亂皂𥴊仔店 ⓂⒺⒾⓃⓀⒾⓄⓈⓀ

有當時我會按呢想，德國 ê 自省教育敢正經有應效?

起因，搪著 ê 人無分年歲抑是階級，𪜶若是認為你是低路人，就使𪜶 mā 無幾支毛通品並，𪜶 mā 猶是有法度 kā 豬屎籃仔提出來品並。

Tshan-tshiūnn 彼日按呢，一个德國人大大典典 tī gún 遮 ê 人客目頭前 īng 懸目看 tsham 伊相𫝛攏是仝階級 ê 義大利人殕殕。

我 ê 語言無分佗一路攏低路，我無法度 kā 義大利朋友鬥贊聲，其他 tsham 我相𫝛攏 m̄ 捌 tī 遮食過頓➀ ê 朋友，gún 逐家攏成做無氣味無色水 ê Bach➁ 按眼前 ê 溪划過，不而過我知影 Bach ē 揣--著 ê 溪流 ê 出口。

起因，逐家攏知影按怎引𤆬脹膿 ê 人去看醫生，在水 buē hōo 家己穢著 tshan-tshiūnn 翁公司 ê 少年查某囡仔，無佮意 D ê 大嚨空隨投去總公司，總公司隨派人來調查頭尾。

論真講，我家己 mā 真無佮意這个德國人，總是四常 buē 佮伊接接 kan-ta tī 櫃檯算數 tsiah-ē 搪著伊，而且機會 mā 無 tsuē。

若誠實無拄好 hōo 我搪著，只要伊莫目睭囥到天頂，喙閣呸臭溝仔水我攏 buē 要意，起因每一个人攏有家己專屬 ê 紅蟲 ê 紅龜➂，這塊生蟲 ê 紅龜 m̄ 管生偌 tsuē 蟲，攏愛接受上帝公 ê 賞罰，sòo-pái 我這个平凡老百姓搪著 tsham 我無仝型 ê 龜怪，只要伊莫刁工來相觸抑是為非糝做，m̄ 管伊人偌臭攏大丈夫。

起因德國就有法度接受 AFD，我這款𠢕乞食攑蠓捽仔➃捷捷 kā Rosa Luxemburg ê 金句 Freiheit ist immer die Freiheit der Andersdenkenden➄ 掛 tī 喙角 ê 人呔 ē-tàng 輸 hōo 德國。

我 m̄ 知影彼日 ê 發展，總是有機會閣搪著這个人，我感受伊 buē 閣遐爾仔 Afd ê「德國是德國人-- ê」，伊開始 tuì gún 遮 ê 比義大利人看起來閣較無相𫝛 ê 人挨拶(あいさつ/aisatsu) 這个熱情 ê 人人攏相仝生張 ê 相借問 ē-tàng 維持偌久，我家己 mā 真好奇。

彼个德語講甲若母語 ê 義大利朋友 mā 自彼日 ê 生頭清面又閣踅轉去耳戴一蕊招牌 ê 燈仔花喙笑目笑佮 gún 遮 ê kan-tann tsham 伊 tī 這條溪相拄 ê 人客挨拶。

德國 ê 歷史 m̄ 是 kan-tann 德國一个民族，德國發生過 ê 代誌 mā m̄ 是過了代 m̄ 免閣要意。

總是，當我讀這本冊我攏 ē 想著 tsham 赫爾米醫生相𫝛 ê 波蘭籍 ê 外科 S醫生佮原籍埃及 tī 德國娶某生囝開業 mā 成做德國人 ê 齒科醫生佮伊 ê 工作人員。

Gún 攏是 Ronen Steinke 筆花內底 ê 主角，只是無相𫝛 ê 年間𤆬 hōo gún 無相𫝛 ê 安定。

總是遮 ê 安定敢是遮爾仔輕可得著，我知影答案在水 m̄ 是。

咱講惡馬惡人騎，總是咱家己 mā 愛知影搪著惡馬無可怕，可怕是咱見著惡馬 teh 作歹 m̄ 出聲 mā 無要意。

讀 Ronen Steinke ê 《穆斯林與猶太少女》mā 拄好 leh 參加 tsuē-tsuē 人呵咾 ê 線頂台語教學課。

這个通人呵咾 ê 線頂台語課，我無興趣 uī 伊寫一篇，我 kan-ta 清楚知影當𪜶見著桶箍出現無仝 ê 鉛線就隨 bueh kā 拔掉換𫝛款材料佮色水 ê 鉛線，m̄ 管𪜶按怎妝娗包容性，我猶是感受 buē 著𪜶是拯救臺灣文化 ê Oskar Schindler 佮赫米爾醫生，𪜶是我想 bueh 𪜶保持距離 ê AFD。

蓋好看 ê 一本冊，向望有機會 ē-tàng 搪著原文閣讀一斗。

➀ 未曾在這求學的人

➁ Bach 德國音樂家亦是 der Bach 溪流之意

➂ 臺灣俗諺語「紅龜生蟲 - 龜怪」

➃ 裝模作樣

➄ 自由永遠是有意見 ê 人 ê 自由

《穆斯林與猶太少女》

Der Muslim und die Jüdin von Ronen Steinke

譯者：闕旭玲

㊓ 臺灣商務印書館

ⓦⓦⓦ 博客來