徙岫 tsuē-tsuē 冬，遮 ê 重要節日除了兩德統一日(Der Tag der Deutschen Einheit)10月初3佮聖誕節到新正 ê 歇假日 hōo 我捎有摠頭掠外，賰 ê 歇假日 tuì 我來講齊是 m̄ 捌字看告示 ê 攑香綴拜，人講歇睏我就綴 leh 歇，一霎(sap)仔攏 buē 哭呻 uī-hô 猶愛顧腹腸。
Buē 哭呻凡勢交遮 ê 禮拜光景有 kan-gāi。
按怎講？
徛家非都會區 ê 德國街路，禮拜時仔 ê 街路光景是狗蟻盤沙塗攏比人熱鬧 ê 恬靜。
Tī 歐洲行跤花，想 bueh 儉飯錢這个 APP: To Good to Go 是真好 ê 相放伴
遮 ê 禮拜除了政策允准 ê 加油站、餐廳猶通開店歡迎人客來坐，賰 ê 齊做陣寧靜(Ruhetag) hōo 我 buē 翻頭要意歇睏日。
二專畢業彼冬 uī-tio̍h buaih 無收入繼續踮餐廳做服務生，彼陣 ê 我 m̄ 捌啥物號做勞基法，是講彼準 mā 凡勢無這个法，簡單一句見擺撨好勢 ê 歇假攏愛轉去餐廳開會，而且 kan-ta 我一人 ē 搪著這款龜鱉叨趖 ê 代誌。
過了代 ê 無四序 m̄ 捌閣翻頭，目今 ê 這久 mā m̄ 免 uī 伊寫論文一篇。
2023.06.07 仝途 ê 朋友知影我 tuì 德國 ê 歇睏日無遐爾仔熟似，特別是宗教節，𪜶 uī-tio̍h buaih hōo 我白走一逝 tī 歇睏前兩日 tuì 無頭神 ê 我一再交代「6.7 拜五宗教節免來，6.8 拜六 tsiah 來鬥陣相放伴」hōo 我感心甲，轉來厝問翁「Fronleichnam 你敢愛上班？」
「M̄ 免」伊應。
「按呢敢 bueh 做陣出門行跤花？」
「無雨來天，當然 mā bueh。」
「你敢知影啥物是 Fronleichna？」
「教會節目。」
「......我當然 mā 知影是教會，m̄-koh 是佗一款？」
「你愛請教教會抑是 Google」翁笑應。
讀甲足食力 ê 字母....
手機仔隨捎出來請教 Alle Wiessen 萬事通 ê Google 啥物是 Fronleichnam。
無所不知 ê Google 賜我三个語言兩款字母 ê 智慧 --- Fronleichnam/Feast of Corpus Christi/基督聖體寶血節，總是 m̄ 管佗一个我齊是讀有 m̄-koh m̄ 知一个呼。
煞煞去，放伊自由，青盲牛 mā m̄ 是今仔日 tsiah 開始，像這个看板。
Brauerei/Brewery/麥仔酒廠
Gasthof/Inn/飯店、旅社
Hasen/Rabbit/兔仔
外國人 m̄ 捌字看告示 kā 有字讀做無字是四常，出門行尞這日，逐日上班齊倚電聯車(S-Bahn)出入 ê gún 翁竟然 kā 施工告示看 m̄ 著日 hōo gún 險險趕 buē 赴按算好勢 ê 盤車時間。
按險險 buē 出門到順利盤車到 Ulm 烏爾姆(Oo-nī-ḿ)，時間猶閣有額，翁仔姐隨人行東西揣心適。
德國出名國防醫學大學城 Ulm tuì 往過蹛 Baden-Baden 彼搭 ê 我 buē 生份，起因捷愛踮遮盤車，總是這久翻頭看彼久，向時 ê 驚惶成做目今 ê 心頭定，準做我猶原是 m̄ 捌字，看告示、井欄(nuâ)看做石舂臼 ê 頇顢，總是這久 buē 閣瘸跤瘸手驚甲若燒鼎 ê 狗蟻。
坐 m̄ 著車幫，繼續換車幫就好。
Ulm 出名 ê 上城門起厝 ê 徛家
Gún 這逝 ê 行跤花猶原是使用德國政府 uī-tio̍h bueh 節能減碳所設立 ê 交通福政車票，全德國火車(ICE、IC/高鐵無算在內) 、Bá-suh 坐 thóng 飽 ê 一月日49歐圓月票。
這日受市中心鐵路開始動工 hōo 四常慣勢 ê 車幫時間齊做 Iphone 1 buē 振 buē 動愛換 Iphone 15 交 gún 翁仔姐隔日愛上班無法度延續本底 ê 計畫，就順氣象局 ê 建議向有日鬚通做烏魚子曝日交車幫有通 hōo gún 一日落南上北 ê 角勢行尞。
頭站一粒頭石頭(Einstein) ê 故鄉，尾站白色獸角 ê Weißenhorn(華：魏森霍恩 -- 德語直翻：白色獸角)。
Weißenhorn 市政府辦公室
向時行跤花無寫入行尞指導冊 ê 角勢，我看 buē 上目，這久真愛跟綴 ADAC 地圖行踏歐洲鄉鎮。
不過，目今 ê gún 愈愛跟綴 App 行踏歐洲各鄉鎮。
是講，這項硬篤事工齊 gún 翁 teh 無閒，我 kan-ta 負責 tìm 頭佮幌頭。
窗仔門是 3D 列印(lia̍t-ìn) --- 滾耍笑 ê
M̄ 捌行踏歐洲進前，我認為逐个歐洲齊有個性 mā 認為每一个歐洲國家有無相𫝛 ê 面肉，像 3D 窗仔框妝娗 kan-ta 捷克 tsiah 有。
押尾發見家己認為 ê 美麗是鼓井水雞，m̄ 知天地有偌大 ê 愛更加寶惜這份福氣，m̄ 通認為一个符號抑是文化 kan-ta 屬於一个民族 ê 無自信。
文化交人類相仝，齊是按這个人生湠到彼个人 ê 互相學習。
3D 窗仔框 ē 出現 tī 捷克、德國、波蘭，文字 mā 是。
R Phàng-kìnn 是 bueh 按怎和平自由...
見著這亂皂，gún 理解伊 ê 14，總是生活 mā 愛學 ē 曉五仁 tsiah-buē 過甲逐日「范仲淹」ê 政治自早到今從來 m̄ 捌脫離人類 ê 複雜.....
Oberers Tor/上城門
Weißenhorn 第一擺出現 tī 歷史跤跡是 1160 年，彼久 ê 號名是 villa Wizzenhorn。
伊 tī 14 世紀成做 Herzöge von Bayern(Bayern 公爵/kong-tsiok ê 領土)，紲來成做奧地利 ê 領土到19世紀初期 tsiah 閣成做 Bayern ê 領土。
舊市政府辦公室/Altes Rathaus
Weißenhorn 佮德國大多數城市有𫝛款 ê 運命，tī 2 次大戰無法得險避同盟軍 ê 空襲成做斷籬倒壁。
舊城一搭
總是，世事就敢若 Forrest Gump 阿甘正傳 ê 分張 --- 你永遠 m̄ 知影你 ē 食著啥物口味 ê Tsioo-kóo-lè-tòo。
舊城街路
Tī 美國準備 tuì 安 tī Eschach-Wald ê 軍藥庫進行2 逝 ê「樹仔大欉擲果子，人若受氣擲手機，飛機上天擲啥物?➀」
舊城街路
伊佮打貓𫝛款攏有得著「彼時我為著救眾生，隨躘起去天頂，見若有飛機擲炸彈，我就用裙去承，這爿走、彼爿傱，大氣是喘袂離...➁」
舊城街路
總是，神是人類 ê 副本，Weißenhorn 有法度受神 ê 保庇無跟綴德國眾歷史街路行向斷籬倒壁猶是「人」teh 決定 ê 也著神，也著人。
城門
空襲進前，當地教會決定成做第三帝國國防軍 ê 背骨者，tī 教會鐘塔𫞼白旗仔。
因為這个背骨決定 hōo Weißenhorn 閃避起厝千工，拆厝一陣風 ê 運命 mā hōo 我這个後輩有機會跟綴伊 ê 跤跡行入歷史，交熊恬靜感受 300 冬前 ê 麭味交目今 ê 恬靜。
行踏這搭古典德國保存甲猶原真好 ê 城市，除了家己駛車，坐火車 mā 是利便 ê 交通工具。
Ulm 舊城門
只不過 m̄ 管你按佗落來，大多數 ê 車幫齊愛停跤踮 Ulm tsiah 有法度繼續盤車。
起因 Ulm tuì Weißenhorn 來講，就 kan-ta 彰化二水 ê 集集線。
Ulm 出名 ê 舊城門人家厝
這款行尞方式 tuì 慣勢，一車一角勢 ê 旅行者來講凡勢是厚工 ê 行跤花方式，總是我個人是認為伊是無價 ê 行尞，像 Hegel 分張 ê 智慧，按一个圓湠出另外一个圓閣一个圓。
舊城門
Ulm 較出名 ê 角勢大多數攏倚 An der schönen blauen Donau 佮教堂有世界第二懸塔 ê Ulmer Münster，總是坐輕鐵(U-Bahn)踅外圍 mā 是真有14 ê 方式。
Tshan-tshiūnn 這 m̄ 捌出現 tī 行尞指導觀光 ê 舊城門交這个 m̄ 捌出現 tī 歷史課本抑是讀過 ê 冊本 ê 往過，齊是跟綴輕鐵生湠 ê 圓。
Anna Essigner 女仕 tī 德國第三帝國猶未剺開伊真正面目前進，tī 1938 年𤆬 900个囡仔按德國徙到英國。
Anna Essigner ê 故事 tī 萬通事 ê Wikipedia 交臺中 ê 27部隊➂ bueh 相仝 ê 清氣，無 tsuē 甲指頭無夠算 ê 語言，唉。
這 m̄ 是事發 ê 學校，總是迵過 E. H. Carr 捌開拆 ê 歷史學者或是作家所寫 ê 歷史並 m̄ 是過去捌發生 ê 逐項事件，咱讀著 ê 仁仁仁歷史是經過𪜶若揀茶 ê 解說。
我 tuì Anna Essigner 交發生 tī 臺灣這塊土地 ê 故事，buē 閣感覺 buē 公平，顛倒感覺幸運 hōo 我有機會繼續成做貓，楦闊世界。
茄仔咖哩(素食)
有行尞就有食食，tī 這个 Türkiye 土耳其烘肉 kiōng-bueh 成做這个國家主要食食 ê 所在，按亞洲來 ê 印度料理是我上意愛 ê 選擇。
意愛印度料理除了我自本就佮意印度料理閣有這个上重要 ê 因由，伊較 buē 成做一入喙我隨問你是 Tsiâ。
菠薐仔雞肉咖哩
我愛食印度料理，m̄-koh 無食食薟，不過遮 ê 印度餐廳 mā 真古錐，見著德國人交亞洲人隨成做摩西分紅河。
相𫝛 ê 菜色 gún 翁 ê 味素無濫薟，我 ê 味素薟甲 hōo 我哀爸叫母，這斗 mā 是。
總是我 m̄ 捌愖過是按怎 ē 按呢生，一直到這杯 Lassi 上桌，我 tsiah 雄雄生智慧。
檨仔 Lassi
「你 ē 記持咱 tī Aalen 印度服務生一聽著我無食薟 ê 不可思議無」我問翁，伊隨 tìm 頭。
「M̄ 是恁德國人認為亞洲人齊食薟，連印度人看亞洲人 mā 相𫝛，後回我愛特別交代，我無食薟」我隨閣點一杯 Lassi 止薟。
這間餐廳薟罔薟，味素正經讚，有機會閣行踏 Ulm bueh 閣來 kā 𪜶交觀。
➀➁ 《大士爺厚火氣》von 鄭順聰，前衛
➂ 讀文字傷過忝頭 mā 有尪仔冊通讀 --- 二七部隊上集+下集
留言列表
冊 ▪ Bücher ▪ Books (4)
