拉脫維亞 ê 瑞士
倚首都 Rīga 53 公里 ê Sigulda 徛 tī 有大片原始森林 ê Gauja 溪溝坑崁，當地人 kā 伊號做拉脫維亞 ê 瑞士。
公元200冬前遮就有人類 ê 跤跡，歷史上有名 ê 第一斗北方戰爭 a.k.a Livländischer Krieg ê Liven mā tī 11世紀蹛踮遮。
Sigulda 美麗 ê 生張 mā 因為 tsuē 冬 ê 戰爭 hōo 伊成做東方不敗，一暝烏絲變白鬃，總是東方不敗是小說是影戲 m̄ 是現實人生，伊 ê 烏絲變白鬃，演員一落戲自來原樣隨相揣。
Sigulda 是準做伊下性命閃避龍眼好食核烏烏，猶是無應效 ê 無奈何。
車頭
歷史是起厝千工，拆厝一陣風 ê 城市大都更。目今 ê Sigulda 是結合 1953 按田庄社區分拆 ê Turaida 交 Krimulda 成做一个大區。
伊 ê 人類跤跡 mā 按考古遺址得著推論，公元二百年進前遮就有人類 ê 跤跡，六世紀到七世紀 Semgallen/Semigallians a.k.a. 波羅的海人（Balten）安身於此， 十一世紀 Liven/Livs/立窩尼亞人安身踮遮。
舊時 ê 水塔
本底信仰萬物 ê Livs tī 13 世紀初期成做基督王國，根據文獻是 Kaupo von Turaida ê 後代 Turaida 王子所決定。所致行踏 Sigulda 你會使得見著 “ Orden ” ê 痕跡，語言 mā 是。
關於語言這項代，我個人 kan-na 聽有 Ja 佮 Nē 這兩个交德文一模模一樣樣 ê 詞，不而過搪著 ê 當地人是認為𪜶 ê 語言交德語有雙生仔款。
1561 立窩尼亞戰爭，Sigulda 成做 Polen-Litauen（波蘭 - 立陶宛聯邦）ê 管轄地，紲落來瑞典、露西亞。倚捌兩百冬 ê 戰爭，曾經 ê 繁華美麗光炎炎成做斷籬倒壁，準做 Sigulda 目今上大 ê 觀光景點是徛立窩尼亞基督年代，猶是 hōo 人看 buē 出曾經 ê 光景。這敢是狗去豬來 ê 實踐？
結合傳統市場佮戲院 ê 開張無幾冬 ê 觀光𥴊仔場
1721 露西亞成做立窩尼亞 ê 扞權者，拉脫維亞脫離露西亞 ê 管轄到 gún 第二斗行踏 Latvia，伊猶是波羅的海三國徛露西亞族群上大 ê 角勢，紲落來身在曹營心在漢 ê 對頭是厚甲若蠓。
我這个外國人第一回絞入去𪜶 ê 冤家量債是我 tuì 拉脫維亞語交露西亞語無一个概念，所致搪著好禮 ê 守衛仔自然 mā-ē 好禮挨拶，料想 buē 到拉脫維亞人交露西亞人 ê 對頭遐爾仔深，蹛露西亞式公寓 ê 厝頭家嚴肅 tuì 我講「伊是露西亞人，你免 tuì 伊好禮」，紲落來 ê 故事我 mā 捌做過，彼就是 tuì 外國人𪜶無興趣 ê 講古。
第二回就是這斗 tī 合該然是 Cēsis 采西斯 ê 露營區搪著凡勢已經安身 tī 美國 ê 露西亞裔拉脫維亞人，伊問我按佗落來，我回答台灣，伊開始講台灣 buē 使人牽 m̄ 行，鬼牽溜溜行像波羅的海三國按呢。我聽甲心狂火著猶是 kā 火禁掉，文文仔笑問伊「露西亞遮爾仔好，呔討你 buaih 轉去露西亞？」
本底講甲紅膏赤蠘，喙波全泡 ê 露西亞先生無起呸面，m̄ 過斡頭隨走，交伊司公仔象桮 ê 牽手大力 kā 我降一目 mā 是雙跤挽 leh 隨走。
Sigulda 目今上出名 ê 觀光景點是順倒籬斷壁 ê Segewold mit Kreuz der Templer（有聖殿騎士十字架 ê Segewold 城堡，下圖正爿）。這座城堡是彼當時 ê 地主 Prinz Kropotkin（Kropotkin 王子）tī 1878 ~ 1881 uī 家族起造。建築樣式是新哥德式。
向時是別人 ê 徛家，現此時是市政府 ê Sigulda 城堡
歷史是起厝一陣風，拆厝一陣風，過去目今隨人註解，自家己 mā 相仝，Kropotkin 王子 ê 徛家成做 Sigulda ê 市政府徛地，伊 ê 闊閬閬 ê 莊園成做城堡公園。
拉脫維亞脫離露西亞獨立，城堡 mā 成做作家協會聚會 ê 場所，所致伊 mā 有這个新 ê 名號 “ 作家城堡 ”。
露西亞火車
Sigulda 自 1889 連結首都 Rīga ê 鐵支路開通，伊成做露西亞皇帝渡假地之一，伊 mā 成做王公貴族頭人上愛舉辦舞會 ê 角勢，到 19 世紀尾期，Sigulda 是生理人交觀光客上意愛行踏 ê 城市。
露營區搪著 ê 蟲豸
波羅的海三國基礎建築，若順露西亞年閣排名 “ 拉脫維亞 ” 經濟上交易來做路線規劃，包穩一路食埃坱食甲飽。第一回行踏拉脫維亞坐飛行機，行踏 ê 角勢齊是打馬膠鋪甲好好好順順順一屑仔攏 buē 風飛沙來挨拶，這回按露西亞年閣排名上散凶 ê 立陶宛上拉脫維亞，我開始思考友善政策紮來 ê 社會變化，拉脫維亞莫 kā 首都 Rīga 算在內，徛家百外冬 ê 露西亞社群基礎建設確實比別 ê 社群好，m̄ 過無地交立陶宛 hām 愛沙尼亞相比並，特別是愛沙尼亞，規逝路無機會食著風飛沙。路裡搪著露西亞社群 mā 無拉脫維亞社群 hōo 人感覺沈重，合該然按呢形容，跤猶未踏入去隨想 bueh 斡頭走。
拉脫維亞是波羅的海三國，唯一个離開露西亞無強制要求當地露西亞人想 bueh 繼續徛家踮歐盟，著愛學習當地語言 ê 國家，伊 ê 露西亞人口 mā 是規个地區上大 ê 一區，人口佔當地 ê 四成。當地政府 ê 友善 hōo 厝邊 tuì 伊 ê 印象是引災𤆬厄 ê 所在。
第一回行踏 Rīga 有這款感受，不而過無遐爾仔強烈，這回無論上北抑是落南我齊 tuì gún 翁講緊離開，除了這久想 buē 起來 ê 趨雪露營地，環境恬靜規个社區又閣當地人 hōo 魂舒無四序 ê 我要求加歇幾工 tsiah 出發。
Tī 這个露營區 gún 翁仔某搪著一位大學拄畢業踏孔明車環波羅的海三國 ê 立陶宛少年人，伊問 gún tuì 拉脫維亞交立陶宛 ê 印象，紲落來伊笑笑仔講「孔明車𫞼烏克蘭國旗 ê 伊，獨獨 tī 拉脫維亞搪著問題。」
語言 tuì 土地 ê 認同交融合敢有影響？我 ê 答案是，百面有。
Gún tī 立陶宛柴杙鄉鎮停跤，露營地經營者是露西亞裔立陶宛人，一世人敢露西亞語慣勢 ê 伊，因為立陶宛 ê 居留政策 hōo 伊 m̄ 願學習 mā 愛參加，紲落來語言影響態度，伊 ê 好禮 hōo gún 翁講，我無啥確定伊是露西亞人。𫝛款 ê 狀況 mā 發生 tī 愛沙尼亞。遮 ê 露西亞人搪著你第一句話百面是「你敢 ē 曉講俄羅語？」，你幌頭講 buē 曉手機仔隨請出來翻譯。
愛沙尼亞猶原愛特別註明 Narva 這个角勢例外，gún tī 搪著鼻甲懸過天 ê 自我樂暢講寡免聽看表情 mā 知影譬相 gún 聽無俄羅語 ê 工作人員。Gún 一屑仔反應攏無，起因 gún 非常確定遮 ê 人十八港跤行透透 kan-ta Narva 這个小小 ê 角勢，所致免 uī-tio̍h 𪜶刁意故若露螺趖 ê 結數詬詬唸。
上北愛食無料風飛沙，準備落南我 tuì gún 翁講請揣無打馬膠 ê 車路，伊認真看地圖押尾 mā 確實有揣著，總是路是人行出來--ê m̄ 是 Google 或是別 ê 地圖照出來--ê，gún 掠做高速公路 ê 車路愛按倚 Rīga 50 公里開始 tsiah 有打馬膠路。
這搭四界 ka̋ng 講「Gún-ê 露營區是聯合國，有西班牙、德國、英國、波羅的海三國、奧地利、波蘭閣有台灣來 ê 朋友。」這位古錐 ê 露營地主人一講著台灣手隨指我 ê 方向，我 mā 隨攑手 Hallo。
這搭有各地旅客 ê 露營地拄拄好 tī Rīga 四箍輾轉 48 公里內底，澈底解救 gún 做手摵茶摵 32 公里 ê 痛苦。
Sigulda 向時徛 tī Rīga 地區，準做按呢生只要無交易 ê 所在，m̄ 管偌 tsuē 徛家齊無鋪打馬膠。這久翻頭想向時愛哭呻 ê 產業車路實在是天堂。
我 tī 這个露營地搪著三位合該然受著阿母態度影響 ê 囡仔。
兩位是兄弟，阿爸是英國人阿母是波蘭人，阿母自頭到尾下性命 tuì 囡仔講英國腔 ê 英語，囡仔 ê 反應是反白睚兼聽著阿母無細膩講波蘭語隨棄嫌 ê 表情，我因為講德語，囡仔無才調分別我到底講啥物語言，準做我 ê 英語講甲 lòo 𪜶 mā 是捷倚來破豆。
一位是阿爸是墨西哥人，伊假做西班牙人，阿母是愛沙尼亞人，阿爸 tuì 伊講西班牙語，阿母 tuì 伊講愛沙尼亞語，爸母做伙講英語，伊 tuì buē 曉講這兩个語言 ê 人 mā 循這个模式交人盤撋。伊交 gún 翁講西班牙語，交我講英語。
「我後擺 mā bueh 學習德語」這个查某囡仔掠 gún 兩个人 ê 母語是德語。
Gún tī 這个露營地停睏三工，這兩組家庭 mā 是，gún-ê 無致意攪擾成做這兩組爸母暫時免大聲嗽四處喝囡仔 ê 禮物。英國爸爸見著我總是笑迷迷，愛沙尼亞媽媽見著面就淡薄仔破豆，畢竟魂舒猶有一个幼囡仔，波蘭媽媽凡勢聽我講德語無自在，所致保持有善 ē 距離，墨西哥爸爸有新聞報導 ê 墨西哥白人優越症 tuì 我誠不友善，所致 mā hōo gún 翁洗面轉去當伊講伊是西班牙人，gún 翁隨講你是墨西哥人抑是南美洲人 m̄ 是西班牙人。
這款龜怪 ê 交陪無人拆破面，起因 gún 翁無當別人 ê 面 kā 黜臭，不而過伊清楚知影伊假西班牙人 ê 戲齣煏空，伊 ê 牽手 mā 知影，總是這是翁婿家己選擇 ê 戲齣伊家己愛擔輸贏。
用露營區主人兜家己種 ê 洋梨仔做早起頓
這搭露營地窮實是一个莊園，內底有種洋梨仔交林檎，露營地主人就交代 gún kā 伊鬥相共加食一寡，我交愛沙尼亞媽媽 mā 認真 kā 鬥相共。波蘭媽媽凡勢無想 bueh hōo 人知影伊 ê 波蘭背景所致猶原維持英式飯頓。
兩个文化交流所創造出來 ê 新性命，一个 hōo 我想著人 tī Elbląg 搪著 ê 波蘭序大，一个 hōo 我想著家己，按呢講有較家己褒嗦，不而過我一直相信家己願意接受各種語言交爸母態度有關係。我 ê 芋仔爸 m̄ 捌拒絕講台語，我 ê 番薯母 mā m̄ 捌講 “ 講彼番仔話 bueh 做啥物 ”。我成長 ê 環境有排灣族朋友、阿美族朋友、客家朋友，遮 ê 朋友齊 ē 曉講家己 ê 語言，我去遮 ê 朋友兜𨑨迌加加少少 mā-ē 學寡，準做這久全燒做烌攏揣無，我 tuì 語言 ê 態度猶是 buē tshan-tshiūnn gún 翁按呢，有排名。不而過伊這个按爸母承來 ê 歹癖已經改掉，這交我敢有關係，當然 mā 是有。
每一个世代攏有 SSR 這類 ê 問題，總是當這个問題成做歷史，後代人敢有需要繼續 kā 伊開枝散葉？這是個人決定，總是我以請教台灣有幾種語言 ê 露營地主人聽我分張後 ê 感想做這段旅程 ê 結束。
「Gún-ê 語言無問題，文字 mā 無龜怪，感覺龜怪交非文字 ê 人是伊家己造成，起因 gún 著是使用這个語言交文字 ê 人。」
硩學家 ê 智慧果真 m̄ 是語言，是認捌家己。
2023.08.30 初寫
請先 登入 以發表留言。