亂皂𥴊仔店 ⓂⒺⒾⓃⓀⒾⓄⓈⓀ

Gún 蹛 ê 城邦 tī Fastnacht 這段期間推捒「Ein Kuss」唚一个無料參觀城堡，gún 就四界「唚一个」參觀城堡。

一日踅到歷史感情較倚法國 ê 城市，建城 mā 比現此時 ê 首都，gún 蹛 ê 所在有兩个首都，m̄-koh 行政權猶是 tī 後來成做德國歷史上重要 ê Hohenzollern 家族徛家這爿。

Gún 翁某一个喙白兼驚食 buē 飽，一个驚開錢食外口，sóo-tì gún 攏真慣勢早早出門早早轉來食下昏頓，出發 RESIDENZSCHLOSS RASTATT 彼日 gún bueh 坐 ê 車幫受著別搭鐵枝路著火暫時無通車，我隨 tuì 翁講「這表示咱佮 Residenzschloss Rastatt ê 緣份無夠深，來轉。」

「德國鐵枝路 m̄ 是 kan-ta 南北兩爿 mā m̄ 是 kan-ta 一間公司 teh 運作，較停仔 ē 廣播新路線」翁應。

著謼，遮是德國 m̄ 是臺灣，德國 ê 高鐵無法動運作猶有其他 IC、IR、RE 通替換，臺灣 ê 火車系統一出問題彼日 ê 計劃百分之 90 全臭火焦無 teh 調整，10% 有法度調整是因為出發 ê 所在無蓋遠。

本底就挨挨陣陣 ê 車頭，這久因為車幫問題 hōo 伊愈成牽罟。

時間經過 bueh 一點鐘，新 ê 路線 mā 沓沓仔協調(hia̍p-tiāu)出成果，坐 tī 椅仔頂成做日頭花 ê 我開始綴人倒越正越「鰮仔魚 ē 無去，咱煞 buē 無去」步頻感覺對不起鰮仔魚，總是每一个人有家己 ê 天性，像鰮仔魚食蝦，我食伊。

 重要 ê 國際車幫，像駛往巴黎遮 ê 車幫離開了後，開始換 gún 遮 ê 在地車幫，換到 bueh 到 gún-ê 車幫，我看一下仔時間隨問翁「你確定咱下晡 3 點進前趕 ē 到位？」

「Ē」伊應。 

我想 bueh 紲喙講寡啥，一个聲音要求我停一睏，等時間行跤到 tsiah 來討論，就恬靜佮伊繼續一人繼續成做頭 ē 正越倒越 ê 日頭花，一个世界除了 Meta 就是 Meta。

「Kā 生活踅轉來本底 ê 簡單，Return to Innocence」我那看四箍仔 ê 百樣人生，那感覺腹內 ê 蝶仔，我總算學 ē 曉按怎 kā 家己放 hōo 冗。

彼日 ê gún 真幸運趕 tī 尾幫3點進前踏入去城堡觀光 mā 綴著精彩 ê 無料導覽，導覽結束離開城堡翁講「咱今仔食外口」。

「你確定？」我講。

伊知影是按怎我 ē 按呢應話 mā 緊紲喙講「非常確定，咱來食 Karlsurhe ê 印度餐廳」。

出門食餐廳一直是廕 buē 掉 ê 火引，這斗翁主動 kā 火引線剪掉，我喙癢甲想 bueh 吐幾隻蟲 mā 愛噤。

簡單佮店東挨拶就開始補數念，數念送入喙，隨想著今仔日 ê 水啉甲較無夠，緊補啉一喙，繼續食第二、三喙... m̄ 著這鹹汫佮較早完全無相仝，這斗 ê 食物鹹甲若死海。

「你敢有感覺遮 ê 鹹汫變足鹹？」我問翁。

「無，m̄-koh 糋路有變較 tsuē」翁應。

「Mā 著，問你鹹汫是白問 ê」我笑講。

食飯飽等翁算數，tī gún 猶未行出餐廳，我紮 ê 滾水已經無飼半隻金魚，人猶未到 Karlsurhe 中央車站彼罐新捾 ê 滾水 mā 啉 bueh 一半焦，猶未轉來到厝彼罐 1500ml ê 滾水 mā 已經完全無地通飼半尾金魚，按呢短短無到點外鐘 ê 時間，我 ê 喙猶是焦甲若火燒埔，tsua̋n 按呢我 ê 人生按彩色成做烏白 ê 一坦倒 7 工，這 7 工 mā 凡勢拄好搪著大娘姑來相揣致使規仙人愈無氣力通佮「鹹」相偃，這久寫故事我 ê 胃腸特別是自本是一條腸仔迵尻川 ê 通通通，這久成做進前清 buē 到岸 hōo 543 窒牢 ê 水槽仔水管相𫝛 ê m̄ 管我按怎灌藥水，伊著是 buaih 清 buaih 通一下。

Tī 這段坦倒 ê 日子，我想著烏貓姊年間彼位 uī-tio̍h bueh kā 愛情縛 tī 身軀邊 ê 朋友佮 uī-tio̍h bueh 控制別人 ê gún 翁𪜶老母，𪜶遮佮意破病 ê 人，搪著真正破病 ē 成做啥物款?

是講，這是別人 ê 興趣 m̄ 是我 ê 興趣，我個人 kan-ta 這个願望，這款代誌 m̄ 通閣來第三斗。

Kā 想 ê 事項記錄落來 tuì 𠢕喋詳 ê 我並 m̄ 是一件真困難 ê 代誌，畢竟我並無要意逐个記錄攏愛成做一蕊花。

只不過，這斗 ê 病疼 hōo 我連喋都喋 buē 出來，這件代誌有 hōo 我著驚，而且是驚甲 m̄ 知 bueh 按怎 tsiah 好。

我 m̄ 知影是按怎一个食傷鹹 ē 造成按呢這款狀況，總是我清楚知影愈無動頭殼，頭殼愈 buē 踅。

Sóo-tí 頭一無眩目無暗就隨拍開電腦寫寡物件，這久寫 ê 文字我無法度好好仔熥一斗 mā 感覺遮 ê 記錄決定㧎㧎無順，總是這久 ê 我清楚知影，我現此時 ê 無頭神就敢若 teh 接受化學治療 ê 人仝款，無食寡物件是 bueh 按怎有體力佮外來者捙拚。

是講，這斗 ê 無頭神佮踅神敢是身軀 ê 鐵、鎂遮 ê 物偷走厝？

M̄ 知影，總是我知影靜心等待，偷走厝 ê 記持𪜶 ē 沓沓仔踅轉來。

押尾私心推薦外觀看起來無啥特別 m̄-koh 內底齊齊攏是寶 ê RESIDENZSCHLOSS RASTATT，特別是 tuì 德國近代歷史有興趣 ê 人，tī 遐 ē-tàng 看著足 tsuē 課本至少我讀過 ê 課本 m̄ 捌讀過 ê 歷史。

Rastatt ê 發展按 17 世紀開始，這座城堡是順法國 Versailles 做見本 mā 是影響楦闊奧地利 Haus Habsburg 皇朝領土交權利 Rastatter Friede（拉施塔特合約） 重要 ê 所在。伊目今是 Mercedes-Benz 重要 ê 生產基地。