。
Micky
Micky 是 Krka 露營區主人家飼 ê 貓 mā 是隻真𠢕拍獵佮保護露營區朋友 ê 貓，我已經 buē 記得家己是按怎佮真有個性 ê Micky 成做好朋友，總是到今我猶原 kā 這个溫暖記在心肝穎。
一暝當我順露營鼓仔燈行向便所間，Micky mā 尻脊骿痀痀向我行倚來 hōo 我直接認定伊食暗出癖斡頭準備換別條巷路。
Meow，Micky 猶原保持尻脊骿痀痀 ê 姿勢恬靜徛踮我跤兜，這久 ê 我想著人 tī 阿爾巴尼亞 tī 紅𪐞烏阿波羅交黛安娜交換手時間食下昏飯，兩隻應當是餐廳主人家飼 ê 狗，恬靜無聲行倚，𪜶無 tuì 桌頂 ê 糜飯金金相，伊 kan-ta 恬靜倚 tī gún 身軀邊雙目向前金金相，步頻其中一隻走向前行，兩隻狗一前一後大聲 tuì 見無半隻蠓 ê 山坪 Wau Wau, Wuff Wuff，gún 知影附近有狼緊 kā 糜飯吞落腹肚，上車歇睏到隔工貓霧仔光落車便所，tsa̋ng 暝步頻出現 ê 狗猶原在原位陪伴 gún hōo gún 更加確定，tsa̋ng 確實有狼群 tī 附近。
Meow，Micky 本底若安魂曲 ê 叫聲沓沓仔愈來愈像 bueh 交人相拍 ê 警告，我規仙人隨成做電火柱交 Micky 倚相偎，一直到 Micky 大聲 Meow 一聲若 gún 翁 teh peh-ha ê 聲音，我 tsiah 有法度繼續向行前。Micky 成做烏影進前，換我 tuì 伊金金相。
Micky 頭犁犁 tuì 無一屑仔風吹振動 ê 樹籬笆大聲警告，一隻雙目吐劍 ê 貓恬恬仔按樹籬笆行出來交 Micky 做伙相嚷，Micky 大聲 Meow 一聲隨走百米，彼隻雙目吐劍 ê 貓 mā 隨斡頭走百米。我想著 Micky 透早送來 ê 禮物 --- 一隻鳥仔。Micky 是厝貓 mā 是野貓，主人家 m̄ 捌提走伊 ê 本性。
小阿貓
「德國人愛狗 tsuē 過貓」隔轉工準備出外款菜，飼貓掠鳥鼠 mā 愛貓 ê 主人家喙笑目笑 kā 手頭厝內家己做 ê 蜂蜜送 hōo 我那講。
「遮是貓 ê 天堂 m̄ 管失去本性閣規日坐牢(tsē-kann)」我那說多謝那講心內話。
Gún 翁某 tuì 飼貓飼狗 ê 想法是一个行倒爿一个行正爿，我認為 m̄ 管是野貓抑是厝貓攏 ē-tàng 食自然食物，gún 翁認為厝貓厝狗就是愛食市面賣 ê 飼料。
這斗 tī Balkan(巴爾幹)狗仔莫算在內，m̄ 知見過幾擺無食飼料 ê 貓。Tī Berati gún 見著食 Lê-bóng ê 貓交愛食優格 ê 貓，tī 遮 gún 見著跟綴貓仔爸母吮骨頭 ê 貓仔囝 hōo 我第一時間掠做狗仔囝走 m̄ 著位食糜飯
。
阿母食大骨伊 mā 綴 leh 食 ê 小阿貓
Krka 國家公園 tī 克羅埃西亞 2010 確定加入歐盟我就請翁 kā 我鬥相共，按德國專工駛車來遮栽跤花。
押尾因為翁哭呻 gún 德國無日鬚 kan-ta Elsa hōo 我 tuì 囡仔時興趣趣 ê 前南斯拉夫漸漸失去興趣，特別是德國人 ê 廚房之一克羅埃西亞。
「克羅埃西亞有美麗 ê 海岸交天氣」當 gún 互相拔大索看 Tsiâ 喙花較𠢕盤，這話一出翁隨反悔，因為曝烏魚子交看海岸 tuì 我無路。
「M̄ 管佮意無佮意咱就是愛停跤 tī Krka tsiah 有法度接續向前行。」
「我 buē 曉看地圖，你 bueh kā 我載去深山林內擲挕捒我 mā 毋mˇ知diˊ。」
「我選 ê 露營區你絕對 ē 佮意」翁知影牽手 teh 張隨換話題，我 mā 清楚知影家己若翹頭查某烏白張隨 kā 話題轉做逐日攏愛餾 ê 事工「敢有大間超市通款糜飯材料？」
「有。」
本底嫌 Micky 真野 ê 翁押尾 mā 成做伊 ê 人肉眠床
Gún 翁本底 ê 計畫是踮 Krka 歇一暝兼收集附近地圖資料就繼續上北，伊是 OpenStreetMap 分散各地志工其中一个。我 mā 掠做伊分張 ê 露營區 buē hōo 我失望是指設備園區規畫。人真正到位我發見遮是天堂啊，遮 ê 貓 m̄ 是一隻是幾仔隻。
「咱敢有趕 bueh 轉去」我問。
「你 ē-tàng tī 遮飼貓三日」翁笑應。
隨在我攪擾 ê 阿貓家族
行踏 Dubrovnik 我一直掠做克羅埃西亞是無貓 ê Balkan，準做有貓 mā 應當是厝貓，像 Dubrovnik 彼隻 IG 網衝阿貓。
這斗車日子 m̄ 知是山線 tsuē 過海線，田庄 tsuē 過都市，我見著 ê 貓交土耳其 Istanbul(伊斯坦堡)無宛 2 體 ê tsuē。
這个變化 hōo 我想著路裡捷見著 ê 動物救援車交土耳其 hőng 講做臭頭雞仔動物保護政策 --- 早前 m̄ 捌見著 ê 貓仔狗𪜶 ê 運命交土耳其貓仔狗敢相仝？
搪著德國豬，按土耳其貓仔狗成做德國貓仔狗 --- 德國是收容土耳其流浪動物上主要 ê 國家。沐著打馬膠，𪜶敢 mā tshan-tshiūnn 土耳其貓仔狗仝款 hőng 集中一搭做陣行向塗州賣鴨卵？
厝邊見著這个畫面齊掠做 Micky 是 gún 飼 ê 貓
我想 bueh 請教露營主人家，總是克羅埃西亞語無半句，主人家 ê 英語 mā kan-ta 做生理彼幾句就隨放棄。
貓狗 ê 世界交人類相仝，搪著德國豬，生活甲若神 tī 法國(Leben wie Gott in Frankreich)，沐著打馬膠，就愛自立自強揣出路。
我愛貓，我唯一 ē-tàng 做 ê 代誌就是 hōo 𪜶繼續成做𪜶家己並尊存𪜶生存 ê 權利，m̄ 管有路無厝貓、厝貓抑是野貓。
Omiš
倚克羅埃西亞第二大城 Split(史普利特) 25 公里 ê Omiš，伊無 Split 現代城市 ê 面肉 mā 較無 Split 彼款 hōo 遊客 WOW WOW WOW ê 羅馬建築，不過伊 tuì 愛攀岩(phan-giâm) ê 人來講，伊是訓練技巧 ê 好所在，mā 是 tuì 洘秫秫海岸較無心適 ê 人 ê 天堂。
Omiš ê 14 有人講是山抑是山崎 mā 有人講伊是按希臘語 ê 驢仔轉化，因為伊 ê 山形 tshan-tshiūnn 驢仔。
自按帕(phè)水落地就蹛 tī 山腰 ê 我 tuì 向時例行愛做 ê 𬦰山運動揣無心適氣，tuì Tom Cruise tī Mission Impossible 2(無可能 ê 任務 2) ê 興趣更加 m̄ 捌按影片燒到現實。
無愛成做烏魚仔抑是做寡 Mission Impossible 2 ê 心適，是按怎八字無一撇 ê 專工來遮停跤？
Uī-tio̍h gún 翁 ê 鞋，Omiš 猶有傳統修理鞋 ê 店。
窮實克羅埃西亞猶原保存 tsuē-tsuē 修鞋店，只不過我經過 ê 時間齊無都合。講無都合 mā 無確定，起因 Google 翻譯 ê 文句無一句 hōo gún 捎有摠頭，只好繼續向前行，向望一路上北到奧地利界限，有法度搪著都合 ê 修理鞋店。Omiš 就是一路上北一路都合 ē 峇 ê 所在。
Omiš 交地中海 tsuē-tsuē 角勢歷史相𫝛，攏行過希臘交羅馬年閣 hōo 伊有厚厚 ê 希臘羅馬風格。
Omiš mā 交克羅埃西亞 tsuē-tsuē 角勢相𫝛，當你掠做德語比英語較弱勢，押尾卻發現德語比英語較強勢 ê 角勢。
這个因端，應當交獨立戰爭 tsuē-tsuē 人按德國避難有相關，Omiš ê 海岸有一搭紀念碑紀錄 uī 獨立戰爭犠牲 ê 人員，內底有 tsuē-tsuē 二十捅歲 ê 少年人 hōo 我思考，𫝛款年紀 ê 我搪著戰爭我 ē 按怎做？
我那看靜甲若玻璃海水，那愖這件代誌，海水猶原若玻璃，這件 mā 有可能發生 tī 咱番薯島臺灣身上 ê 過去，伊無引𤆬我得著啥物智慧，m̄-koh 目今 ê 大腸告小腸。
早前溫柔跟綴喙白翁享受克羅埃西亞美食 hōo 我掠做克羅埃西亞 kan-ta 這兩味 Pizza 交 Ćevapčići hōo 我骨力家己扞食食，這斗 tī Dubrovnik 食著舌觸 buē 離 ê Burek hōo 我頭殼生天線，猶未見著 Burek 隨 tuì 翁講「遮有 Burek 咱 bué 轉來做下昏飯」。
「你確定遮有 Burek」翁那𫝻地圖那講。
我無應話隨斡頭向露營區方向大步大步划，那划那想若無 Burek 加加家己扞鼎 niā-tiānn，人生 uī-tio̍h 愛有一个確定 ê 答案 tsiah bueh 向前行。
我想，自動參加戰爭 ê 人應當 mā 是這款想法，無法度確定家己追求 ê 自由 ē 落地 ē 開花，總是無去追求連這个夢想攏 m̄ 思考。
我那行那感謝天公伯 hōo 我 ê 好字運 mā 提醒家己，目今 ê 自在 m̄ 是一出世就有 ê 權利。
我那行那繩彼間坐踮車頂感覺伊若 Burek ê 店 mā 那聽翁 tī 後壁詬唸 buē 離 ê 地圖講遮無 Burek。
交下課 ê 學生若相閃身那 Hi ，交停跤 tī 路邊花矸 ê 有路無厝阿貓挨拶，目 mā 斟酌繩 Burek，「遮」我大聲喝一聲。
尻脊骿向我 ê 店東聽聲無越頭，無閒糋馬鈴薯條 ê 少年人 mā 無交我挨拶，我交翁恬靜徛 tī 櫃檯看菜單。
「遮無法度 hōo 咱 m̄ 捌字看告示點菜，按呢咱就逐味點一份」我講。
「我試這个翻譯軟體看覓」凡事攏愛照家己需求來前，無想 bueh 重耽 ê 翁若揣網路連線，若講。
Uī-tio̍h Burek 交出錢 ê 人主意，我願意放捒家己 ê 脾氣交翁 tī 遐揣網路，總是較有耐性猶是比 buē 過枵饞。
「我想這應當是菠薐仔，這應當是 Tshì-sù」我手那指那講，本底尻脊向 gún ê 店東 mā 斡頭過來講「是，這是菠薐仔，這是 Tshì-sù」。
店東德語講甲若德國人，我第一个反應。
第二个反應是，頭家應當慣勢德國人喙白 ê 囉嗦，sóo-tí 一聽著德語耳空直接關門
。
完成交易，翁某兩人坐踮若天色若鹹鴨卵卵仁 ê 街路那食 Burek 那看人生百態，一對英國男女按百外公里冤家量債行到 gún 面頭前步頻成做無聲。
「咱是𪜶 ê 聖誕節」我講。
這對冤家出海口攏聽有著 ê 英國男女 m̄ 知敢是步頻想著有人聽有英語 sóo-tí 做伙停戰？
總是，見𪜶暫時停火 hōo 我感覺「家己真正是好牽手」，因為我 buē 烏白跳童交隱私攏捎出來做冤家本，準做家己認為無人聽有我 ê 語言。
Burg Starigrad
Omiš 無 Krka 闊閬閬 ê 自然景緻 mā 無第二大城 Split ê 人文建築，不過伊交歐洲 tsuē-tsuē 鄉鎮𫝛款，只要有山就有堡寨 Burg/Festung。
我 tuì 堡寨是看甲哽胿，一聽著門票 3€ 隨想 bueh 斡頭，總是一想著跤已經按山跤𬦰甲遮無拆票參觀實在拍損，隨撏錢拆兩張票入堡參觀。
Burg Starigard 是這久揣資料 tsiah 知影 ê 名，伊 ê 狀況交連結分張 ê 相片所寫 ê Die Burgruine Starigrad 仝款是斷籬倒壁，不過重要 ê 觀景台有維護甲誠好。
按觀景台 ē-tàng 看采蒂納河/Cetina tī Omiš 出海口交山海成做一片 ê 景緻。
行踏 Omiš ê 人大多數是佮意攀岩 ê 人，我這个看無半項攀岩裝備 ê 人，一日透早交兩隻 kā 露營地當做厝宅 ê 有路無主 ê 阿貓做陣 tī 廚房無閒，兩位紅頭鬃 ê 查埔人無一聲挨拶開始𪜶 ê 早起頓。
慣勢 hőng 當做空氣 ê 我 mā 無要意家己 ê Hallo 若石頭擲入水 ê 無水泱(iann)繼續吩咐阿貓 m̄ 通致著德國人六分鐘出好菜 ê 喙斗。
「你按佗落來」縛毛尾仔 ê 查埔人問。
「臺灣」當我準備回應恬靜一睏 ê 泰國，查埔人講「我去過臺灣三斗，我 ê 朋友蹛高雄，我真佮意大龍峒 ê 攀岩。」
我無聽 m̄ 著，確實是高雄，確實是大龍峒「高雄天氣誠好，臺北𠢕落雨，我蹛四季分明 ê 中部」我笑應。
縛毛尾仔 ê 查埔翻譯 hōo 朋友聽，我認真聽這个語言捎無一个摠隨 kā 翁分張 ê 觀察請出來請問「恁敢遮 ê 攀岩教練?」
「Gún 按芬蘭來遮攀岩，恁敢 mā 是？」
第歐洲 ê 土地第一斗搪著芬蘭人閣捌臺灣 hōo 我一開喙無法度收煞。
按 uī-tio̍h 修理按阿爾巴尼亞 bué ê 鞋來遮停跤到臺灣流浪動物 ê 問題。
「臺灣交遮相𫝛有 tsuē-tsuē 流浪動物」芬蘭朋友講。
本底交我徛相倚 ê 兩隻貓 mā 因為𪜶 ê 手頭有肉，按我 ê 跤兜換桌去奶𪜶 ê 跤兜。流浪動物問題我無法度回應，只好微微仔笑。
「你佮意貓，你敢有飼貓？」
兩隻臨時變心 ê 阿貓見著煎鍋仔 ê 卵包落瓷仔隨徛來 Meow Meow Meow，我那揣位 hōo 貓食糜飯那幌頭講「德國無適合飼貓，貓蹛德國特別是 gún 兜無自由。」
「物競天擇，性命家己 ē 揣出路」芬蘭朋友講。
我目那看進前 tuì 翁哭呻 ê 環境 --- 油肭肭 ê 煎鍋仔、塑膠碗、開封無綁樹奶 ê I-tá-lih，我 ê 天公伯這 mā 是「物競天擇，性命家己 ē 揣出路」ê 進化。
眼前 ê 芬蘭朋友看 buē 出任何胃腸滾絞 ê 無爽快，甚至已經添新碗，世間事真正闊莽莽 hōo 我無法度有一个正確答案。
隔轉工準備離開，芬蘭朋友向行說伊應當有向臺灣朋友請教並認真鏨 tī 頭殼 ê「早安」，我 mā 請教𪜶按怎講芬蘭語 ê「𠢕早」佮「來去」。
「你有學習語言 ê 天份」芬蘭朋友 tuì 我第二斗有法度 kā 芬蘭語 ê「𠢕早」佮「來去」講甲無啥走精歡喜甲。
「我 tuì 語言有興趣，總是能力不足無法度逐个語言攏學 ē 曉。」
互相說 Auf Wiedersehen 我決定明年上北波羅的海三國 mā bueh 行踏芬蘭，準做 kan-ta 有法度停跤一工。
栽欉 --- 2022.10.23
翻田塗 --- 2024.11.14
留言列表
冊 ▪ Bücher ▪ Books (4)
