我東南西北分 buē 清，歐洲歷史 mā 讀無伊 tsuē，總是迵過囡子書，我猶是知影波蘭交捷克有一个所在號做 Schlesien，只不過捎無摠頭，這个 Schlesien 屬德國（Preußen）抑是奧地利，起因 kā 萬事通請教，伊永遠一个答案「德國」。因為這个永遠 buē 變竅 ê 答案，我決定請伊引𤆬我行一逝 Schlesien。
車路三寶兼掠 buē 著頭 ê 我 bueh 請一个𠢕看地圖駛車細膩 m̄ 過一搪著錢是一个錢拍二十四个結 ê 人鬥相共，當然愛好禮好喙兼有一个 ē-tàng hōo 伊臭頭仔包布，防蠅（風神）ê 理由。
「這本小說寫著 Schlesien 風俗，非常有意思，敢會使得請你撥工𤆬我去遐閣行一逝？」
柏林圍牆拆掉十外冬，伊交 tsuē-tsuē 出世 tī BRD（前西德）ê 人仝款，彼堵牆原在𫞼 tī 心肝穎，不而過這堵牆 tī 這十外冬已經完全拆掉。這个改變交我有關係無？當然 mā 是有關係。
1765 進前這塊土地一直屬 tī Promnitz 家族。
寫著野牛人生第一斗交歐洲野牛互相相借問 mā 是波蘭，只不過斯當時我 m̄ 知影伊遐爾仔重要。這个無致意交引𤆬者 gún 翁 hām 我家己貧惰湠好奇心有相關。
「啊，著是牛按呢 niā-niā，呔有需要特刁工徙跤來看伊」這是我彼當時 ê 想法。
Pleß 有一座交德國 Schloss Sanssouci（無愁宮）bueh 相仝 ê 城堡號做 Schloss Pleß，伊 tī 歐戰 1915 ~ 1917 成做末代德皇 Kaiser Wilhelm II 重要指揮中心。
Tī 1419 ~ 1434 Hussitenkriege/Hussite Wars/胡斯戰爭期間，Pleß 因為有完備 ê 軍事防守建築 hōo 伊無受著這場戰爭 ê 影響。
Pleß mā 是𩸙仔重要養殖地。波蘭𩸙仔料理鼻起來芳貢頁，不而過伊 ê 好味好素 mā 揀有緣人，愛食魚 ê 我交伊無緣。
歐洲結束期間，當地居民 mā 捌舉辦公投決定留踮德國。Pszczyna mā 是波蘭二戰少數無啥受著戰火摧殘 ê 城市。不而過當地有關猶太文化建築物 tī 德國第三帝國侵門踏戶期間 mā hōo 𪜶起厝千工，拆厝一陣風，舞甲斷籬倒壁。
16 世紀進前，Pleß 主要居民是德國人，紲落來 ê 2 世紀因為 Krakau 總教區 ê 關係，波蘭人成做主要 ê 居民，18 世紀當地居民換德國居民做主要居民。1910 遮 ê 德國人口數徛 67%。這个人口結構影響 1922 進前 ê 西瓜猶是無才調倚大爿公投：德國人投德國，波蘭人投波蘭。
Gún 本底 ê 計劃是蹛波蘭怙四輪捷克行踏，起因 Zlotys ê 歇暗比 Koruna 迷人，押尾按算捙拚 buē 過 Covid-19，捷克恢復邊境檢查兼入境需要網路登記 hōo 我 tuì 主要行踏國家捷克搣鹽豉心肝穎。
總是，歐盟申根 ê 邊境檢查 mā 交 Covid-19 ê 名稱相仝隨時變化，當當我 kā 心肝穎豉甲鹹篤篤，捷克又閣恢復 “ 申根 ” 自由出入兼免等待 “ 容允 ”，不而過無上網路登記出入地點交旅社名稱、地址，猶是無才調訂旅社。
Gún 無確定底時按波蘭駛去捷克就決定，那行跤花那都合捷克行程，tī 這段捷克旅程無法度確實都合 ê 期間，無 tī 計劃內底 ê Pszczyna 成做這逝行跤花交 Kraków, Poznań 遮 ê 閃閃爍爍大明星有地比並 ê 小明星，準做 2021 人 tī 遮行踏 tuì 伊 ê 歷史無一个認捌，這久翻頭認真整菜股，伊猶是這逝行跤花閃閃爍爍 ê 明星前五名。
2021 這段行程花我人猶 tī 面冊沐沐泅， 食老出癖以台語做萬事萬物書寫主體 mā 一日到晏受著愛寫台語火星文朋友 ê 關愛 hōo 我齷齪，參加 ê 台語社團也 hōo 我這个感受，這个語言敢若較愛 “ 柴樠倒油較 ē 較光油 ” ê 環境，情緒無興跟綴遮 ê 干樂遨卻遨遨輾 buē 離。自 gún 翁 mā 知影按怎揣著這个城市，我得著解脫，口座申請好勢隨放伊臭生荒 ê 部落格就此成做我 ê 哲學路 19 號，自來無意願參加 ê 面冊就此放伊自由，一人行一路，互相莫照顧，這个變化一切按 Daisy von Pless 開始。
Aber Deutschland war damals primitiv. Als ich England verließ, mit seinem schönen und behaglichen Leben (jetzt hat es Deutschland bis zu einem gewissen Grade nachgeahmt), dachte ich: Muß ich wirklich in diesem unzivilisierten Lande leben? Soll dies meine Heimat sein? Aber ich gewöhnte mich daran, alles von der scherzhaften Seite zu nehmen.
M̄ 過斯當時 ê 德國是落米仔。當我離開生活美麗四序 ê 英格蘭（現此時 ê 德國已經有跟綴著陣），我想：我敢真正愛生活 tī 這个文明無開化 ê 國家？這个所在敢合該愛成做我 ê 家鄉？總是我已經慣勢用笑詼笑談 ê 角度看待一切。
von Daisy von Pless
Daisy von Pleß 合該然是當地上出名 ê 人物（我是根據地方人物獨獨紹介伊按呢推斷）。
初初閱讀伊 ê 生平紹介，我無得著啥物特別 ê 感受，當我開始初步記錄跤花，想著城市人物看板特別註明伊是 “ 歐洲貴族第一位上流社會倌 ”，隨做貓揣資料，起因歐洲貴族敢 m̄ 是逐个攏框金閣包銀？呔討需要特別註明。
好玄 tshan-tshiūnn 貓仔想 bueh 㨨 ê 膨紗衫，一㨨著隨無法度收煞，原來如貓，伊 ê 朋友 m̄ 是皇帝、國王著是女王，宴會減伊這粒星，規个氣氛隨殕殕。看德國 buē 上目 mā 頂真開錢 ê 伊 tī Pleß ê 期間猶是 uī 地方建立社會醫療保險，並提昇婦女地位交行動無利便人仕 ê 就業機會，遮 ê 改革交創新 hōo 伊轉換名聲並留名。
二戰期間成做德國人牽手 ê 伊無致意人講伊背骨，選擇加入法國紅十字會做看護婦，後來 ê 人生就按馬是伊 ê 天年交換手 hōo 馬著觸，1943 過世進前伊 kā 伊 ê 人生故事寫做冊做手面趁食。
頂懸引𤆬我伐出無必要 ê 情緒磅空文字就是按伊 ê 作品 “ Tanz auf dem Vulkan ” 來。
上重要 ê 引𤆬是有時間交 m̄ 知影悲觀抑是樂觀者洗心情三溫暖，較贏 kā 時間運用 tī 家己跟綴 buē 著 ê 所在，像我捌 “人客倌 ” 這个辭卻 m̄ 知影 “ 倌 ” mā 是敬語，特別是形容女性。遮 ê m̄ 捌齊是迵過書寫 tsiah 得著 ê 珍寶。
初寫 2021.09.06
請先 登入 以發表留言。