亂皂𥴊仔店 ⓂⒺⒾⓃⓀⒾⓄⓈⓀ

阿波羅金頭鬃是規年迵天幔雲紗僫見 ê 色緻，今呔會成做 Medusa ê 雙叉路。食一喙 Ka-pi 越頭看疊甲若林檎葉仔酥 ê 被單枕頭，敢 bueh 無事惹事佇這个 m̄ 免刁工揣金色絲仔絨就 ē 隨做石頭 ê 芒種車日子?

節氣是黃道十二宮，慾望是時行 ê 鹿林長尾星一出門 buē 閣翻頭相借問，往過 ê 𥍉𥍉看這久那 ē 遮成連壁紙攏比伊閣較有價值 ê 阿爸戰士授田證。

原來煞心是陳世美 m̄ 是準做無人 bueh 行踏，伊猶原 ē 照地支摃銅鐘 ê 教堂鐘聲。烏仁目鏡掛咧，拍 buē 死，埋袂密 ê 烏面賊隨成做我 ê 樹蔭。葉仔酥𢯾咧三划做一划划向倉庫 ê 炸彈 m̄ 知底時 tsiah-ē 清 hōo 離 ê Balkan。

按德國划向銃藥囤較少 ê 羅馬尼亞上短 ê 路線是順多瑙河划奧地利佮匈牙利，我數念越南人 tī 捷克帶 hōo 我 ê 家鄉味，mā 貪戀一台牛車窒倒衫仔褲猶原 buē 俗物 bué 破家 ê Slovenská 賊仔市。

按捷克划向 Slovenská 上短 ê 路線是划過 Telč，tī 心喙目攏飽滇隨划向人口無夠 600人ê Horní Dubenky 露營地，一到搭隨趁鴨卵猶未豉甲紅冇冇，聊聊仔綴頭犁犁 ê 麥仔行跤花。紅透金 ê 自然畫布宛然家鄉 ê 軟晡，樸實 ê 教堂 tshan-tshiūnn 家鄉伯公廟 ê 椅條總是排 tī 埕門口 hōo 停跤 ê 人四序。

黛安娜箭一射，紅冇 ê 卵仁勻勻仔出泉成做皮蛋，徛起身隨見著 tī Litoměřice 綴美國學生聽老師講歷史 ê Jan Hus，喙角微微仔翹做菱角，感謝伊掖人 m̄ 是神 ê 種子 hōo 後沿 ê 人 ē-tàng 按地獄解脫。

一條橋牽起 Strauss ê 藍色卻透濫出無相𫝛 ê 布達佩斯，祖先栽 ê 欉一个健欉閣湠欉，一个卻沓沓仔行向焦蔫枯黃，一个 Komárno 兩个生張，𪜶就 tshan-tshiūnn 雙生仔分人飼，有𫝛款 ê 栽湠出無仝款 ê 欉。

按牛車疊飽滇 ê Komárno, Slovenská 划過橋到匈牙利 Komárno kā Jan Heweliusz 借句說聲歷史這个物件，伊從來 m̄ 捌固定(W wodzie, owej płynnej materii, nie ma nic stałego)，隨划向有出名酒 Egri Bikavér(Egar ê 牛血) ê Eger，停跤 tī 百年老厝那食咖啡配甜粅粅，七月 ê 燒風，恬靜卻交易 ê 街道，伊提雞毛筅 kā 我筅鈍目，彼久是彼久，這久是這久，繁華落魄攏 ē 成做向時佮現此時，遮是一人一家代，公媽隨人祀猶受著致蔭 tī 這个時陣猶閣 ē-tàng 起性搦地喝講「Gún 愛先顧腹肚 tsiah-ē 去顧佛祖 ê 匈牙利」。

離開舊城生張宛然帝國栽欉 ê Eger，我綴畫糖仔尪 ê 手成做一尾魚泅入有學者認為遮 ê 民族佮完全消失ê Thraci(色雷斯)有血緣關係 ê 羅馬尼亞。

國家獨立歷史百外冬 ê 羅馬尼亞是自波蘭藍領階級漸漸仔轉家鄉，第二个敆德國欠工縫主要 ê 國家，伊 mā 是歐洲第二山嶺 Karpaten 除了加圇行過 Slovenská ê 第二个國家。

羅馬尼亞 ê 國土因為 Karpaten 保留 tsuē-tsuē 未開發 ê 森林，遮 ê 森林有 tsuē-tsuē 物種，上蓋出名除了熊掠外，伊 mā 是划向保加利亞上近 ê 九彎十八斡。

當我踅甲掠做 hōo 魔神仔牽去 ê 時，一隻熊宛然 Steiff ê Teddy 定 tī 無 īng 欄杆隔起來 ê 草埔 hōo 楞捙捙 ê 我隨按雺煙散霧行出來，車猶未倚近隨綴入山規定 kā 窗門關甲密喌喌恬靜綴限速經過伊 ê 身軀邊。

人 ē 神格化，動物 ē 古錐化，駛 tī 頭前 ê 車隨个仔隨个 kā 大通路當做停車場 mā 隨个仔隨个大大典典佮伊分張𪜶 ê 物食，恬靜等待若筊徒 tī 奕十八仔 ê 生份人。

記持 ē 食餌，熊敢 ē 食爸母教 hōo 伊 ê 餌？

人生 tshan-tshiūnn 水手搪著 Loreley bueh 綴伊行抑是 buaih 攏是家己 ê 決定。

離開森林划向載貨車 ê 多瑙河棑仔頭，河是憂愁抑是快樂我無通請教，總是記持 ē 揣餌，我開始揣五歲成做物仔 hőng 楔入貨車運到西德 ê Krun 是按怎佮父母一人徛一爿渡過茫茫渺渺 ê 現此時佮未來。

過去心不可得，現在心不可得，未來心不可得，人生宛然草埔 ê 山崎，無好玄萬年久遠猶是 m̄ 知伊是遠古 ê 寶藏。

出產玫瑰精油 ê Kazanlak 是保加利亞按鄂圖曼帝國獨立出來重要 ê 所在，也是發現 Thraci 墓壙主要角勢，伊佮厝邊羅馬尼亞 mā 有「好想贏韓國」ê 比並，不而過受著向時露西亞 kā 鬥伨鬥戰鬥 tsiah 有今仔日 ê kā 權利按鄂圖曼帝國提轉來 ê 歷史好感成做𪜶 ê 柏林圍牆，hōo 𪜶到今猶是無法度參比𪜶較晏加入歐盟 ê 克羅埃西亞有相𫝛 ê 光景，國家建設佮 mā 是仝時加入歐盟 ê 羅馬尼亞對照，厝邊已經按燒炭 ê 蒸汽火車進化到復興號，𪜶進化到平快就 m̄ 毋捌閣繼續。

「平快 m̄ 是落伍，只是 buē 吸引外埠頭 ê 朋友來遮觀光坐車」無機會選擇敢 bueh hōo 蘇聯關入櫳仔內 ê 序大，tī 櫳仔門一開包袱仔隨款隨綴人去西德做穡，喙那講彼久 ê 人生光景，十隻指頭仔 mā 無閒 leh 喝臺灣拳來表示一箍西德 Mark ē-tàng 換偌 tsuē Lev ê 光炎炎年間佮國家加入歐盟 ê 期待。

總是期待走頭名，現實煞 kan-ta 想 bueh 徛尾名，74歲 ê 伊無法改變，不過伊一直迵過家己 ê 往年 hōo 囡孫理解歷史佮認捌家己踮厝主意 m̄ 是桌頂拈柑。

保加利亞有豐沛 ê 文化光景，政治佮經濟卻是仝身雙頭鷹 ê 無仝心。離開這个工業第十大城，一路綴不時有警察 leh 指揮牛佮羊遵守交通 ê 山線慢慢仔划入冷戰年間 hőng 號做東爿自由 ê 淨土希臘。

冷戰年間希臘是自由歐洲 ê 外島，bueh 出入上緊 ê 方式是坐飛船抑是按義大利坐大船聊聊仔渡一暝日。

希臘 ê 熱人 m̄ 管是頂港有名聲，下港無出名 ê 城市鄉鎮，大多數 ê 棑仔頭攏是人船洘秫秫。我因為綴山走標所擺儉著免綴人成做鰮仔魚 ê 齷齪火划到愛琴海山嶺，kan-ta 允許男性造訪 ê Athos(阿索斯)靠岸。跤踏娘仔沙，目看 uī-tio̍h 愛情直向大海軁 ê 金烏，喙那食塞爾維亞厝邊燃 ê 咖啡佮家己做 ê 麭 kā tsuē 冬前 tī Epidaurus 聽著 ê「恁 ê 文化誠實不可思議，無 tshan-tshiūnn gún tsiah 兩百外冬 niā-niā」ê 是按怎 ē 遮爾仔恁 ê 往過 m̄ 是恁 ê 往過 ê 歷史是啥人決定 ê 重敧爿送 hōo 愛琴海食。

Tshan-tshiūnn 牧羊者按這綠徙到彼青，愛琴海 ê 山嶺沓沓仔 kā 我徙到上押尾 kā 共產主義擲挕捒 ê 阿爾巴尼亞。

「Gún 啥物攏無 m̄ 過真𠢕掠兔仔」總舖師 ê 話佮 Taken ê 畫面宛然78轉踅 buē 離，等到跤踏入這个國家隨笑家己綴影戲有影無影攏生囝。

凡勢是划國旗 ê 雙頭鷹是15世紀抵抗鄂圖曼帝國象徵 ê 路線，所擺見著 ê 世界佮總舖師 ê 記持無相𫝛。好玄是隻貓，tī Berati ê 街路徛踮 Margarita Tutulani 面頭前，我問伊見著以早 ê 反抗成做今仔日 ê 交易鬧熱是啥物心情，伊無應話，「先 hōo 一部份 ê 人好額先」卻𤆬我行入總舖師分張 ê 山鷹子民是按怎 uì 基督徒成做穆斯林 ê 過程。

先顧腹肚，tsiah 顧佛祖是天性 m̄ 是反抗落塗時八字命 ê m̄ 願。

歷史有百年厝，無百年主，划向𫝛款 hōo 鄂圖曼帝國借蹛 500 冬 ê 北馬其頓 ê 半中站，tī 這个離臺灣千里 ê 懸山山鷹田庄見著家己 ê 字姓 Lin 成做別人 ê 庄名，喙裂甲獅獅獅，世界是圓--ê。

北馬其頓是冷戰期間無想 bueh 坐飛船或是坐大船渡海到希臘上主要 ê 山線，遮有一个懸山淡水湖，淡水湖邊仔有一个水清甲連日頭 mā-ē 成做 Narcissus 直直照家己緣投 ê 世界文化遺產 Ohrid。

北馬其頓佮斯洛維尼亞是前南斯拉夫聯邦較無受著獨立戰爭影響 ê 國家，伊 ê 厝邊烏山到今猶是驚惶塗牛無張持來翻身。

烏山自2006年正式佮塞爾維爾分家猶是無法度解脫戰爭隨時 ē 閣來行踏 ê 惡夢。Tī 南斯拉夫年間國家經濟本底就依倚塞爾維亞 ê 𪜶 uī-tio̍h 躘開 tuì 塞國 ê 依賴開放外國人投資土地房地產 ê 數字駐水成做現此時 ê 苦湯佮𫝛公媽隨人祀兼外人 mā kā 家己 ê 公媽祀入來 ê 交纏。

「Gún 佇波士尼亞感受著平和帶來 ê 威脅」拄按波士尼亞徙到 Kotor ê 朋友 tuì 倚山倚海 ê 露營地主人家講。

「𪜶 ê 問題是無仝公媽祀仝牌 ê 複雜」一家三代男丁孤一个 m̄ 捌上過戰場 ê 主人家表情宛然 Before the rain ê 阿爾巴尼亞少女逃過世仇北馬其頓人 ê 追殺，最後猶是無法度脫離兄哥 ê 仇恨，死 tī 兄哥手頭 ê 運命。

遮無戰爭 ê 理由，𪜶 ē 揣著理由，戰爭宛然病毒自然 ē 傳染湠種。

影戲是現實 ê 牽藤，家己 ê 阿媽佮阿母攏是按塞爾維亞嫁過來，家己 mā tī 遐做穡，自2006年獨立公投投票過關，伊 ê 世界開始起圍牆，海岸見著 ê 是露西亞字母，山嶺見著 ê 是羅馬字母，徛倚山倚海兩種語文攏老 ê 伊文文仔笑講「Gún 烏山人無想 bueh 講政治，恬靜 m̄ 是清彩捎就有 ê 物件。」

順媠甲 hōo 我目蛤 m̄ 願合喙ê「恬靜」Mare Nostrum(Gún ê 海/地中海)海岸山嶺寬寬仔划向一个國家三个政權 ê 波士尼亞佮赫塞哥維納。

時間 buē 亡，圓箍仔 m̄ 捌圓，拆開人心 ê 從來 m̄ 是語言 ê 差異是栽 tī 心肝穎仔 ê 誓不兩立，kā 人 ê 心放裒也是栽 tī 心肝穎 ê 愛佮理解。

按世界文化遺產 Mostar 坐 bá-suh 盤山到 Sarajevo 閣按 Sarajevo 坐火車過嶺轉來 Mostar，心勻勻仔哺露營地主人家大學一年戰爭開始，tsuē-tsuē 厝邊佮同學攏按本底語文無相𫝛卻 m̄ 捌存在 ê 差異成做目無見紅霞手鼻無臭羶世界絕對 buē 媠決定 buē tsiâu-tsn̂g ê 人。

戰爭結束 tsuē 冬，伊原仔無法度放下 Srebrenica 大屠殺 ê 憤慨，總是伊理解人類 ê 傳承從來 m̄ 捌是孤一个血緣，tshan-tshiūnn 伊仝款。

恬靜綴鐵支盤這山過彼嶺「媠人無媠命」佮 tsuē 冬前 tī Bihać 佮戰後合作開餐廳 ê 序大開講，講著門跤口 ê 歹面文字，無仝族群𫝛款失去翁婿佮囝兒 ê 𪜶文文仔笑講「別人 ê 冤家對頭 m̄ 是 gún-ê」一句簡單 ê m̄ 是 gún-ê 是 kā 偌 tsuē 寶貴 ê 珍珠送 hōo m̄ 知愛 tuì 啥人討 tsiah-ē 得著 ê 敨放。

悲傷宛然魚刺㧎佇心緒，一聲柔柔 ê Hi 𤆬領我 kā 魚刺吞落腹。

順眼前 ê 手機畫面讀波文轉英文 ê「咱 bueh 到位矣」，姑娘峇微仔笑引𤆬我敨放對家己 ê 情緒叨撚佮竹篙鬥菜刀，世界萬物無分懸低媠䆀，別人行過 ê 悲傷敢需要咱田螺循舊逝，較行 mā 彼逝 ê 循 buē 離。佇這个 Google kiōng-bueh 成做咱 ê 喙 ê 年間，語佮文已經 m̄ 是一堵柏林圍牆分隔東佮西。

分別你佮我 ê 是當塞族人民行踏波黑地區，見著雙語平等徛仝位 ê 路標，家己 ê 文字佮字母猶是異族㾀勢 ê 䆀物。

順山嶺盤海岸到隔年 mā 是歐元區 ê 克羅埃西亞，眼前 ê 鬧熱交易 hōo 我感受著空喙原在時間 buē 停睏 ê 繼續向前行 tsiah 是改變家己上好 ê 方式。

克國 tī 南斯拉夫年間是西德人佮奧地利人上愛行踏 ê 渡假出名地 mā 是德國出名小說「Winnetou」攝影上重要 ê 所在，特別是西爿受 tsuē-tsuē 攀岩者意愛 ê Starigrad。Buē 曉攀岩 ê 我 uī-tio̍h 1875 出版 ê Winnetou 停跤踮遮並感受深深 ê 準做世界攏拋荒猶原 buē-tàng 放棄栽欉 ê 勇氣。

青春少女 tī 西德讀書 ê 主人家，因為戰爭再次行踏德國，只不過這斗 ê 轉家鄉得著 ê 果宛然鹿林長尾星 buē 閣翻頭。

比並是解脫悲傷上緊 ê 線路，怨慼是 m̄ 願向前行上好 ê 妝娗，成做 Nietzsche ê Übermensch(超越家己)是一肢跤指頭仔攏翹 buē 起來 ê 氣力。Kā 德語當做營地國際語言 ê 主人家講著往過 tshan-tshiūnn 辯士 tī 講影戲，戲一落 mā 煞鼓。

準備划向奧地利 ê 彼一日見著德語 buē 通自在用義大利語佮主人家比跤畫手冇談 ê 少年家，Mandela ê「自由 m̄-nā 是解脫自己 ê 跤枷，更加是尊重別人佮增加別人自由 ê 生活態度」敨放我 ê 驚見笑。

「來去」主人家 ê 笑容 hōo 我想著 Hape tī 聖雅各之路搪著 ê 破相朋友，堅定 ê 牛步已經說明無一个人 ē-tàng 替我主意 ê 世界若是賰一个聲音，啥物就攏無矣。

順海岸盤山嶺，gún-ê 海伴阿波羅金色頭鬃成做一尾閣一尾 ê 白銀魚，山嶺 ê 楓仔葉順 Carpo ê 手藝成做烘甲酥金透柑 ê 葉仔酥，我 mā 來到原意是斯洛維尼亞語小堡寨(gradec) ê 奧地利第二大城兼學術重鎮 Graz 中家己時間 buē 老，心卻會冗 ê 有一日 ē-tàng 成做留學生 ê 向望佮行踏離鄉，不離腔 ê 前加州州長 Arnold Schwarzenegger ê 家鄉Thal(Steiermark)。

「Gún 老爸討我做警察，準做伊猶原 uī-tio̍h 我 ê 決定規腹肚火，彼原仔是伊 ê 向望 m̄ 是我 ê」辭別州長 ê 家鄉，海馬直食波士尼亞朋友分張 ê「Gún mā 捌想過若無1914彼場刺殺，Gún-ê 運命敢 ē 無相𫝛，總是時間 buē 老人 ē 變，m̄  管疊 tsiâ-ê 字姓 gún 猶原是 gún，m̄ 是疊姓 ê 人」。

巴爾幹 ê 交纏平凡 ê 我無法度哺甲透底，帝國 ê 榮光是別人 ê 往過也是空喙，我 mā 無氣力 kā 挽瓜揫藤，不而過我向望有一日這个世界 buē 閣有任何一个人需要等到世界完全恬靜落來才有法  tshan-tshiūnn像波士尼亞 Bosanska Krupa 紀念碑 ê 人 m̄ 免閣 uī-tio̍h 語言、出身、宗教、膚色等等去冤仇別人佮得著 tsuē 冬前行踏埃及，埃及導遊回答仝團朋友ê「耶穌、阿拉攏是仝一个神，神 kan-ta 一个 m̄ 是無相仝 ê 人」ê 一位神三个宗教名稱三間聖堂 ê 愛。

感謝路途搪著 ê 朋友願意成做我 ê 線，hōo 我有機用𪜶 ê 線車我 ê 人生花仔布。

參加徵文比賽無得賞 ê 䆀筆尾就徙來遮做記錄。

那做記錄那改家己四序 ê 文字表現，像「袂」改做 buē，「親像」改做 tshan-tshiūnn，彼个因為虛華佮貪財 ê 翹頭查某又閣纏綴 hōo 我無事揣情緒叨撚。

總是較按怎情緒叨撚，我猶是 buē 和尚頭掠蝨母，揣麻煩。

起因，我清楚知影隨人有家己 ê 路線，我 ê 路線無合評審單位 ê 喙斗按呢 niā-tiānn。

總是一想著無法度迵過文字趁寡所費，像林美麗老師接受《台灣人台灣事》〈240 台語女性書寫〉分張 ê 故事，寫作是家庭主婦 ê 手面趁食，那 ànn 囡仔那趁寡所費，彼个翹頭查某就開始挐頭使性地 hōo 我一時失去理智 mā 綴伊張綴，這久 kā 按 Google 來 ê 喙斗換做家己 ê 喙斗，除了感覺愛笑掠外就是跋一倒，抾著一隻金雞母。

起因，全漢文書寫抑是硬 kā 外來語轉做倚音書寫，彼 m̄ 是我，準做我是慣勢講 Tschechien、Česká 抑是 Česko，我猶是綴記持中 ê 新聞講法寫捷克(Tsia̍p-khik)，其他 ê 外來辭像「Kazanlak」就順家己 ê 慣勢楔入文章無閣做變化，除了「Slovenská」這个較新 ê 國名，我家己審查認為照「華語」寫較有法度「Slovenská」吸著評審 ê 目睭仁，總是慣勢夯竹篙入城 ê 人 m̄ 管按怎妝娗，猶是無較縒。

這个題目，自人按厝車到 Abensberg 見著百水先生 ê 公寓，我就想 bueh 寫做一篇文章分張，只不過有這个想法無彼个行動力，遮猶有 tsuē-tsuē 貧惰翻田塗 ê Balkan 車日子錄。

所以，這是順其自然結 ê 果 m̄ 是刁意故栽欉 ê 植物 ê 厝宅(Gewächshäuser/Greenhouse)，總是準做 m̄ 是刁意故栽欉搪著「箍箍」猶是 ē 跳童 ，這是天性，準做我無苦手面趁食 --- 天性 ê 痟貪正經 ē hōo 人軁雞籠，恐怖喔，總是好里佳哉，我無痟貪甲彼个程度。

那調整文字 mā 那佮《語言學家破解台語》mā 談過 ê「猶未」 ê「未」tsuē-tsuē 人 ē 順語文意思綴 leh 寫猶「袂」相拄搪，是講這个「未」佮「袂」敢是按這本冊來，我貧惰閣反一斗，huînn-ti̍t 我 ê 海馬鉼針就是有這个記持。

這久通過調整文字，發見家己正經有這个症頭 mā 算是 A Blessing In Disguise 佮 Schwein gehabt ê 跋一倒，抾著一隻金雞母 ê 好字運，看起來翹頭 ê 麗子(白鳥麗子でございます!)並無翹頭。

印度 ê Śiva 表示創造、毁滅、生湠，這个過程敢 mā m̄ 是按呢生?

我因為百水先生想著創造，因為無得賞感覺毁滅，押尾因為整理文字遮 ê 文字得著生湠  --- Hape tī 聖雅各之路搪著 ê 破相朋友，堅定 ê 牛步已經說明無一个人 ē-tàng 替我主意 ê 世界若是賰一个聲音，啥物就攏無矣。

這个過程敢 m̄ 是 Śiva？敢 m̄ 是金剛經講 ê 過去心不可得，現在心不可得，未來心不可得佮人 tī Kazanlak 聽 Thraci 導覽小姐分張𪜶 tuì 掠做四常山崎，無外國人 ê 好玄佮讚助，𪜶窮實 buē 去愖遐 ê 一坵一坵敢 ē 是遠古 ê 寶藏。

自寫 Blog，我一直 teh 問家己，我是 leh 寫啥碗糕？

寫食譜，內文佮食譜 90% 無底代。

寫遊記，內文佮愛紹介按怎耍，按怎揣飯店遮 ê 事項 mā 牽無一條線。

總是這是我 ê Blog，伊引𤆬我按這个圓箍仔湠出閣較 tsuē ê 圓箍。

Blog 是我 ê Jakobsweg mā 是我 ê Kreis von Kreisen。

感謝無得賞 ê 點拄 mā 感謝翹頭查某 ê 行踏。

起因，無翹頭查某 ê 行踏，我 buē 翻草並愖這段本底想 bueh 簡單記錄押尾成做虛華佮貪財湠出來 ê 鋩鋩角角。

翹頭查某，Au revoir