亂皂𥴊仔店 ⓂⒺⒾⓃⓀⒾⓄⓈⓀ

愛沙尼亞首都 Tallinn 塔林

因為遮是 Hansestadt sòo-pái 我家己補豬腦按呢愖，Tallinn 是 Orden kā 自身語言 Tal 崁坑、山溝佮當地語言 linn 城市敆逝 ê 字名，總是答案 m̄ 是 kā 夫字看做天就是標準答案。

Ē 無聲無息步頻空襲 ê 海雞母 Sturmmöwe/Gull

 愛沙尼亞 ê 首都 tī 德語號做 Reval(1918.2.4前)、tī 露西亞佮瑞典語 mā 有其他 ê 號名，總是遮 ê 號名佮頂頭 ê 名攏有底代？

Tallinn 這个名是按 Taani-linn(a) 遮來，意思是丹麥 ê 城市抑是丹麥 ê 堡寨。

是啥物因端 hōo 愛沙尼亞人 kā 家己 ê 所在講做丹麥(Tan-bi̍k)人 ê 堡寨？

這一切著愛按1219年丹麥國王 Waldemar II. (Dänemark)  mā kā 家己成做 Caesar 名句 Veni, vidi, vici(我來，我見，我征服) ê 副本講起。

起 tī 10世紀或是11世紀 ê Toompea/Domberg 主教堡寨

總是 kā 家己 ê 城市講做丹麥人 ê 堡寨 mā m̄ 是背骨或是一日到晏 kan-ta 想 bueh 成做外國人，是這个所在確實是按外國人 ê 手頭按柴起 ê 防禦(gū)堡寨成做市。

總是，外國人 mā 無烏白號名，Reval 這个名是按愛沙尼亞本底就有 ê 歷史名稱號名。

舊城

歐洲 ê 歷史多數佮宗教有底代，Tallinn mā 相𫝛。

1219 年丹麥國王提著本底是 bueh 防禦外來者 ê 堡寨就隨 kā 伊改做教堂，總是領土敢若愛情，無愛佮情 ê 基礎是 bueh 按怎唱家後。

另外，你硬 ka̋ng 娶入門，其他𫝛是食銅食鐵 ê 人𪜶敢 buē 做𫝛款 ê 代誌？

1227年飼鳥鼠，咬布袋，你認為 ê 換帖的 mā 會 uī-tio̍h 家己 ê 偏頭開門放虎入來，Tallinn tī 主教 ê 允准德國入城，順紲管理愛沙尼亞大部份 ê 所在。

舊城門

總是，人心 m̄ 是時鐘，一改固定一世人攏相𫝛 buē 按24點成做28點，伊 kan-ta 有法度按24點行轉去0點，Tallinn 又閣成做丹麥講了準算 ê 年間。

不過，這段時間1285年 Tallinn 已經成做 Hansestadt 漢薩同盟商業重鎮之一。

紲落來 ê 歷史就若這幾張圖，明明著是家己 ê 主人卻一直愛成做外人 ê 喙䫌肉。

在人煠

隨人提

在人講我講了 tsiah 準算

露西亞 m̄ 是蘇聯年間 tsiah 來遮，現此時是通人捌 ê 和平愛好者瑞典 tī 隨个搶做大帝 ê 年間 mā 佮露西亞 tī 遮搶做北方頭人。

愛沙尼亞第一間大學 mā 是第二大城 ê Tartu 塔爾圖是瑞典過東海 Ostsee ê 見本。

Niguliste kirik/Nikolaikirche Tallinn 塔林

M̄ 管 Tsiâ 來遐插旗，塔林交東海相𫝛 m̄ 管你是 Tsiâ 你永遠 buē 捅頭成做我 ê tsiâ。

像這台往過 ê 奢颺成做目今 buē hőng 斟酌看 ê 工具車。

電影戲園

 雙目跟綴若肚胿仔 ê Tallinn 文章泅，m̄ 知啥物因端頭殼懶屍 ê 海馬一直按東海泅到太平洋 ê 臺中。

臺中按一个無啥外埠頭人認捌 ē 角勢成做一个沓沓仔有小寡名聲 ê 城市是按 1895 年 8 月日本人 kā 扞權範圍湠到這个從來無一个外來者請教伊敢 bueh 交𪜶誠懇鬥陣 ê 海島臺灣開始。 

臺中建城 ê 歷史無通仔交 Tallinn 相比並，總是臺中 mā 是按這个名換過彼个名，準做有大部份 ê 時間是 hőng 結做一个名 tshan-tshiūnn 地理課本讀 ê 波羅的海三小國。

舊城

行踏 Tallinn 除去聽無 ê 語言，大多數聽著 ê 聲音齊這个 Orden 到底是 Tsiâ-ê Orden 伊凡勢 buē 記得歷史 ê 跤跡，自本就是按這个活甲厭𤺪 ê 角勢徙岫到另外一个新角勢繼續生湠原生四常 ê 後代燃茶 buē 記得愛禁火 hōo 茶鈷呻 buē 離 ê「遮佮 gún-ê 風格無啥精差 ê 無宛 2 體。」

遮 ê 茶鈷引𤆬我食餌，食往過聽著人講「臺灣 ê 京都：臺中」ê 驕傲。 

雙目合做 m̄ 開喙 ê 目蚶，kā 耳仔生 ê 兩葉挽掉，Tallinn 是塔林 m̄ 是帝國 ê 延續，不過恁 ē-tàng 繼續五錢豬仔，掛一支喙，那踅 Tallinn 那繼續燃茶。

有14 ê 看板

Kā 五路行透透生湠 ê 餌擲入糞埽桶，欶一氣大氣沓沓仔 kā 目蚶開喙，天無邊，海無角，準做遮捌有 Orden 條頓騎士團，遮捌有 Peter der Große 彼得大帝，遮捌有 hōo 瑞典成做歐洲大支骨之一 ê Gustav II. Adolf 古斯塔夫二世.阿道夫，遮猶是 Tallinn 交遮 ê 影跡交我𫝛款，總有一日攏 ē 成做水按圳行無法度繼續 tuì Tallinn 月光跤看人影，家己看家己大指指揬揬。

「借問 Orden ê 後代，你敢 mā 捌跟綴茶鈷指指揬揬？」

「指指揬揬猶是無法度改善井欄(nuâ)看做石舂臼 ê 病灶」Orden ê 後代笑應。

月光 buē 曝得粟，城市 buē 堪得比，每一个城市鄉鎮齊有伊按牛食稻草，鴨食粟 ê 需求生湠伊交人交流 ê 生張。

離開月光區，水鬼 mā 隨升做城隍，升格到閒囉囉，看啥攏心適。

有14 ê 看板

整理相片見著墨西哥風格 ê Toy Shop 頭殼內 ê 海馬又閣泅去明明就是墨西哥人硬捌假扮西班牙人 ê Àu-tah。

亞洲人凡勢罕得行踏露營區，sóo-tí 搪著露營地 ê 人 kā 我當做摒掃人員要求我清遮摒遐 mā 按無四序轉做無要意文文仔笑準過，紲落來 kā 遮 ê 無屬於我 ê 問題交無必要 ê 情緒放外外。

總是彼日 tī 露營區搪著 ê 無四序 hōo 我一時間無法度放外外，起因我洗好 ê 碗箸從來 m̄ 捌超過家己 ê 範圍，交我做陣洗碗 ê 先生卻一直 kā 我拭好 ê 碗箸用指頭仔沓沓仔點轉去水槽內底。

「請問我敢有超過範圍？」自我踏入廚房這位先生就開始若著災仝款交我相對看。

全露營區攏聽 ē 𪜶翁某交囡仔講英語 ê 著災先生用輕視 ê 面腔講母語 --- 西班牙語，聽無西班牙語 ê 我用跤頭趺想 mā 知影問題，總是渡假期間無需要 uī-tio̍h 一尾三斑 kā 家己快樂 ê 心情舞甲臭，繼續清家己手頭 ê 碗箸。

因為廚房倚 gún-ê 倚地一架桌距離，這位先生 ê 西班牙語 hōo gún 翁聽著，伊隨倚過來交對方好禮盤撋，對方見著德國人西班牙語講甲若母語閣有法度掠出伊 m̄ 是西班牙人這點 hōo 伊碗箸款 leh 隨離開廚房。

「伊是墨西哥人 m̄ 是西班牙人」翁換英語 tuì 露營主人家講。

這个事件 hōo 我想著都市傳說，墨西哥白人有一種膦蔓 ê 驕傲，tī 這位假扮西班牙人 ê 墨西哥白人身軀頂我見證著這个事實𫝛時 mā 看著較早 ê 家己，無夠額 ê 自信真愛成做 Single White Female，總是這个癖交我 ê 距離 tshan-tshiūnn 地球交烏空 ê 揣 buē 著。

起因，成做別人 buē hōo 家己 hōo 別人看咱上目交 hōo 咱家己 buē ka̋ng 看無目的。 

有14 ê 看板

這擺 ê 車日子搪著厚甲若蠓 ê 龜鱉叨趖 hōo 我敨放我真𠢕 tuì 家己 ê 情緒叨撚(lo-lián)。

這擺 ê 車日子 mā hōo 我閣一斗熥歹食是歹食，閣是米粉底 ê m̄ 通 buē 記得小王子 Le Petit Prince 教咱 ê 代誌上重要的物件，用目睭是看袂著的 L'essentiel est invisible pour les yeux。

The happy Chimney sweeper/快樂煙筒摒盪工

Tī Tallinn 停睏 ê 五日四暝，tī 船埠公車站因為菜頭 m̄ 管 gún 按怎搝猶是捎無摠 ê m̄ 知愛徛佗一爿，只好請教 mā teh 等公車 ê 母囝。

「歹勢 kā 恁攪擾，我想 bueh kā 恁借問，這條線敢是走市區 ê 線？」

應當猶 tī 青春期 ê 查某囝頭犁犁 m̄ 敢擔，本底恬靜看眼前風景 ê 媽媽隨徛起來「露西亞語？」

我幌頭表示 buē 曉，這位古錐 ê 媽媽見著我有法度應 buē 曉，繼續講露西亞語到我無法度幌頭為止，伊擔一下仔肩歹勢歹勢講「No English」，我 mā 綴 leh 擔一下仔肩「Kein russisch」，古錐 ê 露西亞媽媽隨笑講「Deutsch ein bisschen」就請查某囝 kā 伊 bueh 分張 ê 訊息轉英語 hōo gún 讀 mā 𤆬 gún 看車幫路線，押尾閣交 gún 坐仝班車轉去市區。

這个經驗 hōo 我無法度無著蛆 tuì 翁講「全世界齊是一壼金魚 buē 堪得一尾三斑，露西亞人 mā 是。」

Gún tī 拉脫維亞搪著無好鬥陣並驕傲 ê 露西亞人，tī 波蘭交立陶宛柴杙城市聽波蘭人講波羅的海 ê 露西亞三斑按怎吵家抐宅，我猶原相信告子 ê 中性。

猶原是過冬鳥一支交翁做陣拆票去拉脫維亞首都行跤花，我搪著 ê 露西亞守衛比 gún AIRBnB ê 主人家閣較好鬥陣。

閣一斗上重要的物件，用目睭是看袂著的 L'essentiel est invisible pour les yeux。

歐洲駝鹿 Panino

按 Tartu 一路繩食物，繩到 Tallinn 猶原放棄愛沙尼亞 ê 手路，tī gún 按算去露營地附近 Maxima 揣寶，hōo 翁成做茶鈷哭呻呔無見半隻 ê 駝鹿總算出現。

「你敢 bueh 試鹹汫」翁問。

「我相信伊臭羶(hiàn)甲無敆我喙」我應。

出發愛沙尼亞進前 gún 翁 tī Telegram 社群就捌讀過別 ê 社友分張來到愛沙尼亞絕對 buē-tàng 落勾駝鹿好味素。

Gún 按拉脫維亞一過柴杙四目就一四界金金相駝鹿餐廳抑是駝鹿餐車，總是人已經車到 Tallinn gún 猶原無見駝鹿好味素 hōo 我 tī Tallinn 心酸酸唱 buē 離。

凡勢心酸酸唱甲駝鹿心肝穎 hōo 伊感受 gún 翁 tuì 伊 ê 愛 tī gún 準備離開 Tallinn 舊城，駝鹿總算出現，伊 ê 出現 mā 成做 gún 翁 ê 空襲警報，我 ê 疏開。 

試一喙鹹汫，確定駝鹿肉無合我喙斗隨 bueh kā Panino hâinn 轉去 hōo gún 翁，本底無海雞母 ê 街路步頻出現一師海雞母，攻擊！

Uī-tio̍h buaih 加入海雞母交 gún 翁 ê 戰爭，我隨從去壁角疏開放 gún 翁一人喙那緊窒 Panino 手那交海雞母作戰。

是講，這師 ê 海雞母需要指揮官好好仔訓練。

按芬蘭來 ê Hesburger

M̄ 知愛沙尼亞 ê 食食敢有受丹麥 ê 影響，起因我見著 ê Ha̋m-bú-kuh 店 mā ē-tàng 用厚甲若蠓來形容，特別是 Hesburger。

Hesburger tuì 第二逝上北波羅的海 ê 我 buē 講生份，總是車日子到 Tallinn 進前我 m̄ 捌 kā 伊看上目過，畢竟 Ha̋m-bú-kuh m̄ 是僫揣 ê 食物。

另外，食伊一套餐我 ē-tàng tī Maxima 食三文魚食虎蝦食甲飫喙。

足敆脾土 ê 馬鈴薯條

「自立陶宛看伊看到愛沙尼亞無 kā 試鹹汫感覺誠對不住伊 neh」我 tuì 猶原數念駝鹿好味素 ê 翁講。

「遐 mā 有 Kebab」翁應。

「我承認今仔日 ê 我貧惰款糜飯，總是貧惰無表示我 tuì Kebab 較有興趣」我那講那行入人洘秫秫 ê Hesburger。

菜單交 Mcdonald's 麥當勞、Burger King 漢堡王無啥精差，料理手路看起來 mā 無 Copenhagen 哥本哈根料理手路吸人目睭仁，越頭看排隊 ê 人，手點等待人數，雞母喂...「點！」

衝碰戰勝理智，翁仔姐隨人手機仔捎出來𫝻 Hesburger 按芬蘭起家，頭內 ê 海馬又閣踅去 Omiš 奧米什 ê 日子。

「我知影 buē-tàng 按幾个人 ê 行為認定大多數 ê 人，總是我 tuì 芬蘭人 ê 喙斗正港好玄」我 kā 手機仔畫面交 hōo 翁看。

「免驚惶，Hesburger ē kā 碗箸盤洗 hōo 清氣 tsiah 料理」翁笑應。

Tī Omiš 奧米什搪著 ê 芬蘭朋友 hōo 我步頻想 bueh 成做研究人員，m̄ 捌清過碗盤就直接料理 ê 𪜶是按怎猶原有法度規仙人好好交我破豆？

M̄ 知是大腸告小腸抑是人潮洘秫秫食物就 buē 老 hōo Hesburger ê 馬鈴薯條交 Ha̋m-bú-kuh 攏足敆我喙斗，而且是敆甲若轉去 Copenhagen 哥本哈根。 

Copenhagen 哥本哈根食著 ê Ha̋m-bú-kuh hōo gún 翁仔姐到今猶原數念。

不過，成做支持包裝減少 ê 我，見著外盒內底除了包一層紙閣箍一个紙圓箍猶原無法度那食那莫成做六月蚶，開喙臭「本底 95 分，這久賰無 5 分。」 

精神標語露營區附近 ê Meow

Gún 本底按算 tī Tallinn 停跤四暝三日，總是別人 ê Tallinn 交 gún 認定 ê Tallinn 無相仝，我 ê 14 是像 tsuē 冬前人 tī Wien 維也納搪著翁 ê 仝鄉，押尾發見這个仝鄉連 Landkris 郡/縣攏無一撇，就按呢了一工 35€ ê 錢停跤 tī 連洗身軀 ê 燒水攏愛限制交一屑仔攏無資料紹介 ê 捷運交火車站 m̄-koh 有 tsuē-tsuē 精神標語 ê 露營區。

精神標語露營區附近 ê Meow

「這个露營區是佬仔，評論是白賊話，遮確實有車頭 m̄-koh 是一日兩幫車，上班佮下班」gún 翁出外巡田路轉來氣掣掣分張伊 ê 發見。

「這白賊話兼佬仔是你心甘情願接受 ê 敢 m̄ 是」我應。

按 OpenStreetMap 就有法度掠著大約仔 ê 路況，總是 gún 翁就愛耳空重「OpenStreetMap 交 Google 無相仝，地圖無遮 ê 車頭資料凡勢是新資料無登錄。」

「孟子主張性善，荀子主張性惡，告子主張中性，你 m̄ 捌這三个人 m̄-koh 自今仔日開始你學著萬事 m̄ 通 kan-ta ē 曉重敧爿」。

露營區附近搪著 ê 手工麭店

納一暝 35€ ê 萬事 m̄ 通 kan-ta ē 曉重敧爿 gún 總算揣著適合停跤 ê 露營地 --- Saue 紹埃。

第一工按遮出發 Tallinn 看船幫去芬蘭，第二工出發去芬蘭，第三工勻勻仔踅 Tallinn。

Gún 停睏 ê 露營地 m̄ 是觀光地區，m̄-koh 徛位交彰化抑是竹南相𫝛是通 Tallinn 附近重要 ê 火車路線。

按 Tallinn 看船幫轉來，天氣猶原燒烙翁仔姐牽手沓沓仔行踏這个 gún 遮 ê 過客凡勢比當地人 tsuē ê 城市，見著這間 gún 翁講店名是德國字姓 Buxjöwden 手做麭店隨斡入去交觀。

我 tuì 德國人字姓無研究，總是見著店內 ê 甜粅粅交麭 hōo 我想著傳統露西亞-法國烘焙手路，食著 ê 味素 mā 較實較無德國味 m̄-koh 丹麥氣味有厚厚 buē 飫喙 ê Bá-tah 芳交無甜甲連狗蟻攏喝救命 ê 甜。

「我 tuì 恁德國字姓無研究，總是有兩蕊目睭 ê 姓踮北歐 mā 一大拖，特別是瑞典交芬蘭，敢 m̄ 是？」

「看板寫 1406 起家....」

「1406 是一个你交我無分 Tsiâ 是 Tsiâ m̄-koh 一四界求生存 ê 年代，像福爾摩沙三族記 ê 瑞典船長德國醫生。」

我無確定 Buxjöwden 敢是德國姓，總是我確定遮 ê 麭好食甲我腹內 ê 蝶仔賴賴飛。

Saue 車頭附近搪著 ê Meow

我 tuì 貓 ê 品種無研究，不過當 gún 按 Tallinn 轉來 Saue 搪著這隻看起來交普丁大帝誠有兄弟面 ê 面隨停跤聽候伊 ê 恩賜。

這隻懊嘟面 ê Meow 見 gún 停跤 mā 隨按樹蔭行倚並 kā 尻川蹺懸懸 hōo 我心臟 kiōng-bueh 恬去，感謝伊 ê 恩賜。 

Saue 車頭附近搪著 ê Meow

自彼日交伊相辭，我又閣跟綴眾貓 ê 跤步好玄伊敢是露西亞白貓？

起因，伊交厝邊飼 ê 露西亞藍貓足相𫝛，m̄ 管偌爾仔 su-fu 伊永遠是一號表情 -- 懊嘟面，古錐甲。

Saue 車頭附近搪著 ê Meow

這久巡田園，翻田塗見著彼久 ê 相片，腹內歇睏 m̄ 作穡 ê 蝶又閣蝶蝶飛。

Saue 車頭附近搪著 ê Meow

露西亞全白貓是露西亞貓族 ê 白貓族，伊 mā hőng 號做大天使貓。

露西亞白貓有一軀短閣白 ê 皮毛，𪜶 ê 起源一般 hőng 認定是露西亞白海地區。

以上是 Google 大神賞賜 hōo 我 ê 智慧。

Saue 車頭附近搪著 ê Meow

Saue 車頭附近搪著 ê Meow

栽欉 --- 2023.08.27

翻田塗 --- 2024.12.12