亂皂𥴊仔店 ⓂⒺⒾⓃⓀⒾⓄⓈⓀ

我愛聽你唱歌，我 mā 愛唱，咱攏 leh 唱歌，只是咱 ê 懸低音無相𫝛按呢 niā-tiānn。

我 buē 講家己 ê 台語真𠢕講，總是伊是我自細漢講到今 ê 語言。

我 ê 年間無機會接受台語抑是客語教學，現此時有機會迵過教育部兩部辭典佮其他辭典學習台語佮客語，我感覺家己誠實是好字運。

雖罔，我 ê 客語自開始接觸學到今猶原離離落落，總是客語 mā 是我音樂庫 ê 一部份，而且有足 tsuē 美好 ê 記持。

自2019年開始寫台語文，我 buē 講家己 ê 台語文寫甲若 Johann Wolfgang von Goethe， 總是我 mā 無 kā 伊當做啥物形態 ê 品牌，我只是 kā 我上捷講 ê 語言寫落來按呢 niā-niā。

我家己 mā 知影，我有真 tsuē 文法纏綴華文書寫，認捌 ê 俗諺語 mā 少甲悲哀，總是我清楚知影每一个文字書寫攏是經過久長 ê 訓練，無一个人一出世就 ē 曉寫文章佮讀文章。

Sòo-pái 我真感謝家己出世 tī 這个年間，有機會學習 tsuē-tsuē 無相𫝛 ê 語言佮書寫，包括台語。

我唱過足 tsuē 歌，畫過足 tsuē 豆芽菜，現此時猶原有法度 kā 遮 ê 歌唱 hōo 較順，畫甲較媠寡--ê kan-ta Blog 書寫 ê 語言 - 臺灣台語、德國德語、無分類 ê 英語佮無 tī 書寫 ê 臺灣華語文。

我足愛學語文，總是我 mā 知影家己是尻川坐未燒 ê 未食硞硞綴，食無幾喙隨嫌白汫無味 ê 性地。

Sòo-pái 現此時猶有法度鬥句 m̄ 是成做紅嬰仔 teh 學講話 ê 一字、二字，攏是自本就有 teh 講 ê 台語、學校要求 ê 華語佮講 lán 愛學習 ê 英語，抑是現此時入人門，順人意 ê 德語。

我足愛唱歌，我 mā 知影 kan-ta 靠自本有 ê 音感是無法度楦闊家己 ê 跤步。

Sòo-pái 我 mā 利用時間參加台語課，準做台語課 ê 時間佮我 ê 時間是門扇枋鬥 buē 峇，總是柴箍有法度成做門枋是經過敆作師傅 ê 手藝，我 ê 時間 buē 敆逝 m̄ 是大問題，起因遮 ê 工作環境較 m̄ 是一个人講了準算。

門扇枋鬥 hōo 峇峇了後 tsiah 發見我綴 m̄ 著陣 ê 去時紅膏赤蠘，轉來鼻流瀾滴。

押尾我這个捷 hőng 講 buē 扭掠 ê 人就誠實去鼻仔頭喘➀，無 kā 課上甲 tsiâu-tsn̂g。

今仔日聽台灣人台灣事249【台語女性書寫】王薈雯 hōo 我想著參加過 ê 台語課佮德語課。

台語課我 kan-ta 捌參加過彼擺，德語課若無德國政府 ê 規定，我 mā 是 buē kā 上甲 tsiâu-tsn̂g。

我知影師傅𤆬入門，造化在個人，總是無一个人佮意 hőng 當做戇--ê teh 伴教學者 ê 巧佮𠢕。

每一个 m̄ 管本身佮意抑是 uī-tio̍h 食一頓飯去學習新事物 ê 人，攏需要一个有法度引𤆬學習者去認捌這个新事物 ê 人。

畢竟，現此時已經 m̄ 是學一个工夫絕對 ē 咬齒根三冬 ê 年間 m̄-koh 猶原是無後台，行無跤步 ê 年間。

Tshan-tshiūnn 教育部若無起手統一台語、客語、其他族語 ê 用字佮羅馬音標按怎發音，我相信到今我猶原是「匿/li̍k」佮「覕/bih」雙跤踏雙船，心頭亂紛紛無法度 kā 華語文 ê「藏起來」iōng 台語文順順仔寫一篇文章。

起因，我包穩後回再相見猶原 m̄ 知家己 tī 寫啥。

有標準化後日再相見就 tshan-tshiūnn 搪著日文 ê「挽肉」，buē 講「bán-bah」抑是「ㄨㄢˇㄖㄡˋ」ē 講「Hikiniku」就算講我 ê 五十音學甲離離落落無法度讀寫ひき肉，我猶原知影愛講「Hikiniku」。

師傅𤆬入門，造化在個人。

我真感謝初初讀台語文是搪著無分類 ê 作品，我 mā 真感謝初初聽台語文講 hōo 你聽是搪著王秀蓉老師 ê 我咧唱歌。

雖罔，我並無通篇聽 hōo 煞，總是 tī 彼段揣無東南西北 kan-ta 搪著 buē-su Peoples Temple ê 日子，王秀蓉老師 ê我《我咧唱歌》hōo 我一个足清楚 ê 方向感 mā hōo 我 tī 綴 m̄ 著團揣著自我消遺 ê 哲學。

咱臺語若拄著無想欲聽人講話，會共譬相講「我聽你咧唱歌」。有影呢，我自言自言寫家己，自彈自唱說悲喜。可能是一寡四常、恁無興趣的代誌。恁可能會閣較想欲唱講「我聽你咧放屁」。莫共我嚇啦！上無，會當用來學臺語字。

-------- 《我咧唱歌》，自序

近來無事揣事想 bueh kā 標題分類做「掠肥食肉」、「掠肥食麵」遮 ê 較短 ê 主標題 hōo 家己敨放看著連結一大拖文字 ê 齷齪。

是講當初是按怎 ē 寫甲遮爾仔落落長，簡單一句掠做我 mā 綴人按呢寫，tī Google 這个愛看 tsuē 無愛看少 ê 慣勢內底決定徛有一个角勢。

總是代誌 m̄ 是戇大呆我想 ê 遮爾仔簡單，理解虛華 mā 是需要後台 tsiah 行有路 ê 我隨放 Google 有緣做牽手，無緣做朋友 ê 免拖磨。

自開始整理標題佮餾內容，我發見 tsuē-tsuē 水管 buē 通抑是掠做漏已經掠甲足頂真，漏猶是 tī 遐 ê 問題。

拄開始，我真認真一篇一篇改，一篇一篇餾，落尾手我決定接受紅花 buē 芳，芳花 buē 紅 ê 萬事無十全 ê 龜怪。

總是講，我 mā 無遐爾仔堅持愛十全，總是我無愛別人 ê 孔子媽教--ê，家己就愛較斟酌繩家己寫 ê 文字佮用法。

其他--ê，tshan-tshiūnn 頂年記錄 ê《車日子❀露營》準做翻頭轉去看遮 ê 一晃過三冬，一晃過一世人 ê 兩光文章，伊猶原是我彼當時 ê 心情 m̄ 免嫌伊破帆無媠。

總是，早前有一个慣勢就是每一篇「讀文佯青」攏佮意 kā 楔入去食譜尾溜做記錄，這久整理文章拄好 hōo 我一个機會練習粗糠還粗糠，冇粟還冇粟 ê 食歸食，讀文還(huān)佯青 mā 順紲清歇睏三月日 ê 剪蟲。

我 m̄ 知影，文昌君當時 bueh 相揣，總是 tī 這段剪蟲清 buē 了 ê 日子，遮 ê 透濫文章猶原有法度挨挨陣陣出現 tī 我 ê Blog。

3冬前 ê 文章看3冬後 ê 文章，我 ē 講我原仔有 leh 進步，準做別人認為我牛聲馬喉又閣是十肥九呆，無呆狀元才 ê 九呆，我猶原無要意，起因我愛唱歌 mā 愛聽別人唱歌。

語文是小金英，伊 m̄ 驚孤單插人群，起因伊佮意綴風飛，綴蝴蝶走、綴蜂四界硞硞踅。

Tshan-tshiūnn 王秀蓉老師另外一本散文《咱來讀讀/ Lán Lâi Tha̍k Tho̍k》ê〈杯子〉「Demitasse」，伊是英文 mā ē-tàng 拆做講是法文佮德文。

我 m̄ 是語法專家，總是我知影 Demi 是法文一半 ê 意思，Tasse 是德文 ê 杯子，兩个敆做伙成做英文 ê「Demitasse」。

一个字湠做三个語文，這敢 m̄ 是小金英，m̄ 管伊飛到佗落，伊猶原是伊家己，精差伊化做本埠 ê 生張。

➀ 能力無夠，去邊仔喘 mài 鎮地

《我咧唱歌》

㊔ 王秀蓉

㊓ 前衛出版

ⓦⓦⓦ 博客來