亂皂𥴊仔店 ⓂⒺⒾⓃⓀⒾⓄⓈⓀ

倚首都 Tallinn 塔林128 公里，倚國內第一間大學 Tartu 176公里，愛沙(sa)尼亞第四大城市 Pärnu 派努爾是 Orden 德頓騎士團 uī-tio̍h bueh 有一个 buē 結冰 ê 海港城市 tī 1251 年建立 ê 城市。

斯當時 Orden kā 伊號做 Pernau。

歷史是一面鏡 mā 是雙生仔，起因 uī-tio̍h 一个 buē 結冰 ê 海港成做天霸王 ê 事件 tī 咱 ê 年間 mā teh 發生。

只是，地區暫時 m̄ 是這个 德國離開，波蘭來，波蘭-立陶宛聯盟離開，瑞典來，瑞典離開，露西亞來。

歷史 ê 獅仔喙一直攏 tī leh 愛成做一个無骨塗肉林檎 ê 向望 mā 一直 tī-leh，只是，伊會換地區會換方式 tshan-tshiūnn 魚𫝛款。

Orden 年閣 ê 魚應當 m̄ 捌想過有一日𪜶 ê 腹肚所貯 ê 物食 m̄ 是魚蝦等等是 hōo 𪜶食了胃滯滯 buē 消化 ê 塑膠。

另外，向時是驚日頭曝所以總是包甲若肉粽，目今是準做日頭披烏紗 mā bueh 貼兩塊布或是披一領巾仔 mā bueh 䖙(thenn) tī 遐 hōo 日頭看。

倚 bueh 800 冬前 ê Orden 佮其他 uī-tio̍h 這个 buē 結冰 ê Hansestadt 漢薩同盟，戰甲 m̄ 是我活就是你死 ê 先人，𪜶 m̄ 知會有啥物感想？

先人已做仙 buē 曉觀落陰 ê 我 m̄ 知愛按怎請教，總是看著往過 ê 交易(ka-ia̍h)猶原規欉好好，真 uī 這个地區 ê 朋友佮動物歡喜。

Pärnu 按商業要鎮轉型做觀光勝地是 tī 1838 年，自第一間浴場 tī 遮開(khai)業，伊著沓沓仔成做 tsuē-tsuē 人佮意 ê 浸磺水佮耍水 ê 渡假勝地。

當地出名人 --- 建築設計師

Pärnu 是 gún tī 愛沙尼亞上落尾一站，gún 來遮 m̄ 是專工 bueh 來浸磺水抑是成做卵包，是因為 gún 無 bueh 閣一擺行踏立陶宛首都 Vilnius 維爾紐斯 gún 就上北走平洋落南行海線。

落南行海線本底就 tī gún-ê 計劃內底，m̄-koh gún 並無計劃行踏這个往過 ê Hansestadt 目今 ê 迷人沙埔。

市中心

總是人生世事永遠攏有門扇枋鬥 buē 峇 ê 所在，出門進前 gún 已經知影波羅的海地區交通路段上好 ê 所在應當 kan-na tī 德國佮波蘭，我 ê 意思是 m̄ 管是縣道或是鄉道等等，m̄-koh gún 猶原用家己 ê 料想去愖別人兜 ê 一切。

一逝路上北猶 buē 到 Cēsis 采西斯，gún 就隨決定按算行踏 ê 城市齊 bueh 走國道莫閣走省道抑是縣道。

鐵馬路線 ê 亂皂

總是就算按呢 ê 決心猶原搪著無打馬膠 ê 碎石仔塗肉國道....坱埃坱甲叫 m̄ 敢。

Pärnu 就是這个因由成做 gún 這逝千算萬算，m̄ 值風飛沙食甲吐改變路線 ê 城市。

波羅的海三國縣道 m̄ 捌親身行一逝真正 ē 掠伊交高速公路相𫝛 ê 四序，不過猶原愛講愛沙尼亞 ê 縣道是波羅的海三國上 tsiâu-tsn̂g mā 建設甲上好 ê 一國。

鐵馬路線 ê 亂皂

凡勢 tuì 水驚惶，sóo-tí 我 tuì 海沙埔 ê 興趣 m̄ 捌成做荷蘭人 ê 骨力 --- 填海造路。

這个 uī-tio̍h 落南 buaih 閣風飛沙食甲吐 ê 道路，伊 ê 海沙埔 hōo 我想著人 tī Belau 帛琉(Pi̍k-liû)踮沬 ê 自在，隨 kā 按露營區租來 ê 鐵馬𫞼好勢，紲落來跟綴海風 ê 招呼勻勻仔行向無鹹無纖 ê 海水。不過，這段路押尾猶是成做我無法度完成 ê 天堂路。

聽人講，年歲一冬一冬添，耳空鬼仔 mā 一冬一冬愈來愈狡怪。帛琉 ê 海洋 hōo 驚水 ê 我踮遐鑽水沬鑽甲無想 bueh 上岸，Pärnu ê 海沙埔媠甲 hōo 我見無著洘秫秫 ê 人潮，總是彼若 Le Cinquième Élément 第五元素 Diva ê 音樂 hōo 我放棄成做卵包，隨斡頭行向鐵馬繼續挵險。

鐵馬路線 ê 亂皂

Pärnu 是愛沙尼亞重要 ê 浴場，鐵馬觀光路線大多數 mā 是按 Pärnu 河接浴場。

臨時臨曜決定行踏 Pärnu 主要是 buaih 閣 kā 風飛沙當做糜飯來食，落南就愛經過拉脫維亞首都 Rīga 里加。

這逝車日子上北停跤拉脫維亞發見伊 ê 物價 m̄ 是 kan-ta tī 首都 Rīga 較懸價，是全拉脫維亞物價齊懸價，另外伊 ê 食食選擇 mā 無愛沙尼亞交立陶宛 ê 百樣，m̄ 管佗一个超市齊𫝛款就決定踮遮囤貨到拉脫維亞。

按愛沙尼亞最後一个柴杙城市駛入拉脫維亞揣菜蔬，gún 翁仔姐做綴那看價數那講，咱 kā 乾貨一斗踮愛沙尼亞款款 tsiâu 是著頭甲無見頭 ê 正確。 

拉脫維亞是唯一 hōo gún tī Maxima 見著虎蝦隨 Say Goodbye ê 角勢。

建城 tī 1260 ~ 1270 ê Haapsalu 哈普薩盧 tī 2 戰進前是愛沙尼亞瑞典人生活中心 mā 是愛沙尼亞出名 ê 關仔嶺湳塗療養地。

Gún 來遮無 uī-tio̍h 湳塗療養 m̄-koh 事先預習(ī-si̍p)明年 ê 瑞典光景。

恁人類是 bueh 欺負我到底時！！！

四角磚 kiōng-bueh 踏無一角著 ê 冰熊(Eisbär)。