亂皂𥴊仔店 ⓂⒺⒾⓃⓀⒾⓄⓈⓀ

猶原 tī Marburg 等待公主 Kuss ê 田蛤仔王子(Der Froschkönig oder der eiserne Heinrich)

行踏德國 ê 朋友應當攏 ē 按呢分類德國浪漫台3線 --- Romantische Straße 浪漫街路，Alpenstraße 阿爾卑斯山街路，Bürgenstraße 城堡街路，Fantastische Straße 夢幻街路，Geothestraße,Rhein-Mosel-Donau Straße 歌德，萊茵河 - 莫瑟(sit)河街路佮世界上出名 ê 童話故事「Märchenstraße 囡仔古街路(童話)」。

這篇 m̄ 是記錄你 ê 深跍訓練敢有實櫼 ê uī-tio̍h bueh 看田蛤仔敢有變王子，就愛𬦰梯𬦰甲 phīnn-phēnn-tshuán ê Marburg，這篇是 bueh 記錄交伊𫝛款是按 Grimms Märchen 格林童話(囡仔古)生湠 ê Märchenstraße --- Alsfeld。

Gotik 哥德式建築 ê Rathaus(市政府辦公室，正手爿)

13世紀提著城市權利 ê Alsfeld 是中世紀重要 ê 商業絲路，不過伊交歐洲 tsuē-tsuē 城市相𫝛敢若一落塗就 hōo 人類決定伊 ê 八字，行過三十年戰爭(1618~1648)交有百年厝，無百人主 ê 繁華落坐轉樸實。

交歐洲 tsuē-tsuē 城市行過人類帶來 ê 苦湯 ê 伊，目今無 Heinrich ê 好字運 hōo 公主唚一喙就按田蛤仔成做緣投 ê 王子，伊猶原跟綴著 Hänsel und Gretel 番薯佮月桃 ê 蜜甜。

市政府大埕

Alsfeld 按百外冬 ê 繁華行向百外冬 ê 落坐，tī 工業革命跟綴新時代建設鐵支路 ê 伊無因為鐵支路受惠成做臺中，伊 mā 因為麻雀無法轉做鳳凰生湠出另外一个幸運 hōo 伊 tī 21 世紀按軟市行向交易。目今 ê Alsfeld 有 400 外搭文化遺產(Liste der Kulturdenkmäler in Alsfeld)。

Mainer Tor(城門)歷史紹介

Alsfeld ê 名稱起源，有傳說是西元 1200 年 Hessen/Thüringen 黑(hik)森/圖林根公爵(kong-tsiok)騎馬經過 Vogelberg 鳥仔山到倚 Alsfeld ê Homberg 山崎搪著落山風，伊講「Tshan-tshiūnn 帽仔按我 ê 頭殼頂落落來」(Als fällt mir der Hut vom Kopp)，「Als」tī 當地有逐擺、見擺、串(tshuàn)擺 ê 14，然後「Als fällt」成做 Alsfeld --- 敢若田洋。

Alsfeld 是按怎按地方講法成做目今通用德語敢若田洋 mā 有這款講法，伊是當地人 ê「合音」tshan-tshiūnn 台語 ê「昨昏」合音是「Tsa̋ng」。

有歷史 ê 舊厝宅

M̄ 管伊 ê 字名是按公爵 Als fällt 敢若落落來生湠抑是按當地人 ê 合音轉化，Alsfeld tī 1069 年號做 Adelesfelt tī 1222 年正式造冊做城市字名。

本底是天主教教堂，1521~1522 Martin Luther tī 遮蹛一冬轉做新教教堂 Walpurgiskirche

根據 Walpurgiskirche ê 考古研究，tī 9~10 世紀遮就有一間羅馬式教堂，起造時間凡勢是加洛林王朝 Karolinger。

Walpurgiskirche

Alsfeld m̄ 是我第一擺行踏，Walpurgiskirche mā m̄ 知來來回回行過幾百回，總是戇目 ê 人就是上𠢕 m̄ 捌字，看告示攑香綴拜，這搭有人隨攑旗軍仔綴仔喝，彼搭無人隨散陣。

這斗交翁做陣行踏 Alsfeld 見著一大陣人徛踮教堂門口隨攑香綴拜徛倚過看斟酌。

「Luther mā tī 遮交伊是考古學重要 ê 來源之一」我若綴人雙目金金相，手頭 ê 旅遊冊 mā 拚勢反。

「M̄ 是我這个引路人無專業是恁 ê 旅遊編輯大細目，懸低耳」我手指十外冬前 ê 旅遊冊，食這途 ê 翁喙角趒兩下笑講「我 buē 講你是耳仔生兩葉，家己看 buē 著。」

「確實 kā 問題捒 hōo 別人比要求家己精進閣較簡單 ê 咱是圓仔炒大麵，膏膏纏 kan-ta 這項」我笑應。

向時是肉店，現此時是 Pizza 店 ê 舊厝宅

1180 ~ 1190 Thüringen 圖林根公爵 tī 這个有高速商業絲路(Kurze und lange Hessen) ê 角勢起造堡寨➀，自彼時開始，Alsfeld 就隨成做臺中七期，家甲 mā 固定落 tī Hessen 黑森邦 m̄ 捌徙過戶口。

有歷史 ê 舊厝宅

Alsfeld tī 13 世紀按簡單行向繁華，城市 mā 因為市草交易(ka-ia̍h)帶動房地產發展，tī 這段期間除了起徛家 mā 起教堂、修道院、拉丁語學校佮猶太教堂(1359)。

Alsfeld 珍寶 --- 市政廳

Tī 這段光映映年閣，伊是神聖羅馬帝國(Heiliges Römisches Reich)市草上交易 ê 大都會之一 mā 是各路人馬意愛停跤安身 ê 角勢。

冊店

Tī 歐洲 tsuē-tsuē 角勢猶 teh 坐宗教迫害 ê 罪，Alsfeld 就已經加入宗教革新 ê 跤步，不過並無成功。

推捒宗教革新 ê Tilemann Schnabel mā 因為這个事件 hōo 扞市 ê 公爵戽出 Alsfeld，不過團結力量大，當地居民利用公投 kā 伊迎轉來 Alsfeld。

冊(拉丁語)

Alsfeld 就此按一人反對宗教改革行向眾人支持 ê 宗教改革。

有歷史 ê 舊厝宅

一場抗爭成做生理人人加入，發大財 ê 30 年戰爭 hōo Alsfeld 成做人見人驚，鬼見鬼走 ê 斷籬倒僻，1645 ~ 1648 ê 黑森戰爭 hōo 伊成做一个城市兩个管理者 ê 所在。

管理者 A. Hessen-Darmstadt，管理者 B. Hessen-Kassel。

有歷史 ê 舊宅

Alsfeld tī 20 冬 Hessen 黑森戰爭期間，按市草交易交國際化 ê 城市成做這久 ê 中東小巴黎。

Iōng 手長做量尺 ê 講法

向時 ê 百樣交易齊消失，留存農業安身到目今。

有歷史 ê 舊宅

戰爭帶來破壞佮死亡 mā 帶來新生佮重新，行過三十年戰爭人口猶原 m̄ 捌外移 ê Alsfeld，猶原閃避 buē 過 1817 凶年(hiong-nî)帶來 ê 無向望，tsuē-tsuē 當地人舉家(kí-ke)向海 ê 另外一爿美國生湠新活路。𫝛時發生 tī 法國 ê 人民反抗(French Revolution) mā 按法國生湠到 Alsfeld。

有歷史 ê 舊宅

1848 ~1849 Alsfeld 成做德國人民反抗政府重要 ê 角勢 ，只不過幫贊法國人民爭取民主自由 ê 勝利女神 Nike buē 記持愛徛倚來。

Alsfeld 人口 tī 這斗 ê 抗爭是對折閣對折 ê 大量減少。

1680 開業到目今 ê 鞋仔店

19 世紀工業革命行跤到，向時是黑森商業高速公路一份子 ê Alsfeld mā 跟綴著新時代 ê 跤步 tī 1870 開始鋪鐵支路，不過目今佮向時是鑽石佮石頭 ê 差別，Alsfeld tī 新時代 m̄ 是扞權者 ê 鑽石 hōo 伊跋一倒，押尾卻抾著一隻金雞母 ê 流擺。

斯當時 ê 德皇綿豉迎新棄舊，鐵支路經過 ê 角勢 m̄ 管有偌 tsuē 鑽石珍寶齊愛拆除。Alsfeld 政府見著這个問題開始制定建築文化保存法令，並 tī 1900.8.8 通過法案。

冊店

自彼久開始 hőng 嫌𪜶是古漚古臭交鑿目並跟綴時代 buē 著需要擲挕捒 ê 拋荒工廠、徛家沓沓仔重新翻新並保存。

十外冬前伊生做這个生張，十外冬後伊猶原保持原樣，正經是 Forever young

Alsfeld tī 二戰期間 mā 因為城市徛位無閣向時 ê 重要 hōo 𪜶閃避食炸彈 ê 機會，不過規个城市猶原無法度閃避陸軍無生目睭 ê 銃子火炮。

聖誕阿公十外冬前徛𫝛位，十外冬後猶原徛𫝛位

市草交易是福抑是災，這 tuì 低路人 ê 我來講是僫拆 ê 學問，總是我清楚知影 Alsfeld 若 tī 工業革命無智覺著爸公業 ê 重要，這久 ê 𪜶無可能 kan-ta 倚靠農業就成做市草交易 ê 田庄。

有百年厝，無百年主

時間 buē 翻頭，我 ē 翻頭。

這斗見著阿媽 ê Ka-pi 店已經貼告示 bueh 過盤，我想著有百年厝，無百年主，向望有人繼續傳承阿媽 ê 好手路 hōo 我再次翻頭有機會接續好味素。

當地出名物 --- 鹹雞卵糕

十外冬前行踏 Alsfeld 街市無這久 ê 交易，當地人 ê 生活重心(tiōng-sim) mā 較無栽 tī 觀光這地。

這斗行踏 Alsfeld 想著猶未過晝，Ka-pi 廳、麭店、餐廳齊開門 hōo 我想著頂回交阿 V 來遮行踏，見著人兜大門開開隨行入去交觀 ê 笑詼代。

「我下晡 4 點 tsiah 做生理，m̄-koh 你已經行入來，我 mā 歹勢 buaih kā 你做生理。」

這斗交翁做陣行踏 Alsfeld 見著伊按軟市轉做三跤步一坎站，我想著這件笑詼代隨牽翁 ê 手行向日時種田，暗時開店 ê Ka-pi 店。

「頭家猶原 tī 做穡」我笑講斡頭行向凡勢是戇目 hōo 家己 m̄ 捌斟酌，mā 凡勢是目今市草交易 tsuē-tsuē 在地人一家拆做兩戶，一戶做穡，一戶做生理。

「你進前敢捌食這雞卵糕？」翁問。

「第一斗見著，不過伊有臺中海線 ê 滋味。」

這鹹雞卵糕，實在有夠好味素！！！

紅帽仔(Rotkäppchen)

Alsfeld mā 是格林童話紅帽仔 ê 故鄉，遮按 Gebrüder Grimm 格林兄弟生湠無仝 ê 面肉 mā 生湠出 tsuē-tsuē 格林童話 ê 商品。

「遮 ê 童話，你認捌幾个？」我問翁。

「齊捌，不過跟綴𪜶 ê 故事行踏田庄城市，這是第一斗」翁笑應。

咱 ê 珍珠是別人目睭 ê 石頭，這款問題是逐日接觸甲慣勢 ê 麻痺抑是近廟欺神永遠是上讚 ê 事項？

我 m̄ 知影，總是按遮 ê 過程我學著無成做貓，萬項事攏是心適興。

Hanse im Glück

Der gestiefelte kater

Hänsel & Gretel

Aschenputtel 佮 Der Froschkönig oder der eiserne Heinrich

因為車日子閣愛看 Der Camping Check ê 我見著這跟綴年間變化 ê 露營車 hōo 我 tuì 喙講簡單 m̄-koh 露營物件 m̄ 捌減 ê 翁喙賤。

「簡單車日子 m̄ 是牽一台 T1。」

德國人是 kā 露營當做露營抑是展富貴，𪜶家己上清楚。

Alsfeld 附近 ê 露營區。

有向時 ê 放牧(pàng-bo̍k)生活通體驗 mā 有現代不可挕捒 ê 需求 --- 電視交網路。

網路無安 tī 露營地，安 tī 公共廚房。

本底掠做德國做穡人兜無飼貓，至少 gún 蹛 ê 所在 m̄ 捌見過阿貓出現 tī 做穡人兜。

這回 tī 露營區搪著一大陣貓 hōo 我 buē 記得遮 ê 貓是飼來掠鳥鼠 m̄ 是做囡仔 ê 愛保持距離，特別是猶未轉大人 ê 阿貓。

實在有夠失禮。

總是，我猶原知影愛檢討，特別是這久整理遮 ê 相片，想著主人家有話想 bueh 講 m̄-koh 歹勢講 ê 表情。 

過去 ê 無斟酌無法度改變，現今 ê 斟酌無底 tuì 人講，只好 kā 遮 ê 記持深深鏨入心肝穎提醒家己 m̄ 通閣戇頭戇面 m̄ 是款，畢竟本底有通食穿 ê 阿貓凡勢因為我成做有路無厝貓。

畢竟，做穡人飼 ê 貓 m̄ 是飼來育飼來惜，是飼來倒做穡 --- 貓 tī 德國目今猶無受法律保護，sóo-tí 當伊 hőng 掃出去，伊無狗仔 ê 好字運通 hőng 閣送轉去原生家庭繼續照顧兼納保險。

2023 年車日子露營錄 --- The End

➀ 德國 ê Hamburg, Heidelberg, Schloss Neuschwanstein tī 華語齊翻譯做「堡」，總是這三个堡是無仝 ê 堡。Burg 是防禦性 ê 建築，我 kā 伊號做堡寨，Berg 是山，Schloss 是 Disney 片頭 ê 城堡。