亂皂𥴊仔店 ⓂⒺⒾⓃⓀⒾⓄⓈⓀ

我相信每一个觸著心 ê 事件攏有伊 ê 啟發佮提醒。

受訪者「我無認為我是瑞士人，正經，我一屑仔攏無認為我是遐 ê 人，m̄-koh gún 爸母確實是瑞士人。」

受訪者「我六個月大 hōo tī 加拿大揣著穡頭 ê 爸母𤆬來遮，瑞士我捌轉去 mā-ē 曉講瑞士德語，我猶是無認為我是瑞士人，正經講。」

受訪者「若是硬 bueh 講我佮瑞士 ê 關係 kan-ta 我 tī 遐出世佮爸母按遐來這層 niā-tiānn。」

受訪者「我 ê 生活過甲若瑞士，m̄ 是我佮意瑞士抑是認同瑞士，這只是承爸母教 hōo 我 ê 四常，像這久 ê 釣魚。」

這是 3Sat 看著 ê 紀錄片 mā 是開破半路參加節目就隨掠受訪者是回泅三文魚 ê 我理解這 m̄ 是倒轉去家鄉 ê 故事，mā hōo 本底想 bueh 踅台 ê 我開始停跤繼續看落去上重要 ê 一節。 

「你外省人！」

「你 m̄ 是外省人，你是本省人！」

「你 m̄ 是臺灣人，你是臺灣人！」

這部記錄片 m̄ 知按底時起鼓，總是煞鼓愛等到翻點，隔轉工猶有代誌愛無閒 ê 我無綴 leh 踅到翻點，不過 tuì 我來講我已經看著影片上重要 ê 一節，身份認同佮 uī-tio̍h 面子沐沐泅 ê 姻緣。

本省佮外省愛按怎區別，我 m̄ 知影，總是我真清楚知影我 tī 地球 ê 臺灣島出世大漢，sóo-tí 我 buē 閣 uī-tio̍h 這个問題惱氣兼跳童，像受訪者按呢「你若認為我有瑞士人 ê 範，彼 kan-na 因為我承 gún 爸母教 hōo 我瑞士傳統，這个傳統我 mā 拄好佮意 niā-tiānn。」

總是 uī-tio̍h 面子沐沐泅 ê 姻緣 hōo 我認真思考家己 ê 問題。

「咱若行向隨人付米，隨人落鼎絕對 m̄ 是走私野味抑是門扇枋鬥 buē 峇，是一个掠做家己 m̄ 捌纏綴爸母跤步，一个無法度跟綴恁兜跤步，sóo-tí m̄ 願意煞戲 mā 愛煞戲」新正 tsiah 拄起鼓，我已經攢好紙佮筆 bueh hōo gún 翁牽名，雖罔這个方式 tī 遮徛無位，總是彼是我 ê 保領，我 buē 要求伊拆一仙五銀 hōo 我。

「你 tī 做啥物」訪問者問。

「烘雞肉、煎牛排、備馬鈴薯沙拉 ê 材料...」受訪者答。

「今仔日有人客 bueh 來？」訪問者問。

「無，m̄-koh 今仔日是我 ê 歇睏日，我 bueh 快樂做寡我愛做 ê 代誌」受訪者講。

「你無快樂」訪問者問。

「我哪有無快樂，我 ê 婚姻遮爾仔幸福美滿、兩个後生又閣乖巧、我 ê 事業成功人閣蹛 tī 天堂，呔 ē 無快樂...」畫面恬靜一睏仔後「我逐日頂真過日 hōo 四常圓滿美麗 hōo 人欣羨....」畫面又閣恬靜一睏，本底真有元気(Genki) ê 受訪者步頻成做消風 ê 四跤仔「我 m̄ 知影愛按怎講落去，總是我清楚知影我有好好仔綴編劇搬戲，搬伊意愛 ê 家庭戲齣...」

受訪者 ê 拆白 hōo 訪問者一時 m̄ 知愛按怎接喙，畫面沓沓仔越向無開電火 ê 角勢伴「無人要求你搬戲...」，無 tī 畫面內底 ê 受訪者應聲「咱攏 tī 搬戲」這久我 tsiah 知影訪問者是受訪者 ê 後生 mā 想著 2016《日常對話》ê 評論「我們需要不用超譯的日常對話」 。

當「愛」成做理所當然 ê 跤枷，你 ê 鬱卒是無枷夯交椅，你 ê 需求是硬 bueh hōo 我 ê 鬱拗 。

Tī 女主人詬唸一睏仔，男主人 tsiah 恬靜徛起身行向客廳綴女主人手指 ê 每一个日子直 tìm 頭講「你安排就好，綴你安排行就好....」ê 畫面換做兩人靜恬𤲍 tī 膨椅，男主人若四角磚總算踏著一細角恬靜𫝻手機仔，女主人若四角磚齊伊 ê 位䖙 tī 膨椅，看起來恬靜恩愛 ê 畫面，中間隔一个明顯 ê 界線 --- 像刺蝟按呢，無法度徛相倚。

「我 uī-tio̍h 你已經無 teh 看德語節目，這久你閣無歡喜，你是 bueh 按怎....」

設定好 ê 攝影機 m̄ 捌振動，食飯桌頂 ê 人 mā tshan-tshiūnn 攝影機仝款，攝過 ê 影片一直轉一直轉，轉到有人願意揤暫停。

「這久 bueh 11:50，你有 10 分鐘 ê 時間通訪問，你問題敢已經攢好勢？」男主人徛 tī 若磺火燈下 ê 灶跤 tuì 攝影者講，畫面徒去食飯廳揤暫停後 ê 畫面「願得一心人，白首不相離 ê 睏破三領草蓆，掠伊心肝 buē 著.....」

「無人愛冤家，總是人閣較按怎臭耳聾見著人喙開合 m̄ 捌改變 mā-ē 生頭清面」男主人回答，後生問「押尾恁做陣講寡啥」，男主人看一下仔手錶講「今仔日是我 ê 歇睏日 mā 是無 tī 箍仔 ê 日子，我有自由選擇底時精神、底時食飯....時間到 12 點，訪問結束。」

「猶未 12 點」後生應。

「今仔日是我 ê 時間，我講時間到就時間到」男主人講，畫面繼續踅轉去女主人目屎流目屎滴䖙 tī 眠床𤉙苦湯 hōo 後生佮伊做伙啉，我 mā kā 電視關掉，越頭 tuì 翁講「恁 tī 電視頂」。

我講這句話無特別 ê 14，若講有啥物特別 ê 14 kan-ta 若人講我捌去過美國，去過美國 ê 你 mā-ē 綴 leh 喋美國，只是喋到佗落隨在人個性。

「𪜶 ê 問題佮我無底代 m̄ 免 tuì 我講」翁 buē-su 食著炸彈紲喙講，本底無情緒 mā 準備 bueh 綴愛睏神 onn-onn 睏 ê 我隨若食著 moo-hui 精神飽滇講「你若堅心認為我 ē 綴恁兜 ê 跤步行，較早睏較有眠，暗安」斡頭行 uī 睏房，m̄ 插伊紲落來 ê 解釋。

隔轉日伊又閣餾一斗伊 ê 14，我 mā 恬靜聽伊餾，伊看我一句話攏無應目屎輾出來講「我真正無彼个意思...」

「我無興趣研究你 ê 問題，總是恁兜 ê 苦湯無適合我，我 mā 無愛食」講煞手攑懸表示，看診時間到，我 bueh 出門，起因自搪著宗助佮阿米我 mā 揣著方向，sòo-pái m̄ 免閣了時間掠做家己是華佗有法度治伊 ê 病灶，不過我需要治家己 ê 病灶。

現此時我清楚知影家己猶無彼个勇氣斡頭就走，總是我已經節著脈，知影按怎煎藥仔 hōo 家己食，曷彼个德國爸母 ê 老嬰 leh，伊敢知影按怎揣醫生治病？

我 m̄ 知影，總是我知影伊 mā teh 揣辦法來治伊 ê 歹症頭，起因這粒瘤無挽，m̄ 管伊按怎成做爸母 ê 副本，搪著𪜶無歡喜就撏銀兩來廕𪜶 ê 火氣解決問題，這 tuì 我來講 m̄-nā 是白了工閣是柴樠點火較光油。

未來 ē 成向佗一爿，我 m̄ 知影，總是我 bueh kā 家己拍噗仔，起因我 mā 沓沓仔成做《拯救莎曼珊》(Saving Samantha)，有法度佮問題對話 tsiah 有法度解決問題。

感謝 Blog hōo 我有一个所在薅草、翻塗、翻草兼吐苦湯，感謝 Blog。

痞客邦自 2025 年兜開始大改版，到這陣 mā 三月日有矣，改版工程猶未完成 hōo 我總算揣無理由繼續慢牛厚厚屎尿來合理眼前 ê 齷齪。

2024 tī 瑞典駝鹿園區露營地 hōo gún 翁舞甲心狂火著「離車出走」，一个人徛踮湖邊看彼粒若豉 buē 透心 ê 鹹鴨卵仁金烏交若烌姑娘面肉 ê 月娘互相隔橋對看，徛踮橋中央 ê 我雄雄感覺家己比 Sa̋n-tóo-it-tsih ê 俗麭皮閣顧 gún 翁怨，若是按呢呔討 buaih 放伊自由，畢竟我無可能翻身做𪜶爸母 ê 面肉。齷齪死家己 ê 情緒一敨掉，𪜶爸母 ê 吐憐涎 m̄ 捌閣出現 tī 遮。

2025 出發西班牙進前 gún 翁提出離緣，我順伊 ê 意願開始行離緣路，tī 這段想 bueh 寫部落格卻揣無 Muse ê 時間，我翻頭整理文章讀著比河溪閣較密 ê 哭呻文，我隨決定全數擲汽油桶燒掉。總是一日　24 點鐘，我有別 ê 生活愛過，就放遐 ê 文字繼續 tī 遮生活，有時間 tsiah 來挲稗仔。

2025 迒到 2026 這段期間，gún 翁提出 ê 離緣無成功，我挲 ê 稗仔 mā 無幾篇，想 bueh 記錄 ê 落南行跤花法國、西班牙、葡萄牙因為痞客邦 ê 大改版 hōo 我無法度分類相片，我就 kā 時間徙來挲稗仔，然後得著新 ê 家己。

向時我有這个慣勢，認為遐 ê 心情是人生 ê 一部份，需要 uī 伊設一个專區，這久 ê 心情宛然 die Glut ê 這段話：

Und das Fegefeuer der Zeit hat die Erinnerung von jeglichem Zorn gereinigt.

時間 ê 煉獄 kā 心狂火著 ê 記持洗汰 tam-tam。

烏貓姊搪著 ê 恐怖情人 tī 時間 ê 煉獄 kā 心狂火著 ê 記持洗汰 tam-tam，大牛換肩學習 ê 人性㾀勢 mā tī 時間 ê 煉獄 kā 𪜶放水流，困擾 gún 翁仔某龍鳳姻緣 ê 毒藥 tī gún 翁願意澈底改毒確實有沓沓仔 teh改變。我 ê 部落格因為痞客邦 ê 大改版 mā 勻聊仔洗呔無必要 ê 情緒。慢牛厚尿屎者搪著比家己閣較蠻皮 ê 人確實會骨力，像我這久。不而過我愛這个蠻皮。感謝痞客邦。