亂皂𥴊仔店 ⓂⒺⒾⓃⓀⒾⓄⓈⓀ

Kauno pilis/Burg Kaunas/Kauans Castle

Kaunas 一个有德語、波蘭語、露西亞語、英語、白俄羅斯語 ê 立陶宛第二大城市，伊 ê 運命就交遮 ê 角頭 kā 伊號 ê 名𫝛款，因為徛位重要 hōo 伊成做各地角頭想 bueh 栽欉 ê 土地。

路裡搪著 ê 藝術

Kaunas 倚波蘭，波蘭倚日耳曼，日耳曼又閣四界栽羅馬花欉 hōo 我人猶未行到 Kaunas 隨 tuì 翁講，我 buaih 閣 All you can eat 看 Orden 堡。

「行到挪威，你猶原愛 Orden 堡食甲飽」翁笑應。

這逝車日子是我家己綿豉 bueh 來，Orden 堡食甲飫喙火燒心 mā 是愛 hōo 伊嘔酸水。 

按嘔酸水若讀鰮仔魚露營分張 ê Kaunas 行尞資訊「波蘭」-「立陶宛」文化線，我想我揣著解溢刺酸 ê 藥仔。

Kaunas(考納斯)倚首都 Vilnius(維爾紐斯)差不多100公里左右，伊 tī 古早時位置就敢若荷蘭 tī 咱番薯島 ê Fort Provintia，提著 Fort Provintia bueh kā 跤踏到 Fort Zeelandia 就桌頂拈柑。

Kaunas 既然是守護外來者 ê 武士，是按怎目今 ê 伊 ē 生甲遮爾仔成日耳曼？

咱踏 ê 土地是年久月深一勻塗一勻塗勻勻仔疊，歷史 mā 相仝，咱番薯島 ê Fort Provintia 按荷蘭人生湠，荷蘭人離開，換鄭成功來扞，伊看荷蘭人建築式樣 buē 四序就按家己 ê 意愛 kā 伊留枝添葉成做伊後沿通人捌 ê 赤崁樓。

Kaunas ê Orden 堡 mā 是按呢循環再打造。

路裡搪著 ê 藝術

Kaunas tī 德國 Orden 猶未 kā 伊收做後宮美人其中一位 ê 1361 年，伊 ê 字名已經出現 m̄ 是隨人通食 ê 神奇魔菇內底--- 文件。

總是，Orden 繼承羅馬傳統，鄭成功繼承唐山風格，Kaunas 自 Orden 扞權隨成做連伊家己 mā kiōng-bueh 自我請教 ê Wer bin ich? 我是 tsiâ。

讀 Kaunas 堡資料 hōo 我想著陳耀昌醫師 ê 傀儡花(斯卡羅)，無人 kā 伊拍做電視劇 ē 有偌 tsuē 人認捌 Rover 事件。

路裡搪著 ê 藝術

歷史佮 bué 車仝款，當初 ê VW 按怎成立，無人繼續要意。斯當時你下性命反抗 ê 事件跟綴時間 ê 反頁成做你要意倚賴 ê 主力。

1410年7月成功 kā Orden 趕走 ê Kaunas tī 三十冬後 ê 1440 年跟綴市草變化幔日耳曼符號「H」成做 Hansestadt。

17佮18世紀是 Kaunas 上硬篤佮艱難 ê 時陣，露西亞講遮屬𪜶兜 ê 土地，法國 ê 拿破崙 mā 講遮是𪜶 ê 土地，遮 ê 外來角頭無一个人問 Kaunas 敢 bueh 成做𪜶兜 ê 土地，mā 無一个人疼惜這个本底鬧熱滾滾閣交易 ê Kaunas，就此 Kaunas 成做連敲112 攏 buē 赴救 ê 角勢。

Kaunas 紲落來 ê 故事就交世界通用歷史相𫝛，追求獨立，換來戰爭，得著獨立，繼續保持獨立。

這是我第二斗行踏立陶宛，按第一大城 Vilnius 行踏到第二大城 Kaunas，我一直感覺立陶宛 歷史交咱番薯島是 Pollux 佮 Castor 雙生仔。

本底好好 ê 日子，因為別人 ê 喙飽目睭枵開始塗沙坱甲滿四界。

路裡搪著 ê 藝術

不過咱番薯島猶是較好字運一寡，咱四面倚海 hōo 咱按較晏滒著打馬膠，不而過較晏滒著打馬膠 buē 記得家己抑是主動放捒家己 ê 神魂 mā 是無較縒。

這是我行踏立陶宛 tuì 咱番薯島翻草 ê 感受。

路裡搪著 ê 藝術

我 tuì 立陶宛歷史 m̄ 捌一个呼，雙目所見 ê 建築式樣又閣齊是露西亞交目今時行 ê 西方文化 hōo 我一直感覺無鹹無纖掛無局。

按呢 kā 記錄論真講是涵空龜 buē 博假博，畢竟立陶宛並 m̄ 是齊是這款面目，準做 kan-ta 這个面肉 mā m̄ 是伊自願。

理想佮現實齊愛照顧，世界生張十八變，學 ē 曉上山看山勢，入門看人意，跟綴十八變成做新點點 ê 舊家己比成做無神魂 ê 烏面賊較重要。畢竟歷史大厝是隨人記錄隨人講 ê 裝璜，咱無一个人有法度完全理解老去 ê 大厝 mā 無一个人有法度控制目今大厝 ê 後一秒，不過自信是上讚 ê 妝娗。這是第二斗行踏立陶宛 ê 自我翻草。

路裡搪著 ê 藝術

第二斗上北立陶宛栽跤花，我 tuì 伊 ê 都市交鄉村猶原是無煞著頂腹蓋，不過我 tuì 這个人口無夠3百萬 ê 國家，人民 buē 因為家己 ê 語言交 tsiā bueh 相𫝛抑是俄羅語已經成做迵骨 ê 自在就放棄 kā 舌接轉來 ê 骨力兼自信是欣羨甲 mā 敨放彼个龜怪 ê 情緒，自在講台語，準做無人聽有抑是有人攑牌講「請說國語」。

欣羨別人 ê 自信佮光彩，無按家己做起猶是無較縒，敢 m̄ 是。

本底掠做波蘭 ê 霜淇淋已經足好食，無疑悟立陶宛 ê 霜淇淋閣較合我 ê 脾土。

舊城區 ê 教堂

行踏歐洲東海進前，我一直捎無家己 tuì「波羅的海三小國」ê 想法，總是清楚知影伊是一个 ē-tàng hōo 我臭頭包布，防蠅(風神)家己 m̄-nā 是書讀萬卷，路 mā 是十八港跤行到到 ê 𠢕人。

第二斗按德國上北行踏課本紹介 ê「波羅的海三小國」順波蘭 ê 東海一路上北到立陶宛 ê 東海 tsiah 智覺家己 ê 目從來 m̄ 捌離開課本 ê 鳥仔目，跤花猶未栽到愛沙尼亞，立陶宛國土闊幅就比臺灣 tsuē 1.8 倍。

我從來 m̄ 捌感覺捷 hōo 我取來交臺灣國土大小做比喻 Baden-Württemberg 狹卻捷講立陶宛是小國，這是慣勢抑是大細目懸低耳？

這斗遠離人人紹介齊講伊若小 I-tá-lih ê 首都 Vilnius 車入 m̄ 是黃錦錦金爍爍就是青蘢蘢像這句廣告「天然--ê 上好」ê 大街小巷，交當地人講天說地，我想著歷史重來 m̄ 捌反頁，m̄-koh 人心 ē 反頁，只要家己願意楦闊家己 ê 世界，你就 buē 要意別人講你是 小 I-tá-lih 抑是小巴黎，甚至追求 Bismarck kā 頭毛破爿，隨無仝人 ê 想法。

Molėtai Astronomical/天文觀測站

Molėtai Astronomical/天文觀測站是 tuì 天文學有興趣 ê 翁刁意故安排 ê 景點，伊 mā 是上北拉脫維亞 ê 上尾站。

我 tuì 天文學捎無一个摠就莫 buē 博假博卸世眾，不過大力推薦這个天文站，起因 m̄ 管解說抑是設備攏超級 lohn sich(物超所值)。

除了本地語言 mā 提供英語導覽

天文召(tiàu)鏡翕 ê 太陽