亂皂𥴊仔店 ⓂⒺⒾⓃⓀⒾⓄⓈⓀ

十二月食菜頭，六月 tsiah 轉嗽
部落格寫 bueh 5 冬開始翻田塗整菜股 tsiah 發見看 buē 順眼 ê 落䈄(làu-ham)佮實䈄(tsa̍t-ham)，只要 kā Format 轉換做 Normal 刺目就有一種，總算免閣開錢食通血路 ê 藥仔。我 m̄ 知影別人敢有這个症頭，寫部落格明明是做議量，卻不三時莫名叨然家己，像相片䆀隨叨撚家己就是相機䆀 m̄-tsiah 翕 buē 出水準。總是我有一个優點，彼就是我 buē 交錢捙拚啥人較𠢕走百米。所致我 ê 齷齪捷愛十二月食菜頭，六月 tsiah 轉嗽。 
無舌 ê 人笑有舌 ê 人
「你 ê 塗肉林檎 buē 記得尾聲。」

數字是毒藥，身體是解方。
巡菜股，翻田塗翻著這篇文田想著近來又閣搪著相仝 ê 問題，落崎落到倚 bueh 烏貓仔姊年閣 ê 數字，伊又閣勻勻仔開始𬦰崎，致使我家己做三斑擾宅。總是我 m̄ 是彼款火燒尻川猶原無智覺 ê 人。「棋行到這步，你 m̄ 斟酌搜揣辦法來解決目前 ê 困局 kan-ta 想 bueh 按呢 tuì 家己叨撚，彼是按呢飼山羊 mā buē 大箍 ê 無較縒。」頭斡 leh 一伐做三伐伐去房間囊烏貓姊 ê 法國牛仔褲，這領無 Vanity Sizing mā 無 Dehnbar ê 牛仔褲經過兩冬猶原有閬閬有空間。2024.05.18磅仔頂 ê 瓊花
齷齪是另類 ê 祝福，我因為 gún 翁 ê 膽結石 tsiah 想著十外冬前 ê 體檢報告，「詹小姐，你 buē 使得按呢繼續激皮皮，糖尿病 m̄ 是感冒。」我因為工作 hőng 派去中國，𪜶 ê 自來水 hōo 我膽膽，我就 kā 無糖 Cola 做水啉，啉無到一冬馬桶 m̄ 捌見狗蟻，醫生 tī 我 ê 健康報告見著狗蟻軍隊寬寬仔 bueh 行倚，開始 tuì 我做衛教。我因為芋仔爸掠做致著糖尿病無啥要緊，只要固定食藥仔就好勢，所致繼續匪類。第二冬，醫生猶是講仝款 ê 問題，我開始接受家己 ê 問題並敨放自我設定 ê 驚惶，起因我見著無致意糖尿病 ê 實例，雙目因為糖病尿青盲，雙跤神經 mā 因為糖尿病蔫去，規世人需要坐輪椅。

「沙拉」是十个囡仔十樣生
好玄成做貓，自囡仔看甲大漢 ê「沙拉」伊敢會變調，像講慣勢 ê「寂寞/Siok-bo̍k」講「寂寞/Tsik-bo̍k」？好玄引𤆬智慧生，請教教育部臺灣台語常用詞辭典，辭典收錄「沙拉油」無收錄「沙拉」，請教 ChhoeTaigi 有收錄「白醋」（嘉義特有辭）、「生菜餐」、「Sa-la」三个辭，敢猶有別 ê 辭？來向公視台語台〈台語新辭庫〉請教，「有一寡民眾會用沙拉代替正頓，希望會當有減重的效果，毋過醫生提醒講若欠碳水化合物，可能致使免疫力降低這寡健康問題。」西瓜倚大爿，全家有智慧是二選一，我是三選一「沙拉」、「Sa-la」、「生菜餐」，我選自囡仔看甲大漢 ê 沙拉。我愛白醋敆白煠筍。

秋分 ê 金瓜
節氣勻勻仔行到秋分，翁講「著時矣，愛來食金瓜。」今年秋分按算 ê 波蘭行跤花 tī 萬事 tsiâu-tsn̂g kan-ta 等貓霧仔光就出發 ê 前 8 點鐘，因為 gún 翁無法度控制 ê 走腹揤暫停。「我想這合該然 m̄ 是食物中毒」gún 翁若軟絲倒 tī 眠床講。自伊開始走腹，伊綿爛跟綴伊心愛爸母 ê 體剔（thé-thak），𪜶 ê 無四序齊是別人 tuì 𪜶甕肚 ê 對扴。我承認我洗菜有較潦草，總是這个潦草無可能 hōo 伊活到今，敢 m̄ 是？我清楚知影伊 ê 走腹 m̄ 是我惹出來 ê 問題，總是又閣捎無機關藏 tī 佗落，就隨在伊去數佻（siàu-tiáu），畢竟兩个人 ê 孤單，比一个人 ê 孤單閣較好過日子。出發波蘭 ê 前一暝，睏甲 m̄ 知人 ê 我夢著按蘭嶼轉來台灣彼日，本底按算停歇綠島 ê 船長確定風颱猶 tī 外口隨決定繼續向台灣駛，本底就食眩車丹 ê 我繼續補一粒，猶是捙拚 buē 過若風吹 ê 海湧 hōo 做陣去𨑨迌 ê 朋友四界揣塑膠袋仔 hōo 我掠兔仔交安搭台灣島 bueh 到矣。「美樹，我腹肚足疼...美樹...」凡勢天 bueh 拆箬，大腦沓沓仔有法度分辨夢交現實，我順若貓仔 ê 聲翻身揣夢抑是現實，「美樹....」雙目褫金見著目箍紅紅 mā 吐甲規魂舒 ê 翁，隨傱便所間捾燒水，人猶末行倚已經鼻著臭酸味，這一月日來 ê 風火著隨消散，燒水貯跤桶，面巾浸燒水捘 hōo 焦，手機仔準備敲 112。「Bueh 8 點矣，較晚咱坐計程車去病院就好....」，我順伊 ê 話冷靜繩伊 ê 無四序，伊看起來確實無嚴重甲愛敲 112，就交伊做陣等時間，紲落來一个人坐踮花園等伊吩咐。

Each Soul is potentially divine. The goal is to manifest this divinity within by controlling nature, external and internal. Do this either by work or worship or psychic control or philosphy --- and be free. This is the whole of religions. Doctrines, rituals, forms are but secondary details.Sawmi Vivekananda
你寫部落格 ê 目的是啥？我寫部落格 ê 起因是熥甲家己 mā 𤺪，總是有 ê 話題需要以臭酸做代先，故事 m̄-tsiah 有才調繼續延續生湠。2008 面冊行入台灣人 ê 世界，朋友見面 ê 第一句話是「你有面冊無？」，2011 Line 出現，朋友見面 ê 第一句話是「無 Line mā 無面冊，你誠實有夠歹鬥陣。」，朋友剾洗我無仝心歹鬥陣，我就笑微微仔笑回「咱猶有 MSN 敢 m̄ 是？」2012 MSN 正式行入歷史，無面冊、無 Line ê 我 buē 使得繼續蠻皮就 2 選 1，選擇 kan-ta 電腦有法度使用 ê 面冊。加入面冊，魂舒邊 ê 朋友講「換一隻巧機仔啦 hōo 逐家有才調做陣仝步冇談抑是討論食飯會。」，我無確定「逐家」敢有時間仝步踮面冊破豆，總是我清楚知影我 tuì 巧機仔無興趣。

人真龜怪。

按 2019. 9月這跤兜開始寫 Blog 寫到今猶原 tī 改版，不而過改甲這篇已經揣著家己意愛 ê 書寫排版。

Nicht lachen, nicht trauern, nicht verabscheuen, sondern verstehen