坦白講，初讀這本書我讀甲足痛苦，這个痛苦 m̄ 是文字標準化 ê 問題，畢竟身為一位台灣人 tsuē-tsuē 少少攏 hőng 訓練到讀有台華文 ê 火星文，無法度完全理解文字，規个文句 kā 伊接做一幫火車 mā 知影意思。
初讀這本書 ê 痛苦是劉副教授使用大量日治時期 ê 文句，遮 ê 文句準做有註解，猶是 hōo 我真僫消化，像「撮汰(Tseh-thuah)，浪費；糟蹋；作賤...等等」，我想 bueh kā 伊鏨 tī 海馬迴，總是無一斗成功，後來放棄，不而過遮 ê 文字成做我口白書寫台文 ê Muse。
《Tò-tńg 倒轉》寫寡啥物故事，我無台灣人台灣事 Hena Ma 或是阿愷之聲阿愷 ê 好喙水就莫乞食攑蠓捽，假仙假觸。現此時 ê 我 kan-ta bueh 順公視台語台 ê 報導接劉副教授 ê 小說之一〈Puigcerda Nuevo〉來接力這篇報導 ê 內容。
德國 Leipzig 人稱呼家己是 Kleine Insel in Sachsen（意思是𪜶交這个州 ê 人無相𫝛），迵過法國交 Puigcerda 對看 ê Llivia mā 相𫝛，只不過𪜶 m̄ 是像 Leipzig 人滾耍笑認為家己 m̄ 是彼个州 ê 人，這段歷史簡省百萬字，我 mā 無才調解釋。
Catalunya 文化長期交法國相倚，親身行踏一逝 mā-ē 發現遐 ê 人大多數會曉講法語，外來語主要 ê 翻譯語文 mā 是法語，Catalunya 文讀起來像法文，讀出聲就完全無 Bonjour 棉仔糖 ê 氣味。根據 gún 翁 tī 遐做學生 ê 經驗，斯當時 ê 西班牙 tuì 學生 ê 第一外語教學是法語，因為這个因端，伊 ê 語言庫 m̄-tsiah 增加第四个外語，法語。現此時 ê 西班牙教育敢猶原相𫝛，這就 m̄ 知機囉。
劉副教授短篇小說 ê〈Puigcerda Nuevo〉ê Puigcerda tī 12 世紀是 Catalunya ê 首都，不而過 Catalunya 王國上早建立 ê 首都是徛位 tī 法國 ê Llivia，建城時間八世紀，這座城市到今猶原屬西班牙。
閱讀是好代，伊 hōo 失散 ê 記持跟綴〈Puigcerda Nuevo〉骨力做膨鼠 mā hōo 我發覺，家己正港有進步，交 Pyrénées 惜別 tsuē 冬再次相見，斯當時若帶膭 ê 荏身行跤已經過門 hōo 過去。
劉副教授 ê 兩本小說隔十冬閣兩月日，伊 tī《翻身．番身》寫著文學徵文 ê 感想，寫著是啥物因端 hōo 伊無放棄寫作，其中有一段是「我將試驗ê層面換做『題材』，嘛較致心欲予讀者讀著khi-moo會giang，若袂，是個人才情無夠，我有盡量--ah」。
Tī 這个文字 m̄ 是 Heiliger von Bingen tuì 長期向伊寄付 ê 農婦講「神 buē kā 智慧交 hōo 非王公貴族之人」ê 年代，準做你有飽膭 ê 智識，雅緻 ê 筆尾，tī 人生 kan-ta 致意奶喙仔 ê 人，猶原是鑿目khi-moo buē giang。
這兩本小說無經過十冬閣兩月日 tsiah 交我見面，我 mā 讀 buē 出有啥物精差，若是硬 bueh 欹空，我 kan-ta 會按呢講，總算無 gún 阿公彼沿我 m̄ 知影伊敢會講 ê 文句，像「會會 kuē-kuē」hōo 我總算有機會 tī 無註解內底，免繼續骨力做膨鼠揣答案。
最後，向望有一日有機會讀著《台語現代散文選》〈無正常 ê 海豬仔腦〉這類散文集。
這 m̄ 是讀冊心得 mā m̄ 是冊評，以上。
請先 登入 以發表留言。