亂皂𥴊仔店 ⓂⒺⒾⓃⓀⒾⓄⓈⓀ

世界文學台讀少年雙語系列㊂《銀河鐵道 ê 暗暝》佮其他 ê 冊按臺灣寄到德國，整理好勢準備 bueh 排冊櫃想著文青 ê 分張「無法度成做大色貨、頭篩仔」想著 Hesse ê 性命行到尾站，你敢有法度聽出音符升G調抑是降A調，喙角成做月眉，冊 mā 是廣東目鏡，隨人佮意佮賣麵 ê 看人撒油 ê 大細心。

畢竟，文青紹介 ê 冊佮伊寫 ê 冊讀煞我 mā buē 合味。

我無興探討文青 ê 世界，總是我 tuì Anne hőng 按呢講真 m̄ 甘 mā 認為 tuì Anne ê 譯者感覺無公平。

不過，世界著是按呢，食食有家己 ê 喙斗讀冊 mā 是，m̄ 免要意，上重要 ê 代誌是揣著家己 ê 喙斗，sóo-pái 我正經真歡喜有機會讀著 Anne，青春少女m̄ 管Ὕπνος➀按怎來招猶原堅心成做暗光鳥佮台視約會 ê 日子。

Ah--我 ê 青春少女，想著褲袋仔袋磅子，uī-tio̍h bué 冊 kā 便當錢儉落來 ê 噤喙。

噤喙 m̄ 是講無食，噤喙是講放棄學校遐有糋雞腿 ê 便當換創赤肉炒豆干按呢。

便當凡勢是這久 ê 料小，伊卻是庄跤囡仔 ê 山珍海味。

Ah--青春少女愛食 m̄ 驚肥 uī 冊放棄山珍海味，uī-tio̍h Anne 按冊行到電視成做暗光鳥 ê 日子，快樂、滿足。

少女年間收藏 ê Anne 佮逐學期來排擔一月日一本俗賣五塊 ê《The Couple Purple》(紫色姊妹花)、《Arsène Lupin》(亞森羅蘋)、《聊齋》等等攏綴塗牛去旅行，彼久喝講有一日 bueh 綴遮 ê 冊行踏世界 mā 正經攏差不多有行跤到，睏神 ê 希臘、格林童話 ê 德國、亞森羅蘋 ê 法國、幸運 ē-tàng 那作穡那行跤花 ê 中國、五月花號 ê 美國...蹛踮加拿大愛德華王子島(Prince Edward Island) ê Anne 是到今猶未實現心望 mā 漸漸 let it be ê 花缽仔種菜，無緣(faˊ badˋ eˋ zung coi,moˇ ienˇ)佮有緣才做伙，做伙是有緣。

離別二十外冬 Anne 又閣轉來相揣，而且是按水帕(Phè)就聽著 ê 聲音，這種機緣有偌 tsuē？

聯考數學科一直是必巡鴨卵，上二專微積分又閣重上一年 ê 我 buē 曉算，俄羅斯轉盤無膽敢耍 mā m̄ 知愛揤幾擺 tsiah-ē 得銃子一粒，總是我知影這是深甲若マリアナ海溝按呢 ê 緣份。

➀ 希臘神話睡神

《青瓦厝 ê 安妮》

Anne of green gables von Lucy Maud Montgomery

譯者：黃昭瑞、白麗芬

㊓ 前衛

ⓦⓦⓦ 聚珍臺灣