寫著華文咱慣勢講 ê“ 城堡 ”猶是舌長一下。德文 ê 城堡分做三款，一款號做 das Schloss，像新天鵝堡（Schloss Neuschwanstein），die Burg，像遊萊茵河岸邊 ê 三跤步一坎 “ 堡 ” 彼款城堡，die Festung 像影響德國近代歷史 ê Burg Hohenzollern。以上三堡閣斟酌分落去，量其約按呢分，das Schloss 屬無防禦性 ê 建築體，die Burg 屬防禦性 ê 建築體，die Festung 屬 Schloss 交 Burg ê 互相相伨體。閣順這个話題喋詳落去，華文翻譯做海德堡 Heidelberg ê “ 堡 ” m̄ 是 Schloss, Burg 抑是 Festung，伊是 Berg 山 ê 意思。曷若來德國百面愛行踏 ê Romantische Straße（Romantic 街道）之一 ê Rothenburg 就是城堡。總結一句德文 tī 華文 ê “ 堡 ” m̄ 是齊是 “ 堡 ”。
台語講萬事講到遮，接紲主題。
Lubsko 按無名小卒成做有名有姓 Sommerfeld ê 文件這件代誌到今猶有討論 ê 空間，起因主事者 tī 1106 進前就轉去塗州賣鴨卵（1070 ~ 1103）矣。所致 Sommerfeld ê 真正身份交《開花結子》王查某第六个查某囡仔璃子𪜶翁相仝 kan-na 伊家己知影，伊真實 ê 年歲，不而過這个問題無重要，重要 ê 代誌是伊有才調延退，像 Haus Wettin（900 ~ 1126）tuì 這塊土地主權 ê 主張。
1283 Markgraf Heinrich I. von Meißen（按 Meißen 來 ê Heinrich/Henry 三世候爵）根據 Magdeburger 法律授權 hōo 伊做 “ 市 ”，1411 波希米亞國王 Wenzel IV 授權 hōo 伊有城市鑄（tsù）錢權。1411 成做 Mark Brandenburg 也著是影響波蘭歷史深遠 ê Preußen 前身。
Kā 戰爭成做生理 ê Albrecht von Wallenstein mā 來遮行踏，時間是 1627.10.16（1618 ~ 1648，三十年戰爭）。1793 遮成做 Junker ê 領地，頭一代領主 tī 遮起造家己 ê 城堡，1840 伊 ê 後代 kā 伊起造 ê 城堡重新打造，這座城堡 ê 原樣 kan-ta 維持到 1945 年。
Junker 是少年貴族也是少年領主，德國上出名 ê Junker 就是非軍人出身不而過愛穿軍服 ê 鐵血宰相 Otto Eduard Leopold von Bismarck。
Sommerfeld 自 1815 一直是 Preußen 重點改革行政區 mā 是該行政區上大 ê 城市，一直到 1945 城市面肉按繁華轉落坐。
Sommerfeld ê 工業開展按 1835 開始，鐵支路建設按 1846 開始，鐵支路線連結 Berlin 佮有足 tsuē 矮仔精靈 ê Breslau（Wrocław）。
寫著 Breslau 想著 Podcast《曼城里長辦公室》〈里長讀冊會：半島之龍〉談著越南人 ê 認同，我想著 tī Poznań 德國裔波蘭人頭家聽 gún 翁一直 tuì 伊講 Posen，伊一直笑微微 tuì gún 翁講「著，Poznań 按怎閣按怎」，啊...記持喋到甲斟酌細節有興趣 ê 朋友 ē-sái 收聽這集節目。
工業按 1835 開始，Gá-suh 廠 tī 1857 開始運作，水道水管線 mā tī 1863 開始起造。1896 城市開始徛路燈。Sommerfeld 是二戰少數無面骨全變 ê 城市。德國第三帝國 1945.05.08 宣佈投降，1945.06 進前遮已經出現波蘭地波蘭人蹛 ê 聲音，𫝛月底定根踮遮 ê 德國人口齊離開。
戰爭結束，萬事萬物挐氅氅，人民 uī-tio̍h 求生存開始四界破壞城市建築，加上中央政府無閣 kā 這个角勢認做重要地區 hōo 伊險險成做鬼城。1975 Sommerfeld 按逐日食魚食肉 ê 貴族成做食番薯簽過日 ê 普通人，按市轉鎮，本底連結四箍輾轉 ê 鐵支路線 mā tī 2011 年停止營運。
認捌 Lubsko 起因大官 ê 請求，我 mā kā 這段故事寫 tī 遮並投稿 hōo 台文通訊Bong報，名稱號做《大家 ê 熱人田洋》。
初寫這篇文章我順 gún 翁分張 ê 訊息 kā 行跤花含滿腹相踏黜 ê 感受轉做滿滿 m̄ 甘 ê 文字，這久想起來實在傷過衝碰，起因事實並 m̄ 是 gún 翁分張 ê 面目，這个豬母牽去牛墟是伊驚我譬相𪜶老爸所骨力妝娗故事，抑是𪜶老爸百百款人格設 ê 其中一款，我 m̄ 知機總是濁水轉清，魚浮現我 buē 使得 kā 相踏黜清彩 kā 準過。
以下是故事無經過妝娗 ê 面肉。
Gún 翁 ê 阿媽是護理人員 tī 1942 ~ 1945 hōo 政府派去 Sommerfeld 支援戰地病院，阿媽就𤆬阿公、兩个囡仔做陣去 Sommerfeld 生活，戰爭一結束隨搬轉來德國，順紲生湠一个紅嬰仔，屘仔囝。
故事經過妝娗 ê 面肉。
Gún 老爸 tī Sommerfeld 出世，戰爭結束因為波蘭人反對德國人就搬轉來德國，這久咱 bueh 去波蘭行跤花，伊請咱 kā 伊鬥相共走揣伊 ê 囡仔時蹛踮 Sommerfeld 三冬外 ê 記持。
Tsuē 冬前捌迵過台灣電視台聽按捷克轉來德國 ê 德國人分張伊轉來德國 ê 過程，家甲做來德國 mā 搪過幾仔个按捷克抑是波蘭轉來德國 ê 序大分張𪜶這段歷史，德國電視台 mā 捌放送按捷克抑是波蘭轉來 ê 德國人𪜶 ê 故事，遮 ê 故事無一項交 gún 翁𪜶老爸 ê 記持是七分酒 tuì 三分水拄好。
按波蘭抑是捷克轉來德國 ê 人齊有一个感受𪜶 m̄ 是德國人，準做𪜶講德語猶是外國人。Gún 翁老爸無這个問題，伊是目頭懸過天看 buē 起家己 ê 祖公仔話 mā 看 buē 起按遮轉來 ê 人。另外按遮轉來 ê 人無一个人是短短時間就揣著通徛 ê 家甲，準做家族簿清楚記錄離開百外冬 ê 祖先是按德國本土徙跤，gún 翁𪜶老爸一家伙仔卻有才調隨徙位隨入家己向望 ê 家甲，一屑仔攏無 “ 融合 ” 問題。這真正是傑克，這太神奇啦。
Tsuē-tsuē 按捷克抑是波蘭轉來 ê 人，落尾手猶是選擇轉去原家鄉，特別是波蘭，起因 “ 德國人 ” 無 kā 𪜶當做家己人。遮 ê 故事德國公共電視台 mā 捌放送。我認捌 ê 序大願意交我分張遮 ê 往事九分九聽著我講芋仔爸按中國來 tsiah 沓沓仔放裒，我相信遮 ê 序大願意 kā 拗裒 ê 故事轉做放裒 hōo 我知影百面受著芋仔爸來台灣 ê 故事影響。
順紲喋這件代誌，gún 翁交我來往進前 ê 女朋友 mā 是德國裔波蘭人，伊德國裔 ê 爸母無佮意德國人，gún 翁 mā 清清楚楚知影伊 buē-sái hōo 爸母知影伊交一个德國裔波蘭人，𪜶就按呢交往八冬無任何一个人紹介對方 hōo 爸母到查某囡仔搪著合八字 ê 人 tsiah 神歸龕，佛歸廟。𪜶到今猶是好朋友，不而過 gún 翁猶是無 tuì 𪜶爸母講伊有一位德國裔波蘭人 ê 朋友（前女朋友）。
Gún 翁𪜶老爸 ê 故事妝挺甲遐感動人落尾手呔討成做佬仔戲，彼著是戲搬甲變真猶是捙拚 buē 過真實。
我 ê 行跤花 tī 寢頭 m̄ 知影愛按怎寫就寫寡斯當時 ê 貓事，押尾掠著頭就勻勻仔改做目今 ê 面肉，tī 打掉重練 ê 過程 gún 翁 mā 三不時 kā 我鬥相共，起因有 ê 資料我正港讀無路，就按呢 “ 大跤假細鞋 ” 煏空敨我 tuì 這葩故事久長 ê 相踏黜，紲落來決定革新事實。 起因我正港無才調 tuì 囡仔搭心肝穎講 “ 獨裁者𠢕扞家是好代。”
別人囡仔死 buē 了 ê 故事發生 tī 西班牙，gún 翁𪜶老爸 tī Francisco Franco 扞權年間 tī 遐趁著人生 tsuē-tsuē 桶金，gún 翁 mā 因為這段日子 kā 西語學甲若母語。
一回翁仔某談著按古巴來德國做穡 ê 朋友伊 ê 態度 hōo 我想著 “ 階級 ” 比骨力拍拚閣較有出脫，伊就開始分張家己 tī 古巴生活三冬 ê 故事，紲落來講「獨裁真好。」
故事紲落來 ê 發展就是伊死蛇諍做活鱔魚講 Francisco Franco 政權 hōo 西班牙 ê 經濟偌好閣偌好，mā 褒嗦時間停 tī 1950 ê 古巴看醫生免費是偌爾仔好 ê 政策。我是解嚴進前出世十外冬 ê 囡仔，獨裁敢真正遐爾仔好，我無確定，總是我清楚知影𠢕讀書無背景 mā 是無較縒，像《開花結子》作者藍春瑞分張 ê 故事、《台灣漫遊錄》作者書寫靈感女主角 ê 狀況。《台灣漫遊錄》 ē-sái 收聽 Podcast《阿愷之聲》〈臺灣文學LivePodcast：文學中的臺灣史ft.楊双子〉。
伊 ê 死龜講甲活龞，露水做海水 m̄ 是今仔日 tsiah 有 ê 特色，我 mā hōo 伊訓練甲無彼个美國時間交伊練喙水，就請教伊這个問題「獨裁既然遮爾仔好，你 ê 古巴同事呔討無才調佮你平等食仝款 ê 物件 bué 𫝛款你認為料小 ê 日用物，Francisco Franco 政權既然遮爾仔好呔討西班牙人到今猶是十个有八个一講著伊是呸爛兼反白睚直接 kā 這个問題擲去焚化爐燒甲連恘攏揣無，你 ê 西班牙同學呔討一聽著伊轉去塗州賣鴨卵歡喜甲若得大獎仝款？恁德國人呔討遐 tsuē 人搢頭陣想 bueh 推翻第三帝國？你呔 buaih 徙跤去獨裁國家好好過你認為讚 ê 生活？」自彼日開始伊總算理解家己 ê 家庭教育確實有問題。我 kā 家甲做來遮 ê 龍鳳生活 mā-tsiah 有機會勻勻仔改善。雖罔到今問題猶是一大拖，總是伊已經若【新聞挖挖哇】譚敦慈家裡沒有保健食品！2026最實用健康養生指南！抗癌每年必做的救命檢查清單！乳癌九成是後天造成？女醫師罹癌致命壞習慣？20260724｜來賓：張家銘、鄭伃書、洪素卿、譚敦慈、張語希這集節目來賓鄭伃書醫生仝款，承認問題接受問題並改善問題。
徛踮臭生荒 ê 車頭我看壁頂 ê Lubsko tuì gún 翁講，恁兜慣勢搪著䆀頓粉點胭脂 kā 準過 m̄ 願意撥時間去理解問題並處理問題，這款人生態度交壁頂 Lubsko 相𫝛，徛甲遠遠遠我猶是有才調見著 “ Sommerfeld ” tī 遐，像恁老母 ê 關節炎是家己做得來 ê Arthrose m̄ 是自來 ê Rheuma，準做伊一直講彼是 Rheuma。
𪜶老母自少年就搬 buē 離 ê 我 ê 人生因為這个病症賰無幾冬 ê 戲，喋到遮就好，畢竟彼是伊搬到今猶未收煞 ê 趣味。我 ê 重點 kan-ta 囥 tī gún 翁詈我歹瓜厚子，歹人厚言言後總算相信我講 ê 話，𪜶老母是 Arthrose。
感謝伊願意 tī 提早退休閒甲掠蝨母 ê 日子去療養院做小工𤆬無論年歲 ê 人去診所抑是病院看醫生，紲落來得著遐--ê 交𪜶老母有相仝病症 ê 人醫生齊講是 Arthrose。
啊，m̄ 通閣舌長喙臭講人尻川後話，總是猶是愛清楚記錄彼久 ê 車站生張。一樓成格做餐廳，二樓是徛家，這久 m̄ 知影敢猶相仝？
寫著這點想著捷克 tsuē-tsuē 火車站 mā 是按呢生，今年（2026）tī 法國某一个小庄頭 mā 搪著相仝 ê 光景 hōo 我感覺浪漫甲想 bueh 相趁相喊，總是褲袋仔袋磅子，無才調。
請先 登入 以發表留言。