亂皂𥴊仔店 ⓂⒺⒾⓃⓀⒾⓄⓈⓀ

一目𥍉又閣 3 冬外，我 tuì Tzatziki(Tsatsiki) ê 興趣猶原懸過 Himalayas，總是一想著瓜仔哖愛成做厚工 ê 米粞 1. 礤簽 2. 渧(tè)水，我甘願 tuì 伊僥心選擇別 ê 頭盤、食前酒。

3 冬前交翁做陣去朋友兜過新曆過年，朋友請 gún 食伊家己款 ê Tzatziki hōo 我決心轉到厝 bueh 家己做一份補空虛，總是想法永遠捙拚 buē 過現實 bué 便 ê 貧惰。3 冬後 ê 這久因為沙拉瓜仔哖步頻大落價 hōo gún 翁逐日去超市 bué 一條轉來囤，囤甲我 kiōng-bueh 放棄信仰 --- 杜猴損五穀 buē 落阿鼻地獄。 

「我相信你愛恁兜牽手落阿鼻地獄」結束做小工轉到厝見著食飯桌又閣三條沙拉瓜仔哖我隨燃茶鈷呻 hōo 翁聽。

「我 tsiah m̄ 甘你去阿鼻地獄」翁笑咍咍行倚那講。

人講歹拳無拍笑面我恬靜聽伊紲落來 ê 分張，「伊俗甲無人愛，聽好做 Tzatziki」，著--neh！我呔無想著這點，四常無興做 Tzatziki 除了無愛礤簽、渧水 ê 貧惰猶有無三無通 Tzatziki ê 因端。

「猶原 gún 翁𠢕想著 Tzatziki」uī-tio̍h 紲落來 ê 對話，我喙抹蜂蜜講甜蜜。翁仔姐誠懇睏鬥陣 mā m̄ 是 1,2 工 ê 代誌，伊隨講你礤簽我渧水，一人一半感情 tsiah buē 散，順紲加一句「Lê-bóng m̄ 通做水添」hōo 我笑甲目汁㴙㴙落。3 冬前 ê Tzatziki 就是按呢生 hōo 我 ê 扶挺險 bueh 落氣「料想 buē 到這優格奶湯 mā 會使得敆北非小米成做飯湯來食。」

本底按算跟綴 3 冬前 ê 食法：Tzatziki 敆北非小米，總是這斗 ê 食食是臨時臨曜 ê 主意就 kā 伊敆烘箱馬鈴薯，美味しい。

 

Tzatziki

...... 材料 ......

瓜仔哖，礤簽	3
橄欖油	1EL
蒜頭，刴幼	2
優格	350g
薄荷，刴幼	2
鹽、胡椒

...... 步數 ......

1. 刺瓜仔水渧 hōo 焦。

2. 橄欖油、蒜頭、優格、刺瓜、薄荷、鹽、胡椒做一伙抐 hōo 齊，樂暢來食。

 

---

---

---

 

Den Tag vor der Impfung wir ein Tag in Freundin's Haus und übernachten da.

Den Tag sie macht Couscous mit Tzatziki.

Das war sehr lecker aus.

Dann denke ich danach Impfung gemacht, ich möchte das Selber machen.

Aber, nur das Tzatziki.

Weil mein Mann Reis nicht mag, dann mag er Couscous?

Ich glaube, das ist nur im Traum, aber ich muss ehrlich sagen, das Tzatziki mit Kartoffeln ist auch lecker.

 

Tzatziki

...... Zutaten ......

Geraspelte Gurke	3
Olivenöl	1EL
Fein gehackter Knoblauch	2
Joghurt	350g
Fein gehackte Minze	2
Salz ＆ Pfeffer

 

...... Zubereitung ......

1. Geraspelte Gurke in einem Küchentuch auspressen.

2. Joghurt, Olivenöl, Knoblauch, Gurken, Minze, Salz und Pfeffer gut mischen. Guten Appetit!

 

---

---

---

 

The day before the vaccination, we spend the day at Freundin's house and spend the night there.

The day she makes couscous with tzatziki.

That was delicious.

Then I think vaccinated afterwards, I want to do it myself.

But, only the tzatziki.

Because my husband doesn't like rice, then he likes couscous?

I think this is only in a dream, but I have to be honest, the tzatziki with potatoes is also delicious.

 

Tzatziki

...... Ingredients ......

Grated cucumber	3
Olive oil	1EL
Finely chopped garlic	2
Yogurt	350g
Finely chopped mint	2
Salt ＆ Pepper

 

...... Method ......

1. Squeeze the grated cucumber in a kitchen towel.

2. Mix the yogurt, olive oil, garlic, cucumber, mint, salt and pepper well. Enjoy your meal!