亂皂𥴊仔店 ⓂⒺⒾⓃⓀⒾⓄⓈⓀ

It was in Gdańsk that i met my wife Danuta, it was here that our children were born... And so i became a Gdańsker by choice.

Lech Wałęsa

自彼日再會一目𥍉仔已經倚欲3冬，踏出門埕見著盤山過嶺蹽溪渡湳 ê 朋友，記持 ê 海馬總愛泅水，泅去為著自由為著予家己抑是後一代免閣心驚膽嚇過日，下性命做飛烏泅 ê 同學，這久 ê 𪜶敢猶原停跤踮德國。

人講落塗時八字命，環境養飼你 ê 世界。出世佇饒裕西德 ê 翁婿人生 m̄ 驚無飯通食，唯獨擘腹魂舒規年迵天無透烏魚子烏金 ê 媠，通予伊喙免開人隨知機伊 ê 日子宛然 Leben wie Gott in Frankreich 過甲四序閣有賰。按亞熱帶徙來寒帶德國 ê 我，面對伊這款騎鐵馬遶山花是娛樂，我騎鐵馬是為著儉公車 ê 1 仙五銀，無按算 ê 歇睏日金烏一捊鬚就愛交伊出門做夸父 ê 集體休閒文化予我非常有意見。總是姻緣宛然這句俗語「媒人保入房，無保一世人」，犀牛照角後我猶原交伊翁生某旦，目睭安電線，特別是為Ulrike 寫出 Marienbad Elegy ê 歌德已經行跤到。

「金烏袂使得無金光，人袂使得無戀愛，我 ê 出門行跤花袂使無你做陣牽手。」歌德 ê 情詩共兩个若阿爾卑斯山冤家量債犀牛照角 ê 番鼠，轉做甜甜蜜蜜唚一喙做陣揣睏神。

黛安娜因為阿波羅對奧利安 ê 嫉妒交伊劃清界線不再共同守護暝日，gún 秋清 ê 暝隨阿波羅為著登門向悲傷 ê 黛安娜說抱歉 ê 追逐慢慢仔轉做燒烙。阿波羅金色 ê 頭鬃捊過我 ê 雙目，貧惰鬼上身躽佇眠床共睏神 ê 衫裾搝牢牢，向望伊予我繼續划向羅麗萊 ê 歌聲。

佇人類創造 ê 世界，上強大 ê 是冊，萊茵河美麗女子 ê 歌聲像泅入討海人魚籠 ê 海軟蜞予輕兩想 ê 感覺轉做真實 ê 聽覺。起手無回大丈夫，書是知 ê 開始，行是論證，像當年予歌德褒嗦不可思議 ê 法國 Saverne 運河目今已經按自本 ê Grand Est 生湠到德國、荷蘭 ê 北海交波蘭和德國 ê 東海。知行合一看起來是天賦人權，窮真是落塗時八字命一屑仔攏無包領。阿波羅 ê 金色頭鬃按目勻勻仔捊到腹肚，大腸開始告小腸，我順阿波羅栽 ê 日頭花成做番薯佮月桃伐向廚房交窗仔外深碧青柳大地和溪流 Bach
做陣聆聽潺潺溪水捊過石頭 ê Air。

牛頓因為 lìn-gòo發現地心引力，蜜蜂因為 lìn-gòo 地毯無閒𩑾𩑾，我因為雲尪跟綴薄縭絲仔風吹泅入家鄉 ê 太平洋，順街區 ê 變化轉做豬仔海翁按東海泅入北海。向時是三跤步一坎店人潮挨挨陣陣 ê
車頭卵仁區，因為無聲無色 ê Covid-19交執硬野心 ê 烏露戰爭予伊成做鐵人飼 ê 十姊妹一飛出去無閣翻頭相揣 ê 稀微。

我寬寬仔跟綴稀微對陪伴我 ê 老店說再見，人 ê 第六感 mā 跟綴看袂著 ê 天線搜揣相敆 ê 電波。佇四常閬甲有才調楔十隻大象 ê 公車亭，因為鐵路局臨時臨曜 ê 停線予伊步頻成做人潮相挨相𤲍 ê 轉運站，我佇若青鱗仔見著火光就搢倚 ê 公車亭見著熟似 ê 形影，彼个形影 mā 按我遮看。

互相對繩一睏仔，啊，是阿丁，我三伐做一伐大聲喝「阿丁，我是美樹」，文化 ê 差異予對方 m̄
敢隨紲喙，微微仔笑手指家己表示我敢 teh 叫伊，我那頕頭那行倚，見車幫猶未到牽手就相趁相喊趕做青鱗仔 ê 翁婿 mā 緊行倚。

「我是美樹，敢猶會記得」因為居留身份無相仝予我從來 m̄ 捌向望互相說保重猶有機會再相見。

「美樹？」阿丁那講那對我自頭繩到跤。

我知影家己這幾冬 ê 變化微微仔笑箍家己向時 ê 肨奶交若掃梳 ê 長頭鬃講「B1 ê 厝邊。」

「美樹！」一落地見袂著 ê 天地遠距離瞬間縮甲賰伊佮我相徛 ê 闊度。

「你好無，阿德𪜶逐家 mā 好無」我共對 B1 語言課坐仝桌 ê 敍利亞同學 ê 數念敆做一囷草囷問。

阿丁那伸手交 gún 翁婿頓手相借喙那講「Gún 誠好，大後生已經獨立食頭路，細漢後生現此時佇工廠實習，這久 ê 我 mā允著 m̄ 免實習證明 ê 工課。」

我順阿丁 ê 話瞭一下仔伊 ê 穿插隨比大頭拇講「讚」，知影阿丁有一身好工夫卻受德國若僵屍求職文化覓無頭路 ê 翁婿 mā 跟綴贊喙「Wunderbar」。

「你今仔日免上班？」阿丁敢若雄雄想著今仔日 m̄ 是禮拜。

「Covid-19交烏露戰爭，我做小工 ê 店面親像遮 ê 店面無一个有法度接續共收水 ê 客源交若火箭 ê 能源成本繼續花花仔過落去」我擔一个肩表示目前食家己，擘腹阿丁認為伊仝款失業 ê 翁婿隨紲話講「我今仔日歇睏。」

互相分張這幾冬 ê 四常，我想著阿丁猶是無講著其他 ê 仝鄉隨閣問一改「少年烏狗兄阿德𪜶敢猶佇德國？」

我 ê 敍利亞同學五个有四个是先知 ê 字名，阿丁笑問「佗一个阿德？」

「想欲做烏手 ê 阿德交電子工程師 ê 阿德」我講。

「你知影 gún 遮 ê 外來者交 Löwenzahn 獅仔齒相仝，風一吹就隨四散」阿丁微微仔笑講

德國2015開始 Wir schaffen das 難民協助計畫，阿丁交兩位阿德同學是這波計畫申請庇護 ê 敍利亞人。阿丁一家伙是黎巴嫩停跤欲4冬發現轉去家鄉 ê 機會是犀牛望月，黎巴嫩 ê 政治環境交敍利亞是無仝爸母 ê 雙生仔，準備再次走徙到土耳其申請庇護聽著歐洲 ê 德國願意接受𪜶 ê 庇護，一路按黎巴嫩經過土耳其，無地圖無 GPS 干焦對神 ê 信任𤆬某囝一路怙11路盤巴爾幹路線到德國。

兩位阿德同學是按敍利亞過土耳其盤巴爾幹路線來到德國。向望畢業做烏手 ê 阿德是爸母向望伊有閣較好 ê 未來求伊離開敍利亞到德國生湠新未來，盤山過嶺蹽溪過海 ê 伊發現生活凡勢會停跤佇固定 ê
箍仔，伊按算繼續怙11路怙到英國，向望怙到英國有機會實踐伊自來 ê 烏手夢

電子工程師阿德，內戰一開始就交阿兄逃難到土耳其，當德國願意協助敍利亞難民，阿兄請伊去德國重新生活，畢竟兄弟袂使得坐仝船做陣沈船。

阿丁 ê 獅仔齒風一吹就四散予我想著家己 mā 是獅仔齒，跟綴姻緣 ê 風吹飛到德國，我微微仔笑講「遮 ê 獅仔齒是雜草 mā 是藥材，咱攏發揮咱 ê 美麗予別人認定 ê 雜草變小金英。」

阿丁微微仔笑，身為難民 ê 𪜶佇德國政府推捒 ê 融合課所搪著 ê 齷齪比我這个予世界干焦遐爾仔闊 ê
人所紮來 ê 心狂火著是比波羅的海 ê 蠓閣較厚。閣較掰袂走。

「你敢猶會記得，你講向望有一日有機會探訪敍利亞」阿丁講。

我喙翹甲若菱角那頕頭表示當然 mā 會記得彼日 ê 約定，而且到今 m̄ 捌擲挕捒。

「神會共咱講，這个約定敢有機會實踐」經過這場人生大變化，阿丁對神 ê 堅定無行向其他人 ê
路途，憢疑。

「Inshallah mā 歡迎恁來台灣𨑨迌予我做東道主」我甜甜笑回，聽著熟似 ê 語言阿丁彼對若十五月娘 ê 雙目笑甲眯做下月眉「Genau,Inshallah」。

「我通過 B1.2 ê 考試，你敢有去考？」課程結束 ê 慶祝烘肉會阿丁問我敢欲繼續參加語言課，我回答「先歇睏一站仔 tsiah 做決定」，阿丁講「咱 ê 居留身份無相仝，我會自費繼續參加。」

聽著當初 hőng 譬相講難民就是一陣欲食 m̄ 討趁來共𪜶 ê 活水食甲洘底，學習能力又閣低路 ê 族群，我想著一樣米飼百樣人，別人 ê 排版項項要意踅金龜磨，人生會揣無出路。我微微仔笑看為著囡仔 ê 未來佇半老老認真學習人生從來 m̄ 捌接觸 ê 符號 ê 伊，想欲予伊一个歡喜 ê 攬抱，入港隨灣，入鄉隨俗，見人隨禮，我共這个歡喜轉做噗仔聲「Wunderschön, Super!」，佇我準備紲話分張我 ê 狀況，若一身柴頭尪仔做妝娗 ê 翁婿總算掠著話縫講「伊 ê 德語是 D1。」

阿丁交我是外來者，gún-ê 德語學生味永遠贏過生活街仔味，德語認證上懸級數干焦到C2呔討我 ê 德語是D1捎無寮仔門通開 ê 伊戇做一欉樹對我金金看，我擔一下仔肩笑講「疫情期間身體無四序一个人去蹛院檢查開刀，出院轉來我隨對伊講，我 ê 德語是 D1 Dr.(Arzt)醫生 ê 等級。」

阿丁聽出我 ê 話仁笑甲目汁㴙㴙落「後回我知影按怎敨放我交你講恁 ê 話，呔討你聽有卻一直對我 wie wie wie ê 著觸。」

快樂像流星爍一个光就無見星影，「咱 ê 車幫來矣」翁婿講。

「我足歡喜有機會交你相拄搪，親愛 ê 阿丁」我徛文化尊存 ê 距離交伊互相再次說相辭。

阿丁伸手交翁婿握手講「我 mā 是足歡喜有機會交恁再次相見，親愛 ê 美樹。」

公車寬寬仔入月台，我那擛手那順人潮伐去「Inshallah」，阿丁微微仔笑應「Inshallah。」

佇𤲍甲若沙丁魚 ê 公車 gún 宛然德國俗語參加弓箭比賽得尾名猶是得著一隻豬做獎勵 ê 弓箭手「Schwein gehabt」ê 好字運揣著倚窗仔 ê 位。Ùn-tsiàng 共人像金山蹦火仔 ê 青鱗仔罟入漁網，我順公車徙動 ê 角度見著阿丁徛原位對 gún-ê 公車金金仔相，我想著課程結束 ê 烘肉會，交翁婿送伊轉來車頭牽鐡馬，伊 mā 是相𫝛 ê 恬靜到我無法度見著伊 ê 形影為止。

「你知影恁 ê 融合課程有赤裼裼 ê 偏見，著無」，放水流 ê 融合課順今仔日 ê 燒烙成做無法度倚近 ê 海湧。聽牽手分張融合課程老師妝娗 ê 暗毵，隨親身去VHS 國民學校分張學生學習狀況 ê 伊頕頭表示知影。

「Gún 講落塗時八字命，較早阿丁問我 ê 無理解『呔討德國人總愛對我講騎鐵馬是娛樂是好運動愛捷騎出門』是出世佇富裕西德 ê 恁 m̄ 願理解，你交我落塗時奕俄羅斯輪盤無轉著銃子 ê 行佇卯字。」

「Gún mā 講天無絕人之路，未來搪著小齣隨做茶鈷呻進前請翻頭思考，你敢有勇氣為著自由泅入
Spree 交盤山過嶺，蹽溪過海。」我順公車 ê 轉彎踅街共阿丁按仝寸尺見甲連一寸尺攏無法度閣再見著，那提醒翁婿伊認為 ê 人生 m̄ 是伊自來認定 ê 面腔。

順公車盤過這條街斡過彼个角，我想著我 ê 融合課宛然阿母鼎內 ê 白帶魚，永遠是一橛一橛煎好食煞就無看形影清氣啖啖，阿丁交兩位阿德是若阿母加煠 ê 蝦仔予我袂記持愛共白帶魚紲手食予見骨無看肉。

新課程換新老師，當我行入 B1 ê 教室順眾人 ê 目勢揣有通相放伴 ê 感應，阿丁擛手表示遮有位通坐，成做我一橛閣一橛 ê 融合課唯一 ê 同窗友誼，後來 ê 車幫路線成做火車母予 gún 化身火車囝一節敆一節互相認捌家己 ê 人生故事。

以難民進入德國 ê 阿丁知機故鄉 ê 未來袂行向世人 ê 期待，伊無向望囡仔佇若黎巴嫩 ê 環境大漢，mā 清楚知影 Wir schaffen das ê 目的，「這是我第二斗餾 B1，我 m̄ 知影政策會引𤆬 gún 行向何方，不而過做小工予我有一个小小 ê 擔保，較免逐日驚惶擘腹家己 ê 頇顢愛 hőng 徙位。」

佇敍利亞有小小工廠 ê 阿丁，一場戰爭予無自由 ê 榮華富貴轉做火烌予我更加寶惜家己 ê 好字運，無論生活佇臺灣抑是德國，雖罔德國人生無照我 ê 向望向行前，不而過我 ê 日子親像阿丁分張 ê 家鄉就是一个予你交親人有一个安心無受驚惶 ê 所在。

Hegel 講世界歷史是自由意識 ê 進步，三十年戰爭，二次大北方戰爭，歐戰、二戰後 ê 智識普及，呔討顛沛流離從來 m̄ 捌進步過。

Schopenhauer 講「欲讀出好 ê 代誌，一个條件就是莫讀出歹 ê 代誌」面對世界歷史敢若從來 m̄
捌跟綴自由意識正題 – 反題 - 合題予伊按圓湠圓，欲讀出好 ê 代誌需要共歹 ê 代誌讀出來，人生才有法度得著 Nietzsche 講 ê 凡刣袂死我的，必使我強大，佇阿丁 ê 身上我見著這个驗證。

「人生路途，神會共我這个離開敍利亞是青盲的看告示指引方向。」順公車駛過這个斡，盤過彼條路，謝銘祐 ê 路欲按怎行，頭前茫霧坱埃 mā 佇我 ê 眼前起雺。

Inshallah，願眾阿丁阿德逐家平安順序。