亂皂𥴊仔店 ⓂⒺⒾⓃⓀⒾⓄⓈⓀ

Elva 車頭

愛沙尼亞 tī 1886 ~ 1889 年起 Tartu - Valga 鐡支路線，路線完成無外久，Elva mā 綴 leh 出現。

車頭公共冊櫥

Elva 是按 17 世紀就有記錄 ê Elva 河來，總是伊按大自然 hōo 人類升格成做一个鎮 ê 規模是聊聊仔行過 bueh 50 冬 ê 時間。1938 年，Elva 按車頭成做鄉鎮。

有貓仔跤 ê 暗光鳥

二戰期間 ê Elva 因為蘇軍交德軍成做斷籬倒壁 ê 角勢，uī-tio̍h 國家獨立 teh 拍拚 ê 森林兄弟 mā kā Elva 武裝做 Ares。

生態豐沛甲天鵝佮水鴨 m̄ 願徒位 ê Elva 河

繩 Elva 資料讀著 Hyacinth Graf Strachwitz 交蘇軍這段戰事 hōo 我想著輕鬆自在行入戲園，忝頭無力一步一步拖出電影院 ê 1994。

讀著 Elva 因為鐵支路成做鄉鎮 hōo 我想著外國朋友 ê「有日本味 ê 臺中」交家己從來 m̄ 捌 ê 歷史二七部隊。

步頻理解，別人分張 ê 無鹹無櫼白汫無味兼無局是 m̄ 捌時間跤步上簡單 ê 讕頭。

Tī Elva 資料猶未繩 tsiâu-tsn̂g 進前我 tuì 伊 ê 感受 mā 是𫝛款 ê 借口。總是，家鄉是故鄉，他鄉是家鄉，家 ê 氣味永遠 m̄ 捌走 phàng-kìnn。

下晡 3 點 ê 黃昏市仔搪著 m̄ 捌字 mā m̄ 看告示 ê 外國人，攤位店東 kā 廂仔車停踮 gún-ê 車後斗，那交四箍圍仔 ê 生理攤開講那等車主 gún 轉來。

見著這个畫面 ê gún 隨走百米，店東面掛笑容手那揲那講 gún 知影意思 m̄-koh 聽無半句 ê 愛沙尼亞語「Langsam 寬寬仔來」hōo 我想著人 tī 愛沙尼亞 ê 第一站 Maxima 搪著 ê 美麗店員。

水鴨 tsuē 甲 m̄ 免憢疑遮 ê 水質

「一个城市心適有局、無議量無局齊是廣東目鏡隨人佮意」臺中是我 ê 家鄉，我愛別人目中白汫無局 ê 臺中 mā 愛這个無頂港有 UNESCO 名聲 ê Tallinn(塔林)，下港有上出名海沙埔 ê Pärnu(派努爾) ê Elva。

路裡搪著 ê 風車

 引述𫝛款按德國來遮行跤花並栽第二斗跤花 ê 德國太太 ê 感想；

雖罔，遮 ê 7月敢若德國 ê 11月，遮猶是 hōo 我曲跤撚喙鬚 ê 所在，準做當地人無這个感覺因為萬項鞏金，我猶原想 bueh 繼續來遮栽跤花，準做我是蠓仔 ê 營養來源(Ich bin so lecker für die Mücke)。 

我 mā 有𫝛款 ê 問題，我 ê 血足合波羅的海 ê 蠓。

德語 ê 東海，英語 ê Baltic Sea，華語 ê 波羅的海(華語 ê 講法 m̄ 知按佗來...)

拆白講，我 mā 是𫝛款 ê 感覺，我就愛遮隨人五肢指指頭仔無平長 ê 自在 mā 欣賞遮心頭扞予在，m̄ 驚起風颱 ê 心定目睭金。

人 tī 拉脫維亞搪著露西亞裔拉脫維亞人，𪜶 tuì 拉脫維亞 ê 態度交咱番薯島一寡 tuì 養飼家己大漢 ê 土地是看無目的 ê 生毛帶角 hōo 我險險行入𪜶 ê 陷坑，跳童。

Tī 愛沙尼亞搪著露西亞裔愛沙尼亞人，𪜶 tuì 露西亞有根 ê 纏絆 m̄-koh 𪜶 mā 清楚知影家己 ê 根已經 m̄ 是露西亞 ê 一个人兩个文化 ê buē 要意家己交別人無相仝 mā buē 要意別人交家己無一項相𫝛。你講英語抑是德語 tuì 講俄羅語 ê 我一屑仔攏無影響。

歐洲上大 ê 水沖 Jägala

這回行踏波羅的海三國，學生時代 ê「細」、「細」、「細」交日頭猶未成做豉卵仁就來挨拶 ê 蠓相仝，一直 tī 我耳空喝玲瓏 hōo 我認真繩課本 ê 記持，不過 m̄ 管我按怎繩永遠 kan-ta 這段記持「波羅的海三小國」。

原來我 mā 致著一世界，一面肉 ê 刻板印象，「Can i go to the toilet」ê 德國查某囡仔交「I would like to buy something, can you help me」ê 德義少年查埔囡仔， 我 kā 恁會失禮，我交你𫝛款，雙目 kan-ta 一款色緻。

人口百三左右 ê 愛沙尼亞土地面積一屑仔攏無細，人口百三 ê 愛沙尼亞，愛沙尼亞語交俄羅語攏重要，無人較大仙 mā 無人較細仙。若有分大細仙，彼是個人 ê 問題。

Gún tī 愛沙尼亞 mā 有搪著露西亞驕傲 ê 愛沙尼亞語，總是伊 ê 驕傲成做 gún 眼中 ê 可憐代。起因伊 ê 俄羅語 m̄ 捌成做 gún 結數 ê 困擾，伊見掃一項物隨捎手巾拭手 ê 動作 mā buē 成做 gún-ê 柴樠 hōo gún 點火較光油。

心安草厝穩，心思有定 buē 抽籤算命，心思無定，抽籤算命，手曲猶是直直曲出，按立陶宛行到愛沙尼亞，這是我 tuì 這三國面對歷史引𤆬 ê 複雜生湠 ê 想法，特別 tī 語言交文化這項代誌 。

澹水地

Et see läks omadega rappa/規个攏烏有去矣，這是行踏出名澹水地學著 ê 當地俗諺語。

愛沙尼亞行過瑞典，行過露西亞，一切看起來攏烏有去，𪜶猶原 m̄ 捌放棄家己並清楚知影一个人 ê 媠 tī 支骨，這是㾀勢裝 buē 出來 ê 神魂。這是我個人 ê 觀察，無代表全部。

Et see läks omadega rappa 是當地人搪著無法度解決 ê 代誌 ē 講 ê 俗諺，伊有沐著打馬膠(Peach gehabt)，歹運 ê 意思 mā 有 C'est la vie ê m̄ 閣綿死綿爛，狗咬鐵釘，m̄ 願放 è 點拄。

畢竟人生世事有當時仔就 tshan-tshiūnn 澹水地 ê 雺霧 hōo 你 buē 節，澹水地 ê 日鬚 mā 相𫝛，咱就 tshan-tshiūnn 澹水地 ê 生物 tī 遮 ê 變化繼續向前行並生湠。

柴杙 ê 對面是露西亞

露西亞佮德國 ê 歷史是交纏甲真僫捊 hōo 明，Eesti 交這兩國 ê 關係是水鬼仔擢(tioh)後跤，不過 Eesti 清楚知影𪜶一屑仔攏無想 bueh 交水鬼圓仔炒大麵，膏膏纏。總是世間事交恐龍底時 bueh 出現無一定確定，𪜶交露西亞 ê 向時交未來 ē 成做啥物生張，無人知影，總是 tī 我 ê 年閣見著這按掠篙泅就有法度泅過 ê 界限，我感謝家己出世 tī 海島。畢竟咱出世 ê 土地無法度 hōo 咱千金 bué 厝，萬金 bué 厝邊 ê 簡單。

Narva 倒手爿是愛沙尼亞，正手爿是露西亞

徛位若 Vaticano tī Italia 義大利 ê Narva 納瓦爾是行踏 Eesti 重要 ê 觀光景點之一 mā 是想 bueh tī 世界地圖加一粒大頭釘 tī 露西亞地形上緊 ê 方式。

烏露戰爭進前，遮是逐日交易(ka-ia̍h)交人洘秫秫 ê 角勢，烏露戰爭遮成做你 ê 自在釣魚是情報收集 ê 假做。

Narva mā 是北韓 ê 平壤，河岸光映映 ê 厝宅是假做 ê 好經濟。

Narva tī 烏露戰爭進前是露西亞人辦鹹水貨主要 ê 城市，mā 是無想 bueh 走 m̄ 知底時 tsiah 有法度提著簽證 ê 人，上緊行踏露西亞領土 ê 角勢。

一場戰爭，改變兩國柴杙城市 ê 經濟。露西亞人無法度繼續出外辦鹹水貨，外國觀光客 mā 無法度繼續申請有時間限制交限定堡寨觀光 ê 觀光簽證。

露西亞堡寨

一場戰爭 mā hōo 本底猶交露西亞尻川敆相倚 ê 露西亞族群開始衫穿顛倒爿，認捌著依賴(i-nāi)孤欉是無法度湠欉。 

露西亞族群 tī 愛沙尼亞交拉脫維亞月光下看人影兼𠢕交繃是通人捌 ê 出名，這斗我 mā 捌搪過，總是月光下看人影，家己看家己大 kan-ta 有法度 tī 仝一款環境，遮是愛沙尼亞 m̄ 是露西亞，準做是獅，搪著大腸告小腸 mā 是愛成做貓。

M̄ 知哈物魚 ê 城市符號

行踏 Narva 河岸，露西亞彼爿有兩个查埔一个查某 tī 河內底釣魚，愛沙尼亞這爿 m̄ 是兩个查埔一个查某是五百人遐爾仔 tsuē ê 自在做家己。

那順河岸巡露西亞，我 ê 頭殼 mā 那巡按德國公共電視台看來 ê 北韓假包城市，假包 ê 世界果真是歹查埔厚同年，歹查某厚姑姨。

那順河岸巡露西亞 mā 那繩 Narva 河 ê 魚，彼魚到底是啥物魚呔 ē 芳貢貢，貢貢芳到這款程度，總是一想著歐洲人食𩸙仔，我猶是莫冒險 hōo 杜猴損五穀。

東海出海口，倒手爿愛沙尼亞，正手爿露西亞

烏露戰爭進前，遮是是露西亞人上愛 ê 三步一坎店交敨放壓力 ê 角勢，烏露戰爭遮按市草交易轉做百步揣無一間店只有露西亞軍防船划來幌去 ê 稀微。

愛沙尼亞 ê Berliner

徛位 tī 淡水 ê 波羅的海三國，𪜶無小暑大暑，有米也懶(lán)煮 ê 問題 m̄-koh 𪜶有小暑大暑 hōo 我𫝏甲足想 bueh 提甜路拜牙槽王 ê 寒。

讀無愛沙尼亞語，翻譯軟體又閣兩光無法度清楚翻譯餡藏啥就先來試這味外表交德國 Berliner 是 Pollux hām Castor ê 麭。

Mamma Mia!

愛沙尼亞 ê Berliner 比德國 ê Berliner 閣較敆我 ê 喙斗，因為 m̄ 是糖半，是糖少。

Pudding 麭

繩資料，資料分張波羅的海三國交芬蘭 ê 甜路受法國 hām 露西亞 ê 影響真大，這斗 ê 行跤花 mā hōo 我有機會繩早前行踏立陶宛 m̄ 捌愖過 ê 問題。應當按呢講我無 kā 食食排入巡禮 ê 第一位。

這斗行跤花一路按立陶宛行到愛沙尼亞，立陶宛 ê 麭 hōo 我想著德國，拉脫維亞 ê 麭 hōo 我 ê 印象交第一斗巡禮猶原相仝，無鹹無櫼無味素食粗飽，愛沙尼亞 ê 麭 hōo 我感覺人若轉去囡仔時 ê 臺灣，鹹甜 ê 細粒子麭 tsuē 過大甲若面桶 ê 大列巴。

我 m̄ 捌露西亞食食文化，總是愛沙尼亞受露西亞交瑞典影響百外冬，我想遮 ê 麭文化交露西亞應當精差無偌 tsuē。

愛沙尼亞馬花糋

「伊是包米包肉 ê 馬花糋」喙一咬我隨 tuì 翁講，m̄ 捌食過馬花糋 ê 翁 mā 成做一隻貓咬一喙，就此逐家間攏愛揣伊 ê 形影。

Tshì-sù 麭

看起來若鹹麭 ê Tshì-sù 麭 hōo gún 翁一路嫌伊脯脯粕粕決定 buē 好食，我 mā 一路 hōo 伊按出錢 ê 人主意到塔林郊區。

「你 ē-tàng 繼續嫌伊䆀，總是這久我出錢，我主意。」

聽牽手按呢品明伊隨改口講「你出意，我出錢。」

我 ê 魚麭𩛩

德國 ê 魚臊鞏金，愛沙尼亞 ê 魚臊 hōo gún buē 俗物 bué 破家，總是因為讀無人 ê 文字 m̄ 敢烏白款魚轉來做魚麭𩛩，就款德國一盒遮有法度 bué 3 盒 ê 魚指轉來做下昏飯。

翁講魚指好食，麭白汫無味。

我個人是感覺麭好食，魚指 mā 好食，落價 ê 紅菜頭冷盤是一壺金魚，buē 堪得一尾丁斑、一池金魚，袂堪得一尾中斑；一家人，buē 擋得一个歹人、一池魚，buē 堪得一尾中斑母，我 ê 魚𩛩麭 buē 堪得凡勢較罕得食生菜冷盤 ê 愛沙尼亞紅菜頭冷盤。彼味素我頇顢形容，總是簡單一句 --- buē 敆喙。

翁 ê 魚麭𩛩

講著麭想著按 Google 大眾廟揣來 ê Helsinki 資料 --- 芬蘭 ê 物食好食過德國。

物食這款代誌是有人興燒酒，有人興豆腐無需要特別寫一大拖沙，總是以愛沙尼亞我個人 ê 喙斗來講，我較實是感覺愛沙尼亞 ê 物食較敆我 ê 脾土。

 露營區 ê 貓霧仔光

愛沙尼亞有 tsuē-tsuē 露營區是佮徛家敆做伙，這搭露營區是 gún 繼續向首都塔林前進 ê 歇暝站。

扞家 ê 主人是一位藝術家，有一隻古錐 ê Chow-Chow 交整理甲足藝術 ê 露營區。

我無藝術天份，sóo-tí 交主人家練仙練無幾句隨告辭斡向迷人 ê 阿菇。