Cēsis 采西斯新城堡佮無開放 ê 主角 Ordensburg 條頓城堡遺址(uî-tsí)
Cēsis 采西斯(tshái-se-su)徛位拉脫維亞北爿，是拉脫維亞上大國家公園 Gauja 高亞國家公園北爿 ê 出口 mā 是南北二路前往首都 Rīga ê 重要角勢。
14 世紀德國 Orden 條頓(Tiâu-tùn)騎士團猶未來相借喙進前，Cēsis 就是一搭鬧熱並交易 ê 所在，特別是 Cēsis ê 平地 mā 開始一磚一磚起造 Backsteingotik 紅磚哥德式 ê St.-Johannis-Kirche 聖約翰教堂。
St.-Johannis-Kirche 聖約翰教堂起造年間 1281 ~ 1284 之間，伊是 Cēsis 觀光重點之一，總是教堂交三堡 --- 城堡、碉堡、堡寨攏看甲飫喙 ê gún 就無特別拆票參觀加速南北二路貿易市草 ê 聖約翰教堂。
Hallo, Cēsis!
M̄ 捌字看告示按 Hallo 推測 Cēsis 交 Hanse 漢薩有相干， 徛五步距離聽 mā 拄好到位 ê 緣投牧師開破 Hallo，果真是仝系統無仝文化。
Gún 無報名參加導覽，總是德國豬(Schwein gehabt，好字運)有 kā gún 綴牢牢 hōo m̄ 先做功課 kan-ta 按算 m̄ 捌字看告示 kā 循禮 ê gún tī 條頓城堡有機會跟綴美國團聽緣投牧師說歷史。
Cēsis 14 世紀加入 Hanse 漢薩，設立波羅的海年歲上老 ê 激酒廠，伊 mā 是斯當時少數得著德頓騎士團 tī Livland 利沃尼亞(lī-ak-nî-a)授權通鑄錢 ê 城市。
斯當時 ê Livland 地區 kan-ta Rīga 里加, Reval(目今 ê Tallinn 塔林 thah-lîm), Dorpat(目今 ê Tartu 塔爾圖 thah-nī-tôo)有這个榮耀。
舊城起 tī 13 世紀 ê 聖 Johannis 教堂外 ê 雕像
1524 第一場路德教會 tī 遮舉辦，1561 面對愈來愈大龐 ê 露西亞 Cēsis 交其他 ê 利亞尼亞城市齊倚傍波蘭國王 Sigismund II August，波蘭國王無因為𪜶 ê 倚傍要求伊抽換神魂成做波蘭人，波蘭國王 hōo 遮 ê 城市維持自身信仰自由，循德國律法運作並任命當地人做扞市者。
總是，政治交龍鳳生活相𫝛，齊是媒人保入房，無保一世人，波蘭國王 August 二世轉去塗州賣鴨卵了後，伊 ê 繼任者 Stephan Báthory 國王拒絕這个政策並要求利沃尼亞人齊愛天主化。
1582 年，伊 tī 利沃尼亞地區成立天主教 Wenden 教區。1590 Cēsis 第一廠激酒廠 mā 成立。1598 遮成做波蘭 - 立陶宛聯邦 ê 首都。
舊城
1621 瑞典國王 mā 按伊 ê 東海來到這个東海。
1671 佮 1748 繁華跟綴火舌成做一場空。
19 世紀因為工業革命帶來 ê 火車建設，Cēsis 成做 Rīga 到 Pskow 普斯科夫發展 ê 受益者。
Cēsis tuì 拉脫維亞交愛沙尼亞 mā 是重要 ê 城市。
拉脫維亞人交愛沙尼亞人 tī 1919.6月仝心和齊 tī Cēsis kā 比𪜶強盛 ê 德國軍隊送轉去德國取得獨立權。
故事聽到遮擔頭看這場戰役 ê 紀念碑，頭殼 ê 海馬泅去蘇聯年間愛沙尼亞人，拉脫維亞人，立陶宛人 uī-tio̍h 爭取獨立，一人接一人徛踮主要公路恬靜抗爭 ê 畫面 mā 想著 tī 這段話；
Gún-ê 語言無相仝，文化 mā 有差異，總是 gún 攏清楚知影，gún 三國無成做兄弟仝心，烏塗 buē 變黃金。
臺灣 ê 語言交文化已經行到無一个人無相𫝛，咱卻一直無法度仝心 ê 總愛放尿攪沙來堆塗。
城堡外 ê 露西亞東正教教堂
Cēsis 舊城目今光映映 ê 面肉是 2007 年 uī-tio̍h 建城 800 冬特別翻新。
伊目前上主要 ê 觀光資源 m̄ 是舊城，是 Gauja ê 大自然交伊若捊仔田 ê 地理面肉。
向時 ê 歷史，像條頓堡寨 tī 北方戰爭結束就放伊斷籬倒壁到今，目今看著 ê 城堡紅厝瓦彼棟交花園是商人 tī 1775 年順舊堡寨生湠 ê 新面肉。
這棟新城堡現此時 mā 是博物館。
Cēsis 是 gún 這逝上北波羅的海三國拉脫維亞 ê 第一站，伊 hōo 我感覺比首都 Rīga 閣較有 14
。
Valmiera/瓦爾米耶拉博物館
順拉脫維亞傳統音樂勻勻仔繼續上北到倚首都 Rīga 100 公里，倚愛沙尼亞 50 公里 mā 倚 Gauja 高亞國家公園 ê 瓦爾米耶拉(uá-nī-bí-iâ-la)車日子。
Valmiera 是 Livländische Konföderation 利沃尼亞同盟(1228 ~ 1560)重要歷史區域 Vidzeme 維澤梅(uî-ti̍k-muî)行政區第一大城。
Hanzas Pilseta/Hansestadt 漢薩城市
Valmiera 交世界各角勢相𫝛 tī 人類猶未出現希臘文化、羅馬文化，Valmiera 已經有人類 ê 跤跡，跟綴人類行入歷史是按 Latgale 拉特加爾(la-ti̍k-ka-nī)開始。
1224 Valmiera 成做 Schwertbrüderorden 寶劍兄弟騎士團扞權地，伊 ê 城市名稱第一斗出現 tī 白紙烏字是 1323 年，斯當時 ê 伊號做 Stadt Woldemars，Woldemars 市按口說成做文字進前已經出現 40 冬，彼當陣扞權 ê Wilhelm von Schauenburg 就順高亞河岸起 Wolmar 堡寨交 heiligen Simeon 聖西蒙天主教教堂。14 ~ 16 世紀成做 Hanzas Pilseta。
Gauja 高亞河
1525.6 月 Wolmar 舉行州議會並制定土地管理條例，身為 Herzogtum Livland 利沃尼亞公國一部份 ê Valmiera tī 1566 ~ 1622 劃入 Großfürstentum Litauen 立陶宛大公園交 Polen-Litauen 波蘭 - 立陶宛聯邦。
1622 瑞典人按𪜶 ê 東海來到拉脫維亞 ê 東海並征服拉脫維亞北爿領土，Valmiera mā 成做 Graf (Greve) Axel Gustafsson Oxenstierna af Södermöre 伯爵(pik-tsiok)私人財產。紲落來 ê 跤跡是瘟疫交戰爭。
1700 ~ 1721 露西亞交瑞典 ê 北方霸主爭霸權 alias Großer Nordischer Krieg 大北方戰爭，徛位北方交獅豹𫝛款共享東海 ê Wolmar 交 2024 ê 黎巴嫩𫝛款 tī 1702 成做斷籬倒壁 ê 角勢。
成做獅豹想 bueh 食入喙 ê 食物，成做露西亞 Gouvernement Livland 利沃尼亞政府 ê 一部份，伊保持一段久長 ê 平和。
1738 Valmiera 成做 Herrnhuter Brüdergemeine 摩拉維亞兄弟教會 ê 起始社區，並 tī 遮設立神學院。
接紲 ê 年閣變化，1865 起造第一个木橋，1899 鐵路通車，Valmiera 行入工業化年閣，並按 Gauja 河岸繼續生湠新 ê 社區。
歐戰(一戰)進前，遮有一間師範學院，女子寄宿學校交商業學校。
一戰結束，遮按露西亞脫離成做拉脫維亞共和國 ê 領地。
按歷史城市行向二戰，歷史花欉豐沛 ê Valmiera 交德國 Köln 相仝，百外冬 ê 歷史厝宅交街路跟綴人類 ê 干戈相刣成做火烌，唯獨神 ê 徛家 Gotik 哥德式 Simeonskirche 西蒙教堂交人類 ê 自私相閃身。
Smiltene 斯米爾泰內
Gún 這逝 ê Latvijas 路線齊按愛沙尼亞規劃，停跤 ê 城市 mā 齊按露營區生湠，徛愛沙尼亞 45 公里 ê Smiltene 斯米爾泰內就是其中一个。
特別 uī 遊客設立 ê 拍卡區
Smiltene ê 歷史交 Valmiera 相𫝛齊按 Latgale 拉特加爾(la-ti̍k-ka-nī)開始，不過伊是按 Rīga 主教 tī 遮生湠伊 ê 主教城堡(Burg Smilten)生湠。
這座起造 tī 1359 年屬里加主教個人城堡 ê Burg Smilten 斯米爾泰內城堡 tī 1560 hōo 露西亞軍隊 kā 伊毁甲涼傘雖破，柴骨原在後，順無仝 ê 領主波蘭、瑞典重新翻新到 1700 大北方戰爭 ê 1702 年正式成做斷籬倒壁到今。
Smiltene mā 按 1721 成做露西亞領土一部份到 1918 年。
甜路館
Smiltene ê 歷史交 Valmiera bueh 相𫝛，總是伊無 Valmiera ê 好運成做 Hanzas Pilseta hōo 伊有豐沛 ê 街路光景花欉吸人烏目仁，不過伊承先祖先顧腹肚 tsiah 顧佛祖 ê 傳統，成做引𤆬遊客探索伊 ê 歷史上緊 mā 上好理解 ê 方式。
「有 Orden 就有 Brezel」我向車頭那划那指那講。
無閒 OpenStreetMap ê gún 翁頭擔都無擔隨應「遮徛露西亞。」
無興交伊比賽 Tsiâ tsiah 是𫞼諍王 ê 我恬靜坐踮車頭內等伊完成伊 ê 作品，步頻想著這个空間 tshan-tshiūnn 猶未成做百貨公司交太魯閣打擊場臺中火車頭 ê 後站。
我 ê 人生短短無到五十冬，我行過 ê 光景 mā 交 Burg Smilten 相𫝛跟綴無仝 ê 政府成做無仝 ê 面肉。
1912 ~ 1970 遮有鐵支路迵 Valmiera，目今 ê 火車站成做無人要意 ê 廢所，這个城市 ê 人出出入入 m̄ 是倚靠公車就是自家駕家。
這个變化 mā hōo 我想著舊厝，按我囡仔時有通坐公車到 gún 崁頂，行到公車 kan-ta bueh 停車 tī 市仔到 bueh 坐公車愛請厝內人載到後一个大庄 ê 變化。
人人身上都是一個時代，這句話正港規欉好好 ê 無剉(錯)。
行踏 Smiltene 我 ê 掠肥食瘦人生 mā 已經收攤，總是蹛 tī 神魂內底 ê 大箍查某囡仔猶原 m̄ 捌離開 hōo 我成做若乞食看窗止枵。
「準做這久猶原大龐，咱 mā kan-ta 食這逝食」翁按窗仔開始點菜那講。
「著呢，我呔無想著這點」喙瀾隨承轉來喙空，斡頭 tuì 神魂內底 ê 大箍查某囡仔告別，門，大大典典 kā 捒開，快樂享受這出 hōo 目睭仁 kan-na 看 ē 著法國交美國 ê 人剾洗 ê「Blini」，好食矣！！！
Daugavpils 陶格夫匹爾斯露西亞東正教堂 Борисоглебский собор(Ss. Boris and Gleb Cathedral, Daugavpils)
徛位 Daugava 道加瓦(tō-ka-uá)河，倚首都 Rīga 230公里 ê Daugavpils 陶格夫匹爾斯(Tô-ki̍k-hu-phit-nī-su)是拉脫維亞第二大城，mā 是 Latgale 拉特加爾(la-ti̍k-ka-nī) ê 首都，不過自 2009 年伊已經按這个徛位卸任。
目今 ê 伊 mā 是露西亞人徛位踮拉脫維亞上主要 ê 城市，露西亞人加伊 ê 隔壁兄弟白俄羅斯人踮遮佔 bueh 7 成，踮遮免驚揣無露西亞食物 mā 免驚無地學露西亞語。
Daugavpils mā 是引𤆬我認捌，烏克蘭甜路敆我喙斗敆甲峇峇峇 ê 城市。
拉脫維亞第二大城 Daugavpils 露西亞東正教堂
1224 利沃尼亞條頓騎士來遮扞權，1275 kā 伊按口說成做白紙烏字並起造利沃尼亞堡寨，並生湠城市面肉。
1277 hōo 立陶宛軍隊圍城一月日，Daugavpils 按本底 ê 商業堡寨行向十分 ê 軍事堡寨，特別是 14 世紀 ê Iwan III. (Russland) 伊凡三世事件 hōo 伊按九分商業十分軍事行向一百分 ê 軍事重地。
Uī-tio̍h 爭取戰爭資金，利沃尼亞條頓騎士 tī 1558 年 kā 斯當時號做 Dünaburg ê Daugavpils 抵押 hōo 波蘭立陶宛聯邦。Dünaburg 成做抵押品 ê 19 冬，1577 伊猶原 hōo 伊凡三世征服，成做斷籬倒壁。不過𫝛時，伊凡三世 mā 順家己 ê 意志踮遮起造長 19 公里 ê 碉堡。
1582 露西亞人離開，波蘭國王 Stephan Báthory 按 Magdeburger 律法賜 hōo Daugavpils Magdeburger Stadtrecht 城市權，遮又閣恢復向時 ê 光映映交交易。
Daugavpils 是大北方戰爭少數 m̄ 捌 hōo 瑞典扞權 ê 城市。不過，伊猶原無法度閃避露西亞想 bueh 倚近 ê 野心。1656 露西亞交波蘭戰爭，1667 取得 Daugavpils ê 扞權權利。
目今 ê Daugavpils 舊城區是 1810 面對法國拿破崙 ê 壓力生湠 ê 城市面肉。1853 Daugavpils mā 跟綴年閣變化行入工業化城市。
1861 箍絡制度行入歷史，Daugavpils 成做追求新生活 ê 人上主要 ê 城市。
1919 ~ 1921 波蘇戰爭，拉脫維亞人交波蘭人做陣 kā 蘇聯軍隊趕出 Daugavpils，1921 Daugavpils 成做拉脫維亞領土 ê 一部份。
1940 uī-tio̍h 對抗德國第三帝國踏入這片土地 ê 蘇聯紅軍，一直停跤到蘇聯解體為止。
這逝上北波羅的海三國，Daugavpils 無 tī gún ê 按算，伊是 gún 路過步頻䀐著若金含厝 ê Борисоглебский собор(Ss. Boris and Gleb Cathedral, Daugavpils)教堂隨斡頭停跤 ê 城市。
Gún 停跤 ê 時陣教堂 mā 無方便外人進出，gún 就斡頭行向另外一个 mā 是歷史建築 ê 露西亞東正教堂，不過修女 m̄ 允准 gún 參觀，因為 gún 非教徒，鼻仔摸摸 leh 斡頭轉去停車位見著金含糖教堂已經無悲傷氣氛，gún kā 頭按內底看，工作人員以俄羅語請 gún 入堂參觀並指示我愛遵照東正教徒穿插入教堂。
順工作人員 ê 指示成做東正教徒裝扮行入教堂，我 tuì gún 翁講「教堂應當是起來 hőng 親近 m̄ 是隔離。」
Rūķīši 矮仔精靈露營地
拉脫維亞 m̄ 是 gún 這逝上北車日子上主要 ê 停跤點，sóo-tí 行踏 ê 城市鄉鎮齊是順愛沙尼亞路線生湠 ê 露營區。
這个徛位 tī Salaspils novads 薩拉斯皮爾斯 ê 露營區交 Valmiera 是這逝拉脫維亞露營地我上佮意 ê 兩搭。
Rūķīši 矮仔精靈露營地
這搭露營區 mā 因為語言 buē 通交 gún 翁 kā 請教來 ê 需求按豬母牽去牛墟 hōo 我險險得失著主人家，總是主人家交我攏知影遮 ê 無細膩有語言 ê 山崙，只不過 m̄ 知愛按怎盤山過嶺。
總是，辦法是人想出來，路 mā 是順動物抑是人 ê 跤跡行出來。
我押尾猶原按當地人身軀發見按怎解決無浴間，無廚房 ê 問題。
Rūķīši 矮仔精靈露營地
人主人家清清楚楚手指鎖匙掛 tī 柴厝門邊，gún 翁一直要求我行入彼免用跤頭趺斟 mā 知影是禁區 ê 餐廳。
總是 tī 我猶未揣著解決方式進前，需要傱便所猶原愛行入禁區.....
寫著這件代誌，真正感覺有心交 buē 比較語言懸低比 ē 曉講100 種語言閣較重要。
Rūķīši 矮仔精靈露營地
這个露營區無網路，m̄-koh 廚房交浴間齊整齊閣利便，是想 bueh 成做植物進行光合作用上四序 ê 角勢。
這个露營區出入款菜 mā 誠利便，準做伊看起來 kiōng-bueh 廢村仝款。
動物比人 tsuē.....踮遮猶原免驚無物通食。
Rūķīši 矮仔精靈露營地
Gún 因為無法度清楚節上北 ê 時間隨 kā 臨時臨曜生湠 ê 想法擲一邊，並 tuì 伊講 hōo 咱期待再相會，若是鉛粉有掖到額。
是，gún 本底想 bueh 踮遮繼續停跤一暝，總是一想著無順 Rīga 路線上北，gún 肯定無法度 tī 三月日內底完成 gún-ê 波羅的海三國車日子。
繼續上北搪著 ê 亂皂
本底掠做 2023 車日子錄 mā 齊翻新，捊愛沙尼亞 tsiah 發見，拉脫維亞一篇攏無翻新。
這正經是，時間 buē 倒勼，記持 ê 倒退。
感謝 Blog hōo 我這个機會順拉脫維亞 ê 跤跡餾消失 ê 目今佮向時並新添智識。
栽欉 --- 2023.08.27
翻田塗接枝 --- 2024.12.17
留言列表
冊 ▪ Bücher ▪ Books (4)
