亂皂𥴊仔店 ⓂⒺⒾⓃⓀⒾⓄⓈⓀ

8 ~ 13 世紀 ê Kadaň 就是一个民族大融合 ê 角勢。

805 法蘭克國王 Karl der Große/Charlemagne 試圖(tshì-tôo)征服波希米亞地區，有一搭徛位 tī Eger 河 ê 拉斯夫部落長期抵抗法蘭克國王 ê 侵入，以目今 ê 地理推斷應當就是 Kadaň。

Kadaň ê 建城推斷合該然是 11 世紀尾。1186.4.23 波希米亞公爵 Friedrich kā Kadaň 送 hōo 醫院(i-īnn)騎士團。幾十外冬後，大約仔 tī 1260 Kadaň hōo 波希米亞王國征服，成做波希米亞王國 ê 皇家自由市。Tī 這段期間 Kadaň 起造皇家城堡、教堂，1362 一場火災 kā 遮 ê 建築燒做烌。火紮走 ê 一切，押尾有夠修復轉來，並跟綴年閣變化 è 防禦功能，𫝛時波希米亞國王再次楦闊 Kadaň ê 城市權利，像葡萄園、年貨市場遮 ê 權利 hōo 貿易自本就交易 ê Kadaň 愈交易。

1421 胡斯戰爭 Kadaň 成做胡斯信徙掌管 ê 城市，並掌管到胡斯戰爭結束。紲落來 ê 日子 tī 宗教和談之間渡過到三十年戰爭(1618 ~ 1648)規个繁華成做一場空，然後重新起造，1811 閣循環一斗城市大火，規个城市又按交易成做斷籬倒壁。1848 人民之春革命之後，Kadaň 成做地區中心，並成做重要 ê 研究中心，𫝛時 mā 是奧匈帝國 tī 波希米亞重要 ê 軍事要地。

1918 歐戰結束捷克斯洛划克成立 Kadaň 成做捷克斯洛划克 ê 一个城市，釘根踮遮 ê 德國人無同意，1919.3.4 伊展現決心加入奧地利，捷克斯洛划克出兵鎮壓這場運動，tī 這陣鎮壓有 25 个人死亡，tsuē-tsuē 人受傷。

1938 ê 慕尼黑協定 Kadaň hōo 列強劃入德國第三帝國蘇台德地區。當地 ê 捷克人 hőng 趕走，猶太人送去集中營。1945 德國第三帝國戰敗，遮 ê 德國人全數離開。

白色尖塔是市政廳

Kadaň 是 gún 翁順上北波蘭路線停跤探訪 ê 城市，伊 tuì 這个城市 ê 介紹 kan-ta 這句經過「遮較早是德國，而且幾仔百冬。」

這逝旅途進前我 m̄ 捌 tuì 伊分張 ê「德國」有特別想法， 自步頻 hōo 雷公摃著認為家己愛斟酌行一逝記錄踮遮行尞 ê 跤跡，我 tuì 分張 ê 德國開始敏感「佗一个德國」我問。

「就是德國」囡仔時 tī 葡萄牙佮西班牙過日子 ê 伊，德國歷史學無一半，西班牙歷史學比德國歷史精，我閣綿豉問落去，只是加了喙瀾，煞煞去，放伊過，家己斟酌繩建築。

「我感覺這个德國合該然是奧地利」當我巡著這座教堂，我隨 tuì gún 翁講。

「德國 mā 有這款建築」伊講。

「你講 ê 角勢𪜶 m̄ 是一開始就倚恁德國，𪜶徛奧地利」我講。

我 ê 德國歷史低路，m̄-koh 我至少 kā 20 集 ê Die Deutschen 看透透。

這座 hōo 我推斷是奧地利 ê「德國」 tī 我揣資料 ê 這久得著正確答案，這个德國 m̄ 是 gún 翁兜 ê 德國是奧地利 ê 德國。不過我個人是按呢認為，伊 tuì 這个城市有所認捌，只不過伊搬戲假 m̄ 捌是佗一个德國。

第一斗交 gún 翁做陣行踏捷克，tī 奧地利接捷克 ê 山區我雄雄想著「蘇台德」這个名，我問伊這搭敢是有爭議 ê 地區。彼陣 ê 伊搬戲假聽無我 teh 講啥，這久 ê 伊法度繼續假做 m̄ 捌我講 ê 蘇台德，畢竟我無閣使用外國怪腔講「Su-thai-de」這久 ê 我使用正確講法 Sudetenland hōo 伊僫裝聽無我 teh 講啥。

若魔神仔 hōo gún 翁無愛講出喙 ê 蘇台德是啥物概念，歷史低路人捎無一个摠，總是按學生時代殘留 ê 記持，伊是有爭議 ê 山區地區，這个爭議涵括 ê 國家有三个：德國、波蘭、捷克，不過多數地區徛位 tī 捷克。

久年前按奧地利接捷克 ê 彼段路，伊是非常明顯 ê 山區地形，這久一路無感覺 tī 山區卻 tī 整理行尞跤跡發現 Kadaň 是歷史課本 ê 蘇台德地區 hōo 我 tuì 這張本底 bueh 刣掉 ê 相片產生興趣。

我是手抱蛇 ê 女子，我總算理解課本寫甲短短 ê 蘇台德是啥物生張，gún 翁是 hōo 蛇纏牢 ê 老人，德國第三帝國 ê 一切 tshan-tshiūnn 蛇身 kā 伊 ê 頷頸纏牢牢 hōo 伊講 buē 出話。

是講這久我又閣成做貓，華語 ê 蘇台德是按佗落來 ê 發音，我請教英文維基，英文 mā 寫 Sudetenland。嗯，放伊自由，免研究。

整理相片揣資料做記錄，見著這張相片我想著 tsuē 冬前 ê 電視訪問，交人 ê 眼界 buē 因為你 ê 學問懸過天，你認捌 ê 世界就 buē 狹甲若這个角度。

「我 ê 祖先 tī 捷克開墾倚 bueh 5 百冬，一場世局變化，gún 閣較 m̄ 甘願 mā 無法度改變，有萬年土地，無百人主這件代誌，土地 buē 走，歷史佮我攏 ē 成做坱埃，咱無一个人有權利講彼是咱 ê 物」我 m̄ 知影這位囡仔時 tī 捷克是阿舍 ê 受訪者是經過偌 tsuē 角度 tsiah 得著這款 ê 平靜，畢竟咱小小 ê 島猶有 tsuē-tsuē tuì 向時繁華 m̄ 甘放手 ê 世襲人。

這久 ê 我 mā 想著地震後，有人問阿母講「厝無去，嫁粧 ê 金鍊仔、手環齊攏無地抾，敢 buē 艱苦？」

阿母回答「艱苦 mā 無較縒，敢 m̄ 是。」

我 ê 阿母 m̄ 捌新世局 ê 文字 m̄-koh 伊知影順世局改變伊 ê 人生，楦闊伊 ê 世界 m̄ 是怨嘆無人栽培。

我 ê 歐洲歷史低路，不過我 tuì 歐洲城市 ê 重要性有一个屬於家己認捌 ê 方法，彼就是城市名稱。一个城市換過 tsuē-tsuē 語言，就大約仔臆 ē 出伊 ê 重要性，像 Kadaň 有德國名、義大利名交無記錄 tī 部落名稱，表示目今看起來無啥特殊 ê Kadaň 是歷史跤跡重要 ê 角勢。 

三位一體

釘根踮遮 ê 民族自法蘭克國王來遮我來、我看、我 bueh 征服，下性命交伊抵抗。面對宗教 ê 矛盾勇敢徛出來對抗，面對少數者同化家己 ê 語言佮文化，下性命保存，遮 ê 歷史跤跡成做日後 ê 民族融合 ê 底蒂。

讀無捷克語 ê 推薦：這个凡勢是 tī 1362 年 hōo 火食去 ê 修道院

排除大航海造成 ê 民族融合，以無倚海 ê 捷克，目今 ê 社會形勢來感受，我個人認為伊 tuì 無仝民族 ê 融合度懸過德國。這是我個人行踏捷克 ê 感受。

成做一个交捷克人完全無仝面肉 ê 人，我 m̄ 捌搪過捷克人 tuì 我金金相，特別是露營區。不過𪜶攏主動交我講捷克語，我想𪜶凡勢掠我做越南裔捷克人。這个現象 tī 人口無到 500 人 ê 田庄 Horní Dubenky mā 相𫝛。

讀無捷克語 ê 推薦：這个凡勢是 tī 1362 年 hōo 火食去 ê 城門

Ē 講古，不過 kan-ta 捷克語 ê 電拹仔

行踏捷克，搪著德國人我上捷聽𪜶講 ê 話交第一斗邀請 gún 翁交我做陣行踏捷克所講 ê 話一模一樣「我掠做捷克無歷史閣危險，車停無一秒賰車身，想 buē 到伊有遮爾仔豐沛 ê 歷史，值得一來再來探訪。」

蘇聯拄解體，北約國家人民自助旅行到遮，捷發生規台車無去抑是輪仔無見四輪，這我會使得理解，總是捷克 buē 永遠停跤 tī 蘇聯年代 tshan-tshiūnn 我囡仔時三隻手猶原厚甲若蠓，目今 ê 台灣是人人呵咾，物件 buē 記得挈，隔轉工猶原規欉好好在原位。

「心無闊，世界自然白汫無素莫怪別人」這是向時捷 tuì gún 翁講 ê 話，當伊成做茶鈷呻出門行跤花較行 mā 彼幾个國家。

路裡搪著 ê 看板

捷克語融合 tsuē-tsuē 外來語，車 Auto 順德語來，這个介紹賣韓國茶 ê CAJ 我個人推斷凡勢按土耳其語來，土耳其語又閣按華語 ê「茶」轉譯。

好成硩死一隻貓想 bueh 入店探訪，主人家安息(歇睏)去。

行踏歐洲除了愛看板，我 mā 真愛看壁頂 ê 時鐘想像伊看過偌 tsuē 悲歡離合，然後翻頭問家己，面對悲歡離合我敢有才調遮爾仔恬靜？

我猶 teh 學習。

Hōo 人一看就知影餐廳主力商碞是啥物 ê 看板。

真佮意《青瓦厝 ê 安妮》使用 ê 照明，m̄-koh 一直捎無摠通閹雞做鳯飛生出一模模一樣樣 ê 罐仔燈。踮 Kadaň 我揣著靈感。