一隻貓，我較無搪著大兄哥 leh kā 你看加加是跟綴 YouTube 生湠 ê 文章交我相借問，這敢是我無 teh 使用社群媒體 ê 關係？