亂皂𥴊仔店 ⓂⒺⒾⓃⓀⒾⓄⓈⓀ

古都 ê 故事留 hōo 古都家己去說。

踮遮我 kan-na 想 bueh tuì 追求清芳氣息 ê 人致意。

Solidarność 文物

你講我細漢 koh 散赤，手提 ê 閣是摃槌仔，sòo-pái，我夢想 ê 代誌是較早睏較有眠。

搪著這仙 m̄ 知伊想 ê 代誌敢有佮我相𫝛 ê 銅像，我 teh 愖若是我，一出世就是落塗時八字命我敢有勇氣 tuì 熊挵鼓？畢竟，無牛駛馬日子 mā 是 ē 度。

我問伊伊無回答，我問家己 mā 無法度回答，擔頭看雲感謝家己出世有紮寡好字運 hōo 我儉人性 ê 試驗。

慣勢按圖書館借冊 m̄ bué 冊 ê 翁 tī 伊彼个滿滿栽跤花 ê 地圖冊櫥有一本《Gdańsk According to Lech Wałęsa》。

「這本冊有啥物特別，除了有波蘭總統親自簽名」我問。

「讀了你就知」翁講。

窮真講，這本冊讀煞並無引𤆬我任何 ê 想法，惡質 ê 熊已經離開，現此時 ê 一切就佮教育養飼 ê 結果「邪不勝正」相仝，有啥物好要意。

「世間若有邪不勝正，人類應當 buē 遮爾仔𠢕互相傷害」翁講。

港埠遊行攝相

這逝行跤花搪著波蘭 ê 選擇 mā 見著舊矸仔新裝 ê 賊船隨想著家己捷 tuì 翁喝「我包袱仔 bueh 來款款轉去台灣，恁遮又閣踅翻頭」ê 咱人類敢若學 buē 曉進步 m̄-koh 興退步 ê 癖。

歷史是未來 ê 見本 mā 是傳承，無一个事項是死豬仔價 buē 喝價，像本底自由開放 ê 阿富汗佮伊朗。

目那讀遮 ê 歷史相片心那踅阿富汗佮伊朗 ê 過去，我總算知影一个錢拍 24 个結 ê 翁是按怎 ē 遮爾仔支持這本冊，感謝天公伯 ê 疼痛 hōo 我 m̄ 免跟綴爸母 ê 跤步行入歷史，mā 感謝 uī-tio̍h 邪不勝正努力拍拚 ê 人 hōo 我 m̄ 免行入阿富汗佮伊朗 ê 世界。

1844 成立 ê Danzig/Gdańsk 造船廠 mā 是 1980 Solidarność 發生地

跟綴眼前 ê 相片行歷史，翁 uī-tio̍h 敨放中氣按共產波蘭徙岫到德國 ê 前女朋友，伊峇微仔笑 ê 分張步頻出現在眼前。

自由 tuì 恁遮 ê 有法度四界交朋友 ê 人來講是一杯準做透酒 hőng 人一啉頭殼隨清醒 ê Ka-pi 猶是無鹹無纖，tui gún 來講有法度 bué 著一包 Ka-pi 是一件人生上大 ê 願望。

 別人 ê 犀牛望月是咱認為 ê 四常免寶惜，猶未行踏 Gdańsk 進前，我 tuì Solidarity ê 感受就 tshan-tshiūnn 台灣 90 年代 ê 抗爭無任何 ê 感受，因為罩頂 ê 烏雲已經散甲無見一塊，現此時 ê 生活 mā tshan-tshiūnn 教育所養飼 ê 邪不勝正。

台灣這幾冬 mā 沓沓仔出現按反抗共產黨成做共產黨好朋友 ê 紅龜生蟲，龜怪 ê 才怪伴佮阿富汗、伊朗 ê 歷史 hōo 我清楚知影，無想 bueh 踅翻頭上賊船就愛目睭擘 hōo 金 m̄ 通認為現此時 ê 一切是自然，像兩德合做一个德國進前 ê 幾月日，三位衝破圍籬揣自由 ê 東德人分張 ê 故事；

Gún 若知影幾月日後柏林圍牆 ē 無去，gún buē 做遮危險 ê 代誌，總是人生 ê 自然佮人想 ê 永遠無相𫝛。

Markthalle --- 烏克蘭水餃糋

歐洲穿插無合軀，果子菜蔬又閣無地通料理，越頭按中央車頭行去搪著這攤烏克蘭人經營 ê 攤。

「我知影恁 teh 想啥，這是 gún 烏克蘭人傳統食食」頭家見 gún 翁仔姐嗤舞嗤呲徛踮攤前講德語隨笑講。

聽著頭家按呢分張我規个面紅甲若關公，我就是 uī-tio̍h buaih hōo 頭家知影我 teh 講火燒豬頭，面熟 m̄-tsiah 按無輾轉英語轉到愈無輾轉 ê 德語，世事真正 hōo 我 buē 固定，起因我一直認為波蘭 kan-ta 波蘭人德流較輾轉。

雖罔感覺伊是火燒豬頭，面熟，總是猶原捎無摠通搝，伊到底像 Tsiâ➀。

中央車站

屬文藝復興體起 tī 1896 ~ 1900 ê 中央車站，現此時 ê 美麗佮這座 tuì 熊拍鼓 ê 城市仝款，攏是行過 hőng 嫌破糊糊 m̄-koh 猶有利用價值 ê 年間。

二戰期間伊無打貓 ê 好字運有觀音菩薩來接炸彈，𫝛時伊 mā 是 kā 猶太囡仔送出德國領地主要車站之一。

往過 kā 魚臊送來保存 ê 港埠魚倉庫

行踏 Gdańsk 進前，德國朋友分張拄開放 ê Gdańsk。

30冬前 ê Danzig 是一个 buē hőng 行踏過後閣踅翻頭一訪再訪 ê 城市，伊垃圾、臭，規个建築攏 hōo 塗炭食去，真正是䆀甲 hōo 你隨離開。

水車間(Wasserrad/Mühlrad)

翁 tuì Gdańsk ê 印象是伊準備申請歐洲文化城市 ê 時間。

彼陣 ê Gdańsk 已經 m̄ 是塗炭仔是公主，我行踏 ê 時間 Gdańsk m̄ 知啥物因端無申請成功 mā 無閣申請。

我行踏 ê 時間從來 m̄ 捌感受伊是塗炭仔抑是公主，我 tuì 伊 ê 感覺 kan-ta 是優雅閣有智慧 ê 皇后。

「第二斗來 Gdańsk 有啥物感想」我問翁。

「Sie ist Aschenputtel」

一个城市 ê 運命佮一个人 ê 運命攏相仝，無人知影未來 ê 家己 ē 行向佗一款運命佮成做啥物生張，sóo-tí 就 kā 一切交 hōo 自然，準做一个城市 ê 形成根本無自然。

Ulica Mariacka/Frauengasse(女人巷)/琥珀(hóo-phik)大街

俗語講佛愛金裝，人愛衣裝，無一个是䆀--ê mā 無一个人是媠--ê。

Ulica Mariacka/Frauengasse(女人巷)/琥珀(hóo-phik)大街

總是，準做一出世就媠原仔 buē 堪得無教養，Gdańsk 就是 hōo 我這款層次分明感覺。

按捷克來 ê 天文學家兼市長 --- Jan Heweliusz

W wodzie, owej płynnej materii, nie ma nic stałego

水，這个物質從來 m̄ 捌固定

我足愛這个句

咱每一个人攏 m̄ 是獨一無二，咱每一个人攏愛迵過互相學習 tsiah 有法度成做家己，像 Jan Heweliusz 跟綴 Mikołaj Kopernik ê 學習成做伊家己。

這久 ê 我 mā teh 搜揣家己，準做我一直感覺家己是中國糜鹿，啥物攏無像，不過我相信總有一日我 ē 揣著我家己。

2021 ê 波蘭行跤花是我第一斗以台文寫感想，彼陣 ê 我筆那生花那礙虐。

起因，我 tuì 家己綁票，我有法度接受羅馬字迵歐洲，我煞無法度接受台文字抑是白話字是台灣字。

2023 行過 8 斗 ê 春夏秋冬，𫝛 ê 角勢攑筆生花我 tuì Tsiâ 是 Tsiâ 已經無要意。

起因，我就是我 m̄ 是別人目睭仁 ê 我。

➀ Calzone 佮 Empanada

栽欉 --- 2021.08.28

翻田塗 --- 2024.10.08