亂皂𥴊仔店 ⓂⒺⒾⓃⓀⒾⓄⓈⓀ

青盲 牛 m̄ 驚生驚，讀著這篇捌錄 tī 愛料理 ê 食譜隨想著《露營。車日子》m̄ 捌字看告示綴圖出一碗早起頓 ê 食褒唆交無聊 ê 驚現世，割耙一攑隨翻塗交栽新欉，像華語 ê「覆盆子」、「紅加侖」按怎講，德語 ê Johannisbeeren tī 英語愛按怎講，蔓越梅 ê Cranbeery tī 台語愛按怎講？目今 ê 臺灣除了藍莓 mā 有黑莓而且是臺灣生產 ê 黑莓 tī 台語按怎講？英文豬母牽去牛墟 ê Goosebeery 我 bueh 趁德語抑是英語做翻譯？以上 ê 問題田那犁，子那掖穎自然來發穎。

自露西亞 kā 烏克蘭侵門踏戶，四季是若行灶跤 ê 洋刺波交藍莓 mā 沓沓仔跟綴這場戰爭行出灶跤，跟綴這場戰爭行出 gún 兜灶跤 ê 食物，窮實 m̄ 是洋刺波一味，猶有別味。

我 m̄ 是超級食物 ê Fans，不過我 tuì 朋友分張 ê 超級食物總是保持 tī 火燒厝--有厝味(有趣味），比論講藍莓仔這類 ê 食物。

Tī gún 翁𪜶兜食飯飽無來一塊勥母牌雞卵糕抑是超市冰淇淋是一件無狡怪閣 buē 上教 ê 代誌。Tī gún 翁朋友遐食飯無敆一杯酒是一件紅龜生蟲，龜怪 ê 代誌， 我佮意 kā 優格做飯後點心來食 mā 是一件 hōo 𪜶無法度接受 ê 食癖。向時我真要意遮 ê 意見，這久據在𪜶，畢竟我 ê 生活若神 tī 法國交𪜶無相𫝛，tshan-tshiūnn 法國人食露螺，德國人看甲若𧌄蜅蠐吱 buē 離，法國人 mā 無一个要意𪜶 ê 想法。畢竟隨人有隨人 ê 喙斗。我愛家己 ê 生活若神 tī 法國。

台灣人 ê Khu-lì-mù 敢 kan-na 提來做 Tshì-sù 雞卵糕？雞卵糕 tuì 我無路，自然 buē 費神請教網路眾𠢕人，不而過我 tuì 德國講 Quark 奧地利講 Topfen 德式 Tshì-sù 雞卵糕靈魂主角 ê 伊誠有興趣，我想 bueh 知影華文按怎對譯，順華文理路公視台語台台語新辭庫又閣按怎對譯。田螺循舊路，較行 mā 仝逝先按維基百科請教，華文維基 kā 伊翻做奶豆腐，這个稱呼維基有註明無參考來源，準做有參考來源，根據內容我 mā 是 kā 準過 buē 參考。華文無地參考徙頁到日文維基，日文取德文 Quark（クワルク） 交 Topfen 做稱呼。華文、日文齊請教，紲落來 ê 問題是我自少年時就認捌 ê Cheese 現此時 ê 台灣環境按怎講？起因我按朋友遐聽著乳酪交奶酪，乳酪閣分輕乳酪跟重乳酪。

啥物是 Quark？伊是一種若雞卵豆腐 ê 生 Tshì-sù，伊無美國 Khu-lì-mù Tshì-sù 厚脂肪不而過伊有厚厚 ê 卵白質。Quark 主要時行國家 tī 德國、奧地利交瑞士，Quark 這个名稱通用 tī 德國交瑞士，Topfen 通用 tī 奧地利交德國南爿大州拜仁州。Quark 𫝛時 mā 是德國、奧地利、瑞士頂港有名聲，下港上出名 Tshì-sù 雞卵糕 ê 主要靈魂人物。Tshì-sù 雞卵糕 tī 德國 mā 分兩種講法，一款是通用 tî 前西德 ê Käsekuchen，一款是通用 tī 前東德 ê  Quarkkuchen。 Quark mā 是我上愛 ê 甜粅粅，特別是早起頓 ê 甜路杯，我愛植物奶抑是牛奶透 Quark ê 味素 tsuē 過希臘優格。德國人 kā Quark 做優格食 ê 時慣勢淋寡亞麻仁籽油抑是橄欖油，我猶是亞洲胃，我 tuì 甜粅粅淋寡料理油猶是無法度接受，所致這斗當我𫝻著 Quark 敆鱷梨仔，喙瀾隨㴙㴙落，起因我愛鱷梨仔，伊 tī 營養學又閣分類 tī 油脂類，遮爾仔一餌釣雙魚 ê 食譜呔通無款來試鹹汫。

天 uī-tio̍h 金烏佮月娘 ê 相逢沓沓仔點胭脂捊水粉 。

Gún 翁無法度理解，我見著弓蕉一公斤一歐圓隨喝貴 ê 心情，我 mā 無理解伊明明知影𪜶兜勥母是 buē 曉泅嫌溪狹卻綿死綿爛愛哭愛綴路綴伊款一堆根本無 teh 使用 ê 物件。Gún 隨人有隨人 ê 半斤八兩，總是我 hōo 伊 ê 無理解比伊 hōo 我 ê 無理解閣較 buē 食倒家。咱有下願 buaih 喋𪜶爸母，總是猶是愛舉一个例做證明，我 tuì 弓蕉 ê 偏見 buē hōo gún 食倒家，不而過𪜶勥母 ê 𠢕扞家絕對 ē hōo 𪜶食倒家。我一个白鐵平鼎仔煮萬項，逐日六分鐘出好菜 ê 勥母廚房分類櫃一拍開，平鼎仔至少有十个。我最後一上交𪜶做陣 tī 𪜶兜食飯，勥母當𪜶翁 ê 面 kā gún 翁仔某投「廚房傷過細間愛 kā 倉庫拍掉，改做一大間。」Gún 翁仔某知影伊 ê 意思，不而過無興趣做中人，所致恬恬無紲喙，gún 翁𪜶老爸直接換喙喋別項。「恁老爸總算 buē 閣人牽 m̄ 行，鬼牽溜溜行」我講。「曷 m̄ 是悾歁講」gún 翁褒嗦𪜶老爸 kā 天公借膽。

初初讀著這篇食譜，我第一个想法是鱷梨仔敆優格敢 buē 龜怪？當我按呢想，2018 轉去台灣歇寒，順紲上北新竹探訪猶 tī 台灣做穡 ê 菲律賓朋友所發生 ê 代誌。

遮 ê 莓仔罕得敆弓蕉做伙食，有機會交伊相拄搪當然愛試鹹汫，好食。