亂皂𥴊仔店 ⓂⒺⒾⓃⓀⒾⓄⓈⓀ

二次世界大戰著重傷 ê Kathedralhügel/Frombork Cathedral

波蘭語號做 Frombork 弗龍堡，德語號做 Frauenburg 女仕堡 ê Frombrok 上早出現 tī 文字記錄年間是13世紀，不過 hōo 伊成做通人知 ê 行尞景點 m̄ 是伊起 tī 13世紀 ê 教堂建築，是出世 tī Toruń 托倫 ê 天文學家 Mikołaj Kopernik/Nikolaus Kopernikus 哥白尼百年後， 伊 ê 大厝安 tī 弗龍堡。

目今是波蘭歷史紀念碑 ê Frombrok 佮 Kopernik

2021 tuì 熊拍鼓行跤花翁仔姐按算 uì Krynica Morska(Kahlberg)坐渡船到 Frombrok，總是日子掠無準，gún 上北到搭當地船幫已經歇寒 ê 後回再相會。

這斗車日子停睏順 Grudziądz/Graudenz 格魯瓊茲順 Wisła 維斯瓦河起造 ê 駁岸露營地，我跟綴翁 ê 跤步踮 OpenStreetMap 步輦發見 Kopernik ê 百年厝 Frombrok 真順路隨 tuì 翁講「恁德國電視台 mā 是 Google 真𠢕臆你佮意，像 Frombrok 倚遮一屑仔攏 buē 遠。」

 「上北到立陶宛咱愛停跤 Elbląg/Elbing 埃爾布隆格，按 Elbląg 過 Frombrok 咱 mā ē-tàng 行踏波露柴杙鄉鎮城市看精差」翁講。

「國王若無𬦰山𬦰甲 buē 記得轉來，目今 ê 咱應當 m̄ 免遮厚工 khau 一大輾」我講。

「國王𬦰山𬦰甲 buē 記得愛翻頭，Kaliningrad ê 海沙埔 m̄-tsiah 有法度維持甲若國王猶未離開仝款。」

我 m̄ 知影德國人按怎愖𪜶 ê 往過，總是按 gún 翁 ê 態度看德國，伊就若 Adenauer(西德第一總理)火車一過西德範圍，車窗就搝落來 ê 彼本底就 m̄ 是德國仝款。

記錄歷史進前，家己 mā 需要翻草彼久按 Wunderschön 看來 ê Frombork，抑無 m̄ 知家己 teh 行啥跤花，行啥物涼。

Frombork 有一段久長 ê 時間屬 Warmia 瓦爾米亞其中一个首府，伊自 13 世紀 hōo 德國 Orden 條頓騎士團(1243 ~ 1466)劃入管轄版圖，中央經過 Zweiter Frieden von Thorn 第二斗托倫合約(1466)，伊劃入波蘭地圖，1772 伊劃入 Preußen 普魯士地圖，歐戰(一戰)結束 Warmia 大部份 ê 領土劃入波蘭地圖，唯獨 Ermland 停跤 tī Ostpreußen 東普魯士。二戰東普魯士分做兩个地區，一个屬波蘭，一个屬露西亞。東普魯士人 hőng 趕離開這个地區。

德國人行踏波蘭東北爿上捷 hőng 問 ê 問題是「你來揣親人？」

跟綴資料行踏東普魯士 mā tsiah 讀著二戰結束徛家踮波蘭 ê 德國人齊離開，總是 gún 翁 ê 前女朋友是按波蘭徙家甲到德國 ê 德裔波蘭人，中國醫藥學院 ê 馬培德醫生 mā 是按波蘭徙家甲到德國，二戰後 ê 德國人敢攏齊離開波蘭，這个問題自我搪著翁 ê 前女朋友交已經搬厝 tsuē 冬 ê 德裔哈薩克斯坦(Kazakhstan)厝邊，我細甲若塗豆 ê 頭殼開始挐氅氅，想 bueh 知影事實到底是啥物?

總是，智慧無夠額 ê 我自人成做貓到今猶原㨨無一絲答案，不過按 Wunderschön 得著這个智慧，二戰徙岫轉來德國 ê 東魯士人 hōo 家己 ê 同胞講𪜶是外國人，𪜶就閣全家徙岫轉來到波蘭維持自身 ê 傳統交語言並生湠新 ê 文化交語言波蘭語。

我想這 mā 凡勢是德語比英語閣較好溝通 ê 因由，特別 tī 東北遮。

出發車日子進前按 Wunderschön 看來 ê Frombrok，彼位先生是轉家鄉生湠在地文化 ê 人，伊是德裔波蘭人抑是波蘭人，這个問題我無研究，總是我按伊 ê 紹介 tuì Frombrok 生湠閣較 tsuē ê 智慧。

Warmia/Ermland 瓦爾米亞珍珠 ê Frombork 佮水塔

Warmia 是按拉丁語來，伊按拉丁語轉做德語 ê Ermland 有這兩个講法，一个是按國王牽手 ê 字名來，一个是按東普魯士語來。

講著東魯士語，按東普魯士轉去德國 ê 人，𪜶 ê 德語 mā hőng 當做外來語，非德語。

瓦爾米亞珍珠 ê Frombork 有一个起造 tī 14 世紀，15 世紀安水風車 kā 水紡去頂懸並服務當地人民到 19 世紀 ê Wasserturm 水塔。

這座水塔 ê 工業技術 tī 斯當時是獨一無二，規个歐洲 mā kan-ta Frombrok 有這个技術。 

這座有歷史 ê 水塔目前是博物館，入園參觀需要拆票。

我工業青盲牛，gún 翁 tuì 這類博物館 mā 揣無心適，翁仔姐兩人就繼續成做鋪面蟶(than)，浸水蚵 kā 伊掠一張相踮遮 buē 博假博，臭頭包布，防蠅(風神)並順紲替 Bunzlauer Keramik 波蘭瓷仔拍廣告。

水塔邊仔有設一个波蘭瓷仔展示中心，無時間抑是機會行踏 Bolesławiec 博萊斯瓦維茨 m̄-koh 想 bueh 收藏波蘭瓷仔，Frombrok mā 是一个好所在。

教堂需要拍票 tsiah 有法得入去參觀

行踏一个城市，我慣勢讀當地 ê 城市導覽讀資料 mā 慣勢請 Wikipedia 維基百科 ê 德文、英文、華文成做我 ê 引路人。

這回請教這三文，華文交英文分張 Kopernik 捌笑過這座城市是牽手➀ ê 城市隨翻頭轉去請教德文，德文無分張這段故事 m̄-koh 號名起源，這个起源就交英文相𫝛，Frauenburg 女仕堡這个號名是按一位身份來源是普通百姓、王公貴族、基督徒抑是非基督徒之無法度考證 ê 女子，伊 tuì 教會虔誠寄付遐來。

➀ Frauen tī 德語是女子、女仕 mā 是牽手，英語 kā 伊翻做牽手城堡並講伊是按拉丁語來，事實敢是按呢？拉丁語 tuì 我來講是 m̄ 捌一个呼，總是學過拉丁語交自身是講這个語言 ê gún 翁，伊分張 ê 答案 mā 交德文版本相𫝛 --- 按一位女子寄付 ê 城堡。

拍票 ê 所在

這座城市佮歐洲 tsuē-tsuē 城市攏相𫝛 m̄ 是行過 Orden 條頓戰爭就是北方戰爭 hōo 本底是景氣活跳 ê 所在，成做死殗殗閣 hőng 𠞭甲連骨攏無地揣 ê 狀態。

1626~1632 瑞典按北方領軍來到 Frombrok，伊交其他國家相𫝛，我來，我看，我紮走。

瑞典按 Frombrok 離開 mā kā Kopernik tsuē-tsuē 手稿佮文物紮走到今無 hâinn hōo 波蘭。

瑞典無 kā Kopernik 文物 hâinn hōo 波蘭 ê 因由敢交德國 m̄ 肯 kā 𪜶按土耳其款轉來 ê 文物交 hōo 土耳其政府相仝，這个問題我無研究。

Kathedrale Mariä Himmelfahrt und St. Andreas a.k.a Frauenburger Dom

低路人無智識，一逝路幾仔百公里到 Frombrok m̄-nā 無向有歷史 ê 水塔致意，閣無拆票向 Frombrok 上重要 ê Kopernik 百年厝致敬，我原仔知影愛跟綴電視台 ê 跤步徛踮教堂大門口翕一張仔粉絲相，準做我 m̄ 是這个節目 ê 忠實觀眾。

Grudziądz/Graudenz

徛位 tī 平靜捒倒牆 Gdańsk 南爿 93 公里，目今號做 Kaliningrad 加里寧格勒西南爿 170 公里 ê Grudziądz 格魯瓊茲是 gún 按破解 Enigma Bydgoszcz 比得哥什上北到 Elbląg 埃爾布隆格需要停睏 ê 驛站。

這个自十世紀就開始有人釘根 ê 城市，伊 ê 德國字名 Graudenz 是按 Altpreußische Sprache 古普魯士語 Graude, Grauden, Graudenes 演化，意思是森林荒埔(hong-poo)，伊 mā 是普魯士人抵抗波蘭人上重要 ê 堡寨。

普魯士人 tī 11 世紀 mā 確實成功抵抗外來者 ê 侵門踏戶。總是按歷史文件來判斷，一世紀後 ê 普魯士人 1222 年猶原無法度守護家己 ê 鄉里，按普魯士成做波蘭王國 ê 一部份。1225 年又按波蘭王國轉向德國 Orden 條頓騎士團 ê 一部份。

普魯士這个字名來源 ē-tàng 參考 PreuBen ohne Legende《不含傳說普魯士》。

郵便局

1231 條頓騎士團 kā 屬普魯士面肉 ê Grudziądz 全面手術做條頓面肉，並 tī 1291 年賜伊城市 ê 權利，就自開始伊繁華 ê 年閣，特別是 14 世紀 ê 伊，是 Orden 上重要 ê 米糧交易中心。

天文學家 Kopernik tī 西元 1555 年 mā 捌 tī 遮發表錢角仔演講，16 世紀伊成做手工藝交貿易中心。伊交 Frombrok 𫝛款 tī Zweiter Nordischer Krieg 第二斗北方戰爭(1655 ~ 1651) ê 1655 成做瑞典人 ê 領土，1659 換做波蘭人 ê 領土，這場戰爭交拿破崙戰爭 hōo 伊按鬧熱交易 ê 城市成做斷籬倒壁 ê 落坐。19 世紀因為工業革命 hōo 伊按落坐行向鬧熱 ê 市草，並大量起造在地性 ê Barock 巴洛克建築。

Grudziądz 按屬普魯士人抵抗波蘭人 ê 要角到一戰結束 ê 1919，伊屬 Provinz Westpreußen 西普魯士地區，二戰又閣劃入德國地圖，紲落來成做波蘭人。

我 tuì 波蘭 ê 理解少甲比我討厭食 m̄-koh uī-tio̍h 止枵猶原 ē 窒入喙 ê 紺草花閣較少，我因為有事無事開始看喝玲瓏台學習四常德語，tī 喝玲瓏台有一位按波蘭來 ê 姑娘 m̄-nā 𠢕喝玲瓏閣叫花➀，見搪著伊來叫花我隨 hōo 伊卡花➀並享受鴨仔聽雷 ê 洗花➀，這按 Provinz Schlesien 西利西亞，這按 Provinz Oberschlesien 上西利西亞，這按 Provinz Niederschlesien 下西利西亞，這按 Niederlausitz 下盧薩蒂亞來 ê 跟綴伊 ê 食食文化生湠生份 ê 波蘭歷史變化。

➀ 〈市仔 ê 花草〉《我隨意.你儘量》

街路有14 ê 雕像 — 雨傘自動紮雨水

Grudziądz 自本就是防禦地區，Orden mā tī 遮起造懸山堡塞，gún tī 遮 ê 期間 mā 搪著一个烏克蘭少年兄，伊 ê 少年無風騷，食老 tsiah 想錯 ê 一世人 tshan-tshiūnn 做人客 ê 態度 hōo 我愖若是我搪著戰爭問題，我 ē 按怎生?

論真講，我愖 buē 出一个答案，總是我欽佩這位少年兄交 2022 行踏 Balkans 巴爾幹半島搪著 ê 烏克蘭朋友𪜶面對世事 ê 變化，m̄ 是憂頭結面是一世人，tshan-tshiūnn 做人客，認真享受家己所徛 ê 時間。

我知影凡勢有人 ē 講國家當咧頭殼𢯾 leh 燒，恁遮 ê 人猶有心情一世人，tshan-tshiūnn 做人客，總是每一个人 ê 選擇無相𫝛，咱無一个人有權利 tuì 𪜶指指揬揬，除非𪜶背骨閣妝娗甲我愛國。

按 Grudziądz 僫揣一搭設備 tsiâu-tsn̂g ê 露營區就 ē-tàng 看出伊並 m̄ 是一搭受歡迎 ê 旅行地，總是有機會行踏這个按 PreuBen ohne Legende 讀來 ê 歷史名稱交地區 hōo 我有一種真正行入歷史 ê 感動。

另外，Grudziądz 凡勢受著觀光業無發達 ê 致蔭，所致箍 tī 舊城外 ê 森林到今猶原有法度保留甲若向時 ê 環境 hōo 驚生份 ê 狐狸 kā gún 遮 ê 露營客當做空氣自在 tī 日鬚沓沓仔伸鬚 ê 河岸行跤花。 

栽欉 --- 2023.08.02

翻田塗接枝 --- 2025.01.03