「等你 80 歲記持猶原 ē 食餌，我包領你看著伊你隨泅去咱 tī 西元佗一年來 Mikołaj Kopernik 哥白尼 ê 家鄉行跤花」當我猶 teh 請花 kā 我鬥出主意，尻脊後真正出錢 ê 錢出主意並指這仙有掛喙罨 ê Printenmann 人模仔印。
出錢 ê 人已經主意，我這个無功不受祿 ê 人哪通無好喙水「God bless us, my lord➀。」
「我已經揣著我 ê 天佮主人」出錢 ê 人揹仔搝一下，學驢仔叫。
感謝 Shrek hōo 鈍喙成做喙花。
➀ Good bless us, everyone，Shrek 史瑞克
市政廳 Rathaus
往過 ê Thron 目今 ê Toruń 是 Kulmerland 庫爾默蘭地區年資上懸 ê 城市，因為徛位重要，伊成做德國交波蘭重要 ê 三河之城➁。
Toruń 托倫上出名 ê 出名人 mā 影響後輩天文科學 ê Mikołaj Kopernik 哥白尼。Toruń ê 城市建築以紅磚做主體，舊城光景保持中世紀面肉成做聯合國世界文化遺產之一。
逐冬無走一逝遠門就是落面代敢若是德國人 ê 傳統，按 Malta 馬爾他行跤花轉來，確定明年按算 ê 行跤花受歐盟著災新政策 hōo 伊無法度田螺循舊逝，較行 mā 彼逝 ê 翁成做 Gá-suh 爐頂 ê 茶鈷呻 buē 離，並想空想縫按怎突破防疫檢查政策 hōo 伊 ē-tàng 繼續循舊逝轉來交朋友風神。
疫情期間 mā m̄ 是 gún 翁有這个病症，伊 tsuē-tsuē 四常無愛出門行跤花 ê 朋友 tī 這段時間 mā 骨力出門行跤花，像有人講一世人 buē 迒過柏林圍牆範圍，Covid-19 hōo 伊無料洗面，洗甲清氣啖啖。
咱臺灣就一个島，四面齊海，囡仔時連去海邊仔攏愛斟酌繩看板 ê 我 tuì 這段因為九月颱，無人知 ê 疫情無法度成做田螺循舊逝，較行 mā 彼逝無意見，畢竟命 kan-ta 一條，不過著災時間有法度 kā 日子過甲若四常是一件僫得 ê 幸福。
2021 翁講出入捷克需要線頂申請，2022 翁講出入波蘭喙罨款 hōo 齊就大丈夫，德文是伊 ê 專門科，伊按怎講我按怎綴，像這逝行尞，我 kan-ta 負責 kā 伊交代 ê 防疫用品攢好勢並照伊 ê 分張出入波蘭店頭交民宿。
➁ 德國南爿城市 Passau 帕紹，因河(Inn)交伊爾茨河(Ilz) tī 遮做陣流入多瑙河(Donau)，號做三河之城 --- 融合 。
Toruń 有啥特別？
照慣勢，先請 Google 大神賜我智慧，總是一搪著若狗蟻 ê 文字，我就若和尚划船，無髮(法)度有彼个耐性讀落去。我佮意交樹皮談戀愛 ê 文字。
「遮是 Mikołaj Kopernik 哥白尼 ê 家鄉是按怎無見著伊人」我手指頭前彼隻交 Juliet 茱麗葉無宛 2 體 ê 驢仔講。
「Mikołaj Kopernik 哥白尼交 Pope John Paul II the Great 若望保祿二世相𫝛，只要伊摸過也是經過 ê 所在齊有伊 ê 人」Toruń 是重要觀光景區，自然有無料網路通 hőng 頓卡，翁若講若順網路羅經揣方位。
「這位先生，借問伊是 tsiâ」我刁意故按 F 調(F-Schlüssel)換做 G 調(G-Schlüssel)，本底全心全意跟綴網路羅經徙位 ê 人總算理解牽手 ê 機關安 tī 倉庫，m̄ 敢繼續豬母牽去牛墟，清彩烏白應。
「《Tischchen deck dich, Goldesel und Knüppel aus dem Sack》金色 ê 驢仔 ē 生錢➂。」
「我來請伊生錢，你去解你 ê 網路毒」頭一斡行向驢仔笑甲痚呴講「我 m̄ 是浪溜浪蔫討食 m̄ 討趁 ê 人，m̄-koh 我向望你 kā 你獨門工夫傳 hōo gún 兜彼隻驢 hōo 伊成做我個人 ê ATM。」
聽著錢本底重聽隨做順風耳 ê 羅經取經人越頭大聲笑講「這是違法 ê 搧腹肚邊。」
➂ 格林童話《按麻布袋仔來 ê 桌仔，金色驢仔交棍仔》：Tuì 驢仔喝「Bricklebrit 吐磚仔」驢仔喙抑是尻川斗隨吐錢，說一句「Tischchen, deck dich 桌仔崁家己」" 桌仔隨滿桌山珍海味。Bricklebrit 是一句 Zauberwort 魔法辭，無特別意義，筆者 tī 遮取交英文相𫝛 ê Brick 磚來表示錢。
波蘭 ê 面容 tuì 低路人我來講交德國無宛 2 體分 buē 清 tsiâ 是 tsiâ，我 ê 14 是 kan-ta 看建築，我 ē 掠做家己猶 tī 德國。
西元 9 ~ 13 世紀，遮屬波蘭王國，遮徛一座順 Wisła 維斯瓦河 Weichsel 起造 ê 柴枋堡寨號做 Festung Toruń。Tī 這段期間 996 ~ 1220 年波蘭王國分裂做 polnisch-piastenpommerschen Danziger Pommern 波蘭 - 帕斯特波美拉尼亞 但澤 - 波美拉尼亞。
Thorn 這个城市名稱是德國條頓騎士團 tī 1231 年 tī Kulmerland 庫爾默蘭地區設立 ê 第一个管區。
Toruń 現此時 ê 舊城 m̄ 是伊上原始 ê 徛地，自箍地到建城 Toruń 一直受大水影響，自 1236 扞權 ê 德國條頓騎士團 kā 伊向西徙 7.5 公里，成做目今 ê 舊城。
德國條頓騎士團 kā 權利徙到 Toruń，主要是扞權 ê 波蘭貴族請𪜶入城 kā 𪜶鬥相共 kā 波羅的海異教徒受洗成做基督教徒。
順歷史讀歷史，低路人智識無實腹，總是讀到這段想著中國歷史有明朝吳三桂，圖博歷史有平措汪傑，凡事支厘(tsi-lî) ê 德國敢有可能無料鬥相共，那看眼前 ê 城市面肉，那請條頓騎士後代賜我智慧，西班牙歷史比德國歷史閣較實櫼 ê 後代講「毋知」結束我 tuì 伊 ê 請教。
按呢 mā 好 hōo 我無機會想空想縫窒千錯萬錯攏是別人 ê m̄ 著，攏是別人做假數目，m̄ 是我乞食攑蠓捽仔，假仙假觸，像𪜶老母，掠做 ē 曉講通用德語就是智識份子。
「恁老母愛交恁交換條件，恁 tsiah bueh 食伊攢 ê 飯頓，恁祖先 mā 相𫝛，愛我鬥相共無問題，條件是土地愛讓渡(jiōng-tōo)」無料分享，結束。
1226 德國皇帝 Friedrich II. 腓德烈二世得著波蘭貴族 ê 保證，這塊土地開始生湠德國交波蘭百外冬 ê 大麵炒圓仔 ê 膏膏纏。
1231 遮開始出現目今真僫劃線 m̄-koh 齊順 NRW 北萊茵.西發里亞州做大概 ê Westfalen 西發里亞移民，1233 tī Kulmer Handfeste 庫默爾.漢德節得著城市權利。
伊交 Chełmno 海烏姆諾是庫默爾蘭地區(Kulmerland)上老 ê 城市。
1255 年進前 Thorn 無圍牆，1260 年德國條頓騎士團順柴杙疊磚起圍牆交建城堡，就此 ê 百外冬 Toruń 成做 Thorn mā 成做十字軍重要徛地 Thoren➃。
➃ 德國條頓騎士團記錄 tī 建城文件 ê 城市名號
14 世紀 Toruń 交東海➄城市像 Danzig/Gdańsk 遮 ê 城市成做彼當時上大 ê 貿易聯盟 - Hansestadt 漢薩城市 mā 號做漢薩聯盟。
總是，人心肝，牛腹肚，準做條頓騎士已經得著上交易 ê 市草，領土 mā 不斷增加，𪜶猶原棄嫌遮 ê 山珍海味白汫無味無鹹無纖，繼續要求閣較 tsuē ê 領土。𪜶 ê 貪心 m̄ 是無人反抗，𪜶 ê 貪心 mā buē 因為仝源仝宗得著支持，𪜶 tuì 一帶一路 ê 痴迷成做哽死家己 ê 刺，波蘭交其他德國聯邦聯合交𪜶反抗。
1411 年條頓騎士團交波蘭國王簽訂第一斗和平和約，1454 年 hōo 普魯士聯邦(Preußischer Bund➅)毁掉，規个城市成做斷籬倒壁。
但澤城市戰爭結束，1466 年 Toruń 交條頓騎士團簽第二斗和平和約，紲落來條頓騎士團 tī Toruń ê 領土讓渡 hōo 自願成做波蘭王國自治公國 ê 普魯仕。Toruń, Danzig 但澤交 Elbing 艾布隆格本底是條頓騎士團 ê 領土齊成做波蘭普魯仕共和國 ê 一部份，並成做條頓騎漢薩聯盟主要 ê 隔壁厝邊，tī Sejm 塞伊姆➆設有代表。
歷史正經是 m̄ 捌以相𫝛 ê 面肉出現，不過不斷輪迴巡演。
➄ 德語 Ostsee，華語波羅的海
➅ Uī-tio̍h 交條頓騎士遏手把所成立 ê 聯邦。
➆ 波蘭 - 立陶宛聯邦(14 ~ 18 世紀)
1521.4.5 最後一斗騎士戰爭(Reiterkrieg, 1519 ~1521)Toruń 捌暫時因為按 Brandenburg-Ansbach 布蘭登堡-安斯巴赫來 ê 條頓騎士大團長(Hochmeister) Albrecht 成做 Thron。
Toruń 交 Danzig 但澤交 Elbing 艾布隆格相𫝛行過大北方戰爭(1700 ~ 1721)，規个城市成做斷籬倒壁，紲落來成做德國人喙內 ê 一塊肉。
1793 年 Toruń 成做 Thron，扞權者按德國條頓騎士團轉做 Königreich Preußen 普魯仕王國。
4 冬外前 Google 引𤆬我讀「柏林，在那裡（一）：「Berlin」這個名不太像德語，為甚麼？」hōo 我想著德國有 tsuē-tsuē 字姓誠無德國氣味 ê ski 抑是 sky，像 Lukas Josef Podolski➇, Claus Weselsky➈。
這久巡田園，翻田園跟綴豆菜學歷史，我總算理解南德朋友講 ê Wir können alles. Außer Hochdeutsch. Gún 啥物攏 ē 曉，唯獨通用德語➈交周全老師翻譯 ê Sebastian Haffner 作品。
普魯士是一個神話。對某些人來說，它的名字代表著秩序、正直與寬容；對其他人來說，它卻集軍國主義與反動作風於一身。身為普魯士人的塞巴斯提安．哈夫納現在拋開舊有的傳說，娓娓道出這個國家的歷史──它僅僅以獨立國的身分存在了一百七十年。
哈夫納解釋了普魯士的特殊之處，表明它是一個人工化的產物：普魯士需要極度強烈的自保意志，才得以將分散各地的國土凝聚成一個相互連貫的整體。在數百年的演進過程當中，普魯士是由民情迥異的德意志與斯拉夫殖民地區共同生長而成，缺乏共通的血源或宗教基礎、沒有天然的疆界，以致它只能說是一個「理性國家」。廉潔的政府以及對宗教的寬容，使得普魯士成為十八世紀歐洲最現代化的國家。它的危機閞始於法國大革命，它在建立德意志帝國之後陷入緩慢的死亡，國家社會主義則促成普魯士的毀滅。
---《不含傳說的普魯仕》
➇ 原藉波蘭，目今是德國人 ê 跤球選手。取伊做比如，主要因端是 tsuē-tsuē 有 Ski ê 字姓，我 kan-ta ē 記得伊 ê 字姓。
➈ Claus Weselsky 德國鐵路工會 ê 領導者。2024 德鐵以罷工爭取權利成功，伊是上主要 ê 孔明。
➈ Hochdeutsch 是一个交臺灣 kā 華語講做國語 ê 政策。Gún 翁受爸母影響，放棄家己 ê 舌，所致伊慣勢講 Hochdeutsch。我 ê 朋友 buē kā 這个語言講做 Hochdeutsch，𪜶 ē 講北爿德語。目今 ê 德國較捷講 Standard deutsch。我個人慣稱德國講 ê 德語是通用德語，因為這个系統 tī 奧地利、瑞士、Liechtenstein、義大利 Südtirol 提洛爾等講德語 ê 角勢齊通行，準做你 buē 曉當地德語。
1807 年 Thron 因為 Napoleon Bonaparte 拿破崙成做 Herzogtum Warschau 華沙公國，波蘭 ê 領土。
1813 年 Preußen 普魯仕交露西亞聯手 kā Toruń 閣轉做 Thron，並劃入 westpreußischen 西普魯仕地區並跟綴工業革命鐡路建設行入新 ê 經濟市草。
歐戰(1914 ~ 1918)結束，Deutsches Reich 德意志帝國戰敗，由美國領導 ê Versailler Vertrags 凡爾賽條約，包括 Thron 在內 ê 西普魯仕地區齊劃入 die Zweite Polnische Republik 波蘭第二共和國，並設定 Polnischen Korridors 波蘭走廊，並 tī 這段期間成做波蘭第二共和國 Woiwodschaft Pommerellen (1919–1939)濱海(pin-hái)省 ê 首都。
Tī 這段期間 Toruń 恢復伊本底 ê 交易佮鬧熱 mā 開始實施波蘭化。
1939 年德國第三帝國 kā 戰車駛入 Toruń 並 kā 伊交西普魯仕地區齊劃入新設立 ê Danzig-Westpreußen 但澤西普魯仕地區，紲落來 ê 歷史走向就是咱這个世代上認捌 ê 德國烏暗史佮波蘭話猶未講透機，目屎已經掰 buē 離 ê 歷史。
Tī 戰爭內底，無一个人是勝利者。二戰結束，跟綴頭人徙岫到新世界開墾 ê 德國人 mā 成做話猶未講透機，目屎已經掰 buē 離其中一个族群。
Tī 德國猶原是扞權者，𪜶是 gún-ê 親情。Tī 德國拆做東德交西德，𪜶 m̄ 是 gún-ê 親情，伊是外國人，一个 bueh 轉來德國搶 gún 資源 ê 人。
我出世 tī 美麗 ê Posen 波森，目今 ê Poznań 波茲南，我需要 kā 家己成做東德人 tsiah 有法度成做西德人。
遮是我出世 ê 所在，遮是我生湠 ê 所在，當我回歸祖國並投入藍領階層，我 ê 薪水交德國人無相𫝛，因為𪜶講我是波蘭人。
我 m̄ 知影德國按怎教育𪜶 ê 後輩，總是當德國序大一聽 gún 芋仔爸是一路按東南亞踅來到臺灣，行過相𫝛歷史 ê 𪜶開始成做我課本 m̄ 捌讀過 ê 智識。
市政廳 Rathaus + 郵便總局 Hauptpost
1997 年 Toruń 成做聯合國世界文化遺產成員，伊受選 ê 因由除了規个舊城保留完整 ê 中世紀建築 mā 保留 19 世紀街路面容。
起 tī 13 世紀，按哥德紅磚建築行過 400 外冬歷史，tī 18 世紀跟綴斯當時上時行 ê 建築風格轉型做 Barock 巴洛克建築 ê Toruń 市政廳交郵便總局是舊城上大並上顯目 ê 建築。
伊交 tsuē-tsuē 行過大北方戰爭 ê 城市𫝛款，tsuē-tsuē 重要文件 tī 這段期間 hōo 瑞典燒甲 kiōng-bueh 無見半項，特別是 Mikołaj Kopernik ê 天文研究交伊 ê 生平事件記錄。
寫著瑞典，我開始懷疑我 tī 瑞典行跤花是假包旅行，tī 以橋做敆榫 ê Stockholm 斯德哥爾摩一間博物館攏無行踏，這一定是 ABBA 害--ê。
這座目今媠 tang-tang ê 市政廳，tī 1722 年進前因為戰爭交瘟神行踏 hōo 伊連散凶甲厝頂都揣無資金通修理。目今見著 ê 建築 m̄ 是原始面肉，不過伊 mā 無整形甲 hōo 爸母見著伊 m̄ 知伊是 Tsiâ。
遮是 Mikołaj Kopernik ê 家鄉，伊 ê 銅像 mā 徛位 tī 遮。
Toruń 除了 Mikołaj Kopernik 猶有一个頂港有名聲，下港上出聲 ê Thoner Lebkuchen, Thoner Honigkuchen, Toruńskie pierniki ê 芳料雞卵糕➉。
Thoner Lebkuchen 上早出現 ê 文字記錄 1380，根據遮 ê 文件推測，伊應當是 13 世紀條頓騎士團 kā 伊按家鄉𤆬來 Toruń 生湠，起因 Lebkuchen 這个辭已經出現 tī 13 世紀 ê 中古高地德語，彼陣號做 lebekuoche, lebkuoche。這兩个辭敢是 Lebkuchen 自來 ê 字辭，無法度確定，不過推測伊凡勢是按修道院 ê lībum(中世紀拉丁語) Fladen 平、扁轉化，mā 有可能是 Leip 目今 ê Laib, Brot 麭結合做伙成做 Fladenkuchen 平扁 ê 雞卵糕，抑是麭雞卵糕。德國有一款雞卵糕號做 Apfelbrot 林檎麭，伊 m̄ 是麭是雞卵糕。
➉ Google 請教來 ê 翻譯齊跟綴英語 Gingerbread kā 伊翻譯做薑餅，我個人是順德文原意翻譯做芳料餅 --- Lebkuchen ist ein süßes, kräftig gewürztes und haltbares Gebäck 芳料餅是一款甜粅粅，厚厚芳料交 ē-tàng 長時間保存 ê 甜路。Kuchen = 雞卵糕。
條頓騎士 ê Lebkuchen 成做 Thoner Lebkuchen 推測是 Nonnenkloster Thorn 托倫修女修院道 ê Kathrinchen 凱瑟琳修女創立。
傳統上，芳料雞卵糕是逐年 11 月 25 Heiligen Katharina von Alexandria 聖凱瑟琳節 tsiah 開始做餅。17 ~ 18 世紀本底無造型 ê 芳料雞卵糕開始以波蘭國王 ê 外型出現，並成做上市草交易 ê 主角。
1763 年生理人 Johann Wees kā 伊按年節餅類升格做四季齊有通享受 ê 甜粅粅。
芳料雞卵糕 tī 20 世紀進前，有一項傳統，彼就是私奇無外傳，單傳家己人，爸傳囝，囝傳後生。
我個人無愛甜粅粅，相片 bué ê 芳料雞卵糕 mā 捎無一个寮仔門，𪜶有啥物特別，總是循資料分類家己 tī 聖誕節較捷 bué ê 芳料草雞卵糕 tī 波蘭語號做 Katarzynki 德語號做 Nürnberger Lebkuchen 抑是 Aachener Printen，無包餡 kan-ta 淋招閣禮篤。
God bless us, everyone ê Printenmann 人模仔印 tī 波蘭語號做 Pierniki figuralne。
另外一个淋糖霜交包餡抑是無 ê 外型是圓形抑是心形各類造型 ê Lebkuchen tī 波蘭語號做 Pierniki glazurowane。
Pierniki figuralne mā 有另外一个外型，你掠伊是麭，伊窮實 m̄ 是麭 ê 焦甲無配十杯 Ka-pi 交無抺寡厚甲若《邦查女孩》厚度 ê 果子醬抑是 Bá-tah buē 挃 ê Gebildbrot 有造型 ê 麭(照字面翻譯)。
其實，Lebkuchen 自本就是 uī-tio̍h 保存糧草所生湠 ê 無卵雞卵糕，所致我 ê 哭呻是無聊 ê 喙白。
杯仔雞卵糕造型 ê 芳料雞卵糕
行踏 Toruń 進前，我 m̄ 知伊有頂港有名聲，下港上出名 ê 芳料雞卵糕。
總是佮意芳料 ê 我，一鼻著若咱五香粉 ê 芳味隨成做熊，順伊 ê 氣味三步做一步伐過，然後 hōo 德國驢仔實踐伊疼某 ê 方式。
外型若 Frühstückskuchen 德國早起頓雞卵糕 ê 芳料草雞卵糕
德國早起頓雞卵糕是一款以烏麥仔做 ê 雞卵糕，目今 ê 伊真僫揣，主要因由是伊 ê 甜度無敆德國人目今 ê 標準。
波蘭甜路 tuì 我來講 mā 沓沓仔行向這个方向，愈來愈甜。不過，人 tī Toruń 搪著 ê 芳料雞卵糕猶原保持傳統 ê 狗蟻無 hōo 伊驚死 m̄-koh 徛遠遠。
Gún 翁嫌遮 ê 芳料雞卵糕，甜度無夠，芳料傷厚，無敆喙。
喬治亞蘑菇挽肉麭
波蘭有 tsuē-tsuē 烏克蘭人交喬治亞人，遮 ê 住民成做我探索新世界 ê 好所在。
這斗行踏 Toruń 當我成做 Gá-suh 爐頂 ê 茶鈷呻講呔無烏克蘭抑是喬治亞食物通揣，一个若囡仔時 ê 水煎包氣味雄雄趖來鼻空，我隨 kā Gá-suh 捘掉斡頭綴這个氣味行。
一个媽媽抱一个幼嬰仔交人講話，我雙目順幼嬰仔手頭 ê 麭金金相，相甲幼嬰仔歹勢軁入去媽媽 ê 肩胛頭，媽媽順幼嬰仔 ê 動作看發生啥物代誌隨理解有一个枵饞鬼 teh 相𪜶囝 ê 麭，手隨擛表示麭 tī 遮 bué。
我順幼嬰仔媽媽 ê 手行入無看板 ê 麭店，哦，就是這个味，厚厚 ê Bá-tah 敆一層鹹芳。
洋蔥挽肉麭
我徛壁角附近斟酌繩玻璃櫃仔內 ê 麭，總是彼麭猶有燒氣 hōo 我無確定，彼麭敢有 teh 賣，畢竟 bué 麭 ê 人敢若攏注文好勢，𪜶 ê 麭 buē 衝水煙。
幼嬰仔媽媽敢若發現我 ê 考慮隨講「遮 ê 麭愛燒燒食」紲落來一个一个紹介。
「我窮實已經食飽矣，m̄-koh 伊 ê 芳味 hōo 我想著家鄉 ê 氣味，敢 ē-tàng 請你紹介我一兩項上有銷路 ê 好味素？」
幼嬰仔媽媽隨手指囝仔手頭 ê 麭蘑菇挽肉麭，我順伊 ê 推薦點一粒蘑菇挽肉麭，紲落來順店東 ê 推薦點一粒洋蔥挽肉麭，這兩味喉韻到今猶原無法度敨放，美味しい。
行轉去停車場見著這看板，gún 翁講「這是抗議抑是提醒自由 m̄ 是遮爾仔簡單就通仔得著？」
「你確定遮 ê 自由敢是真正 ê 自由？」我講。
栽欉 --- 2021.09.02
翻田塗 --- 2025.02.13
留言列表
冊 ▪ Bücher ▪ Books (4)
