亂皂𥴊仔店 ⓂⒺⒾⓃⓀⒾⓄⓈⓀ

揀冊 ê 時掠做伊是台文冊，我 ê 意思是 iōng 台語書寫。

冊按臺灣飛來德國，讀第一頁久年 m̄ 捌比過佮講過 ê 中指話隨倚來挨拶(aisatsu)。

起因，這 m̄ 是第一本 hōo 我感覺吊牛頭賣馬仔肉 ê 台文冊。

不過，我知影是我家己猶原分 buē 清啥物號做台文冊，sóo-tí buē-tàng kā 咱 ê buē 爽攏囥 tī 出版社抑是作者。

那讀這本台語晶晶體 ê 小說，歹勢 iōng 晶晶體形容這本冊，m̄-koh 我誠實感受 buē 著作者分張 ê 台華濫糝書寫體。

我知影這个定義真僫界定，m̄-koh 雙語濫糝 tuì 我來講應當是各50% m̄ 是其中一个語言 ê 比例 kan-ta 10%抑是5%甚至1% mā 號做「臺語文文學」。

我無批評這本冊 ê 14，總是鬱著 ê 中氣無敨 mā buē 挃。

雖罔，這个鬱著 ê 中氣是我家己硬 bueh kā 手伸佮遐爾仔長 tsiah 滓著，佮作者一屑仔相干攏無，我猶原愛敨一下仔中氣。

不過，我原仔感謝作者，因為這本冊 hōo 我慣勢 ê 情緒叨撚得著敨放，我 buē 閣受著「臺語」人就隨茫甲 m̄ 知人 ê 鬥相楗。

另外，我無批評作者是彼款心口無一 ê 文字創作者，起因作者 tī 踏頭話就清楚說明伊是華語為主，台語為輔，sóo-tí 搪著這款吊牛頭賣馬仔肉 ê 問題是我家己造成，m̄ 是作者。

成做一个臺灣囡仔 m̄ 捌家己跤踏 ê 土地是講快樂抑是悲傷?

這个問題 tī 我猶未行出舒步箍仔伊 m̄ 捌造成我 ê 困擾，起因 m̄ 捌日子 mā 照過，敢 m̄ 是。

總是，歷史 ē 成做過去，人 mā-ē 綴世間 ê 變化沓沓仔成做無相𫝛 ê 人。

我開始好奇遐 ê hőng 問甲變啞口 ê 代誌是按怎發生，是按怎𪜶知影遮 ê 代誌我煞 m̄ 捌半項？

我知影我 ē-tàng 按呢講「Gún m̄ 捌學過」，總是歷史 ē 成做過去，我 tuì 埃及已經過去 mā m̄ 捌學過 ê 歷史有法度講甲喙角全全泡，是按怎我無法度 tuì 家己 ê 歷史 mā 講甲全全泡？

我 m̄ 知影，我 kan-ta 知影準做我講 ê 埃及歷史是烏白亂濺，伊猶原 hōo 我感覺家己捌足 tsuē 事項按呢 ê 博士博。

Tī 我那讀那指中指 mā 那讀搜揣敨中氣 ê 方式，我想著家己 tuì 別人歷史 ê 好感佮讀別人 ê 歷史我 m̄ 捌 uī-tio̍h 文言無一致 teh ka̋ng 指中指閣詈諞仙仔，隨笑甲吭跤翹 mā 欣羨這久 ê 少年囡仔有遮爾仔多元 ê 讀本，特別是認捌家己 ê 土地。

雖罔，內底有 tsuē-tsuē 文辭佮我誠有距離 hōo 我耍蹌跤雞，遮跳遐跳按呢揣連結，我猶原足欣羨現此時 ê 囡仔有法度遮爾仔自在寫家己想 bueh 寫 ê 物件，m̄ 是喙講 bueh hōo 上大額 ê 人上大額 ê 幸福 m̄-koh 寫 ê 卻是別人看無 ê 文字 tshan-tshiūnn 死人骨頭愛寫做「髑髏ㄉㄨˊ ㄌㄡˊ」。

Hegel 講 Die Weltgeschichte ist der Fortschritt im Bewusstein der Freiheit(世界歷史是自由意識 ê 進步)，《鯤(Khun)島(Tór)計(Kē)畫(Uē)》佮《史上最有梗的臺灣史》讀煞我足欣羨現此時 ê 囡仔有遐爾仔豐沛 ê 讀本佮自在 ê 表達方式，另外我 mā 相信這款文體我 ê 14 是「雙語雙文濫寫」抑是「PPT體」ê  文類 kan-ta ē 愈來愈 tsuē buē 愈來愈少，我家己 mā 愛綴著遮 ê 自由意識 ê 進步。

凡勢受著霜雪 ê 影響，sòo-pái 近來 kan-ta 想 bueh 成做一隻番鼠➀無想 bueh 成做蜂認真作穡記錄代誌。

總是，我猶原是人類 m̄ 是大理石鼠➁ sóo-tí 猶是動手寫寡物件 hōo 家己 ê 腦佮筋骨攏淡薄仔動一下。

因為 m̄ 知影 bueh 寫啥就 kā 早前敆 tī 食譜 ê《讀文佯青》提出來仕上げ一下兼記錄近來讀煞感受較無前三本遐爾豐沛 ê《拉封丹寓言集1》(Les fables de Jean de La Fontaine - Livre 1)。

法國文學 kā 上蓋通人知 ê Albert Camus 佮因為玫瑰成做一款心理研究 ê 小王子提掉，法國文學 tuì 我來講是生份甲賰囡仔時 tī 學校 bué ê 敢若草紙 m̄-koh 猶原 ē-tàng 讀 ê《Arsène Lupin》(亞森羅蘋)，總是這久想彼久，m̄ 知我讀 ê《Arsène Lupin》敢正經是 《Arsène Lupin》起因到今我猶 m̄ 捌看過別 ê 華文版本。

讀《拉封丹寓言集1》我 ê 海馬一直 tī 開囡仔時 ê 屜仔，這若捌 tī 世界文學翻譯草紙讀過，這就是希臘神話故事，這就是.....。

車日子轉來踅聚珍臺灣發見世界文學台讀少年雙語系列㊃已經出版隨 tsham 傲慢佮偏見做伙落訂，冊一寄來到德國翁 kan-ta 見著冊皮尪仔圖就隨問「你這斗 bué 佗一位法國人寫 ê 冊」我 tsiah 想著，He̋-hòonn 伊是 siáng。

一想著這 mā 隨想著囡仔時徛踮學校冊擔佮冊 bué 好紮轉去 ê 畫面。

 「學校敢有推薦這本冊」芋仔爸問。

 「無」我應。

紲落來芋仔爸 ē 閣提錢 hōo 我 bué 學校規定 ê「優良課外讀物」我 ē 閣紮寡佮學校規定一屑仔攏無底代 ê 冊轉來。

落尾手學校規定 ê 冊攏芋仔爸去款，我就自由自在綴家己感覺有 14 ê 冊生湠其他 ê 冊，tshan-tshiūnn Aesop's Fables 生湠出希臘神話佮羅馬神話。

彼久讀 ê 冊到今窮實攏 buē 記得了了，總是人生就敢若譯者 ê 踏頭話「世事無奇」我認為我 buē 閣 kā 遐 ê 纏綴塗牛行跤花 ê 冊閣一本一本 bué 轉來，伊猶原成做另外一款生張沓沓仔佮我久見久見 tshan-tshiūnn hőng 講無法度成做大色貨 ê 青瓦厝 ê Anne 這久 mā 出現 tī 德國電視台 tsham 我相拄搪。

人生正經是世事無奇，sòo-pái m̄ 免要意別人 ê〈包袱 á〉。

是，我又閣踅著一寡代誌感覺真煩，總是煩又閣按怎，彼是別人 ê 小鬼仔殼 m̄ 是我 ê，我 m̄ 免 uī 𪜶寫寡543 m̄-koh 享受家己 ê 四常。  

➀➁ 華語 ê「土撥鼠」公視台語台 kā 伊號做番鼠，總是我 ē 記得進前 ê「天竺鼠」mā 是番鼠。我 m̄ 是語言學家，總是土撥鼠 tī 德語有伊真好 hőng 理解伊按佗位來 ê 講法 Murmeltiere 大理石動物。

我 m̄ 知影這个號名是按當時流傳到今，總是見著 Murmel 隨想著 Alpen，sòo-pái 我家己較佮意 kā 伊號做大理石鼠，起因伊 hōo 我想著 tī 瑞士 ê 大理石山搪著 ê Murmeltiere，蓋古錐。