- 秋分 ê 金瓜
節氣勻勻仔行到秋分，翁講「著時矣，愛來食金瓜。」
今年秋分按算 ê 波蘭行跤花 tī 萬事 tsiâu-tsn̂g kan-ta 等貓霧仔光就出發 ê 前 8 點鐘，因為 gún 翁無法度控制 ê 走腹揤暫停。
「我想這合該然 m̄ 是食物中毒」gún 翁若軟絲倒 tī 眠床講。
自伊開始走腹，伊綿爛跟綴伊心愛爸母 ê 體剔（thé-thak），𪜶 ê 無四序齊是別人 tuì 𪜶甕肚 ê 對扴。
我承認我洗菜有較潦草，總是這个潦草無可能 hōo 伊活到今，敢 m̄ 是？我清楚知影伊 ê 走腹 m̄ 是我惹出來 ê 問題，總是又閣捎無機關藏 tī 佗落，就隨在伊去數佻（siàu-tiáu），畢竟兩个人 ê 孤單，比一个人 ê 孤單閣較好過日子。
出發波蘭 ê 前一暝，睏甲 m̄ 知人 ê 我夢著按蘭嶼轉來台灣彼日，本底按算停歇綠島 ê 船長確定風颱猶 tī 外口隨決定繼續向台灣駛，本底就食眩車丹 ê 我繼續補一粒，猶是捙拚 buē 過若風吹 ê 海湧 hōo 做陣去𨑨迌 ê 朋友四界揣塑膠袋仔 hōo 我掠兔仔交安搭台灣島 bueh 到矣。
「美樹，我腹肚足疼...美樹...」凡勢天 bueh 拆箬，大腦沓沓仔有法度分辨夢交現實，我順若貓仔 ê 聲翻身揣夢抑是現實，「美樹....」雙目褫金見著目箍紅紅 mā 吐甲規魂舒 ê 翁，隨傱便所間捾燒水，人猶末行倚已經鼻著臭酸味，這一月日來 ê 風火著隨消散，燒水貯跤桶，面巾浸燒水捘 hōo 焦，手機仔準備敲 112。
「Bueh 8 點矣，較晚咱坐計程車去病院就好....」，我順伊 ê 話冷靜繩伊 ê 無四序，伊看起來確實無嚴重甲愛敲 112，就交伊做陣等時間，紲落來一个人坐踮花園等伊吩咐。
「醫生講我愛蹛院檢查...」疫情期間無病院 ê 允准 buē 使自由進出 ê gún 翁 kā 櫃檯借電話敲 hōo 我，聽煞隨斡頭坐公車轉來款伊 ê 物。
蹛院 ê 第二工，確定病灶是膽結石需要開刀，伊拍電報 hōo 我講 m̄ 通寫光批 kā 𪜶爸母煩惱，我順伊 ê 要求無出聲，𫝛一日 ê 暗眠我接著𪜶爸母風火著 ê 電話請教我按怎款三頓 hōo 𪜶 ê 後生食，閣 m̄ 肯 tuì 𪜶講後生蹛院 ê 代誌。
按怎款三頓，順恁後生 ê 喙斗款三頓，呔討 m̄ tuì 𪜶講生後蹛院，因為𪜶後生要求，遮 ê 話我囥踮心肝穎無出喙，起因人交 Mn̂g-sng buē 對喙。電話掛掉換我拍電報 hōo gún 翁，紲落來成做無聲 ê 人到伊出院轉來到厝會失禮 tsiah 出聲，「Gún 兜唯一一个膽愛無去，是因為醫生 kā 病人規魂舒自來 ê 病症巡一遍猶是揣無問題，最後判斷凡勢是膽結石造成胃口無好，所致蹛院𠞭膽，彼个人是 tsiâ，你 mā 知知。」
「恁阿母」伊頭向向 m̄ 敢擔頭看我講。
「我上網請教膽結石 ê 起因，我非常確定你 ê 膽走無去 m̄ 是我造成--ê，不而過我知影按怎照顧你 ê 無膽人生，只要你相信 gún-ê 醫療無輸恁德國。」
Gún 翁知影我話中有仁，目箍紅紅講「𪜶一个 40 外歲，一个 50 外歲 mā 去病院𠞭膽，我攏去 kā 看。」
情緒海湧若彼日 ê 掠兔仔，我討厭這款感覺 mā 沓沓仔清楚家己 tuì 孤單愈來愈 buē 驚惶，無紲伊 ê 話直接敆我 ê 按算，「因為你 ê 問題 hōo 我想著，家己無本錢交恁匪類，甜粅粅做飯頓，一日食六頓，簡單一句，你交我 ê 飯頓神歸龕，佛歸廟。」
「我 bueh 跟綴恁 ê 跤步，秋分矣，是時食金瓜」伊講。
- 種珠
「H ê 城市接受外埠人過去種珠」翁若挖著寶大聲喝。
「咱市敢猶原無地通種珠？」一想著一逝路高速來回愛 5 點外鐘，我就𤺪。
「你敢有接著通知？」uī-tio̍h hōo gún-ê 行跤花有通仔照按算出門 ê 翁步頻成做巧巧人，知捌按怎 kā 問題捒轉來 hōo 我。
清楚知影骨力踅金龜磨 mā 無較縒隨問「按算當時出發？」
「交 H 時間都合就會使得出發。」，紲落來話講無甲隔轉工，gún 翁仔姐已經出發去種珠。
出門種珠進前我問 H 翁仔姐種珠後 ê 反應 mā 問台灣同學種珠後 ê 狀況，H 翁仔姐講無任何感覺，台灣朋友講魂舒 buē-su hōo 大象坐椅仔坐，忝甲無法度做穡三工。我 ê 種珠 ē 發生啥物狀況，無行一逝無法度節，總是順抵抗力來講，種珠後 ê gún 翁合該然宛然 H 翁仔姐活龍一尾，我合該然行向同學 ê 狀況，忝甲變懶屍。
「我若做懶屍，你家己就愛較巴結」無向望按死窟仔水轉做活水隨見著規个廚房齊碗箸 ê 我，目那看愈來愈倚 ê 櫃檯，頭那繩猶有啥物代誌愛交代，喙那七十八轉直直轉。
M̄ 敢出喙包領 ê gún 翁微微仔笑講「咱種 ê 品牌 buē hōo 你出現恁同學 ê 狀況。」
我無紲話恬靜聽 Hinz 交 Kunz 互相佔一搭，喃阿珍講 ê「M̄ 通做人無料 ê 白鳥鼠」交 gún 翁講 ê「有種有保庇」，我無確定這緊甲若火箭 ê 研究發表是有種珠有保庇，總是一想著 SARS 膽膽 ê 跤步隨大伐大伐向前伐，過五關斬六將到種珠前 ê 過敏檢查，我決定 buaih 閣以德文對答。
自基本資料審查到基本資料確定，我搪著 ê 工作人員齊是外國腔口，𪜶 ê 外國腔口 hōo 我自在 hōo 我 m̄ 驚文法鬥 m̄ 著位，換到過敏檢查準做工作人員看起來是遐爾仔友善好禮我猶是決定 m̄ 開金喙講德語。
「咱講德語著 m̄」工作人員親切招呼我坐 mā 那以德語請教我 ê 四常上捷使用 ê 語言。
「英語」我微微仔笑答。
「咱確定無半句德語？」工作人員笑微微繼續以德語請教。
我知影工作人員向望我講德語，總是我無向望家己半桶師 ê 德語脫箠，就文文仔笑做回應。
工作人員見我綿豉 m̄ 講德語，吐一氣大氣講「Gún 有英文練習，總是英文 m̄ 是我 ê 母語，請你莫見怪。」
「你 ê 英語比我 ê Dankschön 閣較輾轉」我微微仔笑講。
醫藥大細項一項一項斟酌核實，工作人員 tī 我 ê 德文申請單簽名，請我順跤步指示伐向注射室，我微微仔說聲 Thank you, bye，雙目貓貓相 gún 翁人 tī 佗落跤步 mā 三伐做一伐，伐到注射室。完成注射順跤步指示伐到休息區靜候 30 分鐘 tsiah 去簽最後一張單。
當我捎無寮仔門這久 ê 愛睏是預防射造成抑是昨昏看過頭 ê 忝頭愛睏，有人按我種珠 ê 手骨頓落去，我哀一聲想 bueh 看佗一个𢯾壁鬼 tī 這个闊甲連大象 mā 有才調橫行 ê 角勢，行路猶原遮爾仔無細膩。
「敢有啥物問題」我順搐搐疼 ê 方向揣聲音送伊一个目箭，「我驚講德語，恁德國人比我閣較驚講英語」我笑講。
三十分鐘時間到，最後一張單簽好勢，翁仔姐做陣行出種珠中心，我刁意故 tuì gún 翁講「你愛寫建議單，接受預防射 ê 民眾有人講台語，我會使得來鬥相共。」
我 m̄ 知影德國逐个城市敢有針對市民做語言服務，總是三斗兩地種珠經驗，我 kan-ta tī H ê 城市搪著外語服務。土耳其語、阿拉伯語、英語。另外，我 ê Covid-19 種珠經驗是，前兩斗忝甲睏三暝三日，第三斗骱邊起癰閣忝頭。Gún 翁三斗 kan-ta 最後一斗有感覺種珠所在有淡薄仔疼，賰--ê 齊無感覺。
- 食物中毒
Gún 翁 tī「To good to go」見著德國頂港有名聲，下港上出名 ê 有機超市 Alnatura 貼食物敗價箱，一箱 15€。
Bué 物慣勢是三人共五目，日後無長跤短話隨講「價數迷人無 m̄ 著，總是你敢有法度保證伊一屑仔攏無臭膎閣 m̄ 除鈗？」
「準做臭膎閣 m̄ 除鈗，伊猶原是 bué 著俗貨較贏 leh 做工課」伊講。
伊愛紅龜生蟲，龜怪就 hōo 伊繼續主意，
綿爛討論這款掠做𠢕扞家窮實是俗物 bué 破，畢竟人生愛了錢 tsiah 捌儉錢，「出錢 ê 人主意，只要你莫做茶鈷呻，我攏無意見。」
To goog to go ê 提貨時間大部份設 tī 關門進前 1 點鐘，Alnatura 設定隔工 12 點後，這交進貨時間 m̄ 知敢有相干，總是時間猶未到 gún 翁人就泅去遐報到並直播 gún 是偌爾仔好字運，有才調搶著一箱 15€ ê 有機商品。
我 tuì 有機無痴迷，伊 tuì 有機有一種 m̄ 承認 ê 虛華，食有機品商品表示伊 ê 褲袋仔 m̄ 是袋磅子。
「出錢 ê 人主意，我 ê 菜錢無才調款有機，總是我會使得替你無料隨碗出」我順伊 ê 話，外甥仔點燈火，一切照舊講。
我無確定伊有錢抑是無錢，起因伊 mā m̄ 知影我有偌 tsuē 財產，總是我清楚知影我 buē 無錢假大範，像伊這久按呢生。
貨領著轉來厝，人 tī 客廳無閒交部落格做議量 ê 我 hōo 伊呼去廚房開箱仔。
脯甲會使得隨做菜脯 ê 紅菜頭，一把閣送塗。
攝甲會使得直接送去田塗做肥料 ê 馬鈴薯 500g 一盒，mā 無料送塗。
蔫甲會使得直接做菜乾 ê 菜擴兩粒，開始出皺痕 BIO 身份 ê 貼紙猶原貼牢牢 ê 大同仔交甜椒一包，合該然是肉幼仔總窮做一包 ê 生蚵仔菇（Austernpliz，華語秀珍菇），伊一項一項挈出來，我一項一項 kā 過聲，過甲生蚵仔菇我雙目射金光講「請阿舍繼續出主意。」
生蚵仔菇 tī 咱台灣是新婦仔命，遮 ê 生蚵仔菇是少奶奶命，伊比三文魚閣較框金閣包銀。呔討按呢生？明明是一戰 uī-tio̍h 解決糧草大量栽種 ê 料小食物，呔討這久成做金包銀？不而過，德國料小食物 mā m̄ 是 kan-ta 這味素，向時 hőng 號散赤人食物 ê 鯡魚，現此時 mā 貴甲驚死人。
「這包金包銀我向你擔保孤你通食」gún 翁 buē-su 見著 Pest（烏死病）驚甲徛遠遠。
「謝主龍恩矣」我刁意故講。
我那分類，那想做穡人分張 ê 故事，gún 兜 ê 田若 bueh 轉型做有機田需要歇百冬，gún 是做穡人無可能 uī-tio̍h 有機兩字拋荒換頭路，所致 gún 兜 ê 農產品是無澍農藥 m̄ 是有機。德國萊茵河工業危害按頂世紀到今 mā 短短三十冬，啥物號做「有機」我又閣成做一隻貓，不而過無論台灣抑是德國，有機從來 m̄ 是選項，畢竟我 ê 錢袋仔兼褲袋仔齊袋磅子。
「你今仔日 ê 下昏飯就倚靠遮 ê 有機𤉙做一碗田庄肉湯，我 ê 下昏飯就倚靠這包金包銀交你 ê 敵人敏豆仔」，雙人一雙箸 bueh 食無仝味分配好勢，海馬泅去食魚餌。
「我 buē 閣遐爾仔悾槌曷啦！」，手揀生蚵菇，喙 mā 那笑講。
Gún 兜五个人有四个有才調𠢕出若總鋪師 ê 手藝，所致食到 37 歲摸過 ê 鼎是十隻指頭仔就有法度算齊齊。
一年人 tī 中國做小工 ê 我，那食泡麵那敆白汫無素 ê 電視，囡仔時捌 tī 仁愛病院看著 ê 黃色雨幔人步頻閃過頭殼，我無確定食泡麵交肝病敢有相關，總是我有一種感覺閣按呢食落去，已經沓沓 teh 落崎 ê 健康，伊 buē 翻頭𬦰崎，隔工透早隨去宿舍附近 ê 菜市仔 bué 菜。
咱攏講有唐山公無唐山媽，順這个句造句，咱 ê 食食文化合該然無宛 2 體，呔討來回伐十遍我猶是揣無我愛食 ê 菜蔬，連滷肉看起來 mā buē 敆喙，猶是食泡麵敆卵包。當我按呢想，掠做睏飽猶是忝是因為長期欠睏債 ê 同事，伊 hōo 肝癌舞甲比枯焦枝閣較焦 ê 面容活靈靈出現在眼前，我無才調一步𬦰上天，總是我會使得做龜慢慢趖，按比肉幼仔閣較幼 ê 蔥仔乾、紅菜頭乾、洋蔥乾湠到完整 ê 菜蔬。斡頭一攤一攤繼續繩，金針菇我佮意就按金針菇開始。
金針菇洗好，湯鍋仔 ê 滾水 mā 開始跳水舞，Eh...遮 ê 金針菇交台灣 ê 金針菇無相仝--neh，遮 ê 金針菇有箍一輾黃，一簇一簇剺一簇一簇擲入滾水煠，紲落來 ê 睏房就 tī 便所間到隔工透早中國同事發現我無去辦公室，敲電話來宿舍又閣無接，直接認為出代誌揣鎖匠來開門，閰王 tsiah hōo 我轉來人間。
「靚女，吃菇要去尾，你不知道嗎？」，身體恢復健康轉去辦公室，同事見著我隨个仔隨个按呢挨拶， hōo 我確定煎一粒卵包 m̄ 是一件簡單 ê 代誌。
這生蚵仔菇按有機來，有機就是愛紮跤毛，菜刀攑懸懸，喙唸阿彌陀佛一刀 kā 切斷， 薑落鼎煏 hōo 芳，敏豆落鼎炒 hōo 油光透金，生蚵仔菇交礤簽 ê 紅菜頭做陣濫落去炒，無麻油芳靠想像力，畢竟阿母有交代入人門，隨人意，無 bueh 家己撏錢就愛換喙。
Mein Mann hat ein Paket bei Alnatura auf den To good to go gekauft.
Das gibt's Radieschen, Karottfel und mehr.
Das Paket für mich ist nicht so interessant außer "BIO".
Aber!!!
Ich glaube, wir haben großes Schwein gehabt.
Da gibt's viele Austernpilze.
Ich liebe Austernpilze sehr, egal ob gebraten oder Suppe.
Alle sind super lecker.
Den Tag, ich glaube, als ich das Paket gesehen habe
Ich bin sehr aufgeregt.
Deshalb ich vergesse eine wichtige Sache....
Die Wurzel abschneiden.
Denn ich habe das gleiche Problem wie früher....
Ich koche Enoki mit Hotpot, dann gehe ich zur Notaufnahme wegen Lebensmittelvergiftung
Den Tag, ich koche nicht.
Dann kenne ich dieses Wissen nicht....
Aber, jetzt nochmal?!
Ich kann das nur sagen.
Ich habe großes Schwein gehabt, ich lebe noch.
Weil ich wurde nicht durch meine Nachlässigkeit getötet.
My husband bought a package from Alnatura on the To good to go.
There's radishes, carrots and more.
The package for me is not that interesting except for "BIO".
But!!!
I think we were very lucky.
There are a lot of oyster mushrooms in it.
I love oyster mushrooms very much, whether fried or soup.
All of them are delicious.
The day I think I saw the package
I am very excited.
So I forget one important thing ...
Cut off the root.
Because I have the same problem as before ...
I cook enoki with hotpot then go to the emergency for food poisoning
The day I don't cook.
Then I don't know this knowledge ...
But now again ?!
I can only say that.
I'm really lucky, I'm still alive.
Because I wasn't killed by my negligence.
睏天路車日子 Camping mit Caddy (21)