亂皂𥴊仔店 ⓂⒺⒾⓃⓀⒾⓄⓈⓀ

Die Weltgeschichte ist der Fortschritt im Bewusstein der Freiheit

世界歷史是自由意識 ê 進步

--- Georg Wilhelm Friedrich Hegel

我真𠢕做寡白痴 ê 事項 tsiah-ē 發覺你 ê 感動是別人眼內 ê 豬屎籃仔也提出來品並。

總是無做寡白痴代呔有節著脈掠做筋撨著骨，敢 m̄ 是？

陳老師 ê 成長背景佮我無仝沿，總是小說 ê〈灶雞仔〉、〈師生〉、〈管區--ê〉攏是一面鏡引𤆬我轉去彼个愈來愈殕卻 m̄ 捌忘 buē 記 ê 記持。

因為有記持所以想 bueh 寫寡啥 mā 想 bueh 佮作者分張啥物家己 ê 感受，總是一想著「有 ê 人掠做 ē 曉講台語，台語文就在水寫甲足媠氣...」hōo 我隨放棄，起因我 ê 台語文寫甲足䆀 buē 讀，猶是莫做見笑代。

林貴龍老師 ê《Thá-kheh》佮陳正雄老師 ê《灶雞仔》攏是我真佮意 ê 台語小說，m̄-koh 我並 buē 想 bueh 特別 uī《灶雞仔》寫寡啥 tshan-tshiūnn 我 tuì《邦查女孩》按呢，因為感觸深甲 hōo 我 kan-ta 想 bueh kā 這个感想保留 hōo 家己。

不過愛照實講拄見著冊皮我 tuì《灶雞仔》無好感，因為我無理解伊 bueh 表達啥物，另外冊皮畫甲足古錐 ê 冊，我攏 ē 自動認為伊是囡仔冊抑是圖 tsuē 過文字 ê 冊。

我猶有耐性兼我有家己龜怪 ê 認定 --- 一本冊就是愛 bué 齊齊全文字 ê 冊 tsiah 夠本。

寫著這个龜怪 mā 真感謝有機會通四界行尞就搪著真愛 bué 行尞指教冊 ê 翁佮感謝阿母𠢕選年間 hōo 我出世，起因 tī 我開始有法度出門行尞，網路 mā 開始時行寫「跟著xxx去旅行」遮 ê 變化消敨我堅持 ê 龜怪。

猶原愛講我無輕視行尞指導冊或是食譜冊，我只是坦白家己 ê 龜怪，tshan-tshiūnn 我有 tsuē-tsuē 朋友 Ka-pi kan-ta bueh 食 Starbucks，而且是 m̄ 管 tī 臺灣抑是國外。

面對遮 ê 堅持，gún 攏接受別人認定 ê 無好鬥陣，gún 遮 ê 無好鬥陣做伙出門又閣峇甲有空有榫(tsún)無一个人 tī 快樂日子成做相拍雞仔 mā 無一个人轉到厝開始四界投「後回 buaih 佮 tsiâ 鬥陣出門。

我佮意這本冊 mā 認定一本冊有法度行入一个人 ê 心肝 m̄ 是伊寫偌 tsuē 媠甲若瓊花 ê 符號抑是展示讀過偌 tsuē 出名人 ê 句，是故事𤆬 hōo 讀者 ê 感受。

舉一个例，tsuē-tsuē 人真愛講 Cien años de soledad 總是，彼 m̄ 是咱 ê 世界，所以到今較聽 mā 是「幻奇....」

當然這个較聽 kan-ta 表示我 ê 世界，無表示每一个人攏按呢，就敢若搪著土耳其記者朋友，我 tuì 伊講起 Ferit Orhan Pamuk 伊 ê 表情是「Oh....伊佮我有啥底代」ê 簡單。

是講，我 tuì 這个作者 mā 無啥熟似 tuì Türkiye 理解 mā 無深，所以我真清楚接觸伊 ê 作品 kan-ta 因為伊是 Nobel Prize ê 得主需要綴 leh 佯一下仔青，因為咱有出版伊 ê 作品。

𫝛款這 m̄ 是一篇讀冊心得 mā m̄ 是啥物推薦冊單，這 kan-ta 是一篇個人因為這本冊𤆬 hōo 我 ê 543 想 bueh 記錄家己若《灶雞仔》ê 朋友佮捷 ē 變調若《管區--ê》入港隨灣，入庄隨俗 ê 阿爸佮其他 tsham 阿爸相𫝛 ê 序大。

--- 2023.06.30

Tī 這个花園 gún 相信童話

聽《台灣人台灣事》230〈 台語書裡的地景〉我想 bueh 寄張電子批 hōo 賢仔媽媽分張這兩本冊，總是我小面神批寫好猶是擲入去糞埽桶，清掉。

2024.04.17 那硞輕鐵那讀電子報，猶是相𫝛 ê 想法，感謝家己無 kā 批寄出去。

無寄出去 m̄ 是認為家己 ê 文筆䆀 tsi-tsi 抑是自信無夠額，不過我清楚知影讀冊人有𪜶 tuì 文學理路 ê 要求，彼款理路我做 buē 來就莫 ka̋ng 齪嘈。

家己 tī 家己 ê 箍仔感受世界歷史是自由意識 ê 進步 tī 家己 ê Blog 相信神奇。

按呢寫若蓋龜怪 buē-su teh 哭呻賢仔媽媽無好鬥陣仝款。

無，我並無這个意思，總是我清楚知影家己無文學理路，像 242 ～244 鄭雅怡老師分張伊 tuì 瑪利亞 ê 看法，像 245 ～246 王昭華女仕談「正範」ê 看法，像 248 ～249 王薈雯談「語言」m̄ 是單純 ê 語言，像 254 ～ 256 王秀蓉老師談「文字」徛相倚 ê Nobelpriset，遮 ê 分張攏是我 ê 想法，遮 ê 想法敢合別人 ê 喙斗，我無要意，總是家己愛知捌按怎保持優雅 ê 距離。

踮空龜 ê 我，近來發見 Blog mā ē-tàng 貼 Emoji，開始換 teh 痟這項。

舊底 ê 事項 --- kā 按台文雜誌學來 ê 漢羅寫法改做家己 ê 面肉猶未完成，又閣 teh 痟這項新工程。

按呢 mā 好，熥古漚古臭 tsiah 有法度知影家己敢綴有著 Hegel ê 智識。  

《灶雞仔》

㊔ 陳正雄

㊓ 前衛

ⓦⓦⓦ 聚珍臺灣