亂皂𥴊仔店 ⓂⒺⒾⓃⓀⒾⓄⓈⓀ

這幾工看《新聞挖挖哇》「35歲乳癌覺醒參悟生死！乳房外科醫師驚覺XX罹癌前兆！「醫師變病友」震撼自白啟發人心！重新定義活著的意義？生與死最短距離！20250530」鄭伃書醫師分張 ê 做一个有路用 ê 人 hōo 我 ê 感受深甲若菲律賓海溝，不過伊已經成做過去，目今 ê 我學習放輕鬆，學習好好交家己鬥陣。起因，無一个有才調感受我 ê 辛苦疼病交彼个 m̄ 知按佗落來 ê 龜怪情緒，像雨落甲連阿菇都求天公伯矣，你莫落矣，gún 翁煞一看氣象報告講佗一日 ē 出日頭就隨講我 bueh 去山區行跤花露營，規身人就心狂火著 ê 気持ち。

這款情緒決定有人 ē 講這是四常 ê 反應，因為你愛伊關心伊驚伊 tī 雨 tsiah 拄停歇 ê 山區 ē 出代誌，總是我敢真正遮爾仔要意這款代誌？論真講，我一屑仔攏無要意，起因我尊存伊 ê 人權交伊 ê 決定。按呢我這个𠢕上童 ê 起性搦地按佗落來，我需要 tī 彼堆挐氅氅 ê 膨紗線搝著線頭，我需要 tī 魔神仔安排 ê 世界家己行出家己 ê 路。

魔神仔按底時行入我 ê 世界，我又閣按怎按討厭魔神仔行入𪜶 ê 形體，我需要交家己恬靜做朋友，好好談一下，這是我目前 ê 工課。

Gún 翁準備出門前一日，翁仔姐做陣食下昏飯「氣象報告講明仔載出大日頭，按呢我差不多 6 點就 bueh 出門」，uī-tio̍h 伊 ê 交代「請你 kā 我鬥款早起頓，我食飯飽 tsiah bueh 出門」透早專工出門 uī 伊款 gún 品好 ê 生冷菜蔬像瓜仔哖、櫻桃菜頭、羅馬萵仔菜這類交伊做陣食飯頓我 tsiah-ē 攢 ê 生食菜蔬，Tsa̋ng 暝交代 ê 任務，今仔日隨拊掉，正港是暗頭仔食西瓜，半暝仔反症。 腹內 ê 電石敢若有水珠 tī 滴，緊 kā 濆水 ê 開關禁掉「我 m̄ 是勥母，我 m̄ 是勥爸，我 m̄ 是𪜶兜 ê 人，m̄-koh 𪜶兜不三時愛上童交隨時反症 ê 慣勢已經造成我 ê 困擾，我需要解決，我需要解決。」

「敢 buē 使得食飯飽 tsiah 出門？」本底按算講「無問題」kā 這个起毛䆀拊掉，一想著拊掉 ê 問題宛然桌頂 ê 白紙，m̄ 管拭仔拭過幾斗白紙寫過字 ê 痕跡猶原有才調復原，像斷尾 ê 蟮尪仔後回再相見伊 ê 尾溜猶原健欉，莫閣轉彎踅角踅玲瓏，開門見山。

Kā 家己呵咾，家庭煮婦看俗物，無買 ē 克虧。

眼睛金金相，心內算盤斟酌擉。

跤步踏 hōo 在，一 tâu 十八仔。

十八、十八、十八...那買那唸，我絕對無俗物食破家。

我是俗物𠢕拑家。

翁按公共無料書櫥紮兩本食譜冊轉來隨反來揣 Muse。

「這本齊是甜粅粅 ê 食譜會使得送伊轉去書櫥 hōo 伊交別 ê 人結緣」我知機翁 ê 企圖，總是甜粅粅 tuì 我無路，自然 buē hōo 伊向望成做我 ê 無閒。

愛食甜粅粅 ê 伊 uī-tio̍h bueh hōo 牽手 uī 伊無閒，下性命褒嗦牽手 ê 好手路，總是牽手交𪜶 ê 樂聖 Warum Beethoven Taub wurde 𫝛款一聽著無意愛 ê 事項隨聽無半點聲。

「若是 gún 阿母隨款一份來做...」

「請。」

記持 buē 食餌，不而過厚突突 ê 喋詳 m̄ 捌收水，2022 ê 記錄 kan-ta 簡單好味素！

M̄ 知影扞鼎 ê 阿母交阿姊敢有我這款症頭，下昏飯猶未軁嚨喉空，腦髓(náu-tshé)已經孜孜愖明仔載 ê 早起頓愛款啥來食。我 m̄ 知影這个食癖是自囡仔就栽欉抑是我自來就迎新棄舊，和尚划船無髮(法)度一項物熥 buē 離？𠊎毋知，je ne sais pas，總是這个食癖猶是好過一粒粿餾二千一百九十擺，一甲子餾...我 m̄ 敢閣算落去。

沉島傳說前幾工聽 YouTube 紹介 ê 節目講臺灣 tī 烏露戰爭 kā 通貨膨脹扞甲在在穩穩無起海湧 hōo 我 ê 感受是沈到菲律賓海溝。掠做順河溪行向 Belén 伯利恆 ê 三國王賜眾生平安喜樂 ê 新正過後，德國 ê 物價 ē 沓沓仔恢復年節前 ê 面肉，結果代誌 m̄ 是戇人我想 ê 遐爾仔簡單兼樂觀，豬挽肉按年節前一公斤 3€ 起甲 6€ kiōng-bueh 雙倍，本底無啥人愛 bué ê 雞摸雞鼓箸 mā 一公斤起 1€ hōo 我認真思考規氣跟綴阿姨 ê 跤步成做食菜人，押尾猶原決定成做無慧根之人，菜蔬比肉閣較漲懸價，像著時 ê 兔仔耳按 0.99€ 起甲 1.59€，特價 1.49€ 閣紹介伊是大落價。

我 m̄ 捌行過臺灣錢變薄 ê 4 萬台票換 1 箍新台票 ê 日子，總是烏露戰爭 hōo 我感受家己若行入德國威瑪共和國年間。按呢講德國通貨膨脹是一分田嗙甲幾若甲，總是萬物齊鞏金唯一民生食食無鞏金 ê 德國，自烏露戰爭開始，𪜶 ê 物價 tshan-tshiūnn 心電圖仝款，按規律直接衝懸，以包裝妝娗無起價 ê 唬秤頭。

茶鈷呻遐久我 mā 理解遮 ê 問題 99.99 受烏露戰爭 ê 影響，總是自豬災出現，豬肉 m̄ 捌落價顛倒起價，這是 teh 搬佗一齣戲？特別是豬災一確定 kā 德國進口牛豬肉 ê 國家 mā 隨通知退訂單 hōo 罕得出現 tī 鏡頭 ê 農業部長頭殼𢯾 leh 燒安搭牛豬農 ê 驚惶「有政府，有安心」牛豬肉猶原若飛天車逐禮拜向天衝衝衝，雞肉 mā 是 hōo 我沓沓仔行向巧新婦，無米煮無飯。