Jagdschloss Antonin / Antonin 拍獵城堡
Gún-ê 車日子計劃上北到 Estland(愛沙尼亞)，按德國出發 gún 會使得迵過波蘭一路上北到位，總是捷克 ê 越南人市場太吸引我 ê 需求，出門露營車日子無去遐款寡米粉、絞頭鬃，我 ê 気持ち ē 隨破一空，按呢行跤花就無 14 矣，畢竟需求無滿足著。
Kā 需求清楚講 hōo 翁聽，Happy Wife, Happy Life，伊隨 kā 按算好 ê 路線拊掉，我 tsiah 有機會行尞 Chopin 蕭邦停跤 ê 鄉鎮：Antonin。
感謝頭殼𠕇甲若花崗石 ê 翁願意滿足牽手 ê 需求 kā 全部 ê 按算延至少五工。
拍獵城堡翕著 ê 臭金龜(?)
Antonin ê 德文交波蘭文地名齊𫝛名，伊是一搭 tuì 外來者無啥知名度 m̄-koh 誠受當地人意愛 ê 溪頭。
Gún 停跤 ê 露營區交溪頭 ê 設備相𫝛，所致我 kā 伊號做波蘭溪頭。
波蘭溪頭無啥特別觀光景點，m̄-koh 我足佮意停跤 ê 時間，規个耳空聽無德語抑是英語，唯一 ê 德語抑是英語 kan-ta gún 翁交厝邊少少 ê 德語交英語。
「我若閣踮遮加蹛幾工，我 ê 波蘭語合該然 mā 有機會講甲像德語按呢，無好 m̄-koh 有才調開喙」離開這个 hōo 我自在甲 buē 曉波蘭語猶是 buē 做啞口 ê 鄉鎮，我自信滿滿 tuì 翁分張我 ê 學習能力。
Antonin 按一片森林成做鄉鎮，是 Anton Radziwiłł 公爵大約 tī 1815 tī 遮落塗起家。
Antonin 人口按維基百科記錄大約 500 人(2003)，gún 探訪 ê 期間 mā 確實感覺自然園區 ê 遊客交園區大湖 ê 𩸙齊比庄頭 ê 人閣 tsuē。
Antonin 吸引人停跤 ê 景點除了若阿里山 ê 樹欉交若海洋 ê 大湖，另外一个景點就是這棟起造 tī 1822 ~ 1824 ê 八角形黃金閃閃➀ ê 木骨拍獵城堡。這座拍獵城堡除了特殊 ê 八角外觀，伊 ê 四面山尖是以十字架呈現。 城堡內底有一个三層樓懸 ê 花磚烘爐，中間徛一支白色 ê 大柱仔。目今 ê 城堡(2012~)是一間餐廳兼飯店，飯店內底保留 Chopin 1829 停跤 ê 紀念房佮一台有歷史 ê 柴鋼琴。
➀ 一款黃色油漆，像瑞典 ê Falun Mine
Kaplica Grobowa/Radziwiłł-Mausoleum/陵墓(lîng-bōng)
人口無到 500 人 ê Antonin 伊 ê 人工歷史除了拍獵城堡猶有這搭新浪漫建築 ê 陵墓。
伊是順德國人 Johann Heinrich Haeberlin tī 1835 ~ 1838 設想以紅磚伴八角尖塔做前後門建築主體 ê 教堂式陵墓，兩對前後對稱 ê 尖塔徛十字架。
Elisa Radziwiłł 公主 tī 遮安息，內底祀伊 ê 半身像，四枝大理石柱 mā 雕刻歷史人物。內底 mā 有後哥德式建築。
公爵 ê 族譜
人口無到 500 人 ê Antonin 吸引人 ê 景點是我個人 m̄ 管一日探訪幾斗，齊感覺規个園區蓋有咱溪頭抑是杉林溪景緻 ê 景觀公園抑是拍獵城堡？我捎無一个摠，總是 gún 翁交我一致認為 Chopin 蕭邦蓋重要，至少 gún 翁仔姐就是 uī 伊停跤，準做我 tuì Chopin ê 理解少甲一支指頭仔攏無才調揤，除了 Rainy days, never say good-bye, to desire when we are together, rainy days growing in your eyes, tell me where's our way? 我愛蕭邦(I like Chopin)這首歌會使得算在內。
1829 年 Chopin tī 遮停跤一禮拜，滯 遮停跤 ê 時間伊 uī 公爵一家伙仔帶來世間萬物無地比並 ê 禮物，音樂佮伊 ê 簽名。
公爵自身 mā 是歐洲知名 ê 作曲家，所致探訪伊 ê 城堡 ê 音樂家窮實 m̄ 是 Chopin 一位，不過因為 Chopin tuì 波蘭歷史太重要加上伊 tī 遮 ê 期間 kā 波蘭舞曲(Polonaise) Op.3 交鋼琴三重奏(Piano Trio) Op.8 組合做一首曲送 hōo 公爵一家伙，成做 Antonin 目今上大 ê 人類文化資產。
Gún tuì 古典音樂無一个認捌，gún tuì 曾經 mā 捌來遮做音樂老師 ê Beethoven 交 Niccolò Paganini mā 無一个認捌 ê 齊知影𪜶是古典音樂電台上捷放送 ê 出名人就順城堡推薦 ê 路線欣賞大自然，順紲飼蠓。
Gún 徛 ê 角勢有溪有田園無蠓，行踏波蘭幾仔斗 mā m̄ 捌搪過蠓，這斗上北波羅的海三國，波蘭第一站 Antonin，伊 ê 地勢看起來交德國田庄無啥精差，森林密度交烏森林 mā bueh 相𫝛，我順人 tī 德國 ê 經驗穿短褲巡城堡感覺一切齊妥當自在，除了空氣凡勢受西北雨，落 buē 過車路 ê 影響 hōo 我感覺熱人濕度交德國相比並有較懸淡寡，一切猶原若德國，無半隻蠓，快樂甲牛聲馬喉唱歌 hōo Chopin 聽，Chopin mā 恬靜聽我 ê 歌聲到見 buē 著伊 ê 範圍，我開始認捌啥物號做千萬 m̄ 通惹歐洲東海 ê 蠓。
鼢鼠是環境自然 ê 觀察者，城堡八公公尺見無鼢鼠空，一離開城堡鼢鼠軁來軁去 ê 塗空一窟一窟陪伴我踅路線，東海蠓仔大軍 mā 一隻一隻 kā 我鬥減肥：敕血。
「遮是波蘭蠓呔遮爾仔厚」我那舞者下性命交蠓跳 Tango 那問自紮膨紗衫所致較無感覺有蠓 ê 相借問 ê 翁。
「這附近合該然有湖水」翁講。
聽著遮爾仔廢話 ê 回答，送伊一个反白睚放一个人慢慢仔趖，我添柴枝骨力傱轉來露營區，中間搪著當地人 buē-su 無蠓自在踅園區，我 tsiah 雄雄想著歐洲有蠓，而且毒甲無輸咱台灣 ê 烏蝛。
有一年來德國談戀愛交翁做陣去捷克湖邊露營，伊講歐洲無蠓免按台灣款蠓仔水來，押尾我 tī 遮 ê 五工險 bueh hōo 蠓欶甲變人肉乾。
人講翁某穿仝領褲，三碗飯兩碗菜，無蠓我願意交伊翁仔某食菜脯，有蠓啥物一日夫妻，百世姻緣，較早睏較有眠，一見著這尾𩸙(Karpfen, Carp)比交伊相黏蒂帶慢慢仔趖閣較快樂。
等翁轉來交我會合開車門，一陣閣一陣 ê 魚風味 mā 順軟晡涼涼仔 ê 空氣四散，聽人講歐洲𩸙蓋恐怖，呔討這陣鼻著 ê 芳味宛然阿母煎肉鯽仔 ê 氣味.....一个人坐踮櫃檯門口交本底 buaih 交我相交插後押米糕𣻸 ê 烏貓做伙等總是趖轉來 ê 翁。
「這氣味交煎肉鯽仔足相𫝛，敢 bueh 試鹹汫？」我問規魂舒揣無半粒紅豆 ê 翁。
伊看規魂舒齊是紅豆 ê 牽手講「歐洲蠓仔 kā 伊舞甲 kiōng-bueh kā 我扛去種，我若答應你試這味素足恐怖 ê 魚，我 ē 成做阿烏➁，m̄ 通。」
見著罕得食魚不過 m̄ 捌拒絕牽手 ê 久久一斗邀請 ê 伊遮爾仔明白拒絕，我想這歐洲𩸙合該然交翁仔時猶未成做台灣雕 ê 吳郭魚相𫝛，氣味芳甲流喙瀾，夾一喙呸掉「好，咱莫了錢」我講。
➁ 烏鬼記
Gún-ê 露營區佮 gún-ê 露營車
停跤最後一暝，翁仔姐做陣那看漸漸豉做鹹鴨卵 ê 金烏那食四秀仔，我 tuì gún 翁講「遮無人寫評論，特別是德文你就莫家婆。」
伊知影我 tuì 第一暝停跤 tī 德國柴杙田庄所發生 ê 代誌猶非常不滿隨講「我 buē 開城門放德國 Mǹg-sǹg 入來。」
彼暝步頻 hőng 趕走是遮 tsuē 冬踮歐洲露營上䆀 ê 經驗 mā hōo gún 翁清楚知影，我分張 ê 故事「除了中國人佮狗無歡迎，賰--ê 齊歡迎」m̄ 是烏白亂講。
伊 uī-tio̍h 省一仙五銀決定 kā 時間留踮德國 ê 停車場露營地，tī gún 準備 bueh 歇暝，管理營地 ê 工作人員講 gún-ê 車無合資格 buē 使得歇暝，gún 手指附近交 gún 相𫝛 ê 車講 gún-ê 車交𪜶無宛 2 體，工作人員講𪜶 ê 車登記是露營車，gún-ê 車 m̄ 是。Gún-ê 車確實是登記 PKW(私人用車)，總是 gún 翁就是堅持 gún-ê 車是露營車，一直到對方講 bueh 倩警察來處理，伊 tsiah 落軟願意換所在。
我是彼搭停車場一看就知影非歐洲人 ê 外國人，自 gún 停車我就感受有人無滿意提醒 gún 翁捷克賰無幾公里咱會使得直接過邊境去捷克歇暝，伊 uī-tio̍h 儉幾仙歐元堅持 buaih 繼續向捷克出發，押尾搪著這件代誌 hōo 伊風火著 mā 無較縒，起因 gún-ê 車就是登記 PKW。按怎分別露營車交 PKW 車內？有安煮食設備就是露營車，我 ê 意思是家己組 ê 露營車有見著 Gá-suh 台，決定是露營車。
錢納了閣 hőng 趕走 ê 彼暝，本底就 bueh 停睏 ê 露營區無開放半暝入營，gún kā 車停踮外口 ê 停車場歇暝，捷克警察來巡邏以輾轉 ê 德語問 gún 呔討停睏踮外口，gún 簡單講傷晏到位，警察 tìm 一下仔頭講，今暝會使得停睏踮遮，明仔載𪜶 ē 閣來巡邏，說聲暗安就離開。
交警察說多謝暗安，我心內非常清楚，警察看車牌 mā 知影按 gún 蹛 ê 所在到這搭所在無遠甲若按瑞典來到捷克，其中必有緣故，就放 gún 一條生路無開罰單。
本底是清面 ê 阿貓
這隻烏貓敢是露營車飼 ê 貓，我無研究，總是第一暝交伊成做好朋友 m̄ 捌閣見過伊交伊停跤 ê 大理石按無𫞼牌子換做𫞼一隻重橫橫 ê 牌仔，我想這隻烏貓合該然 m̄ 是 gún 翁講 ê 有主人 ê 貓。所致我想 bueh tuì 阿貓講，彼暝 ê 相放伴造成伊按有路有角成做有路無角 ê 貓，我真歹勢 mā 向望你一切攏好。
我 m̄ 知影波蘭人敢佮意貓，總是彼日見著 tsuē-tsuē 人看著我交阿烏貓耍甲 ka-ka 叫，齊一个表情「不可思議」，𠢕做貓好奇 ê 我 tī 彼个當下確實有感覺怪奇，總是我掠伊做逐家知影伊屬生頭清面僫鬥陣 ê 貓。押尾幾仔日無見著伊，我想合該然是營區工作者驚伊沓沓仔慣勢人類就踮遮起家，所致 kā 伊送去別搭過自然生活。
波蘭有 tsuē-tsuē 起造甲若皇宮 ê 教堂，這款若北歐維京人式 ê 建議我捌 tī Schlesien（西利西亞）Karpacz 卡爾帕奇（德語 Krummhübel）見過一擺，教堂名稱號做 Stabkirche Wang，離開 Antonin 進前我餾導覽看板揣有通仔經過 ê 景點，這个若北歐全柴起造 ê 教堂就是其中一个。
這座教堂交 Antonin 以車程來算距離需要 1 點鐘 ê 田庄呔討算入 Antonin 觀光地圖，這个問題我想凡勢交德國 ê 浪漫大道、歌德大道設計相𫝛，唯一無相𫝛伊 ê 交通無德國遐爾仔利便。
教堂外 ê 光景
教堂無開放參觀，對面 ê 麥仔田拄好有頂站仔翁仔姐討論 ê 草囷，隨泅入麥仔田東攝西影，紲落來斡頭 gún 翁德語按怎講。
「Google」伊講。
「你德國人抑是 Google 是德國人」我講。
「我德國人總是我無可能萬項德語齊捌，台語按怎講?」伊問。
「Google」我應。
「咱半斤八兩」翁笑應。
半斤八兩後斡頭轉來車頂，目那看波蘭 ê 田庄變化，腦按《灶雞仔》泅去《拋荒的故事》齊想無台語按怎講，當我準備放棄苦毒家己 gún 翁大聲講我想著矣「Heuballen」抑是「Strohballen」，華語無確定伊敢正經按呢講「牧草捲」，畢竟歐洲 ê 牛羊 mā 食「麥稿」...啊，台語按怎講，是食老記持倒勼抑是自來就是頇顢人無才調 kā 讀過閣寫做筆記 ê 台語辭牢牢鑿踮頭殼。
Heuballen, Strohballen 你到底號做啥物名？啊，這久想 buē 起來來無要緊，較晏有時間整理照片 tsiah 來請教部落格 ê 記錄。
那上北那探訪未知 ê 波蘭風光
德文 ê Heuballen 是指猶 teh 曝日頭 ê 麥稿、花草，Strohballen 是指已經曝甲焦燥燥水會使得款 hōo 動物食 ê 麥稿 、花草。遮 ê 講法 tī 台語有囷(khûn)，像草囷、有垺(pû)，像草垺、有棚，像草棚、有堆，像草堆。
寫部落格正港是一件好代。
睏天路車日子 Camping mit Caddy (21)