有當時我會按呢想，德國 ê 自省教育敢正經有應效?
起因，搪著 ê 人無分年歲抑是階級，𪜶若認定你是低路人，就使𪜶 mā 無幾支毛通品並，𪜶猶是囂俳甲我品並 ê 豬屎籃仔是你 m̄ 捌貨。Tshan-tshiūnn 彼日按呢，一个德國人大大典典 tī gún 遮 ê 人客目頭前用懸目看 tsham 伊相𫝛攏是仝階級 ê 義大利人殕殕。
我 ê 語言無分佗一國齊低路，只好目睭金金看意大利朋友用眼神 tuì 我講 “ 人控到你頭頂放屎尿，你閣遐爾仔懦懦 hōo 𪜶食你夠夠 ”。事實上 m̄ 是我無致意，是我清楚知影遮 ê 人五錢豬仔掛一支喙，無 “ 德國人 ” 這个名詞 hōo 𪜶附身，𪜶正港是 Vox et praeterea nihil，除了聲音啥物攏無 ê 無。另外，我清楚知影家己 ê 勢面，就由在這類歹瓜厚子，歹人厚語 ê 人去舞𪜶意愛 ê 戲齣，畢竟交這本書 ê 主角 Nadja 相比並，我無行 tī 卯字。
我這款消極 ê 態度敢是懦懦軟汫 ê 表現？Tuì 意大利朋友來講百面是，tuì 我來講 kan-ta 是簡單 ê 飫喙，無彼个美國時間交這類六月棉被，揀人蓋 ê 族群盤話，像這本書 ê 另外一位主角 Mohammed Helmy 醫生。
《穆斯林與猶太少女》是人 tī 德國踅冊店搪著有興趣 ê 報導文學，總是德文能力無到 A1 程度就此 kā 伊擲過山溝，總是人生宛然 Forrest Gump 分張 ê 智慧。
Life was a box of chocolates. You never know what yor're gonna get.
Das Schicksal wollte es so，運命愛伊是按呢生，我 tī 德國交伊相拄搪，押尾 mā tī 德國交伊成做朋友。臺灣商務印書館股份有限公司有出版這本報導文學 ê 台灣華文版。書按台灣寄到德國用無到三工 ê 時間就讀 hōo tsiâu-tsn̂g，紲落來伊成做我搪著這類搪著 “ 德國人 ” 三字隨水鬼升城隍 ê 鎮定劑。是講 mā 有人因為嫁德國人，是德國留學生，德語講甲老著月光跤看人影，家己看、家己大，mā 有人德語抑是英語講 buē 贏你就展伊是法國人、西班牙人，簡單一句啥物龜叨鱉趖攏有。若 bueh 計較夠夠是美國時間攏無夠用。
啊，低路人有才調讀書頇顢寫讀書心得兼冊皮有紹介主要內容，我就 m̄ 通關公面前耍大刀兼臭頭仔包布，防蠅（風神），不而過我想 bueh kā gún 翁 2026.08.09 出門做 OpenStreetMap 志工搪著 ê 故事轉做文字，記錄踮遮。
德國 ê 街路這幾冬出現若 Hollywood Walk of Fame ê 標誌小石碑，遮 ê 小石碑交 Walk of Fame 無相關，遮 ê 小石碑代表 Ronen Steinke 冊內所寫 ê “ 赫爾米心知肚明：一九三三年四月一日納粹衝鋒隊員將他的猶太同事拖出診間時，其實也很想把他扔出去。納粹人事官員稱那次的任務為「猶太醫院的人員淨化行動」，既然如此，當然也不必對他這個「非亞利安裔」的外族人客氣。”
OpenStreetMap 有一个計畫 kā 遮 ê 小石碑完全記錄踮地圖，gún 翁𪜶這陣 m̄ 驚大日虎 hōo 𪜶著痧猶愛興出門畫地圖 ê 人，這回 tī 小石埤搪著實際 ê 歷史人物。
“ 當 gún 一陣人包圍這塊小石碑，一位序大行倚問 gún 敢是揣無著路需要鬥相共，gún 回答 OpenStreetMap ê 計畫，序大隨微微仔笑講「小石埤 ê 字名是 gún 媽媽 ê 名，gún tī 納粹期間按德國逃到荷蘭，紲落來去英國，1960 年轉來德國。按英國轉來德國猶是真好運，蹛踮這間厝 ê 人願意 kā 厝 hâinn hōo gún hōo gún 省去一大堆行政過程，我這久逐月日 ē 去無仝 ê 學校無仝 ê 班級分張我 ê 故事。”
「序大 ê 爸爸--leh？」
「Gún 無問。」
「序大離開德國 ê 時陣幾歲？」
「Gún 無問。」
「一个活歷史 tī 恁 ê 面頭前，竟然啥物攏無問。」
「Gún 有食雞卵糕佮啉咖啡。」
莫怪德國 buē 進步，我偷偷 tī 心肝穎譬相。德國 buē 進步 m̄ 是我個人想法，是德國人家己檢討 ê 答案。德國新創公司像 Meta 這類跟綴時代變化並影響全球 ê 公司，自 Helmut Kohl 年代 m̄ 捌閣出現 ---- “ 德國已經誠好矣，免閣變化。” 正港是一个政策影響幾仔个世代 ê 人 mā 影響國家發展。
「序大是德國字姓抑是猶太字姓？」我繼續做貓好玄。
本底興趣趣分張 ê 人因為我 ê 好玄勻勻仔失去耐性「百分之百德國字姓。」
「猶太人 ê 定義按母親來，序大消失 ê 阿爸是德國人。」
換伊問甲有一枝柄「你呔會知影？」
「NDR 訪問並記錄伐過百歲序大𪜶 ê 破百生活，有一位因為阿母是德國人，伊閃過交阿爸相仝 ê 運命，人生停跤 tī 納粹年間 mā 閃過 Ronen Steinke 分張 ê 事件。」
一九三四年二月，在杜賓根（Tübingen）的留學生福阿德．哈珊納因．阿里（Fuad Hasanayn Ali）就曾在一家咖啡舞廳裡，被人指著鼻子罵：「黑鬼，低等民族...你根本沒資格跟德國女人跳舞！」
von 劃歸「與我同類」
「𪜶 kā 我講，我會使得參加 NAPOLA，𪜶知影我 ê 背景，轉到厝我 kā 這件代誌講 hōo gún 媽媽聽並 kā 我 ê 決定講 hōo 媽媽聽，紲落來 ê 日子我 m̄ 捌閣見過我 ê 猶太阿爸。」我 kā 記持放出來 hōo gún 翁去食餌 mā kā 書楔轉去冊櫥，放手 hōo 伊去愖啥物號做 “ 平等 ”。
是，gún 最近又閣 uī-tio̍h 伊愛爸母來上童交對頭冤家講歹話，我知影伊清楚知影我 m̄ 是軟仔通 hōo 伊推，所致伊家己 mā 氣身惱命，總是有病愛看病，我 tī 這个過程 mā 學著 kā 問題捒轉去 hōo 伊家己去思考，莫閣講寡互相攏 ē 後悔 ê 話。
Kā 龍鳳代牽線到這本書敢 buē 傷過龜怪？Buē，起因 gún-ê 姻緣拄好行 tī 伊無法度清楚分拆 ê「交我仝類」hām「無仝類」，伊討厭爸母行為掠家己交𪜶無仝類，卻一直成做𪜶仙剝攏剝 buē 離 ê 烏面賊，我是赫爾米醫生 mā 是 Nadja 也是赫爾米醫生 ê 德國女朋友艾咪。
人生正港宛然一盒 Tsioo-kóo-lè-tòo 你永遠 m̄ 知影你 ē 得著啥物口味。因為伊 ê 分張，我想著這本書 mā 推薦伊去讀這本書，特別是〈劃歸「與我同類」〉這部份。
故事聽煞，我窮實捌 kā 想法寫踮 Instagram，隔工透早隨拊掉。這个行為 hōo 我認真愖家己 tuì 社交媒體 ê 想法，紲落來得著這个答案，kā 心情練跤花寫踮 Instagram hōo 我一種若白肉雞仔 ê 無自在，kā 好䆀齊寫踮遮有一種十二月屎桶盡摒 ê 快樂。自在做家己，果真愛好好仔利用利便 m̄ 是 hōo 利便牽咱落湳。
2023.06.01 初寫
請先 登入 以發表留言。