亂皂𥴊仔店 ⓂⒺⒾⓃⓀⒾⓄⓈⓀ

烏麥仔酸酵母麭 ê 味素 tuì 我來講宛然缺喙賣蜊仔肉，峇峇峇，愛甲骨力做膨鼠揣食譜來延續 Heinrich ê 性命。接續 Barbarossa ê Heinrich 自伊出世到今 mā m̄ 捌 hōo 我失望過，伊過手 ê 每一粒麭宛然伊在生 ê 七彩十色，有酸、有甜、有苦、有鹹、有汫，順環境變化調整伊 ê 讓步、停跤、進步，紲落來 hōo 遮 ê 過程成做伊上堅定 ê 意志，做伊家己。烏麥仔 mā 從來 m̄ 捌因為蜂蜜、糖、小麥仔抑是鐵殼麥仔翻身成做主角失去伊 ê 光彩，伊 ê 味素總是引𤆬我感受青春少女甜甜澀澀酸酸 ê 初戀所生湠 ê 感情觀。

我 hām 烏麥仔酸酵母麭第一斗接觸是 gún 翁熱情推薦 ê Pumpernickel。

「這是 gún 這州 ê 名產 mā 是德國頂港有名聲，下港上出聲 ê 烏麥仔麭。」

自囡仔食到烏貓歲聲，我食 ê 麭永遠有鹹甜芳，來到德國 m̄-nā 食著若石頭 ê Kaiserbrötchen 閣不三時愛食焦甲比沙漠閣較焦 gún 翁𪜶老母攢 ê Stulle（德國三明治）hōo 我 tuì 德國麭保持海王星 ê 距離，後來順伊熱情 ê 推薦試 Pumpernickel ê 鹹汫，我決定未來無論𪜶兜按怎供體我 kan-ta 捌蝨母，我 mā buē 致意，畢竟清官難斷家務事，我管 buē 了𪜶兜 ê 七刺五扒、情緒叨撚，山精 Mǹg-sǹg ê 好無相致蔭，歹煞相牽累。交𪜶做伙食飯 “ 食 tsuē 厚病疼，食少 ē 短命 ” buē-sái 擲過山溝。

第一斗感覺烏麥仔酸酵母麭好味好素閣數念是行踏奧地利 tī 田庄人兜食 ê Stramme Max。

「Paderborner 麭是啥物類型 ê 麭」我問倒 tī 膨椅 hōo 若海翁 hōo 日鬚牽藤 ê 翁。

「著是一款麭」伊反一个身，滑鼠、報紙、雜誌、原子筆齊做海波跟綴伊 ê 魂舒搧落塗跤，我目蚶微微仔眯，喙角勻勻仔翹，伊手做翅 tī 塗跤那泅那講「較停仔就恢復原樣。」

「Paderbron tī 佗落」我那收倒 tī 烘爐頂 ê 小說那問。

伊看著恬靜 ê 殺氣 m̄ 敢繼續坦笑泅享受日鬚栽 tī 伊魂舒 ê 日花，雙手開始窮環境「Tī 德國某乜角勢。」

「Dali 按佗落來？」

痟狗病、炭疽（tsu）病疫苗 ê 起造者 Louis Pasteur ê 家鄉。

法國有一隻跤球號做 Paris Saint-Germain hōo 我頭殼不三時相拍電，總是彼是人兜 ê 歷史，人兜 ê 號名 tshan-tshiūnn 葡萄牙 ê Formosa、西班牙 ê San Diego 滿四界。

低路人書讀無 tsuē 總是伐到 Bourgogne 第一个想法是紅喙鬚 Barbarossa，然後...放棄繼續挽瓜揫藤，gún 翁是德國人、法國人、意大利人，畢竟喙講追溯根頭 ê 𪜶 mā 無遐爾仔致意這項代誌，抑無到今呔討猶原相信德國人就是金頭鬃、藍目仁這款白賊講古話。

Dole 一个從來 m̄ 捌出現 tī 我法國地圖 ê 城市，因為台灣新聞討論猴痘愛改稱 M 痘，我順這个議題好玄德國敢 mā 稱呼 Affenpocken？

「是，我囡仔時號做 Affenpocken，新 ê 號名我無斟酌注意」伊講。

當我 ê 50% 又閣人牽 m̄ 行，鬼牽溜溜行，我就請阿鎂來坐大桌。當伊講咱愛 Senza sale 我就請串仔交伊講 Hallo，當伊講我是德國人，我就請 Hüttenkase alias körniger Frischkäse u. Cottage cheese 交伊相放伴，順紲講我是台灣人，我 ê Käse 是豆花，你敢 bueh 交我相放伴？鬼較為伊抑是伊 ê 50% 較為伊，隨看出出。

一禮拜做伙出門款菜，一月日無搪著山精 Mǹg-sǹg hōo 我掠做綿精跟綴德國醫生 ê 建議來出菜正港有應效， gún 翁總算 buē 閣爸母來上童，終其尾猶是賊性入骨，仙洗都洗 buē 甪。

「無代誌遐𠢕 bué bueh 衝啥。」

出門進前已經繩過菜單 mā 拍胸崁保證伊彼跤禙仔有才調楔 gún 需要 ê 物件， 伊猶是爸母來交繃。

相罵無好言，相拍無好拳，我準做風火著 mā 無才調跟綴伊 ê 跤步 tī 人插插插 ê 公共場所搬武戲，像𪜶老母抑是小妹，我好禮仔 kā 回應「你 m̄ 免硬櫼，我遮有棉布袋仔通貯。」

現在，生活 ê 一切

有聲音有血。

現在，地佮天

是激烈 ê 顫掣，

hōo 希望拖磨，

千外歲 ê 秮仔搪著食食纖維之王枝豆、厚厚 Omega-9 長生果塗豆、減肥好鬥手豆腐、雞襟胸，交飽滇維生素 ê 菜蔬是筋肉 ê 好助理、胃腸高速公路 ê 好鬥手 mā 是魂舒上天然 ê 保養品。

德國 Deutschen Instituts für Ernährungsforschung 簡稱 DIfE 近來公佈一份報告，咱 ê 魂舒 tī 下昏飯消化較慢，若是下昏飯含水碳素 a.k.a. 澱粉比例過懸，血糖 ē 勻勻仔增加，紲落來體重 ē 受影響，沓沓仔變大箍，並增加第二型糖尿病 ê 風險。下昏飯意愛食油肭肭 ē 引𤆬發炎相關基因聊聊仔伐向半磅人生交第二型糖尿病 ê 確定，因為身體機能 ē kā 遮--ê 熱量儉起來。

德國醫師好辣、57 健康同學會 Die ErnÄhrungs-Docs 分張咱 ê 食食時間影響咱 ê 新陳代謝佮體重，起因咱 ê 魂舒 tuì 生存要件 “ 食物 ” ê 需求無相仝。

以上無專業 ê 解釋伴我個人 ê 總結著是早起頓食甲若皇帝，中畫頓食甲若王爺千歲，下昏飯食甲若乞食，準做按呢食 mā buē 使得清彩亂使食，kā 甜粅粅、啖糝做正頓。

歲聲 tī 頂年正式伐入半老老，半老老進前 ê 五、六冬我 uī-tio̍h buaih 舞豬舞狗舞死家己 kā 時間匪類 tī gún 翁好種 m̄ 栽，硬 bueh 栽歹種跟綴十个烏醋油桶① ê 手路，我就入人門，順伊意食飯頓，然後無到三冬我腫 bueh 20 公斤，莫名其妙 ê 疼無四序 mā 若山瑞香開始牽藤，特別是跤後蹬，逐日攏感覺有人挈針 teh 搣，疼甲歹穿鞋 mā 無才調徛。

現代麥仔 ê 祖先德文號做 Dinkel，英文號做 Spelt，華文號做斯佩爾特小麥，台語按怎講？請教 Google AI 伊 hōo 我以華語轉文讀音 ê 講法 Sū-phel-te̍k sió-be̍h，我個人感覺白汫無素閣咬舌，手指頭仔準備繼續點 Google 請伊做𤆬路雞，UrDinkel 步頻走百米來相揣。啊，早一步無確定無頭路，慢一步 mā 無確定無半步，差不一秒鐘，時間 kā 建議引𤆬到眼前 “ Schutzhülle ” 。

Dinkel 交 Einkorn（一粒麥仔*）, Emmer auch Zweikorn（二粒麥仔*），大麥齊屬麥仔糠挨掉猶原愛做一遍工 kā 糠皮挨掉 ê 一遍工 tsiah 有才調繼續加工製作。這點佮粟仔無相仝，粟仔是 kā 皮挨掉就是糙米，糙米閣挨皮留米鼻就是胚芽米，米鼻閣挨掉就是白米。總扯來講 Dinkel 著是一款愛一粒麥仔愛剝兩層皮 tsiah 有才調享受 ê 食物。

身為遠古原生穀物 ê Dinkel 伊 ê 起源有兩種講法，一个是埃及，一个是土耳其佮喬治亞。歐洲中北部 ê Dinkel 是按埃及來，伊 tī 德國上早種作 ê 時間是西元五百年，地區 tī Baden-Württemberg 佮 Franken（Bayern），所致伊 mā 有一个在地稱號 Schwabenkorn 施本瓦糧草。

Dinkel 交伊 ê 下勻小麥仔 tī 這幾十冬捷捷提出來 hőng 做比並。遮 ê 比並按出世年閣、營養、污染、好育飼等等一路比到今，除了 tī 環境保護這塊較有贏面。伊交一粒麥仔、二粒麥仔𫝛款是原生小麥仔，m̄ 驚寒、好育飼 ê 免人工肥料、免澍毒農藥 tī 瘦田閣有才調活甲高長大漢 hōo 伊成做有機種作上好 ê 麥種，其他--ê 交下勻 ê 近代小麥窮實是落水平平沉，全無重頭輕，tuì 麩質過敏 ê 人食 Dinkel buē 較好，仝款致使過敏。

20 世紀（1900）進前 Dinkel 猶屬主要農作物，當伊 ê 下勻出現，伊漸漸退出退出江湖，一直到 1980 提倡天然食食運動出現，hōo 捒入舊漚舊臭需要擲挕捒 ê 伊 tsiah 重出江湖。伊重出江湖上重要 ê 因由 mā 是伊當初 hőng 放捒 ê 理由。伊若鐵甲 ê 殼無峇工業化 ê 經濟成本 hōo 伊落坐，伊若鐵甲 ê 殼 hōo 伊 m̄ 驚蟲害、免沃化工肥 ê 少人工加工（污染）tī 天然食食運動成做上好 ê 宣傳兼顧健康閣環保 ê 大明星。

Rota

Unser Vaterland geben wir nicht auf.

Gún buē 放棄家己 ê 祖國

Unsere Sprache lassen wir nicht untergehen,

Gún buē 放棄家己 ê 語言

Roggenbrot-Rezepte ohne Sauerteig wirst du nicht finden. Auch wenn Hefe oft Bestandteil von Sauerteigen ist, braucht es Milchsäurebakterien, um die schweren Roggenteige aufgehen zu lassen. Gleichzeitig liefern sie den charakteristischen, leicht säuerlichen Geschmack von Broten mit Sauerteig.

von Roggen-Sauerteigbrot, Edeka

猶 tī 面冊沐沐泅，德文程度猶無 A1 ê 我凡勢因為等依親簽證閒甲掠蝨母相咬就無料 kā m̄ 知是圓是扁，是熊抑是虎 ê 生份人𪜶 ê 請教整理做一篇 Q & A hōo 𪜶參考閣提供原文 hōo 𪜶鬥掠漏，紲落來 ê 故事是過了時，去了代免閣執訣餾臭酸粿，起因 tī 這个人人是大明星 ê 年閣，咱愛尊存大人看牛，囡仔吩咐 ê 長工望落雨，乞食望普渡。

是講這久 ê 我敢 m̄ 是 teh 餾臭酸粿？無，我一屑仔攏無 teh 餾臭酸粿，雖罔彼當時 ê 我確實 hōo 遐 ê tī 現實生活根本 buē 撥美國時間交𪜶盤撋 ê 人舞甲風火著，我猶是迵過𪜶 ê “ 請教 ” 得著 tsuē-tsuē 寶藏，像德文閱讀能力交課本無教 ê 在地德語認捌。像通用德語講 Spitzkohl 我 ē 講 Filderkraut，人講 Topfen 我隨知影𪜶 teh 講 Quark，奧地利人講 ê Melanzani 是 Auberginen，總扯一句我感謝家己 ê 孤𣮈歹鬥陣兼討厭齷齪 ê 性地，離開䆀著是聰明，這久確實得著聰明，起因我按遮 ê 䆀實踐籬傍壁，壁傍籬，天跋落月 ê 美味しい。

這出食譜 tī 5 冬外前捌 kā 我無料 ê 鬥相共送這个回應「我 kan-ta 食德國麭，我 bué ê 麵粉 mā kan-ta 按德國進口，我上愛食 ê 德國麭 mā 聖拄聖著是你講烏麥仔麭無透烏麥仔酸酵母是無法度發酵，我做 ê 烏麥仔麭從來 m̄ 捌濫烏麥仔酸酵母，伊獨獨倚靠焦酵母 mā 發甲媠噹噹，聽我一句話，做人愛腳踏實地 m̄ 通冇蟳夯籠 buē 博假博閹雞趁鳳飛 teh 烏魯木齊....」

豬岫 m̄ 值狗岫穩

本底掠我 ê 𥴊仔店無機會繼續經營，因為痞客邦 ê「官方公告」、「新版FAQ」無論踅幾回，彼个客服信箱就是妝娗品 hōo 我漸漸仔相信江湖傳說 “ 痞客邦無 teh 管待使用者 ”。總是俗語講一人傳虛，百人傳實，我無向望家己 ê 貧惰成做痞客邦 ê 加害者，就骨力繩伊 ê 新頭頁看別 ê 創作者敢有相仝 ê 問題，紲落來我發現家己 ê 問題...彼著是我掠 “ 客服信箱：service@pixnet.tw  ” 交向時我慣勢 ê Outlook Express 相仝，只要揤𪜶提供 ê 連結線隨會使得寫 E-mail.....這个十外冬 ê 慣勢一直到我 tī 現此時使用 ê Email kā 聚珍台灣 ê 電子批地址 Copy 貼起去 tsiah 發現。

發現問題隨寫電子批請痞客邦 kā 我鬥相共，這回 ê 客服 hōo 我深深感受好禮、專業、緊氣 ê 痞客邦轉來矣，請教 ê 問題無兩工就解決 hōo 我歡喜甲 buē 顧，起因 m̄ 管翁某按怎仝穿一領褲 gún 翁拋荒 ê Meine Reisen 著是伊--ê m̄ 是我--ê。

感謝翁婿 tī 這禮拜外 ê 時間 kā 部落格借 hōo 我書寫。Vielen Dank, mein Fremder.

2026.09.08

Endlich, wir Reisen nicht mehr wie im Marsch und C'est la vie, Oui.

Ich habe gedachte der Campingplatz in Frankreich wird langsam wie in Deutschland, so teuer und viel extra bezahlen, wie Dusche man muss manchmal extra bezahlen, Strom muss extra bezahlen auch die Küche. Warum habe ich die Idee, weil mein Mann, er zeigt mir immer den teuren Campingplatz. Ja, einmal er möchte den Campingplatz 100€ bezahlen. Das ist Blödsinn.

Nein!!! Dieses mal er sagt mir, wir campen auf dem Öffenlichen Campingplatz von den Gemeinden in Frankreich. Ich weiß was ist unterschiedlich aber bis jetzt, ich fühle mich Leben echt wie Gott in Frankreich, Essen so lecker, Bonjour ist genug gesagt, das Leben kein Stress, so schön.

法國有 tsuē-tsuē 公共露營區因為時代轉變漸漸落坐，一間專門經營露營地 ê 私人公司開始交法國當地政府合作 kā 設備提升到電子化，kā 櫃檯人員轉做電子化，以 APP 注文納數，取電子密碼，一暝敆電 15€ ~ 18€ 無分車種，不而過車 ê 長度限制 tī 9m，價數 mā 無分布篷 hōo 你生活甲若神 tī 法國 ê 奢華（Leben wie Gott in Frankreich）。
我目睭帶斗概，看著逐項愛。自 gún 翁按萊茵河岸徙跤到山崎地區，我就罕得來德國 ê 厝邊兜法國行跤花，tuì 法國露營區上尾 ê 印象 mā 停跤 tī Nice 貴甲驚死人 ê “ 風神 ” 露營區。遮 ê 風神 m̄ 是指露營區是指 gún 翁 “ 無錢假大範 ”。啊，過了時，去了代 ê 往事閣餾是 m̄ 捌佛家講 ê 苦 m̄ 是，樂 m̄ 是樂，攏是一時 ê 執訣，若 ē-tàng 放下，心就自在囉。這久 ê 我 kan-ta bueh 分張觀念若 ē 通，粗菜便飯 mā 是寶。這久 ê 伊像 Lunéville 這類露營地 Campingcarpark mā 伊過甲自在。

合該然有五冬 m̄ 捌烘過德國酸酵母麭。向時捷捷出現 ê 伊步頻 tī 這五冬消失，無啥特別因端，不而過這點是萬分確定，彼著是 gún 兜 ê 鳥鼠空迵蛇空 hōo 我直接實踐英國俗語 “ 勤勞是幸福 ê 正手，抾拾是幸福 ê 倒手，兩手攏 ē-tàng 達到富裕 ” ê 規氣兩手空空 hōo 家己 ê 日子較輕鬆，畢竟清官難斷家務事，牽手無彼个才調跟綴翁婿趁𪜶兜樣，山精 Mǹg-sǹg 三尖六角七刺五扒一日貼貼。所致 tī 喙甕猶有才調縛 hōo 密緊 kā 縛甲生菇閬殕攏無機會鑽入去。

Tī 這無閣做德國酸酵母麭 ê 五冬，我 ê 龍鳳生活 tī 電火錢這方面宛然拭餅𩛩行仔內 ê 話𫝛款 “ 一𩛩無成春，萬𩛩春如醉 ” 滿滿是春天。免閣 uī-tio̍h gún 翁人講 m̄ 聽，鬼講貓貓行來好無相致蔭，歹煞相牽累來氣死家己。

五冬無做麭，步頻衫穿顛倒爿必有機關安 tī 倉庫，這機關無啥特殊 kan-ta 伊總算理解光光月，m̄ 值得暗暗日，若閣綿死綿爛跟綴爸母講 ê 道，無論白虎湯啉幾碗，猶是掠龜走鱉，掠蟳走蠘伐向秤鍾拖著尾。𪜶兜掠家己是俗香兼芳，閣點 buē 食 ê 無落腹，放無落礐，放送到遮為止。

2025 翁仔某做陣落南法國、西班牙、葡萄牙睏天路車日子，伊雄雄食老出癖 tuì 我講「轉來德國敢會使得請你烘酸酵母麭」，我食伊 ê 反起反倒 m̄ 是第一斗隨回答「Buaih」，伊知影這个 Buaih 是種匏仔生匏仔家己做得來就夯石頭硩心肝到睏天路車日子結束，伊捾一包烏麥仔全麥仔麵粉轉來講「德國 ê 酸酵母麭愈來愈無好味素，敢會使得請你 kā 我鬥相共......」

俗語講有量，tsiah 有福，伊 ê 執訣放下我 mā 愛放下抑無我 mā 交𪜶老母無宛二體，一粒田螺煮九碗湯，有喙講別人，無喙講家己。橋歸橋，路歸路，過了時，去了代，閣寶惜 mā 是無枷夯交椅齪死家己，就手䘼仔撆起來開始做 Anstellgut，不而過無成功，起因天氣過凍。