亂皂𥴊仔店 ⓂⒺⒾⓃⓀⒾⓄⓈⓀ

㊔ 陳雷

㊓ 金安出版社

ⓦⓦⓦ 台灣e店

前一站仔寫講無想 bueh 繼續 tī 遮記錄食譜，起因已經 kā 伊寫踮愛料理(Icook)。

今仔日料理魚指菜蔬盤步頻想 bueh 繼續 tī 遮記錄食譜，這段掠做沈入大海 ê 話隨成做伸冤 ê 眾生浮出水面 tuì 我講「就 kā 你講 m̄ 免你灌 luā-tsuē 紅毛塗踅 luā-tsuē 石頭，有一日我猶是 ē 浮出來」。

' 愛料理寫，遮 mā 寫是食飽傷閒驚人揣無你是 m̄ '

這久看彼久正經是食菜，食菜，食到肚臍為界 ê 乞食攑蠓捽仔，講話無算話兼假仙假觸。

雖罔按呢，我家己 mā 清楚我並無枵狗痟想豬肝骨，枵貓痟想海底魚佮興 m̄ 知路，閣欲攑頭旗，就隨解脫紅龜生蟲，龜怪 ê 情緒叨撚。

講著情緒叨撚，這件代誌誠實有 14，明明就是無一仙人要求我 uī 𪜶做寡啥，我卻硬 bueh kā 家己捒入去彼窟死水沐沐泅。

是按怎 ē 按呢生，我 ê Tatort 猶原挐氅氅，不過迵過寫 Blog 我 ê 刑事現場 mā 沓沓仔整理出是按怎我 ē 遮爾仔戇狗顧山草 ê 十二月風吹，見做寡狗咬鐵釘無聊代。

教育佮社會催眠 --- 這是目前挽瓜揫藤 ê 答案。

另外，我捷剾洗夜間部同學愛 kā 一日過一年，一年過百冬 ê 外甥仔點燈火，一切照舊，我家己 mā 相𫝛只是我 kā 燈火妝娗甲較媠淡薄仔。

那料理那佮 Zarathustra 相放伴搜揣 gún-ê ê Übermenschen，我知影我這條路 bueh 按怎行。

手頭羅經猶原揣無四方，按呢就放輕鬆揣一搭停跤恬靜綴看無界限 ê 五路敕氣吐氣過心火擲歹癖。

讀無《殺鬼》m̄ 是我智識無夠，是別人 ê Le Fabuleux Destin d'Amélie Poulain 佮我無相𫝛按呢 niā-tiānn，就敢若我寫 ê 食譜佮文章一屑仔攏無啥相干，起因遮是我 ê Die fabelhafte Welt(十全世界)。

㊔ 甘耀明

㊓ 寶瓶

ⓦⓦⓦ 博客來

出發 Balkan 前受著〈麵線婆的電影院〉引𤆬我繼續上網請博客來 kā 我鬥寄這位 tī 臺灣文學界真有份量，不過 tuì m̄ 捌一字一劃 ê 我伊是生份作者 ê《殺鬼》繼續綿精綴出版社「每個人心中都有一座島嶼，藉文字呼息而靜謐，Island，我們心靈的岸」。

㊔ 甘耀明

㊓ 寶瓶

ⓦⓦⓦ 博客來

總是讀這本《殺鬼》tuì 我來講是隱痀捙畚斗，食力兼歹看...

我 m̄ 是講冊䆀看是我認捌 ê 文字、歷史佮工業攏捎無頭摠，自然就真僫綴《喪禮上的故事》kā 伊一暝讀透透，不過猶原愛拆白講，每一斗 ê 旅行揹仔、鞄攏 ē 踅冊，遮 ê 冊無一本捌 tī 跤花四界栽 ê 時讀 hōo 煞，sòo-pái 紮去做伙旅行卻讀無煞 ê《殺鬼》並無啥物特別，總是伊卻成做我 ê 照妖鏡 hōo 我理解原來我 tuì 這个我掠做我上捌 ê 符號一屑仔攏 m̄ 捌 ê 齷齪。

總是，齷齪規齷齪，我是揀後注，無揀大富 ê 性地，無興成做茶鈷哭呻隨換《無情城市》敨筋挽倚來。

《無情城市》是我紲《阿春無罪》佮《歸仁阿媽》請台灣e店 kā 我鬥相共寄冊 ê 其中一本 mā 是這三本內底上尾讀 ê 一本冊。

讀《無情城市》想著家己寫 ê這段話「𪜶 ê m̄ 捌 m̄ 是我 ê 問題」，殺鬼讀無是我 ê 問題 m̄ 是作者 ê 問題，遮 ê 問題我攏清楚總是是按怎手提羅馬字 ē 比臺語漢字佮華語漢字閣較自在，準做陳雷醫師 ê 文字 tuì 我來講是按水帕(phè)就熟似 ê 歌聲，是按怎這久 ê 伊 ē 成做 Mǹg-sǹg hōo 我驚惶？

「美--a，啥物叫做 suí？」𪜶某心內龜怪，thài 會一个人好好 pua̍h 一倒，無頭無尾問這款問題，應講：「Suah m̄ 知，看了會歡喜--ê tō 是 suí」koh 問：「啥物叫做 bái？」 「A̍h 若看了無歡喜--ê tō 是 bái。」「莫怪我 m̄ 知，我無目睭看。」發--a 吐一个 khuì。𪜶某 lú khah 奇怪，問：「發--a，你外面啥物代誌？」發--a tiām-tiām，kā 𪜶某 giú uá--來，suah 伸手摸伊。十枝指頭 á 先摸伊 ê 身軀，koh 摸伊 ê 手，才摸伊 ê 面。一位一位細細膩，像 teh 掠龍按呢摸，一晡摸透透，才講一聲：「Suí。」 𪜶某想講伊 teh 滾笑伊，罵：「你無看--見，m̄-thang 烏白講！」發--a 又 koh 摸伊 ê 面，講：「我目睭無看見，這十枝指頭 á 有看--見。𪜶目睭看會著--ê，我攏摸會出--來。」

--- 《歸仁阿媽》〈阿bái〉

原來，我 m̄ 是 m̄ 捌 m̄ 驚，我是全捌猶原驚。

Gún 阿母加陳雷醫師2歲，伊是按捌一屑屑仔一字一劃 ê 日本年間行到民國年間 ê m̄ 捌一字一劃 ê hőng 大大典典講「遮 ê 人愛擲去焚化爐燒 ê m̄ 捌字兼無衛生」ê 族群。

伊講 ê 話，我 mā 捌大大典典按呢 tuì 伊講「我聽不懂」，這久熥彼久 kan-ta ē-tàng 講自信無夠額，總是年間已經無相𫝛我 tuì hőng 改造 ê 基因 mā 無閣纏綴向時 ê 只要我莫講阿母 ê 話，我就 ē 按猴成做王昭君 mā 免加時間佮人起交繃，是按怎我猶原滓著〈凱西講 gû〉ê「凱西，媽媽帶你去婆婆家....」m̄ 願講「阿母惜、阿母惜...乖乖 m̄-thang háu...」龜龜鱉鱉、掩掩揜揜。

是按怎 ē 按呢生，我 m̄ 是認定我已經迒過這个張身勢 ê 做木 ê 戴枷。

順 An der schönen blauen Donau ê 匈牙利划到 România Eselnita 倚奇麗藍色 Donau 河 ê 露營區搪著一位 kan-na ē 曉講羅馬尼亞語 ê 序大，伊 uī-tio̍h bueh hōo gún 理解 gún kā 伊請教 ê 問題 - -- 伊敢知影露營主人家 tī 佗位，伊勻勻仔 iōng 家己上自在 ê 語言兼比跤劃手 hōo gún 看。

凡勢是捷 hőng 講「我講話 buē 扭掠兼牛聲馬喉」sòo-pái 我 tuì 歌聲豆芽菜無反應，總是我臆有序大 ê 14 手綴 mā leh 比「伊等下就 ē 出現」，總是 gún 翁凡勢 m̄ 捌 hőng 講過「你講話呔 ē 遮爾仔無扭掠」佮伊凡勢猶滓著𪜶爸母 ê 喙瀾真愛唱別人 ê 歌來張身勢展風神，伊就繼續一直問「Do you know where the owner is?」

我送一个反白睚(kâinn)，序大 mā 那笑手那比，我無想 bueh 徛踮遐聽 gún 翁掠做伊按呢繼續英語教學 ē 有任何應效，隨 tuì 序大手指我四界行行看看，序大 tìm 頭表示細膩，我繼續送一个白仁 hōo gún 翁兼剾洗「你 ē-tàng 繼續按呢英語教學 tshan-tshiūnn 恁老母想 bueh 教我伊看 buē 上目 ê 祖先仔話」。

我 m̄ 知影露營主人家當時出現，總是我順奇麗 Donau 成做擲圓石仔 ê 番薯《你無聽--過 ê 格林童話》按呢一路行轉來，gún 翁已經 kā 車駛入去露營區佮序大𫞼仝位 ê トラック mā 是。

彼暝，天頂 ê 星敢若柴樠點火遐爾仔光，露營區 ê 人來來去去，我手提《無情城市》佮天頂天星做伙讀冊。

露營區主人家行倚來問 gún 翁 tī 佗位，西班牙語 kan-ta ē 曉 lo se, no se, si 簡單字句 ê 我手指徛踮トラック邊仔 ê 翁，主人家滿面笑容斡頭行向彼个 hōo gún 佮伊覕相揣 ê トラック。

我越頭看彼本插 tī 車門 ê《殺鬼》耳空聽佮 gún 翁𫝛款掠做繼續熥「英語」主人家翁仔某決定聽有𪜶 teh 講啥，不過講德語、荷蘭語 m̄ 管啥物語言主人家攏 ē 想辦法理解你 ê 需求佮提供協助。

有歐元佮一个 kā 西班牙語講甲真老 ê gún 成做主人家 ê 外匯中心，tī gún 翁 kā 歐元換 hōo 捌 tī 西班牙做穡 20 外冬 ê 主人家，我笑講「講英語 ê 人敢無發現遮 ê 國際語言是西班牙語。」

「𪜶應當攏佮我相𫝛掠做幔別人 ê 衫就是𠢕人」翁笑應。

我無興成做十八街仔甲長，總是我 mā 無法度看 gún 翁按呢 ê 行踏，tī gún-ê 事項一切攏安搭好勢，我開始佮伊討論拄才發生 ê 代誌，最後提醒伊 mā 提醒我家己「上蓋重要的物件，用目睭是看袂著的」佮自信無夠額 m̄ 管家己敢有《後天美女製造機》抑是按 Fat Amy 成做  Jelena Noura "Gigi" Hadid《靈魂裏的胖女孩》永遠纏綴。

彼日主人家發生啥物代誌?

伊 tuì 序大囝婿 kā トラック改做露營車真好玄，就請序大囡婿 kā 伊小小仔紹介一下，落尾手換 gún 翁 mā 牢 tī 彼台トラック。