亂皂𥴊仔店 ⓂⒺⒾⓃⓀⒾⓄⓈⓀ

M̄ 知影台語文愛按怎寫，總是讀《大士爺厚火氣》hōo 我想著 tsuē-tsuē 學語言 ê 人 ē 喋 ê 話題。

窮實 kā 法語佮德語學好，英語 mā 差不多精光--ah！ 

往過 kan-na 學過英語 ê 我對這款講法感覺傷譀古。

開始學德語聽法語、丹麥語佮德國 Sachsen 人講德語，我捷捷 ē 感覺若 teh 聽英國人講英語，只是聽無。

我 ê 意思是 tsuē-tsuē 法國朋友講 ê 法語攏 ē hōo 我想著英語，聽丹麥人講丹麥語佮德國 Sachsen 人講德語攏 ē hōo 我想著咱講 ê 雅緻英國腔。

這本《大士爺厚火氣》佮頂懸喋喋一大拖 ê 語言有啥物底代？

無底代，只是想著我 mā 真慣勢成做露螺 teh 循仝逝思考問題，像寢頭仔讀伊讀甲 tsham 賴和全集相𫝛 --- 袐結，起因我捎無愛揣台華佗一語來讀，雖罔伊有華文版，我就是無想 bue̍h 讀華文，畢竟伊 ē hōo 我願意撏錢就是因為伊有台文通 hōo 我練功，當然--lah，讀無伊佮作者一屑仔攏無底代，這 kan-ta 佮我 ê 語文深度有相干。

起因，我台語 lóo 華語 mā lóo 自然是讀甲一粒頭兩粒大 ê 無啥好做茶鈷呻呻呻。

不過，冊是死 ê 人是活 ê 當我接續翁紮轉來 ê 彼本日文辭典，我知影我 ê 問題 mā 開始改變讀法，管待伊啥物文 huînn-ti̍t kā 齊看做台文讀落去就是。

英語、法語、德語攏有 Aubergine mā 有 Engagement 是按怎我 kan-ta ē-tàng 選擇其中一个發音，tshan-tshiūnn 野菜(Yasai)是按怎 buē-tàng 講 Iá-tshài 愛講ㄧㄝˇ ㄘㄞˋ，這个窒牢 ê 中氣一消敨，規本冊就讀甲順順順 buē 成做家己 ê mǹg-sǹg。

冊是上好 ê 導遊，雖罔我 tuì 內底 ê 眾神誠生疏，m̄-koh 當我 kā 冊闔起來心內 mā 決定，後回轉去臺灣絕對 bueh 行踏 m̄ 是 kan-na 民雄鬼仔厝佮愛啉 Ka-pi m̄-koh buē uī-tio̍h 伊特別停跤 ê Starbucks。

感謝作者 ê 拍字盤戰士 hōo 我那讀那笑甲蔭火氣 mā 感謝作者 kā 伊 ê 囡仔古分出來，hōo 我有別 ê 機會認捌我掠做無局其實誠有局 ê 歷史佮土地。

靜心等待佮挩窗做陣行踏打貓 ê 彼一日。

冊一到位若是隨讀，搪著這款自信滿滿四界提譀鏡分張伊 ê 智慧 ê 拍字盤戰士。

我應當 buē《大士爺厚火氣》mā buē 特別 uī-tio̍h 遮 ê 比《走揣小封神傳說》ê 精怪閣較無膽頭 ê thi-bī 寫一篇 buē-su 跤帛(pe̍h) ê 文章來敨放 buē 爽。

總是，無一項代誌是「早若知」。

所有 ê 問題攏是搪著 tsiah 知影按怎處理。

歸結，搪著問題願意處理閣 buē 纏綴問題繼續踅金龜磨，這 tsiah 是重點。

落尾手閣搪著𫝛款 ê 問題，我連按鼻孔歕氣 hōo 空氣欶攏無興頭。

M̄-koh Email ē 留 leh tshan-tshiūnn 唐鳳按呢。

2023.04.06

2023. 06.04 --- 德國。走揣聖泉、紅酒、山岩鹽 ê Das Käthchen von「Heilbronn」, Deutschland

德國聯邦外交部長 Annalena Baerbock tī leh 選舉總理 ê 時，伊 ê 論文 hőng 講有問題

德國聯邦衛生部長 Karl Lauterbach 猶未成做聯邦部長時，無人談論伊 ê 論文。

按電視頂 ê 公共衛生專家成做聯邦衛生部長，伊彼 buē-su 囥甲臭殕 ê 論文步頻 hőng 提出來曝日頭。

我 m̄ 是出名人，我無啥物重要 ê 文獻。

總是，咱臺灣佮德國攏有因為「引述 」造成困擾。

Tī 遮我「引述 」《大士爺厚火氣》按呢我 mā kā 冊鋪起來，表示我是真正「引述 」m̄ 是參考。

冊真好看，聽作者 tī 公視台語台PODCAST分張講相𫝛 ê 冊 ē 閣出第二本，真期待。

《大士爺厚火氣》

㊔ 鄭順聰

㊓ 出版社：前衛出版

ⓦⓦⓦ 博客來