Micky
Micky 是 Krka 露營區主人家飼 ê 貓 mā 是隻真𠢕拍獵佮保護露營區朋友 ê 貓
我已經 buē 記得家己是按怎佮真有個性 ê Micky 成做好朋友，總是到今我猶原 kā 這个溫暖記在心
一暗一隻無客氣 ê 野貓想 bueh 侵戶踏地閣 tuì 我嚷
Micky 無聲無說雄雄徛踮我頭前頭犁犁，尻脊骿翹 hōo 懸懸
無外久，彼隻無客氣 ê 野貓就走甲無看人，Micky mā 閣成做一陣風咻一聲無看人
隔轉日，主人家看著厝內 ê 貓成做我 ê 貓隨笑講我有貓薄荷
我敢有貓薄荷？
我 m̄ 知影，m̄-koh 我正經足愛貓，總是我向望逐隻貓攏有家己 ê 自由
無家己 ê 自由 mā m̄ 通綴我關 tī 櫳仔內底
小阿貓
這斗專工來 Krka 國家公園露營 m̄ 是 uī-tio̍h 伊 ê 水沖 mā m̄ 是 uī-tio̍h 露營地
這斗行踏 Krka kan-ta 路線拄拄好 ē 經過遮就順路 tī 遮露營
阿母食大骨伊 mā 綴 leh 食 ê 小阿貓
Gún 本底 ê 計劃是 tī Krka 露營一暝，押尾 m̄ 知影發生啥物代誌，按一暝成做三暝閣險險繼續露營落去...
本底嫌 Micky 真野 ê 翁押尾 mā 成做伊 ê 人肉眠床
翁囡仔時捌飼過貓，sóo-tí 伊 tuì 貓 ê 印象是厝內飼 ê 彼款貓 --- kan-ta ē-tàng 食人類做 ê 罐頭
我因為自囡仔時攏見貓、狗家己揣食抑是綴人類食，sòo-pái 手頭有啥就 ē 分張啥
這个無相𫝛 ê 態度 hōo gún tī Balkan 期間捷捷 uī-tio̍h 貓 ê 健康
𪜶認為 ê 健康，我認為 ê 自然冤甲 hōo 我想 bueh 管束貓 ê 自由做試驗 hōo 伊看
押尾 tī Omiš 看著 ē 食掠著鳥鼠 mā-ē 食人類款 ê 菜色就是 m̄ 食罐頭 ê 貓，伊 tsiah 開始學 ē 曉一支喙恬恬
「貓 buē-tàng 食人類 ê 食物」、「貓 buē-tàng 食牛奶」遮 ê 有 ê 無--ê，特別是「貓 buē-tàng 食牛奶」
隨在我耍 ê 貓家族
一日 gún 翁又閣 tī 踅唸我佮貓做陣食優格 ē hōo 貓食歹腹肚
主人家拄好行過，笑笑仔講「貓佮人攏相𫝛，喙斗是按囡仔時開始培養」
紲落來隨笑講「莫怪 gún 兜 ê 貓這幾日看起來若歕雞胿 mā 捷捷無轉來顧厝」
厝邊見著這个畫面攏掠做 Micky 是 gún 飼 ê 貓
我知影有 tsuē-tsuē 人分張貓 buē-tàng 食牛奶
總是這逝 Balkan 車日子，我學著 m̄ 管是貓抑是狗，胃口攏是飼出來 ê
至於(tsì-î)貓 ê 健康 mā 是人類培養出來，佮咱人無宛 2 體
只不過，有人飼 ê 貓確實較有法度活甲久長，有路無宅 ê 貓就需要運氣來鬥相楗
Omiš
自按帕(phè)水落地就蹛 tī 山腰 ê 我 tuì peh 山無興趣更加免講現此時流行 ê peh 石頭壁耍落崎仔頂
是按怎 ē 專工來這个拄好出這兩項 ê Omiš？
窮實 mā 無啥特別，就 Omiš 拄好猶閣有人 teh ka̋ng 修理鞋仔
Gún 就刁工換路線走來遮修理 tī 阿爾巴尼亞 bué 來 ê 2雙面料、手工攏真好 m̄-koh 糊就真 lóo ê 皮鞋
講著 tī 阿爾巴尼亞 bué 鞋 mā 是趣味
明明是 gún 翁 bueh bué 鞋，結果變做我佮頭家一人講阿爾尼亞語，一人講德語做陣 teh 討論鞋 ê 細節
Hōo gún 翁講「gún 某講台語應當 mā-ē 通」
確實講台語 mā-ē 通，不過我 mā 清楚知影頭家按本底清彩恁 bueh 曷 buaih 到斟酌 kā gún 紹介
M̄ 是聽有 gún 講 ê 語言，是伊看著我 tuì m̄ 捌假捌 ê 翁分拆伊 ê 鞋 ê 詳細
「我講德語是 uī-tio̍h m̄ 免閣開一遍工解釋 hōo 你聽」我講
講著語言這件代誌 gún 翁 mā 掠做 m̄ 管伊對方聽有英語抑是無，huînn-ti̍t 加講幾改聽無 mā 聽有
見看伊按呢，我攏 ē 問伊若是按呢生，是按怎台語佮華語到今你猶是聽無幾句
克羅埃西亞 tī 加入南斯拉夫聯邦進前，𪜶佮義大利 ê 關係真峇
Sòo-pái 見行踏克羅埃西亞攏無注意聽聲音，我攏 ē 掠做家己 tī 義大利 tshan-tshiūnn 這个景
Gún 本底 ê 計劃是 tī Omiš kā 鞋修理好隨離開，結果 Google 是被動，人是主動
Google ê 時間佮店頭家 ê 時間無相仝，就隨決定 tī 遮過暝
因為這个過暝成做我日後捷 tuì gún 翁講「gún 朋友 tī 芬蘭，你無 bueh 去我家己去」
是，tī 遮我因為有路無宅 ê 貓佮兩位按芬蘭來 ê 朋友按海王星 ê 距離成做一堵壁堵 ê 距離
Balkan 有足 tsuē 有路無宅 ê 貓，遮 ê 貓因為觀光客 mā 知影按怎利用家己 ê 古錐省費力趁一頓食
露營區 ê 主人大部份 mā buē 趕遮 ê 貓去別搭，甚至 mā-ē kā 𪜶飼三頓
像 tī 波士尼亞露營區 ê 頭家媽有閒就 ē 款三頓 hōo 貓食 m̄-koh 貓猶是貓 m̄ 是伊 ê 貓
Gún tī Omiš ê 露營區就是按呢，主人家有款貓仔罐頭，總是按罐頭色水來看，貓應當無佮意食
貓佮人仝款，有 ê 貓真枵饞 ē 一直綴你討物件食，有 ê 是恬恬佮你徛相倚等你 ê 回應
Tī Omiš 有一隻白柑仔色 ê 貓就是按呢，伊靜靜佮我徛做伙等我 ê 回應
Tī gún 翁提鞋仔去修理，我去灶跤款中晝頓，這隻恬恬徛 tī 我 ê 邊仔 ê 貓步頻 Miau 一聲
我越頭看有兩个看起來 kan-na peh 石頭壁 ê 領隊按灶跤行倚來，我隨 kā 清彩囥 ê 物件徒 hōo 齊 hōo 𪜶 mā 有所在通料理
一寢開始，這兩个若領隊 ê 人就一聲簡單 ê Hei 就無閣出聲，押尾綁頭鬃尾 ê 人問「你按佗位來？」
我無聽著伊講 ê 話，彼隻白柑仔色貓又閣 Miau 一聲，我越頭看發生啥物代誌 tsiah 知影有人 teh 問我問題
「我按臺灣來，恁 leh？」我問
「臺灣 mā 真 tsuē 有路無宅 ê 貓」對方目睭看若我飼 ê 貓跍 tī 我跤兜繼續講「我去過臺灣三改，gún 是芬蘭人」
「我上佮意 ê Nokia，Suomi」我笑應
因為貓 gún 冇談流浪動物 ê 問題佮𪜶 mā 認為我有貓薄荷，起因有路無宅 ê 貓 bueh 遮爾仔靜佮守規矩，真僫
因為 Suomi gún-ê 距離就敢若彼句相信伊是專工問蹛踮臺灣 ê 朋友按怎講「早安」ê 按海王星成做一堵壁堵 ê 距離
「恁來 peh 石頭壁？」芬蘭朋友問
「Gún 來修理皮鞋，m̄-koh 店關門 tsiah-ē 來遮露營」我講
那料理那開講 mā 那款卵包佮 kā 卵包剪甲細細塊 hōo 貓食
「你有飼貓？」對方閣看彼隻 mā 捌徛 tī 𪜶面頭前 ê 貓
「這是我唯一 ē-tàng 飼貓 ê 時間，因為𪜶需要自由佮空間 hâm 物競天擇 」我笑應
Tī Omiš 短短 ê 兩光一暝，因為貓我佮生份人成做記持中難忘 ê 朋友
Tī Omiš 短短 ê 兩光一暝，我感謝彼隻白柑仔色 ê 貓 tuì 我 ê 信任
我 mā 願這隻有緣無份 ê 貓，一切順序平安
多謝你成做我 ê 貓，mā 感謝芬蘭朋友 hōo 我 tī 旅程內底得著歐洲人窮實 mā 無遐爾仔白目
因為我是亞洲人，我 ê 跤手指頭仔已經無法度算有偌 tsuē 德國人請我去「摒掃環境」
準做我穿睏衫 bueh 去洗喙面𪜶 mā 照交代「環境無清氣，你敢 ē-tàng 去摒一下」
留言列表
冊 ▪ Bücher ▪ Books (4)
