亂皂𥴊仔店 ⓂⒺⒾⓃⓀⒾⓄⓈⓀ

Pension Kalista, Klatovy, Česko

遮 ê 相片貧惰閣記錄一篇就徙來這 leh「讀文佯青」ê 文章，是講我 mā 感覺遮 ê 相片佮這篇「佯青」文章真峇，起因這就佮人 tī Кирково(Kirkowo/Kirkovo/基爾科沃), Bŭlgariya(保加利亞)聽李勤岸教授 tī 關懷廣播電台 ê 演講相𫝛。

「我 tī 大學教冊 mā 是講台語，你家己自在別人 mā-ē 綴你自在」這是記錄我大約仔 ê 印象 m̄ 是全文照抄，bueh 全文照抄我 mā 無彼个記持。

這篇〔捷克ⒸⓏ行跤花〕本底想 bueh kā 伊記錄 tī「台語散文 ⁘《青春寫真散文集》 von 李勤岸 ∾ 開朗雜誌」起因想著李勤岸教授 ê「和樂」兩字佮 tuì 語言 ê「自在」。.

越南人市場 --- 美容美髮廳，Horní Folmava, Česko

咱攏知影，語言已經成做「資本主義」ê 一部份，sòo-pái 咱真慣勢使用一个語言當做「世界語言」，總是 kā 歐洲各國箍做聯邦體制 ê 歐盟高層無法度選擇「軍隊語言」咱遮 ê 百姓更加無可能選擇「世界語言」，咱 kan-ta 知影愛徛大於(>,tuā-î)這爿 hōo 咱 ê 日子 ē-tàng 過甲較熱鬧閣較輕可寡，像捷克倚德國邊境(pian-kíng) ê 人，𪜶 ê 世界語言大多數是德語 m̄ 是英語，連按外埠行踏到遮 ê 越南朋友 mā 是德語講甲比捷克語閣較輾轉。

越南餐廳 tī Horní Folmava, Česko ê 看板

像這看板若無斟酌繩著「Pilsner Urquell」 kan-ta 聽語文佮讀肚胿仔字你 ē 掠做人猶 tī 德國，無出國，是講是按怎 bueh 特別寫這段？

無啥特別 ê 因端 kan-ta 想著李勤岸教授講 ê「和樂語」一辭，無人 uī-tio̍h 這是啥物所在應當講啥物語，m̄-koh 逐家攏倚資本主義 ê「和樂語」，起因遮 ê 本埠人佮移岫來遮揣新生活 ê 外國人攏知影德語是引𤆬𪜶行向閣較美麗 ê 生活。

曷咱臺灣--leh？

敢若一款語言「英語」niā-tiānn，準做咱上大 ê 觀光來源 m̄ 是英語國家，咱猶原 kā 英語擒牢牢 m̄ 放，紲落來成做茶鈷呻人 m̄ 講英語抑是嫌人講 ê 英語腔傷過重 hōo 伊聽無，搪著真正講英語 ê 人 mā-ē 講伊講 ê 英語 m̄ 是我學 ê 彼款腔....這是我家己搪著 ê 故事，無表示臺灣人齊是按呢生𠢕成做茶鈷呻 buē 離。

我 ê 天公伯我 mā 成做茶鈷呻 buē 離，總是見來捷克、波蘭抑是倚講德語 ê 邊境地區「和樂」佮自在講你慣勢 ê「語言」攏 ē 成做草囷 hōo 我一个人沓沓仔哺沓沓仔翻草「資本市場語言」佮「無市有場語言」像 3 Sat ê 瑞士人接受訪問準做伊 ē 曉講「資本市場 ê 通用德語」tsuē-tsuē 瑞士人猶是自在講「無市有場 ê 語言」像 Romanisch，𪜶 buē 因為你是講𪜶 mā-ē 曉 ê「資本市場語言」就綴 leh 方便講「資本市場語言」，準做受訪者10个有9个是講「資本市場語言」彼个唯一一个講「無市有場語言」 ê 人猶原照講伊 ê 話，是講 tī 瑞士播出敢 ē tshan-tshiūnn 德國按呢拍通用德語字幕，這我 m̄ 知，總是 tī 3Sat 我捌看過無「通用德語」字幕 kan-ta 講奧地利本埠德語 ê 電影。踅轉來德國，這猶是我個人經驗，無市有場 ê 德國本埠語言 bueh tī 公共電視台看著彼比咱對發票 200 箍彼格閣較僫，是按怎 ē 按呢生，我想這佮咱 bueh 相𫝛就是講逐家攏 ē 曉 ê 語言就好，sóo-tí 德國 mā 有這个現象有少年囡仔講「加學一个外國人 ê 語言 mā buē 䆀」，是講彼个外國語言拄好是家己 bueh 化去 ê 語言。

寫到遮猶原愛講，無比較無感覺，咱 ê 語言復振雖罔猶是 hōo 人感覺足無力，總是教育是語言 ê 肥底，無政府做靠山閣較有額 ê 投資者 mā-ē 消風，是按怎按呢講，彼段「加學一个外國人 ê 語言 mā buē 䆀」ê 專題報導 ê 秒數比美國歌手專訪閣較短，美國歌手專訪至少猶有2點鐘，這段語言復振無到15分鐘，而且是按 m̄ 免驚惶無廣告來鬥相楗 ê 公共電視台製造撥出。

這个問題閣喋落去 ē 喋 buē 煞，總是有比較正經較有 Fu，寫到有 Fu，我 mā 想著 tsuē 冬前 tī 倚瑞士 ê 法國邊境 bué Pizza，店東講法語透濫簡單 ê 德語「pas Scharf, avec Scharf」，我齊應德語佮簡單幾句 ê「Oui, Merci beaucoup, au revoir」，準做我 ê 法語發音無標準，總是迵過遮 ê 音階 mā 鑽入去本埠人 ê 四常，我想這佮德國人無親，土地佮語言至少攏是厝邊 m̄ 是遠甲愛坐 Pue-lîng-ki ê 美國抑是英國有關係。

Pension Kalista, Klatovy, Česko

今年是 gún 第一斗 tī 寒人行踏捷克，早前 m̄ 捌 tī 寒人行踏捷克主要 ê 因端是 gún 翁認定寒人 ê 捷克比德國閣較寒閣較𫝏，事實敢是按呢，我 m̄ 知影，總是我清楚知影越南市場 ê 海拔佮德國無啥無宛2體，另外論真講我正經無感覺德國真寒，我想這佮咱番薯島人，尤其是蹛山區 ê 人自囡仔時就真𠢕穿 hōo 燒有關係，另外，若 bueh 揣德國寒人佮臺灣寒人 ê 差別，我 kan-ta ē 講準做是海拔按 bueh 600 公尺到上懸 1490 公尺 ê 烏森林伊落雪 ê 機會猶是比咱臺灣阿里山 Yuafeofeo(祝山車頭)捷甲 m̄ 免預測雪仔伊敢 bueh 來挨拶一下。

寫到遮愛講 tsuē 冬前翁某做陣去阿里山，彼久 gún 蹛 tī 海拔2000公尺 ê 救國團阿里山青年活動中心，彼陣溫度 14 度 gún 翁已經寒甲若 bueh hőng 送去做仙 ê 豬仔仝款，喝天喊地閣傱去 kā 櫃檯講愛開燒氣，結果人 kan-ta 手指一个牌仔 hōo 伊看，溫度愛落到十度 tsiah-ē 開燒氣 hōo 伊氣甲 kiōng-bueh 投訴，押尾伊學著是𪜶德國人傷過荏身，𪜶德國人連熱天 mā 愛洗燒水，我 ê 14 是 m̄ 管洗衫洗碗洗手攏愛燒水，無燒水通使用𪜶 ē 成做茶鈷呻 buē 離 hōo 你聽。

Pension Kalista, Klatovy, Česko

今年寒人活 tī 家己溫度 ê gún 翁是按怎步頻決定 bueh 行踏捷克，窮實 mā 無啥特別就 kan-ta 伊綴某生活 mā 慣勢 kā 寒人過甲若寒人，像被 kā 伊換做棉襀被，衫褲穿長䘼仔衫佮長褲、囊襪仔，三頓食燒物，看電視蓋一領毯仔 m̄ 是繼續 kā 寒人過甲若熱人 tsiah 來成做茶鈷呻講「電 kā 我 ê 所費食了了」。

是講，這斗 tī 捷克 gún 翁 mā 看著捷克人按怎過寒人，膨椅囥一條毯仔，棉襀被是厚被 m̄ 是薄被，tī 有燒氣 ê 厝內 mā 是穿長䘼仔衫、長褲佮手 mā 捷捷提一杯衝煙 ê 燒茶 tī 啉，準做𪜶 ê 電費俗，總是以當地物價來算這 tuì 德國人來講是喙瀾㴙㴙滴 ê 電費，捷克 ê 電費 tuì 在地居民猶是貴 som-som 無俗。

Pension Kalista, Klatovy, Česko

另外一个因端是 gún 翁 mā 是真慣勢徛大於彼爿，就是人攏講亞洲消費俗就拚勢按亞洲行彼款無綴 leh 攑香綴拜抑是相趁相喊 ē 起清凹(nah) ê 性地，自開始佮我做陣行踏歐洲其他本底 hōo 伊 m̄ 管是受著蘇聯年間政治影響抑是猶 tī 四處拋拋走 ê 風聲像「車駛去捷克，連屍體攏揣無」這款風聲，伊開始發現行踏遮 ê 厝邊窮實是一件真有 14 ê 代誌，消費 mā 比亞洲較迷人，除了醫療，是講歐洲 ê 醫療費用無一个角勢通佮咱臺灣相比並。

我捌 tī Malta 補崩去 ê 喙齒，無德國醫療保險，一齒現金拆做臺幣愛 8 千外箍，而且這是齒科先生帶念我是外國人無 kā 我收「急診」兼「即時治療」ê 費用。

因為遮 ê 實地行踏經驗 hōo 伊理解，伊 ê 車 tī 捷克 buē 出現人講 ê 連屍體攏揣無 ê 狀況 mā buē 因為語言 buē 通 ē hőng 當做盼仔搧大耳，歇暝 ê 角勢若是閣加一屑屑仔耐性窮實就有法度揣著俗閣好 ê 所在。

Pension Kalista, Klatovy, Česko

像 Pension Kalista 這款一暝台票差不多1600 箍 ê 歇暝所在，tī 亞洲有可能 kan-ta 是一頂眠床 ê 價數或是一間房敆一間私人洗浴間按呢 ê 設備，無閣有其他。

Tī 遮是敆停車位、廚房、冰箱、私人洗浴間佮無迵過國際連鎖訂房服務閣 ē-tàng 提著閣較俗 ê 價數 1400 箍台票左右，當然這愛 tī𪜶家己 ê 網頁 Pension Kalista 落訂歇暝 tsiah 有法度得著 ê 優惠。

Pension Kalista, Klatovy, Česko --- 齊是德文冊

 這个優惠是 gún 落訂後 tsiah 發現.......總是當主人家講「Frohe Weinachten und ich wünsche wir sehen uns nächsten Jahr」我知影遮是大多數 ê 德國人行踏 Plzeň ē tī 這个舊時號做 Klattau ê 大城歇暝 ê 城市，mā 是 tshan-tshiūnn gún 這款專工按德國來 Horní Folmava 越南市場採購兼美容 ê 人 ē 接續行跤兼繼續採購順紲歇暝 ê 城市，sòo-pái 主人家應當真確定明年 ē 閣見著 gún。

起因，一逝路 kan-ta 算我 tī 德國鉸彼款屎礜仔形 ê 頭鬃 40€起跳佮 tī 德國加油加到滿扣落來 ê 16€，拄好對拄銷 gún 兩人 tī 德國鉸頭鬃 ê 錢佮 tī 遮歇一暝 ê 數閣有賰 ê 錢通款寡米粉、米、新衫褲佮德國僫搪著 ê Biskuit，德國人愛食浸 tī Ka-pi 抑是可可仔(Khoo-khóo-ah)這款硬甲若石頭閣甜甲連狗蟻 mā-ē 喝傷甜 ê Biskuit，我愛食波蘭到波羅的海彼款 ē-tàng 𩛩果子醬甜度較低 ê Biskuit，雖罔按呢一逝路齊高速公路至少愛 3 ~ 6 點鐘，看是徛佗一搭 ê 越南市場 ，總是時間 tuì gún 來講 m̄ 是錢，橐袋仔有歐元 tsiah 是錢 ê 人來講，這一逝路無算啥物。 

Pension Kalista, Klatovy, Česko

四常無愛囥洗浴間相片 ê 我，這斗搪著 buē 窒水 ê 排水空隨交代翁愛翕一張，起因咱攏知影家己 ê 厝就無 teh 認真保養佮清窒 tī 排水空 ê 頭鬃幼仔，別人 ê 角勢愈 buē 注意，清潔 ê 人 mā buē 要意這个小小 ê 所在，sòo-pái 洗身軀洗到若 tī 游泳池是真正常 ê 代誌。

這斗 tī Pension Kalista 搪著連壁角攏揣無「違規者」無 kā 伊翕一張仔相做紀念 buē-sái，另外遮 mā 有提供微波爐 hōo 無愛煮食 ê 人 ē-tàng 微波微波食物。

Pension Kalista, Klatovy, Česko

我知影無拄好踅到遮又閣讀有我寫 ê 語文 ê 人 ē 講，遮是歐洲無法得佮亞洲比並，總是我無認為這是歐洲佮亞洲 ê 差別，這是咱按怎看待資本主義 ê 態度。

像捷克抑是波蘭這款過暝過甲若 tī 厝 tī 德國 mā 僫揣，準做有設備 mā 無 tsiâu-tsn̂g 甲連碗盤、箸、冰箱有，起因伊愛你開錢，開錢 bué 伊 ê 早頓抑是餐廳食食佮伊認定 ê 價值。

Sòo-pái 我真認同一位日本朋友寫 ê 旅遊臺灣文章 --- 是按怎日本人愈來愈無愛來臺灣行踏，準做猶是有 tsuē-tsuē 日本人來行踏，人數 mā 是愈來愈少 ê 探討。

Pension Kalista, Klatovy, Česko

是講日本朋友 ê 想法 gún 翁 mā 有相𫝛 ê 看法，伊講德國人是按怎無愛 tī 家己 ê 土地行踏，上重要 ê 部份是價數佮服務。

「你納貴桑桑 ê 價數煞無得著相𫝛 ê 服務，按呢你敢願意支持家己土地 ê 觀光業，除非你是好額甲無要意遮 ê 對頭，畢竟歐洲無論文化抑是食食攏 bueh 相𫝛，這个角勢 buē 合猶有其他角勢引𤆬 gún 認捌歐洲，像葡萄牙𫝛款有百冬歷史 ê 老厝價數就是比德國迷人，準做你猶原 bueh 提兩國 ê 物價來做比並」翁講。

我 mā 足認同 gún 翁講 ê 話，起因物價是一个參考價值 m̄ 是全部，畢竟捷克 mā 有貴甲驚死人 ê 物，像洗頭毛精遮 ê 四常用品，捷克就比德國貴，菜蔬 mā 是。

像久冬前 tī 美國 tuì 朋友講「美國 ê 消費窮實無講蓋貴」，朋友回答「因為你提你慣勢 ê 消費做比較」這句話點拄我慣勢 ê 眼界。

是，我 kan-ta 注意著チーズ、Old Navy 遮 ê tī 臺灣若鞏金 ê 物，無去斟酌其他 ê 事項。

明年凡勢 bueh 行踏瑞典車日子，我 tuì 翁講準做無 bueh 按德國直接坐船到瑞典 kan-ta bueh 按波蘭坐船到瑞典，咱猶原愛 tī 德國 kā 四常洗頭毛精、茶箍、衛生紙遮 ê 四常用品款 hōo 齊，起因行踏歐洲遮 tsuē 角勢猶原無搪著有通仔佮德國競爭 ê 角勢，連物價、GDP 攏無法度佮德國尾溜相比並 ê 阿爾巴尼亞 mā 相仝，貴甲 hōo 我感謝家己 ê 凍霜，硬 bueh 按厝款遮 ê 物出門，準做紮遮 ê 物 buē 儉偌濟錢，總是彼氣持就是無仝，另外好額人是按怎 ē 好額，mā 是注意四常變化做判斷，m̄ 是事萬項攏 huînn-ti̍t 錢抉落就好，是講我 mā 無好額，總是我知影厝內就有遮 ê 物 m̄ 免閣掠外 bué 佮厝內相仝 ê 物，是德國商品 tī 歐洲是 kiōng-bueh 窒倒街 ê hōo 我捷 tuì 翁講，這久無「神聖羅馬帝國」m̄-koh 資本市場猶是。

Pension Kalista, Klatovy, Česko

歷史無一个固定，總是一个人 buē-tàng 無認捌歷史。

翁一看著這隨講，這是歷史咱愛翕一張，另外我 mā 想 bueh 請你 kā 我鬥相共 kā 這張相片囥踮你 ê Blog，因為咱攏活 tī 歷史，只是咱 m̄ 知影。

第一斗聽 gún 翁遮爾仔有哲學家 ê 請求，我呔 ē-tàng 無 kā 伊鬥相共一下，是 m̄。

本底想 bueh 翕寡款轉來 ê 食食佮衫褲，總是貧惰一項一項閣捎出來翕，huînn-ti̍t 家己知影這斗款 ê 物有法度擋半冬左右。

2023 最後 ê 3工，gún 翁成做哲學家，2023 最後 ê 2 工，我 mā 愛翻草家己 ê 歷史並修正。

我一直掠做這本冊是「散文」sóo-pái 請聚珍臺灣 kā 我鬥相共揣冊，tsa̋ng 按捷克轉來看著厝邊 kā 我鬥簽收 ê 包裹已經𫞼 tī 門跤口，歡喜甲人猶未開厝門就隨拆包裹揣冊來看，只是本底 ê 懸音「Wow」成做連氣音攏歕 buē 出來 ê「Ai...」兼腹內火 teh 挓佮想 bueh 隨 kā 伊送去無料簞笥 ê 衝碰。

總是有歲頭仔火閣按怎挓 mā buē 閣 tshan-tshiūnn 少年按呢牛就是牛，牽到北京也是牛按呢 kan-ta ē 曉綴綿精綴火氣踅金龜磨，這久顛倒 ē 成做始前人類 tuì 火好奇想 bueh 理解火按佗落來佮理解伊按怎著。

寫這段無表示我 teh 批評這本冊，總是我認真面對家己 ê 問題 --- 我無愛讀詩是按怎又閣 bué 著詩 ê 問題。

陳秋白《當風 dī 秋天的草埔吹起》，用台語寫作長篇史詩，將馬卡道族的歷史，巧妙融入詩思，塑造台語現代詩的新風貌。

市長序 --- 揉合文學綺麗新風貌 陳菊

陳秋白《當風 dī 秋天的草埔吹起》，以台語寫作打狗長篇史詩，意象精準，意寓深沉，呈現極深刻的省思意味，建構出台語詩的新美學。

局長序 --- 打造文學新夢想 高雄市政府文化局局長 史哲

這真清楚是我家己 ê 問題，我無愛讀「𤆬讀」抑是「推薦」遮 ê 文字，總是搪著「台語」我 ē 讀，只是讀 ê 態度 tshan-tshiūnn 速讀按呢，而且又閣是蹌跤雞這款方式，sòo-pái 這斗 ê 錯誤 m̄ 是作者抑是高雄市政府排蕗蕎賣蒜頭，是我家己揀我 bueh 記牢牢佮 kā 伊掠做是「Odyssey」佮「Iliad」這款「史詩」，雖罔我 tuì 這兩 pha 作品 mā 無熟似，總是我捌 tī 5 箍冊攤 bué 過𪜶 ê 故事來讀。

揣著著火點 mā 知影愛按怎蔭火，我 buē 閣綿精這件按高雄市政府出版 ê《一个走揣蝴蝶路草的女子》讀來 ê 序(sū) 踅金龜磨 m̄ 放，罵高雄市政府無寫 hōo 清楚，是講我 mā 無遮爾仔厚面皮死蛇諍做鰗鰡，油魚假做鱈魚，不過按照過去 ê 性地確實是 buē 踅轉去繩是佗一搭無對頭 hōo 家己著觸，紲落來繼續失覺察做𫝛款 ê 代誌，這久有歲頭仔無想 bueh kan-ta ē 曉挓火卻 buē 曉 kā 火完全蔭掉 ê 撇步。

Sóo-tí 換另外一个角度來看這件落漆 ê 揀冊 mā 是好代誌，特別 tī 冬尾 ê 這跤兜。