亂皂𥴊仔店 ⓂⒺⒾⓃⓀⒾⓄⓈⓀ

恁愛慣勢tsit款看袂著結果、看袂著向望ê日子。恁行動一段時間，就會hőng掠去，恁會招認，koh來hőng處死。恁看會著ê結果就是按呢niâ。咱tsit世人是無機會看著一屑仔改變。咱是死人。咱正港ê性命是佇未來，到hit時咱是化做坱埃佮白骨去參與。毋過hit个未來是偌久以後，無人知。無的確是1000年。現此時咱kan-na會用得一點仔一點仔共健全人性ê地盤楦闊，別項lóng無可能。咱無法度做陣行動，kan-na會當共智識一人傳一人、一代傳一代。佇思想警察監視之下無別項法度。

這段文字是我讀 1984 上有感覺 ê 一段，伊 hōo 我想著 Lenin, Castro, Hitler, Franco 等等世間喙水真好 ê 搦權者，讀這段文字 ê 心情 mā hōo 我想著家己是 Winston 聽 O'brien tuì 伊講出這段話 ê 心情，「伊足理解我 ê 想法，而且 kā 伊分析甲足入心肝穎 ê 深刻」。這段話無論楔入政治、感情抑是工課齊是缺喙賣蛤仔肉，峇峇峇。

1984 台文版是我第一斗閱讀 ê 版本 mā 是閱讀後 tsiah 知影這本書 tī 目今已經 buē 記持片名 ê 德國電影 ê 重要性。一陣東德少年家 kā 反甲比鹹菜閣較漚 ê 書以恬靜方式分張閱讀。這陣少年家有人 tī 東德尾期行入 Winston ê 結局，銃子直迵心臟人生就此停跤，mā 有人接續伊 ê 跤步繼續反抗東德政府到柏林圍牆結束。

George Orwell 是某乜人 tī 我猶未閱讀周盈成先生翻譯 ê 版本我無一个認捌，顛倒是 gún 翁一聽我講，我 bueh 向聚珍台灣注文這本書，伊隨攑雙手雙跤講「緊注文，這本書你絕對愛讀」，紲落來以一種你讀過彼本糞埽書呔討 m̄ 捌讀過這本書 ê 表情 tuì 我金金相，我家己 mā 好奇呔討 m̄ 捌讀過，畢竟我是世界名著 ê 相趁相喊者，只要有才調揣著讀本。

誠如頭起先所分張，低路人 m̄ 捌 George Orwell mā m̄ 捌 1984 抑是伊 ê《動物農莊》，總是自第一頁開始閱讀，我有一種熟似 ê 感覺，伊足成蘇聯、伊足成德國第三帝國，伊足成德國公廣電視台放送 ê 記錄片，閱讀結束翻頭繩落勾 ê 部份 tsiah 知影原來如貓，George Orwell 捌參加西班牙內戰，這場戰爭 hōo 伊體驗著蘇聯式政治鬥爭 ê 烏粗暗殘，紲落來拚勢攑筆批判一切極權主義。

世間行過極權主義 ê 國家 tsuē 過民主國家，民主國家 mā 有威權獨裁包裝民主，民主敢誠實 tshan-tshiūnn 小說新講原理所舉 ê 美國《獨立宣言》例句相𫝛，「阮認為以下ê真理是自明--ê：人人出世就平等，造物主贈予予若干袂使讓與 ê 權利，其中包括生存權、自由權和追求幸福權。為著保障tsia-ê權利，眾人才佇𪜶當中建立政府，其權力來自被統治者ê同意。任何形式ê政府一旦會對tsia-ê目標造成毁壞，人民就有權利來共改變抑是廢捒，並且建立新ê政府....」，這段話 tuì 我來講宛然 tsuē-tsuē 人講 ê 民主有缺陷，伊猶是比獨裁威權閣較使人追求，起因我無想 bueh 行入連互相意愛攏愛受控制 ê 人生，像新講 ê 性罪交好性，畢竟 m̄ 是每一个卵子交精子攏有才調成做人中之龍抑是鳳 mā m̄ 是每一个有才調無好田地猶有領著好喙水 ê 能力。

Immanuel Kant 講：

Dinge sind wertvoll, wenn wir sie brauchen können. Ein Schuh ist zum Beispiel wertvoll, wenn er passt und man mit ihm gut laufen kann. Der Schuh hat dann einen Wert. Wenn der Schuh kaputt ist, hat er keinen Wert mehr.

每一項事件攏有伊 ê 價達，當咱需要伊。像鞋仔就有伊 ê 價達，當伊符合你行路 ê 需求。這鞋仔就有伊 ê 價值。當這鞋仔歹去，伊就無任何 ê 價值。

Bei Menschen ist das anders:
Der Mensch hat immer einen Wert. Auch wenn er krank ist. Auch wenn er nicht arbeiten kann.

人就無相𫝛矣：

人永遠有價值。無論你致病破病，無論你失去做穡 ê 能力。

Wenn etwas immer einen Wert hat, sagt man: Es hat eine Würde.
Jeder Mensch ist deshalb wertvoll, weil er ein Mensch ist.

當某一件代誌永遠有價值，咱 ē 講，伊有尊嚴。

所致咱每一个人攏珍貴，因為伊是人。

Alles hat einen Wert, der Mensch aber hat eine Würde.

萬事齊有價值，不而過人有尊嚴。

德國基本法第一條 Die Würde des Menschen ist unantastbar 人性尊嚴/權力不可侵犯，1949 出版 ê 1984 宛然譯者周盈成先生所分張 ê ....毋過並毋是有咧監視就是大兄哥。有極坎ê權力才是。極坎權利搦牢ê人佮組織咧想啥？冊裡hit位精光ê黨幹部講kah透機：「權力毋是手段，權力就是目的。」「想像一跤靴管踏佇一个人ê面頂頭---永遠踏咧。」

我無法度想像家己 ê 面 hōo 人踏咧，然後閣愛像阿 Q 按呢 ka̋ng 說多謝，我無法度想像，不而過我寶惜我 ê 價值交尊嚴，像我自來 ê 我想我講我寫，m̄ 是一日到晏要意 Missachteten 無受人 ê 重視就放棄家己自來 ê 價值交尊嚴，咱是人 m̄ 是鞋仔。

德文有一句話 die Katze aus dem Sack lassen mā 會使得講 lässt die Katze aus dem Sack，白話是貓仔按袋仔挈出來，意思是一个人真實 ê 態度、想法、表明意圖、透露 & 出破秘密/機密、宣佈好消息。

自 O'brien 出現，我 ê 頭殼跟綴這段話踅，中間我捌 hōo 伊關千里幕 ê 動作牽去伊就是 Goldstein，等到 Winston 讀彼本冊「第一章無知就是力量」我開始懷疑伊是大兄哥，紲落來... tsiâ 是大兄哥已經無重要，起因貓仔已經按袋仔挈出來矣。

猶是引述譯者周盈成先生 ê 話句來接枝我想 bueh 表達 ê 心情 --- 佇咱tsia都有袂少人咧gōng信專制比民主較好、較「有效率」。煞毋知𪜶崇拜ê統治者想--ê佮𪜶無仝款。世稱紅色 Rosa ê Rosa Luxemburg 有一段話 Ich fühle mich in der ganzen Welt zu Hause, wo es Wolken und Vögel und Menschentränen gibt. 我感覺全世界攏是我 ê 厝，佗落有雲有鳥隻交滴落珠淚 ê 人類。Rosa Luxemburg ê 人生態度隨人有隨人 ê 看法，總是德國公廣電視台願意 uī 伊做一篇歷史記錄片 hōo 後世人家己判斷，我 mā 順這个湧重新改釋這句話 tuì 我 ê 意思，我無 m̄ 願人類 ê 世界有一日成做這段話 ê 真實版本。