亂皂𥴊仔店 ⓂⒺⒾⓃⓀⒾⓄⓈⓀ

夏目漱石(Natsume Sōseki) ê 人生3部曲總算讀煞。

講總算 buē-su 伊 ê 作品真僫讀，事實卻 m̄ 是按呢。

是我一直掠做這本猶未讀 ê 冊 mā hōo 我 tī 2018 kā 紮轉去臺灣。

疫情進前，準做踮臺灣已經四邊無一倚，我原仔 ē 轉去臺灣行行看看。

轉去 ê 時 mā 真慣勢 kā tī 遮 bué ê 物件紮轉去臺灣，相𫝛 ê 態度我 mā 真慣勢 kā 按臺灣紮來遮 ê 冊閣紮轉去。

起因，我真清楚有一日我原仔愛轉去臺灣，sóo-tí 就真慣勢 kā 家己 ê 物件一項一項款轉去囥。

2019 疫情開始湠，我這野生紅鰱魚無法度繼續往擺 ê 回泅，總是日子原仔愛過 buē-tàng 因為看 buē 著 ê 敵人就來改變家己 ê 慣勢。

Sòo-pái 冊原仔照常 bué 照常讀，總是冊 buē-tàng 食入腹，一日看伊疊甲若燒好 ê 紅磚仔按呢烏白囥 tsiah 發覺家己 ê 貧惰又閣夯起來，隨緊 kā 四散 tī 紙箱仔佮膨椅 ê 冊緟(thōng)整理做緟冊囥冊櫥，《門》就是 tī 四散甲 buē-su 遮 ê 抾字紙清彩疊紙箱 ê 冊緟揣著。

講著這 mā 好耍，我 m̄ 知是 gún 翁 hōo 我感覺遮 m̄ 是我 ê 所在，sòo-pái 我 buē 要求伊愛撨一个所在 hōo 我，抑是我自本就認為遮 m̄ 是我 ê 所在。

這个問題 tī 猶未搪著《門》進前 m̄ 捌愖過，搪著《門》隨想著這件代誌 m̄-koh 無興趣斟酌 kā 愖就家己貼金箔認為，我 tī 遮 ê 四常 tshan-tshiūnn 坂井認為 ê 宗助按呢無慾無求 ê 超然自在。

不而過，我正經是無慾無求 m̄ 是 tshan-tshiūnn 宗助佮阿米按呢，表現無慾無求。

既然無慾無求是按怎 ē 寫甲一大トラック？

我家己 mā 無啥確定，總是揣著這本冊 mā 讀煞，宗助聽著安井 ê 代誌 mā hōo 我搜揣家己 ê 平靜敢是誠實 ê 平靜。

我除了有一个翁猶閣有啥？

是，每一个翁仔某攏有家己 ê 問題，每一个翁仔某攏 ē 搪著 m̄ 願放手 ê 父母佮 hōo 爸母箍牢 ê 性地。

Gún 翁無 hōo 𪜶爸母箍牢 m̄-koh 性地卻種著𪜶爸母 ê 䆀。

這件代誌我敢 m̄ 知？

當然 mā 是知甲若一杯滾水遐爾仔清遐爾仔透，總是每一个人有家己 ê 軟汫佮 ē 敆逝 ê 處理方式。

簡單一句，gún 有法度按結婚平和行到今，早前 ê 過冬鳥生活幫贊真大。

另外，現此時 ê 我 mā buē 閣纏綴伊踅金龜磨。

起因，本底猶 ē 綴伊成做有孝 ê 囡仔 tī 伊佮𪜶爸母合手 kā gún 四个人攏講好勢特別是我 ê 需求擲 tī 糞埽桶彼時開始，我佮𪜶爸母就隨人付米，隨人落鼎，田無溝，水無流 ê 清楚明白。

不過，gún 翁按𪜶爸母遐種過來 ê 歹癖是讀這本冊進前我 m̄ 捌想過 ê 問題。

M̄ 是講家己 m̄ 捌處理這个問題，總是宗助佮阿米 ê 故事引𤆬我重新思考家己 ê 態度 mā 引𤆬我敨放 buē 掉 ê 比阿清閣較四角磚踏無一角著➀ê 齷齪。

我 uī-tio̍h 家己 ê 驚惶成做阿米，搪著榫頭榫空 buē 敆榫隨 kā 假做這著是愛，按呢 gún 就 buē 冤家量債。

另外，我 mā-ē tuì 家己講，我 tuì 按別人湠到 gún 遮 ê 問題 mā 講甲𤺪，huînn-ti̍t 若是猶閣有法度接受就按呢 kā 準過。

總是我 m̄ 是宗助 mā m̄ 是阿米，問題猶原若海湧一波閣一波倚過來 hōo 我餾 buē 離，認捌這个問題，我知影這粒瘤無 kā 提掉 buē 使得，我愛面對問題 m̄ 是選擇行入空門揣新 ê 門 hōo gún 繼續逐个門攏相𫝛 ê 日子。

人生3部曲，按《三四郎》讀甲足食力到沓沓仔較無遐爾仔食力 ê《後來的事》到這本5冬後 tsiah 接觸 ê《門》，這个過程 mā tshan-tshiūnn 我 ê 人生三部曲。

頭前兩本讀甲食力，換這本已經有法度輕鬆自在閣 m̄ 免繼續熥清飯佮 nachmachen、imitate 模擬(bôo-gí)宗助佮阿米 ê 四常，我想我有開悟見性。

另外，m̄ 知是 m̄ 是開悟見性，我感覺《門》是這 3 部曲內底讀起來上輕鬆閣趣味 ê 一本。

➀這句俗語的意思是講根本都無好空的，嘛無偏頭，更加分無分公餅(pun-kong-piánn)，嘛用來形容關係誠生疏，閣較按怎都無法度佮人攀親閣牽戚tshik。

《門》

もん/Mon von 夏目漱石

譯者：章蓓蕾

㊓ 麥田出版

㊑ 諾貝爾