亂皂𥴊仔店 ⓂⒺⒾⓃⓀⒾⓄⓈⓀ

Graz 重要地標 Schloßberg(城堡山) ê 鐘塔

Vielleicht weil sie eine Nachbarin war, war mein Mann weniger an Österreich interessiert, und ich interessiere mich nicht für die Kultur und Architektur, die Deutschland ähnlich ist.

Deshalb haben wir beschlossen, Österreich zu einem Zwischenstopp auf dieser Reise zu machen, aber Pläne holen den Wandel nie ein.

Ich kann mich nicht erinnern, warum sich dies geändert hat, aber ich danke Arnold Schwarzenegger.

Wegen ihm, ich denke an die Stadt, ich habe gehört -- wir besuchen die Stadt nicht weil es gibt noch mehr interessante Städte.

Wegen ihm, ich finde die Graz ist interessanter als Wien und Salzburg, das ist meine Meinung, obwohl er ist nicht hier geboren, er aus Thal, ein Dorf neben Graz, aber, als ich er in Straße gesehen habe, ich fühle Bambi in meinem Bauch ~ aufgeregt.

Aber die Veränderung gefällt mir sehr und ich liebe das Essen aus Persien.

Mur 河 ê 出名地標 --- Murinsel(Mur 島)

凡勢是厝邊歷史文化又閣厝瓦相扯，所以翁 tuì 奧地利是鼻無鳥鼠味，tuì 德國本底是逐間攏火燒厝，有厝(趣)味 ê 我 mā 因為網路時行句「旅行就是按家己蹛甲厭𤺪 ê 角勢，換去別搭心適」ê tuì 交德國無宛 2 體 ê 奧地利 mā 是𤺪頭甲連撥寡鹹 hōo 伊攏 m̄。

總是，人生 ê 變化永遠 hōo 你 buē 扞得 tshan-tshiūnn Arnold Schwarzenegger，伊無法得按算出世 ê 年閣佮家庭狀況 m̄-koh 伊 ē-tàng tī 看無計畫揣計畫。

車日子最後一站是克羅埃西亞，翁看天氣猶閣燒烙 m̄ 願轉來德國種香菇，我 tuì 繼續踮克羅埃西亞栽跤花 mā 栽甲飫，雙人一蕊花 bueh 栽無仝位，斡一个角就是斯洛維尼亞「抑無咱來去 Maribor 2012 歐洲文化首都蹓蹓」翁講。

「遐足斯拉夫日耳曼(ji̍t-ní-bān)」我隨請 Google 大眾廟賜我智慧 Maribor als "Europäische Kulturhauptstadt 2012"。

「你 bueh 踮歐洲揣無希臘、羅馬、無日耳曼凡勢愛較早睏較有暝」翁笑應。

「你講了一屑仔攏無毋著(moˇmˇcog)，按呢咱來去𫝛款是 Machen m̄ 閣 a 變 o ê Graz」本底若 Hermann Hesse 見無日鬚 ê 罩霧(Im Nebel)步頻湠出阿波羅 ê 金毛尾。

「你敢知影按 Opatija 出發到 Graz 就敢若你愛坐火車去二水，紲落來換車去車埕按呢 ê 九彎十八斡」翁目頭隨結結。

「Buaih 轉去德國種香菇 ê 人是你，無想 bueh 繼續讀德國奧地利史 ê 人，我就愛出錢 ê 人主意。」

「我出錢，你主意。」

德國遊客是歐洲各國觀光財源上大宗 ê 來源，一直向望厝邊兼向時 ê 兄弟德國 kā 𪜶鬥相伨 ê 奧地利 mā 向望德國遊客莫 kā 奧地利當做行踏克羅埃西亞、義大利 ê 過路站，真骨力請兄弟電視台推薦奧地利，總是應效敢若無傷大。

這斗若 m̄ 是 Arnold Schwarzenegger 步頻出現 tī 罩霧，參詳規半晡 ê gún 押尾猶是嫁雞綴雞飛，嫁狗綴狗走，我綴出錢兼主意 ê 人行 buē 去翻頭想著這件，我一直想 bueh 行踏 ê 大學之都。

我 tuì 大學之都有一款莫名其妙 ê 意愛，講莫名其妙是安慰 ê 妝娗，我一直 tuì 插班大學成功卻因為經濟壓力棄權 ê 往過感覺缺憾，總是愛我這久翻頭轉去讀大學，我甘願繼續遺憾。

人生 ê 藍彩就是愛按天堂來保證(Das Blaue vom Himmel versprechen➀) tsiah-buē 萬項萬事攏麻痺。

感謝翁出錢 hōo 我主意，感謝 Arnold Schwarzenegger hōo 我想著想 bueh 疊 ê 柴角仔猶閣欠一塊 --- Graz。

➀ 無法度搭胸坎 ê 菝仔票

Graz 奧地利第二大城 mā 是捷 hőng 當做前往克羅埃西亞交義大利 ê 過路站(德國遊客)。

Graz 是羅馬年閣重要 ê 米倉之一，tī 六世紀 mā 勻勻仔按田地捏出城市粗坯。遮第一个粗坯是有軍事用途 ê 城堡(Burg➀)，sóo-tí Graz tī 斯洛維尼亞語有小城堡(Gradec) ê 14。不過 Graz 按城堡行到真正成做一个城市並得著城市認證記章行 bueh 700 冬，1245 Graz 總算得著頭人 ê 目色 kā 伊安一个正式身份。

上城堡山 ê 方法 Part 1.:步輦

1379 到 1619 Graz 成做歷史上以姻緣替代戰爭來得著領土實權出名 ê Haus Habsburg(哈布斯王朝)統治 ê 城市之一，伊佮奧地利目今 ê 首都 Wien 齊有相仝 ê 運命，三不五時愛接受 Osmanlı(鄂圖曼) ê 追求。

2003 Graz 成做歐洲文化首都，2015 成做歐洲重要 ê 宗教改革(Reformationsstadt Europas)城市。

Wien 是音樂之都，Graz 是大學之都特別是醫療。

記錄著醫療之都，我就順紲記錄我佮德國朋友按火星 ê 遙遠，因為 Graz 成做法國佮德國徛位 tī Greffern 萊茵河 ê 距離。

「Gún 頂站仔去 Graz 揣後生」朋友那切 Tshì-sù 話仙。

一直揣無機會 kā 恭喜 ê 我，總算掠著機會通展一下仔朋友情「翁婿是醫生，後生 mā 是未來 ê 醫生，爸仔囡攏是醫生蓋優秀。」

德國人 ê 謙虛有當時仔 hōo 我掠無頭摠，像這項 ē-tàng 直接分張 ê 激派頭𪜶 m̄ 直講愛踅花園(Durch die Blume，轉彎踅角)，總是𪜶 mā 捎無我 ê buē 慣勢是按怎愛 kā 𪜶請教按怎配合較妥當。

一个慣勢有伊 ê 文化背景有啥物好喋詳， 總是本底無北港廟壁通晝仙 ê gún 總算有法度做伙話仙，不過 mā kan-ta 畫有這仙無仙。

Mit Deutschen abstand halten, das ist einer sehr wichtigers Menschenrecht

佮德國人保持距離是尊重人權重要 ê 一項代誌

 Sie wurde zur Menschenrechtsstadt erkoren und ist Trägerin des Europapreises --- Graz

成做聯合國文化遺產城市 ê Graz 有豐沛 ê 文化佮人文，總是 tshan-tshiūnn 頭段記錄，伊佮德國特別是東爿，像 Plauen 宛然成田美名子/Narita Minako CIPHER(雙星奇緣) hōo 你分 buē 清 tsiâ 是 Ciper tsiâ 是 Siva。因為這个個人偏見因端 gún 就遮瞭瞭，遐䀐䀐，順紲 kā 出名 ê Schloss Eggenberg 閃過。

不過，Graz 頂港有名聲，下港有出聲 ê 鐘塔交按鐘塔徛懸向下攝相絕對 buē-tàng 閃。

根據考古，Graz tī 公元 3千年就有人類 ê 跤跡，伊 tī 羅馬年閣是羅馬重要 ê 米倉，tī 羅馬拆做東羅馬交西羅馬，伊 tī 1140 年成做頭人送 hōo 扞權者 ê 禮物，1379 年伊成做 Haus Habsburg ê 徛家。

Graz 現此時 ê 中央廣埕就是按 1160 年生湠到目今 ê 生張。

1585 成立第一个大學。

1598 年 kā 目今成做榮耀象徵 ê 路德教派傳教士趕出地界，隔轉年 kā 路德教派設立 ê 學校全數囥門閂(tshuànn)。

1619 Haus Habsburg tuì An der schönen blauen Donau 產生愛慕，Graz 這位閃爍 ê 珍珠就此成做 A.I. Artificial Intelligence ê David ê 角色失人疼失人惜。

Graz 目今 ê 行政範圍屬講著金瓜佮產品隨想著奧地利金瓜 ê Steiermark 佮奧地利驕傲 ê Arnold Schwarzenegger ê 故鄉。

出世 tī Thal(塔爾) ê Arnold Schwarzenegger 窮真 m̄ 是 Graz 人，總是兩爿遠近不到 4 公里 ê 伊，慣勢講伊是 Graz 人，Graz mā 歡喜有伊做城市大使。

行踏 Graz 大小巷路 buaih 交 Arnold Schwarzenegger 挨拶 m̄ 是一件簡單 ê 代誌。

上城堡山 ê 方法 Part 2.:拆票坐流籠車

Graz 交歐洲其他城市𫝛款 tī 拿破崙戰爭成做法國短短 ê 徛地，紲落來 ê 文化、經濟革新佮新技術發展齊 hōo 本底是書生 ê Graz 有龍銀添新妝。

總是，有人就有複雜 ê 政治，1918 Graz 跟綴奧地利君主制度落台 mā 按市場交易掛銀兩淹跤目行向落坐。

Murinsel 又閣號做 Die Insel in der Mur

Graz tī 2 戰時間 mā 是奧地利上捷食盟軍按天頂分送炸彈 ê 城市。

寫著食炸彈 tuì 奧地利歷史 m̄ 捌一个呼 ê 我開始理解 Arnold Schwarzenegger ê 這段話 Ich komme aus einem sehr zerstörtem Land ohne Hoffung，伊是以英文演講，我家己家婆 kā 伊轉譯做德文。

目今 ê Graz 交首都 Wien 𫝛款看 buē 著德國柏林 ê 過去 hōo 我成做一隻貓，奧地利人交臺灣人敢有相𫝛 ê 問題，群體失憶？

按奧地利政府 kā 希特勒徛家換做警察局，我想奧地利人無咱番薯島群體失憶 ê 問題，畢竟德國 m̄ 捌妝娗柏林 ê 䆀。柏林正經有夠䆀....m̄-koh ē hōo 你成做哲學家，至少我是按呢認為。

波斯(伊朗)料理

奧地利交德國食食文化 tuì 我來講是完完全全相𫝛 ê 無一个精差，sóo-tí 慣勢一个新城市，一个新滋味 ê 我 tī Graz 準做枵燥 mā buē 撏錢掠枵。 

「你今仔日人敢無爽快」翁成做我 ê 鵁鴒講話。

「擋 tī Bismarck 頭前 ê 是奧地利 --- 神聖羅馬帝國 ê 幽魂，徛踮我目睭前 ê 是 Castor and Pollux，這間厝燒過彼間厝 ê 一屑仔攏鼻無厝(趣)味。」

當我大划大划向 Bá-suh 站划去，翁笑甲目汁㴙㴙落講「德國佮奧地利食食除了甜粅粅掠外，我 mā 鼻無火燒厝，厝(趣)味。」

我輕輕仔 kā 搭一个仔胸坎表示無陷眠就好繼續向 Bá-suh 站划去。

「遮有波斯餐廳」伊隨 kā 手機仔地圖𫞼 tī 我 ê 眼鏡前，我 kā 目鏡成做瓜笠仔戴踮頭頂，斟酌看手機仔細甲若狗蟻 ê 字講「若 tī 這附近」斡頭隨向波斯餐廳划去。

伊朗料理

一到位我隨斡頭，翁隨逐過來問「發生啥物代誌？」

「這久是中國餐廳」我應，翁順我 ê 話行倚向內金金相手 mā 若指桌頂 ê 紙巾仔講「敢若 m̄ 是中國餐廳。」

「呔 ē....」話猶未講到煞，一个烏頭鬃喙鼻仔 ê 少年家按倚大門 ê 廚房探頭挨拶「今仔日 m̄ 是禮拜有特餐，來坐。」

見著少年家我想著掠做投資者是番薯 m̄ 驚落塗爛，只求枝葉代代湠 ê 中國餐廳 tī 德國 ê 生張，隨 tìm 頭表示 gún bueh 交觀。

位揣好，少年家 mā kā 菜單送來，伊 mā 若發覺我 ê 好奇隨講「遮本底是中國餐廳，𪜶收攤 gún-ê 資金 mā 無夠額就接續𪜶 ê 設計風格做生理。」

伊朗料理

菜點好，翁隨 uī 𪜶添資料，我 mā 踅轉去彼日人 tī Ulm 見著中國風格餐廳掠做是中國餐廳 kā 准過，押尾喙白猶是拚 buē 過枵燥踅翻頭轉去挨拶 tsiah 知影伊是印度餐廳 ê 記持。

「我無確定逐个中國人手骨敢有較大枝，總是我確定中國料理踮歐洲猶是排無前三名，sóo-tí 我真佩服𪜶來遮開餐廳齊是皇宮大小」我那食烘甲𩚨𩚨 ê 肉條那講。

「你知影東柏林外國人餐廳 ê 故事，著 m̄」翁問。

「彼凡勢有掛 tī 遮 ê 餐廳，總是我較相信是𪜶掠做歐洲有挖 buē 完 ê 寶兼無法度敨放 ê 鋪面蟶(than)，浸水蚵」我講。

「M̄ 管佗一个，𪜶 ê 鋪路成做接手人 ê 省本。」

感謝翁 ê 斟酌 hōo 我無行向喙白並損失楦闊喙斗 ê 機會。

➀ 德國 ê 城堡有分 1. Schloss 2. Burg 3. Festung；Schloss 是新天鵝堡彼類屬國王 ê 徛家，Burg 是王公貴族徛家兼領地，像 The Last of the Mohicans 英法軍隊相戰 ê 彼堡，Festung 屬軍事用途，我個人 kā 伊號做堡寨。

栽欉 2022.10.26

翻田塗 2024.07.23