亂皂𥴊仔店 ⓂⒺⒾⓃⓀⒾⓄⓈⓀ

往陣會使得無料閱讀 ê 部落格 m̄ 知影敢是向 Google 申請 buaih tī 搜揣名單內底，所致目今搪著 ê 食物較無我向時意愛 ê 手路，我 ê 意思是 hōo 酸酵母麭順天氣變化發展家己 ê 性地。除起這个變化猶有另外一个變化，彼著是以小麥仔做酸酵母 ê 食譜愈來愈 tsuē，hōo 意愛烏麥仔酸 ê 我愈來愈有這款感覺，家己敢若 teh 𫝻 Instagram ê 白汫無素，uī-tio̍h 解決這个問題，我決定入人門，順人意跟綴網路食譜環境抐一矸鐵殼麥仔酸酵母來做酸酵母麭，hōo 家己 ê 巴多胺較 buē 杜猴損五穀。

我無社群媒體中毒，不而過 Instagram 一開我隨感覺家己敢若 teh 食毒 ê 無四序，總是我又閣清楚知影，Instagram 是必要 ê 存在，伊 hōo 我交這个世界 ê 某一部份猶有連結，特別是我個人四常 buē 去接觸 ê 世界，𫝛時 mā 補充我有接觸 m̄ 過樹根無才調四界湠 ê 部份，像閱讀推薦，我按 Instagram 得著博客來、讀冊等等以外 ê 新讀本。

這出食譜 tī 我決定抐一矸鐵殼麥仔酸酵母進前就不三時交伊相閃身，鐵殼酸酵母抐好 mā 試過無濫烏麥仔麵粉、瓜子 ê 鹹汫，我決定翻頭交伊挨拶一下，並挑戰家己 ê 喙白，起因我無佮意亞麻仁，無論敆沙拉、優格等等，亞麻仁 ê 氣味 hōo 我想著茴香仔炒卵 ê 恐怖。

窮實我無啥確定我佮意抑是討厭茴香仔，總是食到這个歲聲，我認捌 ê 茴香仔料理 kan-ta 茴香仔炒卵，無峇脾土，芬蘭三文魚湯敆茴香仔，愛甲骨力做膨鼠試鹹汫。

德國 ê 亞麻仁大約仔分做這兩款，原樣交挨礱。原樣 ê 亞麻仁愛浸水透暝 tsiah 會使得食，挨礱 ê 亞麻仁會使得直接做𠕇果掖 tī 優格、沙拉等等。原樣 ê 亞麻仁 tī 早前就食 buē 慣勢，所致 m̄ 通 uī-tio̍h 試鹹汫來杜猴損五穀，我就大主大意 kā 原樣亞麻仁替換做挨礱亞麻仁，料想 buē 到伊 m̄-nā 好氣味閣好味好素 hōo 我一塊接一塊食 buē 離，食甲脹胿並好玄 kā 挨礱交換手 hōo 原樣亞麻仁 m̄ 知 ē 是啥物好滋味。

Ok, wir haben der Jakobsweg geschafft... natürlich nein, aber 25€ für 4 Std. Parkplatz, ich werde bisschen fleißig sein.

城鎮若樹根跟綴山壁生湠釘根 ê Rocamadour 是天主教朝聖聖地，法國第五上受歡迎觀光景點，mā 是𬦰山愛好者行踏 Alzou 山谷上好 ê 起點，抑是我這類用四輪朝聖 mā 會使得規張紙畫一尊觀音 tuì 人講「人我 mā 是有怙 11 號上教堂懺悔」ê 好角勢。

屬法國上媠田庄協會之一 ê Rocamadour 伊 ê 名稱起源按聖 Amadour 遮來，伊是一位隱士 uī-tio̍h 修行 tī 遮順岩石起造家己 ê 禮拜堂，紲落來 ê 跟隨者跟綴伊 ê 跤步 kā 這片山壁勻勻仔發展到目今 ê 面肉。順溪流起造建築者是世俗者：平凡百姓，順山跤壁起造建築者是神職人員，順山崎起造建築者是騎士：皇家人員。

Rocamadour 自 12 世紀著是頂港有名聲，下港上出名 ê 朝聖之路。伊上出名 ê 朝聖者合該然是法國王路易九世。

有關 Rocamadour 成做朝聖之路 ê 講法有百百種，有人講遮每一个斡角 ê 禮拜堂 ē 現神蹟，像鐘仔聲 ē 家己響，有人講遮 ê 聖母像治好法王 ê 無四序，mā 有人講 1166 年 tī Marienkapelle（聖母禮拜堂）hőng 發現 ê 墓壙，伊內底完整 ê 骨骸 ē 展神蹟治百病。這身骨骸根據天主教 ê 確認，伊著是來遮起造禮拜堂 ê 隱士聖 Amadour，城鎮名稱就此定名做 Rocamadour。總扯來講，Rocamadour 自 12 世紀開始著是天主教重要 ê 朝聖之地。只不過，斯當時 ê 朝聖者需要戴跤手枷用跪 ê 方式𬦰上懺悔台，𬦰上懺悔台進前閣愛𬦰 216 坎石坎 tsaih 會得。彼當陣上愛送人來遮朝聖 ê 教區 tī 荷蘭。

陳心棻、陳心芎兩姊妹仔自細漢就有大多數人無法度得著 ê 祝福「刺鑿」交「安電仔」。

姊姊心棻 tī  舊政權尾期，聯邦黨佮總機關相戰期間，猶 tī 淡水市讀大學，伊 uī-tio̍h 安全坐火車轉去家鄉諸羅山 ê 期間，運途行 tī 卯字交聯邦黨頭人坐仝一个車廂就 hőng 掠去「發電所」，一關八冬外。

妹妹心芎 tuì 電腦有深甲若菲律寡海溝 ê 趣味，總是 uī-tio̍h 敨放厝內經濟壓力，伊自願加入海軍，服務 tī 本州國，官拜上尉。

心棻交心芎自囡仔就發覺家己交別人無相仝，心棻鬚邊 ê 血筋 ē 跟綴伊 ê 問題振動，趒一下表示歹吉兆，趒兩下表示好吉兆。心棻因為這个能力 hōo 伊 tī 安發電所 ê 日子過甲較 buē hōo “ 頂司 ” 刁古董揣麻煩，發電所 ê 人 mā 攏知捌三號寮有一个相命仙。心棻 kā 這个能力號做「刺鑿」。

心芎交阿姊心棻一回 tī 廟埕𨑨迌，無張持跋一倒就此頭後擴留一个疧，這个疧成做伊 ê Antenna hōo 伊有才調聽著日鬚 ê 聲，天羅板佮壁裡 ê 電路聲等等，伊聽有遮 ê 聲 m̄ 過無才調斟酌講出聲具體 ê 形體 kan-ta 有才調用色水做比如，像大心氣 ê 時色緻 ē 反深，講白賊話時 ē 反淺，伊 kā 這款能力號做「安電仔」。

Nina 是西部電視台編輯部人員，Sven 是伊 ê 頂司 mā 是男朋友，Nina 因為電視台同事 Sarah 臨時臨曜欠安 hōo 伊得著接手去巴西出外景 ê 機會。

Sven 是一位談戀愛永遠靠勢佔地利兼愛紅目、厚沙屑、疑心生暗鬼者。Tī Nina 猶未有各樣進前伊著憢疑 Nina 交有女朋友 ê 攝影師 Leo 有一跤。

Nic 是南部電視台 ê 導演，伊 hōo Nina 初初見面就煞著頂腹蓋，紲落來青盲貓咬著死鳥鼠 hōo 伊有機會 kā 地獄轉做天堂。

Nina 出發巴西進前，就按算 kā 無峇 ê 貓砂盆徙走，總是生食都無夠，哪有通曝乾 ê 生活壓力 hōo 伊 m̄ 敢驚驚 buē 著等，繼續田螺含水過冬。

Nic 自囡仔就知捌家己 ê 愛情觀交𠰤人無相仝，伊 mā 清楚事業想 bueh 閣較有發展，伊需要草人幔棕蓑揣假影 kā 伊透世人無法度生 ê 影塌跤，感性 tsuē 過理性 ê Nina 是上好 ê 相放伴，特別是巴西攝影最後一日 ê 慶祝會 hōo 伊得著出業紀念相。

當 gún tī 法國睏天路，我 ê 跤肚真愛 tī 下半暝招我跳舞，因為罕得搪著這款狀況，隨準伊做床苴仔無夠軟，就舒予備 ê 棉襀被來解決問題，料想 buē 到糾筋無解決，險險 kā 翁仔某舞出一軀痱仔來。2026 ê 法國熱甲我定定甘願草埔飼蠓 mā buē 睏床枋。

加舒一領被無法度改善我 ê 糾筋，我開始觀察家己 ê 啉水額， 發現一日啉有夠額，甚至超磅，按呢代誌百面無戇人我想 ê 遐爾仔簡單，特別是我有做伸圇來放鬆筋骨。

一日徛騰騰交翁練仙，倒爿腰子筋雄雄疼甲 hōo 我流清汗，我隨知影這 m̄ 是四常姿勢無拄好 ê 問題，這是健康 tuì 我 ê 刣雞敬猴 “ 你閣繼續喙白，我 hōo 你愈無四序。”

「敢愛食止疼藥」慣勢萬事交 hōo 藥仔 ê 去處理 ê 翁看我若有身 ê 行路姿勢，出主意問。

「你敢第一工 tsiah 熟似我。」

意大利電影明星 Sophia Loren 講「M̄ 是美麗決定咱佮意 Tsiâ，是愛 uī 咱決定 Tsiâ tsiah 是美麗。」猶原烏貓年歲 ê 我，認為 Sophia Loren 講譀古代，歲聲摃到五十捅一寡我總算理解伊 ê 智慧，起因武俠小說無論我按怎讀，伊永遠 hōo 我讀無若雲 ê 心適代。

《翻身‧番身》是作者出版《Tò-tńg 倒轉》隔十冬兩月日 ê 新作品，是我順《語言學家破解台語》認捌 ê 台語小說新讀本，mā 是我第一斗正式接受武俠小說無論華文抑是台文，伊 buē 成做我靈魂 ê 色緻，tshan-tshiūnn Hape 搪著 Anne 仝款（Ich bin dann mal weg），所以我免閣硬拗家己理解萬事萬物，像 Sheelagh 想 bueh 理解，伊交同事發生啥物代誌仝款。

《翻身‧番身》m̄ 是百分百 ê 武俠小說 m̄ 過〈蜈蚣湯〉用若西螺七崁在地故事掜入有少年人認為彼是表演藝術笑詼代 ê 鄭南榕事件，交大部份 ê 人凡勢捌聽講 m̄ 閣頭尾永遠鬥 buē 峇抑是理解 ê 真實是豬母牽去牛墟去 ê 七海官邸事件 hōo 我 tī 霧嗄嗄 ê 武林過招，不斷欽佩先人 ê 勇敢 kā 蜈蚣配冷茶，連湯掛料啉--落，紲落來 ê 故事，有興趣 ê 人家己揣小說來實踐 Georg Friedrich Händel 交代 ê Man muss lernen, was zu lernen ist, und dann seinen eigenen weg gehen（你愛先學習，愛學習 ê 物件，紲落來 tsiah 行家己 ê 路），畢竟這是我看 “ 雲 ” ê 變化。

愛永遠是烏暗上閃爍 ê 彼粒星，阿漢是《迷宮中的盲眼蚯蚓》作者 ê 親阿舅，是 Goethe ê Werther，阿滿是阿漢 ê Lied des Harfenmädchens（徛琴姑娘之歌），阿漢 ê 愛 hōo 伊 tī 生活中得著幸福，甚至奉獻一切，總是這份愛從來 m̄ 捌對接過，所致準做阿漢有飽滇 ê 快樂，伊交阿滿 ê 愛猶原 m̄ 捌成做 tī 西爿 tī 東爿 hōo 咱做伙，tshan-tshiūnn 天 tshan-tshiūnn 地，遐爾仔久，遐爾仔長，m̄ 過到棄世，猶原是我--ê 是真愛抑是起呸面 kan-ta 家己上知機。〈愛你幸福〉是一篇 hōo gún 阿母、阿姊看甲 ē 慒心 ē m̄ 甘 ê 故事，是一篇 hōo 我看甲押尾感覺阿漢總算捎著家己想 bueh 愛 ê 快樂。

〈翻身‧番身〉接續十冬前《Tò-tńg 倒轉》仝名小說〈Tò-tńg 倒轉〉ê 在地歷史，伊寫出人如何 hōo “ 字詞 ” 影響 hām 按怎提升風格接受過度熱情閣紮有強烈醋意 ê 外埠者送 hōo 𪜶 ê 禮物。世界有 tsuē-tsuē 角勢經歷 The Last of the Mohicans ê 故事，世界 mā 有 tsuē-tsuē 人書寫抑是討論 The Last of the Mohicans ê 故事，遮 ê 故事有 tsuē-tsuē 版本，咱無一个人知捌斯當時 ê 人𪜶誠實 ê 決定，宛然日本時代有 ê 家庭自動選擇成做國語家庭仝款。故事是現實，現實是故事，解釋 buē 協助咱向前行，不而過迵過小說，人人散赤 ê 歷史會使得 tī 看無紗線 ê 膨紗線內底搝著線頭 uī 家己刺一領膨紗衫。

《Tó-tńg 倒轉》共計 12 篇小說，伊排 tī〈Beh 去極樂世界 ê 加班車〉前。小說第一篇〈孤兒〉寫戒嚴時代 ê 故事，第二篇〈走犯〉寫僥背，第三篇〈Phah hōo 你半小死，自然發展開始〉，短短一頁是 tsuē-tsuē 本埠變外埠 ê 心酸代。第四篇...總扯一句，12 篇小說無仝結構，卻斟酌寫出無仝世代 ê 輪迴，遮 ê 輪迴 tshan-tshiūnn Schopenhauer 講 ê 人無才調改變伊 ê 性地，合該然按呢講真僫改變，起因人有自由 ê 意志，m̄ 過針對家己 ê 向望，這个意志並無自由，無想 bueh 按呢過日子，唯一 ê 自由是 tuì 放棄講自賊。Schopenhauer mā 講過 bueh 讀出好 ê 代誌，一个條件就是莫讀出歹 ê 代誌，我想 “ mā 講台語 ê 先生 ” 百面真僫莫讀出歹代誌，所致伊 kā 台灣無論主動抑是被動 ê 真相， 用文字轉做 Fiction hōo 讀者家己去愖重倍 ê 放送、妝娗、約束 ê 故事，伊自來 ê 真實佮交幻想。

Fiction 交 Literature tī 閱讀《Tó-tńg 倒轉》𪜶 m̄ 捌踏入我 ê 目睭仁，正式閱讀前 ê “ 踏話頭 ”、“ 導讀 ” ê 討論 mā m̄ 捌吸引我 ê 目睭仁，起因掠台文閱讀比德文閱讀閣較順 ê 我，竟然出現一點鐘讀無到十頁 ê 打擊，紲落來 ê 故事 hōo 本底掠 tuì 這片土地猶有智識 ê 我隨理解家己是這地土地上散赤 ê 鳥鼠，智識有夠散兇，總是換一个角度看世界，驚惶 ê 人比冤家 ê 人 tsuē，戇 ê 人比巧 ê 人 tsuē，我因為家己 ê 智識散兇有機會按別人飽滇 ê 智識楦闊眼界，這是破壞幸福 ê 幸福 m̄ 是食飽換枵舞死家己。

我是按《語言學家破解台語》認捌《Tó-tńg 倒轉》這本小說 mā 是按這本小說認捌家己 ê 台語無家己認捌 ê 健欉，紲落來發覺台語文原來 ē-sái 按呢寫，像踏話頭 “ 新鮮台語文 ” ê「有歷史的記憶，土地的認同，宗教佮道德的困境，咱對基因的驚惶，心靈的對話。」遮 ê 萬事萬物 m̄ 免倚靠強勢語言做表達，舊漚舊臭 ê 往陣語詞 mā 免 tī 特別環節 tsiah 出現，總是身為讀者猶是想 bueh 做茶鈷呻一下，遮 ê 新鮮台語文雖罔有 tsuē-tsuē 註解，tuì 初初接觸台語文如我者猶是不足，像 hau-la̍k、phài-phue、khê-khang、làu-pua̍h 遮 ê 字詞，無字典通請教正港讀 buē 落去，有字典通請教是淺性 ê 考驗。

《Tó-tńg 倒轉》是冊名 mā 是小說標題，伊書寫 ê 議題交作者另外一本小說《翻身．翻身》相仝，是 kā 我 m̄ 捌 ê 歷史以 Fiction 方式寫出來，像捷克作家 Kateřina Tučková ê Gerta, das deutsche Mädchen（Gerta，德國查某囝仔），《目睭》寫歐洲大航海 tī 台灣 ê 記持，以 Catalunya 王國 12 世紀首都 “ Puigcerda ” 做主題 ê〈Puigcerda Nuevo〉寫人類追求 ê 世界大同 ê 對午衝交人類押尾猶原回歸 “ 假使你 ê 目睭 kā 你觸意，就 kā 伊遮起來，用一蕊目睭看天堂贏過兩蕊目睭看地獄 ” ê 狀況，準做有一工全人類成做 I Am Legend ê 世界，咱猶是伐 buē 出大兄哥 ê 手捗，不而過人類 ê 勇氣永遠跟綴危險大漢，力量 tī 衝磅之間產生，正交邪、好交䆀，宛然白佮烏，你永遠 m̄ 知影𪜶 tī 底時變殕色。你 mā 永遠 m̄ 知影 Llívia tī 底時 ē 成做 Puigcerda，Puigcerda tī 當時 ē 翻身做老百姓,，你 mā 永遠 m̄ 知影 Puigcerda 有一日有一个雙生仔號做 Puigcerda Nuevo，不而過你非常確定，故事尾段 ê 畫面永遠是輪迴，至少有歷史記錄以來攏是按呢生。

***

自瑞典轉來，頭殼一直踅這件代誌，我 tuì gún 翁掠做是愛窮實是軟塗深掘 ê 回應是軟汫抑是愛？

「你真正好字運，逐日攏有好生活，你愛珍惜」，按挪威落南瑞典停睏徛百八（駝鹿）ê 露營地，翁仔姐雙手鬥來算猶原無才調計算有偌 tsuē 人捌 tuì gún 翁講 Schwein gehabt，特別是食食若沙漠兼萬項是框金閣包銀 ê 瑞典交挪威。

正經無腫頷，gún 翁 tī 瑞典交挪威 m̄ 捌食加工食品過日，伊 ê 飯頓雖罔無才調食甲交德國無宛 2 體若神 tī 法國（Leben wie Gott in Frankreich），伊猶原食甲若皇帝，用上少 ê 錢享受上腥臊 ê 飯頓，總是爸母毒食慣勢 ê 伊真𠢕 kā Arthur Schopenhauer ê 點拄 bueh 讀出好 ê 代誌，一个條件就是莫讀出歹 ê 代誌轉換做「喙脣兩片肉，好 ê 齊是我，歹 ê 攏是別人」全世界 kan-ta 𪜶兜上𠢕上有良心閣上有智慧。

霜降交換手 hōo 立冬，日頭伯交換手月娘，15 度交換手 hōo 5 度，別人兜 ê 窗仔關甲密喌喌，gún 兜 ê 窗仔猶原閬空縫 hōo 見 buē 著影 ê 冷風入來𨑨迌閣兼無燒氣交伊捙拚。

「你窗仔按呢開，厝內 ē 生菇」，gún 翁又閣勥母上童來扞廚房兼查某囡仔教老母轉臍，窗仔開甲透底 hōo 冷風交電磁爐 ê 燒氣做陣雺煙散霧，紲落來喙那喃「你按呢煮滾水是山羊 m̄ 管按怎飼 mā buē 大箍（Die hätte den Bock auch nicht fett gemacht）ê 無較縒閣 hōo 咱兜 ê 電費成做德國一口灶 4 个人 ê 價數。」，我有咸豐三，講到今 ê 歹癖，伊有𪜶兜攢潘請人客兼萬事齊是「伊」ê 歹癖，千軍萬馬按我魂舒走過（Die Gäule gehen mit mir durch，風火著），總是我已經下願 buaih 閣六月蚶，開喙臭，伊愛穿褲（sich in Hose machen，厚性地）就 hōo 伊去穿褲，我頭斡 leh 隔山不見子，走船不等父泅入燒烙 ê 客廳。

一个萬事驚惶 ê 人交啥物攏 m̄ 驚 ê 人無宛二體，一个貪心 ê 人交啥物攏清心無貪 ê 人 mā 是雙生仔。 

頂一站仔烘一粒無囊烘模 ê 烏麥仔酸酵母麭，伊若荷蘭豆扁身 ê 外形 hōo 掠順其自然 ê 家己見著，一切是幻想 ê 真實，我只是 kā 目睭掛斗概，看人物就愛轉換做掩耳空去偷提鈴，自欺欺人。俗語講戲館邊 ê 豬母，buē 曉歕簫 mā-ē 拍拍，人生有久長時間交德國人盤撋，我敢 m̄ 知影傳統烏麥仔酸酵母麭無烘模抑是烘石枋、生鐵鼎仔無先焐燒伊 ē 生做啥物款？我清楚知影，我 mā 清楚知影只要莫遮 A-tah-mah-khòng-ku-lī 綿死綿爛歪喙雞想 bueh 食好米兼三斤貓咬四斤鳥鼠，猶是有才調出猶 tī 面冊 ê 臭頭仔包布，防蠅（風神）麭，總是，人生永遠有總是 ê Tsioo-kóo-lè-tòo hōo 你 m̄ 知影後一秒 ē 搪著啥物味素。啊，不生不滅，不垢不淨，不增不減，生住異滅，成住壞空是豬肚煮湯嫌無菜，塗豆擘爿你著知 ê 考驗，是侘寂（wabisabi）ê 對反。啊，一日食飽閒仙仙，頂家下厝吐憐涎確實 mā m̄ 是歹代，伊至少 hōo 我理解，我 ê 真實猶是 L'autre est L'enfer（他人地獄）食飽換枵。生住異滅，成住壞空，我愛閣較斟酌寡。是講，斟酌進前猶是痟貪一下，人生 tsiah 有鹹酸苦汫甜。

按 Otto 看到 Amazon，閣按 Amazon 看到 Ebay，無閒 ê 痟貪總算 hōo 我得著苦，苦味無合喙，執訣隨放下。煙火好看無偌久，換一个角度看世界，俗麭模仔 mā 是模仔。厝內 ê 菜砧愛換新，揣一日閒甲有通挨冇粟 tsiah 怙 11 號去 Edeka 看實體。

天勻勻仔水紅，北風免霆，我隨艱難，德國相連紲 ê 大暑曝死鳥鼠 hōo kā 寒露過甲若台灣 buē 記持愛做洋蔥。咳啾硞硞拍，吊 tī 手骨 bué 著俗物較贏做工課 ê 物 mā 若啞鈴 hōo 我提早做重量訓練。古早人用天干地支來表示紀年、時間 mā 用伊來表示萬物生長變化，我順申佮酉 ê 田洋變化想著 James ê 分張，這款寒合該然交伊跟綴𪜶阿爸去海墘掠鰻魚栽無宛二體。

秋分暝日對分，本底一日上愛 16 點鐘班 ê 金烏，開始提早下班， 田岸邊 buē 大欉 ê 洋梨仔 mā 勻勻仔跟綴田洋 ê 紫紅、青綠、黃 kā 四箍輾轉成格甲若美術館。我慢慢 ê 跤步 m̄ 是貧惰骨，是享受現時猶無花花世界 ê 恬靜。

Wir sind Boss, alle müssen Geduld haben.

Und warum, so warm, jetzt ist September nicht Juli oder August.

連結法國、Andorra ê LePort de la Bonaigua/Puerto de la Bonaigua 是 Pyrénées 一搭海拔 2072 米 ê 隘口，這搭隘口雖罔連結法國交 Andorra，不而過伊 ê 點仔膠路 kan-ta 通 Andorra。一粒山分兩个世界 hōo 我成做一尾魚食十外冬前交猶是男朋友 ê 翁去 Andorra 行踏 ê 記持餌。

「現此時法國 tī 隔壁，咱呔 buaih 直接去法國行行看看？」我擔頭看若崙仔 ê 山形那好玄四散湖邊 ê 民眾呔無一个人繼續向前行。

「遮看是崙仔，過去 m̄ 是崙仔」gún 翁簡單一句回應 hōo 我理解家己 ê 無知。

丹麥是我個人旅行歲聲伐到這个階段感覺上自在 ê 角勢。遐 ê 人凡勢無咱慣勢 ê 熱情 m̄ 過𪜶恬靜 ê 友善交攑竹篙入城 buē 轉彎踅角 ê 性地 hōo 我 tī 遐自在甲若帛琉 ê 太平洋，除起食食、天氣交物價。

囡仔時去林內揣大姨𨑨迌，大我至少兩沿 ê 表兄𤆬 gún 遮 ê 表小弟、表小妹去斗六天元莊耍水，囡仔人掠游泳池 ê 環境交溪水相仝就藏水沬藏甲深水區，紲落來險險結束這世 ê 功課。

我 buē 曉泅水，不而過我 ē 曉藏水沬交坦笑泅這兩項，只要有所在通徛，這个怪奇 ê 泅水方式 hōo gún 翁到今猶 m̄ 相信，我正港 buē 曉泅水，所致見擺去室內溫水游泳池，伊攏刁意故 kā 我𤆬去深水區，然後講你 ē 曉泅水，只是你 kā 伊放 buē 記持。Uī-tio̍h 翁某和平，我就按愛哭愛綴路 ê 囡仔轉骨獨立 buē 交伊大麵炒圓仔，膏膏纏去浸燒水，準做我足數念寒人浸 tī 燒烙水池 ê 感覺。

丹麥交法國相仝因為徛地無地選擇愛交德國做厝邊，所致伊是 Skandinavia 我上捷行踏 ê 角勢，是講上捷行踏 mā tsiah 3 斗 niā-tiānn。第一斗行踏丹麥是上北看 gún 翁𪜶爸母，彼陣 gún 猶未成做龍鳳，我 ê 經濟狀況比 gún 翁好，𪜶爸母就 m̄ 敢大大典典做山精 Mǹg-sǹg，不而過 m̄ 管𪜶兜代抑是別人兜代，𪜶攏 mā 愛拑牢牢 ê 歹癖是從來 m̄ 捌客氣頓粉點胭脂 ，成長 tī 敬老尊賢角勢 ê 我就接受𪜶 ê 建議 kā 家己 ê 按算囥一爿，跟綴𪜶 ê 經驗行踏丹麥，紲落來 ê 故事是好喙斗 ê 豬 mā buē 食我提供 ê 潘，就莫閣咸豐三，講到今 ê 六月蚶，開喙臭。

第二回上北丹麥是 2019 gún 翁𪜶小妹 uī-tio̍h 龍銀願意放下闊莽莽 ê 怨慼行踏年久月深 m̄ 交插 m̄ 捌致意 ê 爸母兜，這難得 ê 一家團圓 hōo 我無才調無血無目屎無心肝無跟綴 gún 翁上北交𪜶搬一家和氣 ê 戲齣，就答應交伊做陣上北 mā 乘紲家己無完成 ê 目標去看小美人魚。

「長期以來我是敆肉 ê 素食者」，頂站仔看德國衛教節目分張 ê Reels 笑甲吭跤翹，夜間部同學隨越頭問啥物遮爾仔好笑，我 kā 影片分張 hōo 伊看那做六月蚶講「Stimmt, Fleisch ist mein Gemüse(小說)」，伊知影意思鼻仔摸 leh 跟綴我造句「Aber mein Fleisch ist super lecker。」

這件代誌 mā 是長年菜熥 buē 離，我 m̄ 是素食者不而過捷捷 hőng 歸類 tī 素食者彼組。起因，我 ê 飯包罕得出現傳統德國食食像 “ 炕肉 ”、“ 豬排糋 ”、“ 雞肉糋 ” 遮 ê tuì 大部份 ê 德國人來講是較厚工 ê 食物，起因遮 ê 食物需要洋裝配懸踏仔，抑無伊是西裝褲配運動鞋 ê 不三不四。

我愛食海底果子，德國 ê 海底果子鞏金閣包銀這項代 mā 是餾臭酸粿 m̄ 值得餾，總是順這件代誌我 mā 沓沓仔理解，呔討 gún 翁 ē 遐爾仔喙白 ê 因端，起因我 m̄ 食𪜶德國人愛食 ê 火雞肉，牛、豬肉 mā 因為家己鈍跤鈍手頇顢出好味素就田螺循舊逝，較行 mā 仝逝 ê 較食 mā 肉豉仔，愛食 ê 雞腿因為社區潘桶𠢕生蛆，德國人 ê 窗仔門又閣無安裝紗仔門就 m̄ 敢 bué 轉來料理，漸漸仔我發覺家己 ê 食飯桌愈來愈像 gún 翁𪜶爸母兜 ê 面肉。啊，按呢講是譀呱呱甲火星去，不而過交往陣 tī 台灣 hām Má-mah 做陣食飯 ê 面肉確實無地比並。

海底果子鞏金閣包銀、雞肉、牛肉、豬肉、火雞肉又閣罕得食 mā 捷 hőng 德國人掠我是動物維權者，啊，冤枉矣，大人，我 m̄ 是動物維權者，我 kan-ta 因為 tsuē-tsuē 食物 tī 德國 hōo 我食甲縛跤縛手就自動棄權 niā-tiānn。

Tshan-tshiūnn 食尾大西洋金頭鯛（Dorade），我若動物園 ê 人熊愛 hőng 圍觀，食煞無偌久，胡蠅來行踏，我隨成做破壞環境頭號敵人。德國人食啥魚？無刺 ê 三文魚片。德國人食啥物雞肉？無骨頭 ê 雞襟胸，寫著雞襟胸我因為德國人 mā 勻勻仔 kā 伊食甲合喙。