亂皂𥴊仔店 ⓂⒺⒾⓃⓀⒾⓄⓈⓀ

Tartu 塔爾圖 Eesti 愛沙尼亞第二大 ê 城市 mā 是 2024 年 ê 歐洲文化首都。

2024 年 ê 文化首都猶有奧地利 ê Bad Ischl 佮挪威 ê Bodø。

古錐 ê 路牌

Tartu 第一擺出現 tī 文字記錄是 1030 年 m̄-koh 彼時 ê 稱號 m̄ 是目今按德語佮瑞典語 ê Dorpat 轉化，彼時 ê 號名是 Tharbatas 佮 Dorpat 這兩个字辭齊是跟綴遠古愛沙尼亞語 Tarbata 轉化。

Tarbata ê 意思根據考古推測凡勢是 Urgermanische ê Auerochse，意思著是牛 m̄ 捌透著別 ê 血統 ê 原生牛種。

簡單記錄這牛，根據資料記載最後一隻原生牛 tī 1627 年絕種，原生牛最後 ê 跤跡出現 tī 波蘭。原生牛 ê 斷種 m̄ 是波蘭人 kā 伊刣甲無傳(thn̂g)，是大自然進化論造成。

Tartu 按水鬼升城隍，升格做愛沙(sa)尼亞第二大城 ê 字名是 1918年 ê 獨立戰爭以後。

根據考古資料，西元 5 世紀人類就 tī 遮生湠定根，西元 7 世紀 Tartu ê 東爿已經有一座全柴枋起造 ê 軍事堡寨 Festung, Fortress。

11 世紀 Jaroslaw der Weise 以武力 kā 跤跡生湠到 Tartu，這座 uī-tio̍h 抵禦(tí-gū)外來者 ê 柴型軍事堡寨就此行入歷史，並另外進行 Face/Off 換尪仔面 ê 外科手術按 Sean Archer 成做 Castory Troy，手術成功 Der Weise 賜 Tartu 堡寨家己 ê 教名 Yuryev。

1061 Der Weise 武功不再，Tartu 按 Yuryev 閣一斗 hōo 外來者換尪仔面，紲落來 ê 歷史跤跡齊是冤家量債、吵家抐宅、干戈(kan-ko) ê Tsiâ 得天下交 Tsiâ 主意。

13 世紀換十字軍 kā 干戈生湠到 Tartu，有當時十字軍得天下，有當時當地人得天下，總是戰爭 buē-tàng 倚靠放尿來攪沙 ê 團結，Tartu 就此閣一斗換尪仔面成做德國人 ê Dorpat 並轉型做德國意愛 ê 面肉 --- 商業貿易地區，Hansestadt 漢薩同盟。

因為地基 m̄ 是平--ê sòo-pái 成做出名建築 --- Mayo

1558 年露西亞皇帝 Iwan IV 伊凡四世 tuì Tartu 發動戰爭，有往過 ê 經驗當地人開始透水攪沙 hōo 做堆，總是向時 ê 經驗無包領是透世人 ê 保險，本底自治(tsū-tī) ê 生活受著十字軍主教 hőng 請去莫斯科 ê 櫳仔食茶配麩過日子結束，Tartu mā 因為這場戰爭 hōo 露西亞 ê 司馬遷寫入「露西亞史記」，就此交露西亞無想 bueh 相黏蒂帶 mā 無伊法 ê 歲月。

露西亞司馬遷 kā 十字軍寫做侵入者，kā Jaroslaw der Weise 寫做這塊土地本底 ê 主人。

露西亞司馬遷交中國有相𫝛 ê 時空扭曲症，der Weise 是西元 979/986 出世 tī 目今烏克蘭 Kiew 基輔，按西元開始按算，頭前 ê 10 世紀齊是漫画？

Tartu 有 tsuē-tsuē 𫝛一位藝術家 ê 作品，這个是其中一个

1601 年 kā 瑞典按無人認捌 ê 土地引𤆬到歐洲各列強齊熟似 ê Gustav II Adolf 古斯塔夫二世.阿道夫 mā kā 領土收藏 ê 意愛生湠到 Tartu，不過這个收藏品無過偌久又閣 hâinn hōo 露西亞。

Tartu 這个收藏品 tī 露西亞閣一擺搶轉來手頭 ê 1625 瑞典重整干戈按南東海划上北東海 kā 心心念念 ê Tartu 閣一斗收藏手頭到 1704 年，換露西亞整干戈 Tartu 完成𪜶 ê 認為 --- 自古無法度分割 ê 領土 tsiah m̄ 捌閣踅翻頭轉來 Tartu。

大學邊仔 ê 戲院

露西亞拑(khînn)家年閣，Tartu 有啥建設？

按立陶宛看甲愛沙(sa)尼亞敢若是 Null ê 無，除了 hōo 我看甲目睭疼 ê 蘇聯式建築。

瑞典拑家年間，Tartu 有啥建設？ 

1632 年瑞典 tī 遮設立愛沙尼亞第一間大學 --- 行踏瑞典 Stockholm 斯德歌爾摩舊城街路猶原看 ē 著向時 ê 愛沙尼亞學校。

1704 年露西亞彼得大帝交伊 ê 軍隊佔領 Tartu，Tartu ê 繁華交易就此成做一場空。

當地人開始成做家鄉 ê 外埠人，tsuē-tsuē 當地人 hőng 𤆬去露西亞自我奮鬥拍拚，tsuē-tsuē 露西亞人 hőng 𤆬來愛沙尼亞定根生湠。

歷史從來 m̄ 捌反頁 m̄-koh 不斷接枝生湠，敢 m̄ 是。

手寫 ê 影戲時間表

Tartu tī 1721 年 hōo 露西亞 kā 伊簽名頓印仔講，伊自本就徛 tī 露西亞 ê 領土並改字名做 Derpt，1893 年又閣改做 Yuryev，1895 年下令學校教學語言交文字唯一 ê 標準俄羅語並禁止使用愛沙尼亞語佮文。

歐戰(一戰)結束，Tartu 大學隨 kā 露西亞 uī-tio̍h hōo 你完全 buē 記得你是 Tsiâ ê 愛沙尼亞語佮文恢復做主體教學語文，城市名稱 mā 正式定義做 Tartu 並交露西亞簽和平條約「露西亞永遠放棄 tuì 愛沙尼亞領土 ê 要求。」

Tartu toomkirik 塔爾圖主座教堂

歐戰失勢 ê 露西亞 m̄ 是 kan-ta 交愛沙尼亞簽定和平協議，𪜶交 Suomi 芬蘭 mā 是按呢簽約。

總是，蹁仙仔 ê 契約 buē-tàng 提來保一世人 ê 寶藏。

歷史雙獅➀

畢竟，歷史是人寫出來 ê 故事 mā 是人講出來 ê 漫画，伊底時 bueh 暗時食西瓜，半暝仔反症，你齊 m̄ 知。

1940 年食軟驚硬 ê 蘇聯 m̄ 管契約 kā 愛沙尼亞講你交 gún 蘇聯是仝爸仝母 buē-tàng 一人家代，公媽隨人祀隨 kā 愛沙尼亞人當做箍絡喝咻。

不過，kā 愛沙尼亞人當做箍絡喝咻 mā m̄ 是 kan-ta 蘇聯一个，交𪜶簽訂德蘇互相不侵犯條約 ê 德國第三帝國 mā 是𫝛款惡質。

歷史雙獅

二戰期間蘇聯 uī-tio̍h 自身利益無說一聲隨 kā Tartu 起造 tī 1776 年波羅的海唯一 ê 石橋 Kivisild 磅掉，紲落來閣交換手 hōo 德國第三帝國 kā 伊磅甲連一塊肉幼仔攏無地揣 。

講著德國第三帝國 kā 古蹟磅掉 mā m̄ 是啥物特殊 ê 代誌，畢竟𪜶 mā 一四界磅家己 ê 歷史。

信 m̄ 著人交嫁 m̄ 著 ê 結果齊是按呢生，同齊火化布魯斯。

總是 Tartu 並無信 m̄ 著抑是嫁 m̄ 著人，伊猶原 hōo 遮 ê 外埠人舞甲火化布魯斯。

誠做人類 ê 咱 m̄ 管栽 tī 佗一个角勢，咱齊捙拚 buē 過落塗八字命 ê Schwein gehabt 交 Pech gehabt➁ ê Russian roulette 俄羅斯輪盤。

路裡搪著 ê 亂皂

自蘇聯講你是仝公媽彼日開始，Tartu 閣一斗食蒜仔吐蕗蕎兼消瘦落肉。

目今 ê Tartu 舊城面肉是愛沙尼亞閣一斗 kā 目睭掛斗概，看人物就愛 ê 露西亞請出去，kā 家己成做 Tatort 鑑識人員一肢跤一肢骨沓沓仔抾轉來鬥轉 ê 揣舊起舊並翻新 ê 家己。

果菜肉市場

涵空龜 m̄ 捌十八港跤行透透 ê 我行踏 Tartu 準做理解伊 ê 過去，我猶原無法度敨放我 tuì「Europa」ê 設定，德國清彩一个鄉鎮攏比伊「歐洲」。

另外，Tartu hōo 我感受交臺灣 bueh 相仝 ê 氣味，跟綴別人 ê 跤步生湠家己 ê 氣味。

這个氣味 tī 往過我 ē 講蛇無成蛇，鰡無成鰡，這久我 ē 換這个角度，目今 ê 德國 mā 是按呢生湠敢 m̄ 是？

目今 ê 日本 mā 是行過這个階段，敢 m̄ 是？

相趁相喊 ê 攝相

自臺灣開始討論語言平權，m̄ 捌斟酌繩愛沙尼亞語文意識問題 ê 我開始跟綴遮 ê 訊息認捌愛沙尼亞。

我 m̄ 知影遮 ê 訊息有偌 tsuē 是正確，總是這斗正式行踏愛沙尼亞，我感受著愛沙尼亞外交部長接受德國電視台訪問 ê 回答。

遮是愛沙尼亞 m̄ 是露西亞，世居 tī 愛沙尼亞 ê 露西亞族，準做𪜶猶原認定家己是露西亞人猶原愛學習愛沙尼亞語，遮是愛沙尼亞 m̄ 是露西亞。

一段聽起來真硬角 ê 話是 Wer ich bin 我是 Tsiâ 交 Who I am ê 清楚 ê hōo 愛國 tī 露西亞，生活踮愛沙尼亞 ê 露西亞民族知影，徛愛沙尼亞順愛沙尼亞規矩來生活。

這斗上北車日子愛沙尼亞我確確實實感受愛沙尼亞 ê 露西亞族交拉脫維亞 ê 露西亞人 ê 差別。

這段 m̄ 知底時 ê 訪問 mā 訪問蹛踮拉脫維亞 ê 露西亞族群，𪜶拒絕學習拉脫維亞語，𪜶 mā 無認同拉脫維亞這个國家，應當講伊 kā 拉脫維亞當做 Kaliningrad 加寧格勒，一个比加寧格勒閣較自由 ê 飛領地。

看這就知影 tsiâ 捌 tī 遮

我 m̄ 知影家己搪過幾个露西亞族，畢竟多數露西亞人 mā 是雙語使用者 --- 俄羅語交愛沙尼亞語。

總是，我深深感受波蘭柴杙露營主人家 ê 分張，頂懸彼三國，立陶宛較無問題，因為露西亞人少，愛沙尼亞政策硬角 hōo 露西亞人無地選擇，拉脫維亞 ê 露西亞人是 Troublemaker。

二斗拉脫維亞行跤花，我確實認同波蘭柴杙露營主人家分張 ê Troublemaker，拉脫維亞 ê 族群對立交我囡仔時無宛 2 體。

只不過我 m̄ 知影拉脫維亞 ê 露西亞人敢 mā 有幻影號的奇航 ê xx 新村遮 ê 區別閣區別，像 gún 這款 m̄ 捌蹛 xx 新村𫝛款是某仔軍人爸交日文讀比華文有 ê 番薯媽 ê 後代 ê 區別。

愛沙尼亞 ê 語言底時實施，我 m̄ 捌一个呼。

總是，這段放送 tī 烏克蘭戰爭進前 ê 電視訪問成做一面鏡，照出拉脫維亞政府無過房 ê 驚惶，kā 拉脫維亞語過房 hōo 當地露西亞族群。

烏克蘭戰爭開始，拉脫維亞政府宣佈 m̄ 管家甲已經落籍抑是想 bueh 落籍 tī 拉脫維亞露西亞人齊愛學習拉脫維亞語並通過語文認證考試。

這个政策 hōo 我想著第一斗搪著 ê 拉脫維亞露西亞人，伊想 bueh 交 gún-ê 停跤主人家冇談，總是伊搪著 ê 問題交我仝款 m̄ 是語文交流就 ē-tàng 解決 ê 問題，m̄ 知伊 ē 按怎選擇，轉去露西亞抑是桌頂拈柑 kā 新政策完成。

另外一隊這斗車日子搪著 ê 拉脫維亞露西亞人，我 kan-ta ē-tàng 講，蘇聯已經離開，無人要意你 ê 啄鼻。

紀念一位按挪威行路到保加利亞並 kā 伊畫做地圖 ê 德國人紀念碑

這个德國人 ê 名看過隨放風吹... buē 記得

2014年歐洲文化首都 Tartu, Eesti

露營區記錄交那行跤花那攝相

Nina ê 露營區設備 - 廚房、浴間、便所、客廳

露西亞 tī 波羅的海三國 m̄ 知敢是喙飽目睭枵，sóo-tí 除了海岸較有破壞建設，大部份 ê 角勢齊是大自然 ê 動物比人類 tsuē。

愛沙尼亞露營區自拉脫維亞柴杙城市一過境，逐个露營區我齊佮意，唯了人交人 ê 盤撋 hōo 我誠 buē 慣勢，特別是 50 歲以上 ê 人。

這个 buē 慣勢我理解是蘇聯警總猶原蹛 tī 𪜶 ê 心肝穎，m̄ 是𪜶歹鬥陣。

Nina 手人家 ê 手工藝

Nina ê 露營區是 gún 自一入境到愛沙尼亞露營到今，人 mā 已經離開首都 Tallinn 塔林上佮意 ê 一个露營區。

母語是露西亞語，愛沙尼亞語 mā 講甲若母語交淡薄仔英語 ê 主人家伊 ê 好禮交 buē 驚生份 ê 好鬥陣 hōo 我縛絚絚 ê 神經隨冗甲一踏入這个公眾空間隨沈入膨椅做塗肉林檎。

「我發見波羅的海露營地有 tsuē-tsuē 這款大眾空間」交主人家說多謝我那巡家私那 tuì 翁講。

「我知影你想啥」翁笑應。

「啥？」

「這是見本厝。」

翁仔誠懇睏做伙遐 tsuē 冬，果真知影牽手 teh 想啥「猶無 leh？」

「柴起 ê 厝較有法度保持燒熱。」

Gún 翁正經無烏白亂皂，彼暝跍踮這大眾空間，我 m̄ 捌捎外套來囊。

愛沙尼亞 ê 熱人無日鬚是寒人。

Nina ê 露營區正經是我搪過設備上蓋周至 ê 角勢，有微波爐、茶鈷、碗盤 hōo 貧惰搬來徙去 ê 我，只要出一个人就有法度完成糜飯兼洗碗箸，蓋讚！

食飯飽想 bueh 成做膨椅塗肉林檎 mā ē-tàng，不過無電視通捘 m̄-koh 你 ē-tàng 𫝻手機仔。

遮有設網路。

寫遮爾仔 tsuē 猶是家己行一逝 tsiah 有法度感受伊敢有適合你。

Nina ê 露營區資料。

露營區 ê 各項價數。

這个各項表示洗衫機交三溫暖設備齊是掠外算數。

Nina ê 對面是露西亞 hōo 從來 m̄ 捌感覺烏水溝遐爾仔遠 ê 我，雄雄起雞母皮，感謝大自然 ê 神奇交 tuì 咱番薯島 ê 疼痛。

Nina 交露西亞 m̄ 是海，是用泅 mā 有法度泅過來 ê 湖。

露西亞東正教堂 ê 徛黃斷枝

Nina 倚露西亞 mā 有 tsuē-tsuē 露西亞族群 hōo 我儉去一四界金金相佗落通看露西亞東正教堂交希臘東正教堂 ê 差別。

迷人 ê 阿菇。

阿菇是 Enigma hōo 我痴迷。

押尾原仔 愛講 Nina 是田庄名 m̄ 是主人家 ê 字名

➀ 蘇聯佮納粹德國 ê 毁約，推薦影戲 1944 1944鐵甲連

➁ 德語俗諺，好運交歹運