亂皂𥴊仔店 ⓂⒺⒾⓃⓀⒾⓄⓈⓀ

Tī Brad 河 ê 行鋼絲雕像

11 世紀建城，現此時是波蘭第八大城市 ê Bydgoszcz 伊 ê 歷史故事交歐洲 tsuē-tsuē 城市相𫝛，這个來彼个去，來佮去 ê 人攏有伊家己 tuì 這个城市 ê 號名。

1238 波蘭地名號做 Budegac，1309 轉做 Bydgoscia，1386 轉做德國地名 Broberg。

行尞舊城搪著 ê 亂皂作品

1238 東波美拉尼亞大公 Swantopolk II. von Pomerellen tī 遮建立軍事堡寨，1332 德國條頓騎士團行跤到，1238 建立 ê 軍事堡寨成做斷籬倒壁並宣示 Bydgost 屬騎士團領土到 1343。

1343 波蘭國王 Kasimir der Große 交條頓騎士團簽立 Kalisch 和平合約(Vertrag von Kalisch)，1346 兩位德國代表迵過波蘭國王得著馬德堡城市權(Magdeburger Recht)，Bydgost 開始沓沓仔按波蘭面肉轉做德國面肉。城市名稱順當地人口稱呼，波蘭人稱呼伊 Bydgost，德國移民稱呼伊 Broberg，這款 ê 族群城市稱呼 tī 紲落來 ê 百仔百冬平等徛起 m̄ 捌改變，唯一 ê 改變波蘭語 ê Bydgost 轉做 Bydgoszcz，德語 ê Broberg 轉做 Bromberg。

波蘭 ê 城市名稱起源是斯拉夫民族私人字名，德語 ê 城市名稱起源是這座城市 ê 河號做 Dbra，德國順這个音轉做 Broberg。

Brad 河 ê 雕像

1550 波蘭國王 Sigismund II. 收回猶太人 tī 這座城市 ê 特權，1772 普魯士 ê Friedrich dem Großen 腓德烈大帝 kā 這个特別 hâinn hōo 猶太人。

16 世紀 ê Bydgoszcz 是波蘭上大 ê 城市，tī 這个世紀 ê 1520 mā 主辦帝國城市會議。第二斗大北方戰爭(1655 ~ 1661)規定普魯士退出瑞典聯盟 ê Wehlau 合約(Vertrags von Wehlau) mā 是 tī 遮完成，間是 1657。 

第三斗大北方戰爭(1700 ~ 1721)規个交易 ê 城市 hōo 瑞典舞甲斷籬倒壁，熱鬧 ê 城市人口 tī 1772 統治賰無到 700 个。

1772 ~ 1807 這座城市官方名稱號做 Bromberg，1807 ~ 1815 官方城市名稱號做 Bydgoszcz，1815 ~ 1920 官方城市名稱號做 Bromberg。Tī Bromberg 這段期間，這座城市 ê 河水 mā 沓沓仔按咱台灣形容曾文溪「青暝蛇做大水」無照路線來趖 ê 河流成做照路線來趖 ê 河流並按 kan-ta 一尾蛇頭 ê 蛇成做有三粒蛇頭 ê 蛇。按德國公視電視得來 ê 智識，歐洲目前 ê 河流齊是人工整修過，目前唯一條無經過人工整修 ê 河流敢若 tī 意大利。

Tī 普魯士扞權這段時間，Brahe 交 Weichsel、Oder 成做互相有通敆榫 ê 河流高速公路。19 世紀尾 ê Bromberg mā 因為工業革命 ê 鐵支路 hōo 伊按落坐翻身做交易 ê 城市。 Tī 這段期間城市人口 mā 增加到 57,700 其中有 84% 是信仰路德教派 ê 德國裔。

Brad 河岸 ê 教堂 Part 1.

自普魯仕扞權 ê 1818 Bromberg 一直是普魯士省波南(Posen)地區 ê 首都。Bromberg mā 因為波蘭人口 tsuē 過其他地區，得著政府 ê 支持發行波蘭語報紙。

1817 路德教派學校成立，1851 若職業學校 ê Realschule 成立，1875 Bromberg 按縣市升格做直轄城市。歐戰結束 ê 1919.1.2 波蘭人交德國人發生衝突，德國人 tī 這場衝突因為資源條件 tsuē 過波蘭人，決定繼續成做德國領土。1920 根據凡爾賽合約 Bromberg 轉做 Bydgoszcz，波蘭人 ê 領土。Tī 這段期間德國族群 mā 行入台灣 4 萬箍台票換 1 箍 ê 日子，tī 這段期間人口 mā 按多數成做少數。

紲落來 ê 1919 ~ 1921 波蘭蘇聯戰爭 hōo 德國人口愈來愈少，起因 tsuē-tsuē 選擇成做波蘭子民 ê 德國人選擇離開波蘭轉去德國。遮 ê 一戰結束選擇成做波蘭人 ê 德國裔，因為紲落來 ê 戰爭選擇成做德國人，𪜶轉去德國成做波蘭 ê 德國人，無受德國法律保護。 1925 Bydgoszcz ê 德國人口按  86% 轉做波蘭人 ê 87%。

1939~1945 反抗 Faszyzmu ê 英雄

1939 德國第三帝國侵入波蘭，Bydgoszcz ê 反抗成做第三帝國上好 ê 宣傳，簡單來講就是露西亞入侵烏克蘭 ê 彼套話，烏克蘭人欺負露西亞人，成做露西亞族 ê 守護者有其需要守護生活 tī 烏克蘭 ê 露西亞族，後尾 ê 發展 mā 交目今猶 teh 進行 ê 烏露戰爭相𫝛。 歷史永遠 m̄ 驚抄襲。

Brad 河岸 ê 博物館

Tī 第三帝國扞權期間 Bydgoszcz ê 歷史建築 mā hōo 𪜶拆甲 kiōng-bueh 無見半項。其中起造 tī 1884 ê 猶太教堂 Große Synagoge 規个毀掉。

1945.1.27 曾經 ê 敵人蘇聯軍隊佔領 Bydgoszcz。

戰後 ê Bydgoszcz 暫時 kā 頭人首都交換手 hōo 哥白尼 ê 家鄉 Toruń 托倫，1950 又閣恢復頭人首都 ê 身份。城市面肉 tī 二戰期間無受著太 tsuē 影響 ê Bydgoszcz，戰後城市發展緊氣。1947 伊 mā 成做蘇聯年間華沙條約組織北爿重要軍事要地。

Brad 河

Bydgoszcz 自古因為 Brad 河成做貿易交易 ê 城市，遮出產 ê 瓷仔交麥仔酒 tī 波蘭 mā 是頂港有名聲，下港上出名。Gún 這逝上北波羅的海露營車日子，因為 2021 捌探訪 Toruń 就換路線停跤這搭連 gún 翁 mā 生份 ê 城市。

「Toruń 交伊攏是咱愛經過 ê 路線，我 m̄ 捌來遮過就選擇踮遮停跤」這是翁仔姐做陣舊城行跤花進前，我請教翁婿這座城市有啥物特別伊 ê 回答，因為 GPS 家己 mā 捎無摠，gún 勍順城市導覽地圖行尞。

Uī Bydgoszcz 溪流製做地圖 ê 撐渡人 --- Czaki，伊是匈牙利人

順導覽地圖探訪唯獨寫波蘭文 ê 雕像

河岸邊 ê 女歌手

Gún 翁愛食波蘭水餃，我 mā 愛食，當我按算轉去露營區省飯錢清彩款暗頓止枵，一个錢拍 24 結 ê 翁講「敢有興趣食波蘭水餃，網路頂 ê 留話攏講好食閣 buē 做盼仔。」

波蘭 ê 消費我是順霜淇淋做基礎，一个城市 ê 霜淇淋超過 1€ 表示當地 ê 餐廳 mā 會使得放棄，Bydgoszcz ê 霜淇淋就是這个狀況，超過 1€ hōo 我決定轉去露營區清彩止枵，不過 gún 兜 ê 柝仔頭已經提出邀請，我就順風捒倒牆免搬戲「當然 mā bueh。」

找錢 ê 盒仔

順網路地圖揣著人講當地人廚房 ê 餐廳，我隨 tuì gún 翁講網路評論若是妝挺過 ê 詐騙我請客。這間當地人餐廳外表看起來誠無特別，入口看起來 mā 誠四常，順指示勻勻仔行入心臟地帶陶淵明 ê 柳暗花明又一村會使得使用 tī 遮。

這根本 m̄ 是當地人廚房，這根本是五星飯店。

順櫃人檯人員 ê 指示 gún 揣露天倚河岸 ê 角勢等待菜單，我 ê 雙目 mā 認真巡別桌 ê 食物兼檢查𪜶 ê 服裝，起因我無向望家己若海沙埔 ê 穿插成做䆀鴨咪仔 ê 特殊。

「遮有皇宮 ê 氣派 m̄-koh 普通百姓 ê 自在」我 kā 搪著 Wifi 隨下性命泅入網海 ê 翁搝轉來現實世界。

「若是皇宮要求，咱無機會順利開大門」gún 翁又閣泅轉去網海。

無興 uī-tio̍h 這款代誌交伊你一喙我一喙冤來吵去，菜單猶未送來進前先來翕一張食前酒。哦，我 ê 阿姆，這看起來若囥傷久 ê 塗豆醬呔 ē 遮好味素。

當我準備食第二塊，見著四常無愛食麭 ê 牽手準備抹第二塊麭 ê 伊隨喝「刀下留麭，這百面好食留 hōo 我試鹹汫。」

「這馬鈴薯抹醬正經好味素」伊 kā 規个砸仔剾甲清氣啖啖，滿足甲喙裂甲耳空講。

菜單送來，阿姆矣，呔遮爾仔有設計感，另外餐廳 mā 無烏白亂濺，𪜶正港 kan-ta 賣這味，波蘭水餃。菜單頂 ê 分類是糋、烘、煠，猶閣有煎。

Gún 翁按算綴我點煠 ê 口味，我講「咱兩人攏點煠 ê 口味，按呢你就有才調寫評論矣」伊隨換煎 ê 口味，然後成做茶鈷呻 hōo 我聽「我合該然愛綿死綿爛點煠 ê 口味。」

Pierogi 敆蒜頭酸 Khu-lì-mù 醬

Pierogi 敆臭杮仔醬

煎 ê 口味窮實無遐爾仔䆀滋味，不過煠 ê 口感確實較滑溜紲喙。

食飯飽翁仔姐決定換別條路線行轉去車站，那看路裡 ê 亂皂 mā 那看舊城外 ê 新城面肉。

這張亂皂敢是 teh 反應，共產時代無物通食，萬物齊珍貴，這久資本時代，萬物除了甜甜物，其他齊䆀味，特別是菜蔬？

這敢是反應波蘭 ê 人口按大家庭沓沓仔轉做小家庭，甚至頂客族交人情味愈來愈薄？

我那看亂皂那喃來喃去，gún 翁 mā 跟綴我 ê 喃來喃去講「你真𠢕厚操煩。」

我敢厚操煩？合該然無，不過我相信我 ê 潛意識無才調控制順圖泅轉去交當地人冇談 ê 挽瓜揫藤。

檢查，Bromberg，日期，年份，城市設計者這是一路搪著上佮意 ê 一幅亂皂。

破解德國 Enigma 密碼 ê 波蘭數學家 Marian Rejewski

2021.8 翁仔姐做陣去 Poznań(Posen) bueh 看見一塊滿滿數字 ê 紀念碑，斯當時無斟酌要意，這久行踏 Bydgoszcz 感覺這位先生 ê 字名敢若捌讀過，順紀念碑頂 ê 文字讀伊簡單 ê 故事。

啊，伊就是破解 Enigma ê 人，我越頭 tuì gún 翁講，伊隨 kā 維基百科揣 hōo 我講「伊 ê 歷史齊 tī 遮。」

順維基百科 ê 文字我想著奈良美智 Yoshitomo Nara ê 一幅圖，和平 ê 青面獠牙。

入城進前見伊無開門掠做生意兩光，出城見著伊開門，排隊人口插插插 hōo 我大腸告大腦講「你無相趁相喊，我交你 buē 直」隨照規矩保持距離等待入店點馬鈴薯條，m̄ 知是天氣愈來愈涼 hōo 我感覺伊好食甲飛上天抑是伊正經好食，總講一句，一句食煞我又閣翻頭排隊閣 bué 2 包補腦兼洗腦「我 teh 旅行，久久食一斗油臊 buē 大箍，大丈夫，免叨撚。」