Chełmno tī 波蘭語是山崎 ê 意思，伊是 Kulmerland(庫爾默蘭)主要 ê 角勢。
人類 tī 西元 5 ~ 6 世紀就定居 tī Chełmno，這个文化屬 Lausitzer Kultur。
西元 10 世紀 Piasten ê 統治者 Mieszko I 統治這个地區，11 世紀初期 tī Lorenzberg 出現 Basilika 羅馬公共建築。根據 1065 ê 文件記錄，遮是波蘭國王 tī 庫爾默蘭 ê 定居點，後來捌 hōo 普魯士人➀短期佔領。
1222 Konrad von Masowien 按 Masowien 來 ê Konrad 公爵 kā Chełmno 地區移交 hōo 出世 tī 德國 ê 按普魯士(地區)來 ê Christian 主教．1226 羅馬-德國皇帝 Friedrich 二世 kā 城市權➁授權 hōo 德國條頓騎士團。1232 條頓騎士團 tī Chełmno 南爿大約兩公里 ê 所在建造家己 ê 起家厝(軍事堡塞)，1232 實施皇帝賜 ê 城市權利，並 kā 這个城市權生湠到庫爾默蘭地區 200 外个所在。
➀ 這个普魯士是指蹛 tī 波蘭、立陶宛東海 ê 部落族群，𪜶 tî 13 世紀 hōo 德國條頓騎士團征服。
➁ 德語號做 Kulm 是 Konrad von Masowien 賜 hōo Preußen 第一任主教 Christian ê 名，羅馬-德國皇帝 Friedrich 二世 kā 城市權賜 hōo Orden，德國條頓騎士團 kā 這个所在成立 Hanse 據點。
Chełmno 市政廳
1440 Klum 成做普魯士人聯盟反抗德國條頓騎士團 ê 據點。經過 13 冬 ê 抗爭交波蘭王國 ê 鬥相伨，普魯士人聯盟 tī 1453 取得勝利，1454 宣誓成做波蘭王國 ê 子民，Chełmno mā 成做波蘭王國 ê 自治地區。
Orden tī 波蘭起 ê 城堡模型
新 ê 政府迎接新 ê 族群，路德教派抑是新教份齊來遮生活創辦學校。總是宗教問題 ê 複雜，非基督徙屬世俗人 ê 我無一个才調通講 hōo 明，就放伊自由。
1539 這跤兜，𫝛宗教系統無仝理念 ê 傳統教派別占贏面，新教派創立 ê 學校齊結束。紲落來 ê 1554 重新招生，不過兩冬後又閣結校關校。
1580 傳統教派 ê 主教要求信仰新教派 ê 居民改變教派，m̄ 願改變 ê 居民不得居留，這个政策 tī 1612 又閣實施一斗。
Orden tī 波蘭起 ê 城堡模型
17 世紀 ê 波蘭瑞典戰爭佮北歐戰爭攏 hōo Chełmno ê 人口交經濟嚴重落坐，1687 扞權者恢復教派自由，tī 這段期間 tsuē-tsuē 蘇格蘭信仰新教 ê 移民到 Chełmno。開放新教派居民成做新居民 ê 1770，人口普查規个城市猶是信仰天主教 ê 波蘭為主，信仰新教 ê 教徙家庭 mā 賰 4 ~ 5 戶信仰路德教派 ê 德國家庭。
Orden tī 波蘭起 ê 城堡模型
300 外反前 ê Chełmno 是第一个組織反抗德國條頓騎士團 ê 角勢，300 外冬後 ê 1772 列強分割 Chełmno 成做德國普魯士西普魯士省 ê 一部份， Chełmno ê 在地文化交語言 mā 開始變化。
政府官員德國人，tsuē-tsuē 德國人 mā 跟綴政府 ê 跤步來遮開墾釘根，德國學校 mā 開始設立。
1807 ~ 1815 Chełmno 捌短期成做華沙公國 ê 一部份，1815 因為維也納會議又閣劃入 ê 德國普魯士 ê 地圖範圍，不過這斗波蘭人成立家己 ê 學校，時間 1837，波蘭語成做教學語言。 19 世紀尾跟綴工業革命，連結附近重大城像 Toruń ê 鐵支路開始設立並完成 tī 1902 年。這條 19 世紀完成 ê 鐵支路 tī 蘇聯政權離開了後無閣營業。
Orden tī 波蘭起 ê 城堡模型
Chełmno tī 19 世紀吸引 tsuē-tsuē 猶太人來遮開墾釘根，19 世紀尾猶太人人口又閣降甲無到 5%，這是啥物原因？敢是宗教信仰關係？
起因根據讀來 ê 資料，1905 ê 人口普查大量移民 ê 新教徒人口賰無到天主教徒 ê 一半，猶太教徒愈少賰無到新教徒比例 ê 1%。這个按人插插插 ê 比例降到 kiōng-bueh 揣無影 ê 比例，我相信交政府有相干。斯當時 ê 政策決定者是波蘭人交德國人這兩个族群。
波蘭人 tuì 家己文化交語言 ê 維護，真正值得咱台灣人思考。Tī 外來政權之間按怎保留家己 m̄ 是成做若電火珠仔病毒 ê 寄生體。
翁痟亂皂，我痟看板佮時鐘
1920 歐戰結束，Chełmno 重新劃入波蘭地圖並依據凡爾賽合約成做波蘭走廊 ê 一部份，tī 這段期間釘根 tī 遮 ê 德國人離開波蘭。1939 德國第三帝國侵入波蘭，1945 蘇聯紅軍佔領 Chełmno，當地波蘭人順這个勢 kā 猶原堅未釘根 ê 德國人全數趕離 Chełmno。
Chełmno 成做 gún 這逝來遮行踏無人問 gún 敢是來揣親情 ê 城市。
Chełmno 是 gún 翁 uī-tio̍h 揣便所臨時臨曜停睏 ê 城市。Chełmno mā 凡勢罕得有外國人來行踏，所致 tī 遮只要我目睭四界相，總有熱情 ê 波蘭民眾過來鬥相共，準做 gún 語言 buē 通，迵過比手畫刀，本底 ê 雞仔鴨仔講 buē 通，比 gún 翁食飯飽無到十分鐘就愛解放大腸 ê 速度閣較緊閣較順。
「我去納停車錢，你去看彼搭是 m̄ 是便所」車猶未停好勢，黃金 teh 滾 ê gún 翁已經交代我任務。伊車一停好勢我啥物攏無紮隨順伊交代 ê 路線揣便所，人猶未行到位就有人行倚雞仔鴨仔講 buē 通 ê 鴨仔聽雷。
Tī 生份語言閣 buē 通 ê 所在搪著這款人，四常我 ē 驚甲膽膽，波蘭來幾仔斗，凡勢慣勢𪜶 ê 相借問態度，所致我微微仔笑 tìm 一下仔頭，表示我有代誌愛處理無法度停跤練仙，這位熱情 ê 波蘭先生隨傱去外觀看起來若報紙亭 ê 所在大聲喝「NO」，手閣指另外一搭看起來若地下室 ê 所在講我少少認捌 ê 波蘭文「Tak」，我 tuì 這位朋友 ê 指揮捎無摠，總是猶是順伊 ê 指示行去「Tak」彼位。
樓梯新新 m̄-koh 內底看起來暗眠摸，我膽膽越頭看 gún 翁人 tī 佗落，這位熱情 ê 波蘭朋友一直 Tak, Tak, Tak，伊一直 Tak 驚走我 ê 驚惶，就成做一隻貓按光映映行入烏暗，是講人猶未行到磅空電火就著矣。
這个若倉庫 ê 所在是一間無收費現代閣新點點 ê 公共便所間，我隨行入去享受這个利便，按磅空閣行出來，熱情 ê 波蘭朋友交伊 ê 朋友坐 tī 市政府廣埕 ê 公共柴椅曝日頭，做陣 tuì 我講 Tak 手閣比一个讚，我無確定波蘭語敢是 Dziękuję，文文仔笑講「Dankeschön」，熱情 ê 朋友大聲回應「Bitteschön」。這時 gún 翁 mā 傱過來問我敢愛納錢，我講免隨五步做一步傱入去便所解放，我趁這个時間去探訪本底 bueh 上 ê 便所間。
「Ach so」我大力 tuì 熱情 ê 波蘭朋友 tìm 一下仔頭，繼續笑微微講「Dankeschön」，波蘭朋友笑微微大聲應「Bitteschön」，押尾 gún 翁仔姐做陣交伊閣講一上 Auf wiedersehen，𪜶回答 Ciao。
「德國鬼魂猶 tī 遮留戀」我笑 tuì gún 翁講。
「德語是歐洲 ê 世界語言」伊講。
交這陣少年朋友告辭，我看著誠有德國味 ê 時鐘手機仔攑懸懸揣角度，一位年歲合該然有 80 外外 ê 先生行倚，手指市政廳 ê 時鐘。
我知影伊 ê 14，微微仔笑以手指時鐘，表示我 kan-ta bueh 翕相做紀念。這位序大凡勢誤會我想 bueh 了解時間，倒手伸出來畫一个圓箍然後擋恬，表示這个時間歹勢，手指市政廳前 ê 時鐘，圓箍仔一直踅表示時間有準。我看這个範勢比手畫刀 mā 無較縒，微微仔笑講「Dankeschön」，無疑悟，序大 hōo 我一个驚惶 ê 表情，這个表情頓 tī 我 ê 心肝穎想 bueh 知影發生啥物代誌。
Orden tī 波蘭起 ê 城堡模型
「Chełmno 附近有集中營」按按算停跤半點鐘延到三點鐘，我順無料 WIFI 請教 Chełmno ê 歷史，發見這件代，隨想著彼位聽著德語有一款反抗交驚惶表情 ê 序大。
交我做陣翕相 ê 翁 mā 有感受熱情序大聽著 gún 講德語 ê 表情，伊無應話，恬靜享受 Chełmno ê 熱人熱情。
Chełmno 交 Bydgoszcz 仝款，倚哥白尼 ê 家鄉 Toruń 相近，致到伊想 bueh 發展 ê 觀光事業無啥海湧。我 mā 因為這个關係足佮意 Chełmno。
商店波蘭化，食食波蘭化，價數 mā 波蘭化。
舊時 ê 城牆
Chełmno 目今 ê 建築多數起造 tī 18 到 19 世紀，意思就是行入 Chełmno 無斟酌聽當地人講話 ē 掠家己 tī 德國。
Chełmno mā 改變歐洲近代歷史 Solidarność 運動重要 ê 推捒城市。
請翁特別 kā 我翕 ê 相片
順城外行出城內，順城內行出城內，牽車 ê 時見著囡仔時去阿媽兜上愛耍 ê Wasserpumpe 隨變身做貓，想 bueh 知影伊敢猶 teh 服務大眾，隨行倚台語問我伊按怎講。
「Wasserpumpe」我講。
「我講我按怎講」台語問。
「Wasserpumpe」我見笑轉生氣，擲一句 Wasserpumpe buaih 閣交伊纓纏，斡頭行向停車位繼續向北 Kwidzyn 出發。
St.-Johannes-Dom
Kwidzyn 自德國條頓騎士團 kā 伊劃入家己 ê 地圖到 1919，伊一直是德國普魯士西普魯士省 ê 首都。
Kwidzyn 根據語言考究，伊是按普魯士語 ê kweita 意思是花來。
這座城市 ê 發展交德國騎士團有相干，m̄-koh 城市扞權者是主教 m̄ 是條頓騎士團，所致 tī Kwidzyn 較見 buē 著向時商業 ê 跤跡。
St.-Johannes-Dom
歐戰結束，根據凡爾賽合約波蘭需要一條波蘭走廊，德國普魯士 ê 西普魯士省就此行入歷史。
1920.7.11 遮 ê 德國居民以人數優勢投票決定猶原停跤踮德國，這个投票 mā 造成未來 ê 土地佮民族 ê 分歧。
不過這个分歧 tī 1945 成做無需要繼續要意 ê 分歧，德國離開波蘭 ê 土地，本底是少數 ê 波蘭人成做絕對多數。
Ordensburg 條頓騎士團城堡
Kwidzyn ê 舊城面肉是 2002 順自來 ê 城市生張沓沓仔復原。 不過復原 ê 重點 kan-ta tī 歷史建築，所致行踏這座城市 ê 舊城區有一種倒手看現代正手看古典 ê 趣味。
行踏歐洲 tsuē-tsuē 城市，見來波蘭見著遮 ê 粉鳥，我齊有一種波蘭粉鳥決定有阿媽飼，逐隻肥朒朒甲。
Hōo 我叨撚家己背骨 ê「Wasserpumpe」tī 遮交阿媽飼 ê 粉鳥做陣曝日頭，失去 ê 記持，行入歷史磅空 ê 聲音 mā 跟綴恬靜向前行 ê 水流傳達伊 ê 聲音「水拹仔」。
睏天路車日子 Camping mit Caddy (21)