亂皂𥴊仔店 ⓂⒺⒾⓃⓀⒾⓄⓈⓀ

M̄ 捌研究歷史，迵過先人 ê 跤步 tsuē-tsuē 少少應當攏 ē 學著這件事項，彼就是一个族群 bueh 成做通人知 ê 族群攏需要一場戰爭。

徛踮 Elbe 易北河水頭，德文號做 Königgrätz 捷克語號做 Hradec Králové 赫拉德茨-克拉洛韋就是按 hőng 看 buē 上目 ê 民族成做獅仔開大喙 ê 起家所在。

1866，7月初3 本底 hőng 看無目地 ê Preußen 普魯仕就是 tī 這附近戰贏斯當時世界三大帝國之一 ê 奧帝利帝國。

因為這場 Königgrätz 戰役 hōo 本底根屬 tī 奧地利帝國 ê Hradec Králové 轉做普魯仕領土。

我 tuì 歷史建築齊 m̄ 捌一个呼，總是戲館邊 ê 豬母 buē 歕簫 mā 會拍拍(phik)，捷看捷問沓沓仔 mā 小可仔看會出 hőng 講做是兄弟 ê 無相𫝛。

主廣場

1602 年原名號做 Koniggrätz ê Hradec Králové 已經開始起造軍事堡寨，1225 年定名做國王市，1307年指定做波蘭國王未亡妻 Elisabeth ê 住宅，自彼時陣這座城市號做 Grecz Reginae 或是 Hradec Králové m̄ 是進前 ê Hradec（Grecz/Grätz）。

Tī 德語方面，Königingrätz 這个號名 tī 1800年進前已經確定，伊 mā 是上早徛踮 Hussiten 胡斯派教 ê 地區。

2005年 Největší Čech(上偉大 ê 捷克人) 票選第五名 ê Jan Žižka von Trocnov 揚.傑式卡安葬 tī 這座城市。

行過 Hussiten 戰爭佮三十年戰爭進前，遮一直是新教地區。

Tī 30年戰爭 ê 1639 年伊 hōo 瑞典人佔領8月日，tī 這 8月日期間遮 tshan-tshiūnn 一切 ê 戰爭，外來者 buē 寶惜步頻行跤到 ê 所在，外來者 kan-na 會 kā 這个步頻行跤到 ê 所在 kā 舞甲家己油洗洗。

1664 年遮成做信仰天主教 ê Preußen 主教教區，1729年一位教士出一本有通搜揣分類 ê 冊，這本冊 mā 成做伊講 ê 話 tsiah 準算 ê 聖經，伊要求遮 ê 人攏愛有這本冊，伊要求遮 ê 人厝內 mā kan-ta ē-tàng 有這本冊，所致伊 ē 無請家己來巡人家厝，巡著厝內無收藏伊寫 ê 冊隨處罰，巡著別人 ê 冊隨燒掉 mā 送櫳仔受刑。

簡單一句，規座城市 ê 冊 kan-ta ē-tàng 一位作者就是伊本人，因為伊這座城市又閣一斗行入文化災禍(hō)。

寫到遮有一種軟荍無力 ê 無奈何(ta-uâ) mā-ē 憢疑學習歷史 ê 目的是 uī-tio̍h 啥物，總是我清楚我學習歷史 m̄ 是捌成做歷史 ê 副本抑是展現家己智識 ê 飽滇。

我學習歷史是 uī-tio̍h bueh 理解年間承落來 ê 齷齪 hōo 家己有法度敨歷史 ê 繚索，莫綴 leh 轉世 buē 離。

1756～1763 ê 七年戰爭，奧地利軍隊佮 Preußen 軍隊 tī 遮發生衝突。

1866 年發生 tī 遮 ê 世說兄弟戰爭，當事人 m̄ 是按呢認為 ê 奧地利佮 Preußen 戰爭 mā tī 遮改變兩國 ê 運命 。

拿破崙戰爭 mā tī 遮留下伊 ê 跤跡，致使 tī 1809 年發生糧草不足 ê 現象。

起因，人民驚惶戰爭閣來行踏開始囤糧草並武裝城市。

世界第一次大戰或是歐戰結束，遮 hőng 號做共和國 Salon，落尾手因為政治佮經濟沓沓仔徛穩，受破壞抑是無經費通翻厝 ê 建築攏寬寬仔翻新，新 ê 建築 mā 勻勻仔增加。

讀資料講舊城起 tī 崎頂，舊城市中心佮教堂攏是起 tī 山崎，這久 ê 我認真愖行踏 ê 記持。

Tī 奧地利-匈牙利二元君主年間，遮 ê 軍事堡寨建設甲若箍 tī 腰 ê 腰帶，gún tī 教堂倚城門出口 ê 這搭搪著已經關門無做生理 ê 茶店，gún 是按遮行落崎又閣按教堂𬦰崎轉來舊城區。

閣按紅磚教堂行 uī 青銅瓦黃錦身 ê 教堂遐落崎閣𬦰崎 ，一切就宛然資料寫 ê 舊城無綴教堂按呢行一逝誠實無法得感受伊是起 tī 山崎 ê 城市。

新舊城 ê 通道

遮 ê 樓梯表示音符，m̄-koh m̄ 是彼款跤一踏著會出聲 ê 彼款，是人徛踮舊城這爿 ē-tàng 照家己佮意 ê 音樂點歌 hōo bueh 出城或是入城 ê 人聽。

囡仔時捌想過做廣播人 ê 我，日仔一日一日拆拆甲清楚知影家己無彼个天份，這斗就利用這个機會放音樂 hōo 入城佮出城 ê 人聽 。

出入舊新城 ê 另外一个出口 mā 是成做 DJ ê 夢想磅空。

這回行踏捷克 tuì 翁講「千年後無定著換恁愛倚靠捷克搜揣恁擲挕捒 ê 歷史。」

「Gún 已經交遮 ê 國家合作」翁分張。

交著歹朋友抑是信 m̄ 著人，誠實 kā 起厝千日 ê 爸公業舞甲拆厝一暝工。

搪著愛拍バッター囡子 ê 露營區

捷克有 tsuē-tsuē 露營區無登入現此時 ê 露營 El Camino de Santiago➀ mā 無加入露營俱樂部，所致 tī 捷克揣露營區 tuì 我來講就敢若挖金礦仝款 ê 刺激 tuì 慣勢照人講「翁」是苦毒，起因伊 tuì 後一秒無法度掌控。

「後一秒 ê 知知 mā ē-tàng 是人工妝娗，敢 m̄ 是」當翁哭呻揣無一个所在通露營，我手指地圖 ê 三角形講咱遮敢 m̄ 是露營區 mā 直透 kā 伊 bueh 講 ê「無評價」勘定。

Gún 這个露營區就是按地圖揣來，伊無奢颺 ê 浴間仔間 m̄-koh 伊有看起來橫霸霸卻好鬥陣 ê 當地人，gún-ê 露營厝邊有 uī-tio̍h 囡仔參加野球營規家來遮露營，mā 有 Kayak 營 ê 囡仔佮老師搭布棚做厝邊。

我足享受這款無奢颺無比並 ê 露營區隨 tuì 準備寫評論 ê 翁講「遮 m̄ 免你起好心 kā 𪜶鬥廣告」，伊看我調整「遮 m̄ 免你起好心 kā 𪜶鬥廣告」ê 聲調隨講「捷克風格就留 hōo 捷克人，gún 德國人 buē 交插。」

聖泉出名地

出門車日子進前 tī Heibronn 海布隆見著無浡水 ê 聖泉，上北波蘭 tī 這 m̄ 知山名 ê 所在見著當地人車停好隨捾水桶行向柴橋彼搭，gún mā 跟綴當地人 ê 跤步 kā 車停好，茶甌仔捾 leh 按柴橋 ê 方向行過。

總是 tī gún 翁 ê 世界猶原迒 buē 過東西，伊相信頂懸有羊隻走傱 ê 希臘聖泉 m̄ 願相信擔頭看 buē 著半隻蠓 ê 捷克聖泉，當 gún 翁仔姐茶甌仔捾 tī 手比來比去，一位滿面笑容交福相 ê 太太行倚來，手指伊敢 ē-tàng 斟水來啉。

Gún 隨點頭徙位表示請，伊隨 kā 若奉茶 ê 公用杯甌仔提來接山泉水洗沖，紲落來 kā 茶甌仔斟滿水灌入喉，茶甌仔洗清氣，伊笑微微 tuì 我比讚，越頭準備離開，坐踮車頂 ê 序大出聲，伊又閣翻頭用手承水紲落來輕輕仔按臉點幾下，我越頭看序大，序大 tuì 我 tìm 頭比家己 ê 面，我知影這个 14 是，這山泉水 tuì 皮膚好，茶甌仔隨徙去承水大喙淋落去，甜矣！！！

猶原 teh 分東西 ê gún 翁準備成做六月蚶，開喙臭進前，我先開喙「希臘 ê 山泉水有羊仔保庇號做甜，這水就是天公伯 ê 恩賜，自然甜。」

Gún 翁看牽手這水一杯閣一杯啉，啉甲無喝腹肚疼，隨承一杯水來啉。

「我 bueh 捾水桶來承水」伊講。

「世界是圓 ê，若感覺這世界一直 buē 圓，表示你這个人 ê 圓齊是假仙假觸 tshan-tshiūnn 恁爸母」我講。