亂皂𥴊仔店 ⓂⒺⒾⓃⓀⒾⓄⓈⓀ

日本文學 tuì 我來講較生疏，應當講規个日本文化 tuì 我來講攏生疏。

青春少女，逐个朋友攏 leh 痟日本歌星日本劇，我原仔 teh 讀西方文學佮收藏西方影戲。

這久朋友 teh 痟中國戲齣、泰國戲齣、韓國戲齣，我 teh 揣臺文出版冊讀臺文閱本。

自囡仔時到今佮意 ê 事項攏 bueh 相𫝛無啥變化，唯一 ê 變化日本文學開始 teh 讀，日文 mā 開始沓沓仔 teh 學。

是按怎 ē 按呢生?

我想這應當佮夏目漱石(なつめ そうせき) ê《吾輩は猫である》(I'm a cat)有關係。

按怎講?

伊讀起來 buē 遐爾仔沈重。

是，日本文學 tuì 我來講足沈重，雖罔讀過 ê 文學無 tsuē，總是聽老師分張抑是家己讀攏 ē 想著 Before the Rain。

第一擺聽日本文學是上藝術概論課，彼陣老師講甲喙角全波，我 ê 耳空 kan-na 聽--著 Before the Rain ê 樂聲 teh 踅 。

成做一个人已經無法得選擇家己出世 ê 所在佮愛情等等，閱讀是我唯一有法得選擇 ê 快樂。

我 ê 愛情無 tshan-tshiūnn 電影遮爾仔無法得選擇，但是 tī 逐家心肝穎 lóng 蹛一个警總 ê 年間，閱讀確實是引𤆬愛做夢 ê 囡仔行出烏暗 ê 鬱卒。

是--lah，我就是 bueh 綴電影佯青。

我 ê 人生無遐爾仔無捨施，總是青春 ê 我 tuì 10分鐘 ê 故事需要 iōng 百點鐘來吸收，實在無彼个美國時間 ê 耐性。

Tshan-tshiūnn 彼陣《尼羅河的女兒》聽講這久綴本姓《王家 の 紋章》我看無幾本就放棄，起因伊佮往過號做《小叮噹》現此時號做《ドラえもん》佮《怪博士與機器娃娃/Dr.スランプ》相比並，伊若 teh 踅磅空行 buē 出--來 hōo 我放棄。

我 m̄ 捌讀過《吾輩は猫である》m̄ 知我讀 ê 版本敢 ē tshan-tshiūnn 彼本 m̄ 知 hōo 我囥去佗位 ê Hermann Hesse ê 詩 hőng 按德語準做英語 kā 伊翻譯做華文按呢 ê 中國糜鹿(四不像)。

總是《吾輩は猫である》是我認真接觸日本文學 ê 第一本 mā 是引𤆬我行入日本文學 ê 𤆬路雞。

這本《銀河鐵道 ê 暗暝》是我第一擺接觸，伊 hōo 我 ê 感觸無 tshan-tshiūnn 頭前兩本《你無聽--過 ê 格林童話》、《青瓦厝 ê 安妮》佮《悲慘世界》隨讀隨有深深 ê 感觸，總是這久 uī-tio̍h bueh 記錄家己 ê 虛華，那寫那翻草故事，想著故事結尾 ê 一段話「石邦尼感覺甘派禮定著去到遙遠ê河銀邊ah」我 mā 是按呢想彼暝過後 m̄ 捌閣見面 ê 二姊徛踮媠媠 ê 花園 tuì 我微微仔笑，tshan-tshiūnn 石邦尼佮潘派禮做伙 tī 銀河旅行，最後「石邦尼目睭peh金，原來是siunn thiam倒tī山崙ê草á埔睏去ah。心肝頭燒燒、真ak-tsak，冰冷ê目屎四淋垂。」

《銀河鐵道 ê 暗暝》

銀河鉄道 の 夜 von 宮沢賢治

主編.台譯：陳麗君

㊓ 前衛出版社

ⓦⓦⓦ 聚珍臺灣