亂皂𥴊仔店 ⓂⒺⒾⓃⓀⒾⓄⓈⓀ

• 感謝客服，感謝 Bug

Uī-tio̍h 理解痞客邦目前 ê 翻新進度，我以 gún 翁 ê 面冊口座搜揣痞客邦，面冊無引𤆬我伐向痞客邦，面冊引𤆬我閱讀歐飛先生，紲落來 ê 發展就是，啊，原來如貓。

以下是我個人閱讀「歐飛先生痞客邦大更新全系統」 ê 重點記錄。

1. 痞客邦換新頭家
2. 痞客邦按 2025.12.07 改版到今仔日，已經倚 bueh 四月日
3. 2020 進前寫部落格已經 m̄ 是 low m̄ low ê 問題
4. 痞客邦按 2004 到今一目𥍉 mā 二十一歲
5. 痞客邦廣告厚甲若波羅的海 ê 蠓
6. 付費使用者 ê 賠償問題到今猶無一个結果

以下是我個人閱讀心得，先順頂懸 ê 重點做記錄，紲落來跟綴歐飛先生 ê 分張練跤花。

1. 捎無摠頭 ê gogo+ 香港，原來是頭家有港資。
2. 啊，按 buē 慣勢到今 mā 沓沓仔慣勢，一目𥍉 mā 四月日，正港是一晃過三冬，一晃過一世人 tshan-tshiūnn 生離死離，生命 ē 揣著出口。
3. 原來我是史前時代 ê 人類。
4. 根據史前記持，台灣企業平均歲數是十冬到二十冬，痞客邦伐過二十一冬正港無簡單，kā 拍噗仔一下。
5. 痞客邦 tī Google ê 廣告確實厚甲若蠓，無佮意這點換別 ê 瀏覽器就好。像我個人就使用 CCleaner 來解決電腦版本厚甲若波羅的海蠓 ê 廣告。手機仔就據在伊，起因我罕得𫝻手機仔，準做𫝻 mā kan-ta 收聽 Podcast, YouTube 交報社 ê 網路新聞。
6. 這个問題我感謝痞客邦 ê 客服。

我 ê 痞客邦日子按怎開始，彼是一件餾清飯餾甲我家己 mā 飫 ê 過了代就 kā 準過，歐飛先生分張因為大改版選擇搬厝交加入「方格子」ê 使用心得交我相𫝛。我繼續停跤踮遮 m̄ 是文章僫搬厝，實際上就是因為搬過厝，我 tsiah 深深感受痞客邦是我 ê 天堂。

我搬厝 ê 時間是 2025.4 月到 6 月，我搬厝 ê 理由是 buē 爽痞客邦客服 ê 回答。這久翻頭看彼个 hōo 我閃過歐飛先生記錄 ê 賠償齷齪，我除了感謝客服猶是感謝。順這个感謝我又閣成做貓一隻，彼陣 ê Bug 凡勢就 tī 遮賴賴趖矣，所致 mā 來感謝 Bug 一下。

我是長期付費使用者，納數方式 mā 長期使用英國信用卡公司，這張卡片 tī 痞客邦猶未改變納數系統進前 m̄ 捌 buē 過數，自痞客邦改變過數系統，我 ê 信用卡 buē 過數，寫批請教客服，客服講是我 ê 卡片有問題，看有別張通替換無，我順𪜶 ê 建議替換猶是無較縒，就借 gún 翁 ê 信用卡來過數，猶是無應效，寫第二張批請教，隨見著客服功能 hőng 禁掉。生目睭發目眉，m̄ 捌看過遮爾仔無致意生理 ê 公司，我就開始整理行李搬厝。是講，我 mā 清楚這个狀況百面按客服來，總是 Khi-móo-tsih 就是 buē iâng，紲落來我深深體會「猶是舊愛上媠」，特別是我這款 kā 部落格做消磨時間兼敨放壓力，無其他目的 ê 人。正港無腫頷，踅過 Blogger.com, Wordpress.com, Wordpress.org 交「方格子」猶是遮上四序，準做我捎無歐飛先生所分張 ê 舊版交新版有啥物精差，若是硬 bueh 揣精差，我唯一 ê 感受是本底就少甲可憐 ê 字型選擇，這馬愈少，畫好 ê 表格本底會使得 ABCDEFG 無限制 ê 複製、貼起去，目今齊愛重來一斗，這是固定款抑是暫時款 tī 痞客邦大改版猶原完成進前，無人知影，總是遮 ê 改變 tuì 我無影響，唯一影響就是相片，自大改版 ap-lóo ê 相片 m̄ 知影走去佗落，這點交「方格子」一模模一樣樣 hōo 我 buē 慣勢，畢竟伊是部落格 m̄ 是愛料理。

痞客邦大改版底時 ē 完成？順歐飛先生 ê 文章讀落來，凡勢愛一冬，我順這个推論看這四月日 ê 變化，我個人是意愛現此時 ê 改變，準做我看無遐 ê 系統分析圖，總是見著有人按 Instagram, Meta,Google, Firefox 來，有一種心情「啊，一直認為無銷路 ê 𥴊仔店𠩤來猶原有銷路」ê 驚喜。

頂懸分張我寫部落格 ê 開始是熥甲飫，總是文章寫到遮猶是愛寫寡門扇枋 tsiah 有才調 kā 伊鬥 hōo 峇。我寫部落格無 uī-tio̍h 人望 mā 無 uī-tio̍h 趁錢，我寫部落格是 uī-tio̍h 敨放四常壓力，是 uī-tio̍h 生湠無法度接續 ê 四常，畢竟我現此時所講 ê 語言屬於 gún 翁無才調放棄 ê 自來，我隨時會使得 kā 伊擲挕捒 ê 半路相放伴。

最後，痞客邦大改版是好代抑是䆀代？Tuì 我個人來講是好代，伊滿足我 ê 好玄 hōo 我知影我 ê 𥴊仔店猶原有才調十八港路行透透 mā hōo 我無機會揣藉詞講遐 ê 粗糠還（huān）粗糠，冇粟還冇粟 ê 按算到今無執行是因為一日 tsiah 24 點鐘無夠用。總講一句，大改版 hōo 我實踐啥物號做捷餾 ē 有新體會 ê 道理。

是講，記性無好 ê 我按怎改善直直添 ê 新數（相片）？

食譜相片囥愛料理，行跤花囥 Instagram 抑是方格子，等痞客邦一切攢好勢 tsiah 沓沓仔 kā 𪜶徙過來。

• 一還一，兩還兩

自決定一還一，兩還兩，食譜歸食譜，心情行跤花歸心情行跤花，前台猶原翻塗 ê 文章有百外篇，後台按算栽欉 ê 文章 mā 有百外篇，這个現象踮向時我 ē 圓仔花 m̄ 知䆀，大紅花䆀 m̄ 知褒嗦家己是文若春華，思若湧泉，然後戇狗顧山草 tī 遮骨力做膨草挲草，這久卻據在伊生活 hōo 我成做貓想 bueh 知影，我這款食老出癖 buē 閣下性命逐十二月風吹，痟甲無尾溜 ê 轉變按佗落來？遮繩遐愖，我想這个自在轉變凡勢按遮來。

「敢有人來讀你 ê 文章？」，「無半身人來行踏，除了海底雞。」這是我唯一有才調想著 ê 轉變。

• 除了聲音，啥物攏無

𠢕早

搝鱟百冊 tsiah 發現罩霧已經 kā 規條街路攬牢牢，攬甲我 ê 世界宛然神魂猶在，形體卻消散 ê 拉丁語 Vox et praeterea nihil（除了聲音，啥物攏無）。

我 kā 窗仔開一个縫，頭按雺煙散霧探去，路燈峇微 ê 燈火是引𤆬天猶未拆箬就愛出門作穡 ê 人上溫暖 ê 日花。越轉身斟一甌燒茶，恬靜交罩霧勻勻仔等待日鬚來相借問。