亂皂𥴊仔店 ⓂⒺⒾⓃⓀⒾⓄⓈⓀ

Tsuē-tsuē 時陣當你行踏你好玄甲資料就 m̄ 知影讀過幾仔回 ê 所在，你猶原會講遮無啥特別

起因伊無啥特別 ê 觀光景點，總是我無這个問題

因由是我 ê 任務是跟綴 GPS 就是 gún 翁 ê 跤步行跤花

曷伊是綴地圖駛車 mā 沿路綴有畫紅線就停跤成做觀光客，sóo-tí 遮个角勢 m̄ 是 gún 計劃 bueh 行踏 ê 所在

Mā 因為遮 ê 無 tī 計劃 ê 角勢成做整理相片佮記持 ê 歷史老師

特別是課本 m̄ 捌教過抑是1、2字就是全部 ê 準過無知

像這久，迵過整理記持 tsiah 發見家己行 tī 好玄 ê 歷史「蘇台德」

讀冊時，課本講伊是 hōo 德國、波蘭佮捷克攏爭議 ê 山區，m̄-koh 伊 ê 徛地大多數 tī 捷克

總是學校教 ê 智識就敢若咱 tuì 另外一地土地 ê 幻想，我 kan-ta 捌 Praha ê 美麗 m̄ 捌捷克 ê 地形

這个固定 ê 想法 mā 成做我後日行踏捷克 ê 蜈蜞釘 hōo 我 kan-ta ē 曉使用一个眼角來看捷克

捷克無山，捷克 kan-ta Bohemia，捷克 kan-ta Germanen ê 歷史...

頂年 Balkans 車日子需要經過捷克 tsiah 知影是按怎捷克 ê 寒人 ē 遐爾仔寒

起因 gún-ê 露營區 tī 山區，準做我一屑仔攏無感覺伊是山區 mā 因為 hōo 伊寒著呿呿嗽

彼个有爭議 ê 山區 tsiah 閣若圓仔 hōo 我捎出來烰，精差 gún 翁聽無我 ê「洋經幫」

總是，今年 ê 我 mā 聽無 gún 翁 ê 咱 tī Sudetenland 到我揣資料 tsiah 知影伊 teh 講啥物碗糕

華語 ê 翻譯按怎來無興趣研究，總是我清楚知影這久 bueh 記地名抑是人名攏儘量記原文佮原音

我 tuì Sudetenland ê 認捌猶原真少，少甲猶原捎無伊 tī 佗一搭

總是，當我揣資料記錄行踏 ê 角勢，我想著 tsuē 冬前 ê 電視訪問

彼段訪問 hōo 我想著這張，我認為伊無啥持別隨 kā 囥入去糞埽桶 ê 相片

彼日翁揣著 ē-tàng buaih 扣手續費 ê 銀行，hōo 日頭曝甲 kiōng-bueh 做人乾 ê 我綴伊行入去銀行覕日頭

總是我 m̄ 是 bueh 領錢 ê 人，自然就 bueh 徛 tī ATM 附近𤲍燒 m̄-koh 焐(ù)門屋(mn̂g-ak)降燒熱

一位先生行入去，看我焐 tī 門屋掠做我 mā bueh 領錢隨退出去門屋外口 hōo 日頭曝

我隨攑手表示我無 bueh 領錢，我只是來焐免錢 ê 枝仔冰，伊理解我 ê 14 微微仔笑 tìm 一下仔頭行入來等領錢

我 mā 因為這个動作發見這个角度，這个大埕遐爾仔大徛踮門屋 ê 我煞 kan-ta 看 ē 著遮 ê 畫面

有一種 m̄ 管你冊讀偌 tsuē，行過 ê 國家有偌 tsuē 心無曠闊 mā 是𫝛一位 ê 白汫無味

這久整理相片想著彼个故事，想著按祖先 tī 遮開墾到伊已經 bueh 5 百冬 ê 厝願意接受別人 ê 角度笑笑仔回答

「土地 buē 走，歷史佮我攏 ē 走，無一个人有權利講彼是咱一个人 ê」彼是經過偌 tsuē ê 角度 tsiah 得著 ê 平靜

Tshan-tshiūnn 這久 ê 我 mā-ē iōng 這个角度來愖「祖公仔產就按呢無去，你敢 buē 艱苦」 ê 訪問

彼凡勢是 uī-tio̍h 收視率 tsiah 按呢採訪，畢竟咱人攏是透過聲音、畫面 teh 記錄佮理解代誌像這久 ê 我

我認捌歐洲城市 ê 方法是，一个城市有幾个號名就大約仔知影伊 hőng 偌 tsuē 人綿精追求

像 Kadaň 有德語名 mā 有義大利名，總是通篇資料讀落來，義大利字 ê 名 m̄ 知影敢有受著十字軍 ê 影響

這我無確定，不過確定 ê 代誌是德國佮法國攏講遮是𪜶 ê Karl der Große tī 8 世紀就徛 tī 這个民族五彩 ê 地區

三位一體

蹛 tī 遮 ê 民族 mā 足頂真 teh 抵抗 bueh kā 𪜶同化 ê 人佮保存家己 ê 文化

𫝛時 mā 接受別人佮家己無相仝 ê 文化信仰，遮攏事後成做孔明 ê 推論

這有可能是 tī 1362 年 hōo 火食去 ê 修道院

讀無捷克語 ê 事後孔明 ê 推理

佮 Kadaň 城門

讀無捷克語 ê 事後孔明 ê 推理

Ē 講古 ê 電拹仔

這个電拹仔 ē 講 Kadaň ê 故事，m̄-koh kan-ta ē-tàng 聽捷克語一款

白色 ê 尖塔是市政廳

這个城市 tshan-tshiūnn 歐洲 tsuē-tsuē uī-tio̍h bueh 爭取自由 ê 角勢，攏行過三十年戰爭 ê 損蕩

Sòo-pái hōo 我真好玄現此時 ê 建築敢是戰爭進前 ê 生張

我問蜂，蜂講我 mā m̄ 知

m̄-koh 伊知影遮 ê 人來來去去攏佮伊𫝛款無一个是永世留踮這个所在

比論講奧匈帝國 ê 軍隊閣較大龎 mā-ē 綴風徙位

奧匈帝國軍隊 tī 遮駐軍到第一次世界大戰結束

歷史佮藝術攏複雜 m̄ 是我這个小小 ê 老百姓 ē-tàng 理解到 tsiâu-tsn̂g

按呢就記錄到遮

路裡搪著 ê 看板

店無開門無機會通行踏伊敢正經是 teh 賣韓國茶，雖罔 gún m̄ 知茶(CAJ) ê 頂懸敢是捷克語 ê 韓國

行踏歐洲除了愛看板，我 mā 真愛看壁頂 ê 時鐘

這回除了看著有歲數原仔媠媠閣準時 ê 時鐘 mā tī 遮看著 hōo 我真佮意 ê 看板

不過，我上佮意是這个玻璃罐仔，轉來德國我 mā bueh 閹雞趁鳯飛綴 leh 做