亂皂𥴊仔店 ⓂⒺⒾⓃⓀⒾⓄⓈⓀ

• 好吉兆

「比並是人 ê 本性，m̄-koh 悲傷拗鬱攏 buē-tàng 捎來楔一世人嫁一个翁，不二嫁(價)，日時搬布袋戲，暗時暗歌仔戲顧面子 ê 有量就有福。」

本底無 bueh 聽EP486 黃越綏｜【名人專訪】來自愛爾蘭的鐵粉 Feat. 蔡雅芬，畢竟人攏愛看籠面頭篩仔，不過我又閣愛做貓，押尾猶是揤落去無拍斷任何一分鐘。

雅芬 ê 外國人生，我這个佮伊𫝛款攏是外國人新婦 ê 人，聽著伊分張「伊第一斗起跤動手，我就拆白講，第二斗就 m̄ 免閣參詳」我隨笑出來，這个笑 m̄ 是取笑是一種我 mā 是這款態度 ê uī 伊佮我杯底無飼金魚 ê tchin-tchin。

我 tuì 現此時 ê 少年人按怎對待龍鳳生活無理解，總是國校六年 ê 我，身軀邊有太 tsuē kā 食鬱當做仙丹來練 ê 朋友，sóo-tí 當我聽雅芬按呢分張，我有一種驕傲，驕傲 gún-ê 勇敢佮獨立。

囡仔時阿母捷講「查某人 ē-tàng 無翁 buē-tàng 無岫」這久翻頭去想，阿母正經智慧飽滇，雖罔囡仔時捷感覺這就是無受教育 ê 人 ê 貪，這久理解 m̄ 是𪜶無受教育，是𪜶 ê 學習環境佮我無相仝，另外，人生智慧 m̄ 是影印課本就 ē-tàng 一帆(phâng)駛甲到 buē 落湳。

我佮翁 ê 犀牛照角冤家量債寫甲 ē-tàng 成做波蘭森林 ê 眾阿菇，所以 m̄ 免繼續熥清飯來食，總是我 mā 好玄，慣勢成做爸母鳼鴒掠做家己是囡仔和尚，有口無心按呢傳世佛經，踅踅唸，窮實是歹瓜厚子，歹人厚話愛死蛇諍做鱔魚 ê 翁現此時 ê 恬靜敢猶是承𪜶爸母 ê 魔王嫁查某囡，假鬼假怪，總是這是一个好現象，伊 ê 乞食揹葫蘆，假仙 hōo gún 得著德國有 80% ê 人 Magnesium/鎂(bí)乏(ha̍t)帶來 ê 平和。

講著鎂我正經愛講自伊綴著老母 ê 跤步 hőng 𠞭膽閣看著爸母 ê Beschwerden(病痛問題)，伊開始接受像 Hello 醫師分張 ê 食物，特別是豆、米糧、菜蔬遮 ê tī 𪜶兜 buē 出現 ê 食物，德國人四常食啥 ē-tàng 參考 Die Ernährungs-Docs - Essen als Medizin，自伊接受遮 ê buaih 遮 ê 慼，伊確實 buē 閣若吳大獅看 m̄ 是勢面，雙跤 áu leh，tī 庄正身邊 tō 跪落。 Pa̍k 頭巾 ê 兄弟看盟主跪--落去,面向天,雙手伸長長 teh 拜，大家也 tuè 伊跪...(鄉史補記◎陳雷)按呢真𠢕気持ち交繃，我本底就無愛佮人捙盤 mā 愛平靜，自一日照鏡發見家己 mā 歹查埔厚同(tông)年，歹查埔厚姑姨，特別是這支喙愈來愈成𪜶小妹正剾金爍爍，倒剾一缺一缺，我隨 kā 佛祖點香會失禮兼頓手印 tī 香烌講「我 buē 閣一支日本剾刀攑 leh 四界倒剾。」

「我 m̄ 知影恁小妹有啥物敨 buē 開 ê 拗鬱，總是 gún 相信你 ê 態度是你 ê 神魂你上自然 ê 元神，恁小妹生頭清面無快樂，生頭清面講出來 ê 話敢若溢刺酸仝款，酸甲 hōo 人擋 buē 牢」這是五年前見著翁小妹 tuì 伊講 ê 話。

這久想彼久，愛平靜慼人講話欺負人 ê 我竟然 mā 綴田螺較循 mā 彼逝 ê 食老出癖無照直起交繃兼剾洗，總是 tshan-tshiūnn 我一直褒唆 ê 性地，我已經過彼个愛綴時行 ê 年歲，所以我 buē 食菜，食菜，食到肚臍為界 ê 慢牛厚屎尿抑是 buē 曉泅嫌溪狹，攏是別人害我按呢生。

M̄ 管翁是草人幔棕蓑，假鬼假怪抑是正經摠著頭摠，理解問題 mā teh 改善問題，按我聽著刺鑿 buē 閣緊做六月蚶，開喙臭，這就是一个好吉兆。

• 練仙、話仙

翁看我跍 tī 烘爐頭前，笑講節氣若是行到秋分佮烘爐𤲍做伙 mā 是一个抾拾燒氣 ê 好辦法。

我笑應講囡仔時，寒人來挨拶 gún 正經攏是跍 tī 烘爐佮塗窯頭前𤲍燒。

「塗窯是啥」伊問。

「田塗起 ê 窯」我講。

「炕塗窯聽起來誠適合露營，你敢猶閣 ē 記得按怎起塗窯」伊問。

「我 kan-na ē 曉動喙 buē 曉動手」我講。

「媠某 mā 𠢕動手」伊那講那挲伊彼圈度。

「是你 m̄ 甘嫌」我講。

「揣無物件通嫌」伊應。

「一支喙講甲糊瘰瘰，m̄-koh 我佮意」我大力 kā 使一个目尾做瘦氣。

「遮 ê 管(Rohr) tī Stuttgart」聽伊按呢接喙我笑甲 kiōng-bueh buē 喘氣，m̄-koh 閣甜甲若 hőng Winne pooh 倒規桶蜂蜜仝款 ê 甜 tshan-tshiūnn 這碗番薯飯，人生 ê 鹹酸甜攏需要家己去 tiàu 味。

Tī 遮揣無人佮我練仙，我就揣翁來話仙。

• 鬥工課

今年露台影戲加一位前幾冬 m̄ 捌看過 ê 朋友「山雀」。

伊 ê 出現 hōo 慒心家己 kā 包袱仔款款出門掠外，繩 Like Amsel like your ma ê 「Amsel/歐洲烏鶇/Eurasian blackbird」mā 轉來。

看來，彼欉 hōo 我擘腹厝頭家若是 kā 剉掉遮 ê 鳥仔 bueh 蹛佗位 ê 問題，窮實是我家己驚惶 ê 投射。

是講，我 mā m̄ 知影是按怎家己 ē 遮爾仔愛驚惶，不過我清楚知影彼若是自囡仔時就慣勢 ê 自然，咱攏愛活 tī buē 振動 ê 慣勢內底。

彼欉 hōo 二樓厝邊嫌閘光 ê 相思仔已經 hōo 厝頭家剉甲連拄 ē 曉行路 ê 幼嬰仔攏有法度自自在在坐起去𨑨迌，花園 ê 鳥隻猶原無減半隻，甚至閣添新朋友山雀。

動物面對咱人類無講無呾 ê 改變，𪜶有法度自然綴這个改變繼續自在生活，是按怎我愛按呢 kā 家己縛 tī 見 buē 著 mā m̄ 知伊敢 ē 照我設定 ê 戲文來搬戲 ê 未來遮爾仔慒心，我正經是食飽換枵。

是講按呢自我對話，我 mā 好玄遐 ê 綴日鬚踅圓箍 ê 鴟鴞，敢有興趣 tī gún 遮停跤？ 

讀 Struggling Millennial homeowner: I didn't need my degree 我想著 tī 遮搪著 ê 臺灣朋友佮鄭華娟女仕 tī 書寫德國系列捌分張 ê 故事。

鄭華娟女仕寫著德國人見著閒甲一日貼貼 ê 伊是啥物態度佮伊家己 ê 自在，tī 遮 ê 臺灣朋友轉去臺灣講家己留學德國、嫁德國人、生半仿仔囝 mā tī 德國做穡佮蹛德國 ê 窮真，tī 一日固定頭路結束伊猶原愛做散工過日 ê 無奈。

「彼日 H 問敢做 ē 慣勢 hōo 我想著我捌佮你分張 ê 作者，伊寫 ê 故事 mā 想著 Y 知影問題煞繼續要求後生愛行𪜶翁某 ê 路」讀著有超過70% ê 美國人感覺家己足散，mā 聽著 uī-tio̍h bueh 增加收入 sóo-tí 姑不而將成做網衝 ê 受訪者，𪜶 ê 故事 hōo 我想著 tī 德國 ê 日子隨佮翁話故事。

「伊準備 bueh 退休，伊無可能佮咱仝款去鬥遐 ê 工課來補伊開慣勢 ê 額」翁講。

「我知，我提起 H ê 故事 kan-ta 步頻想著，我 m̄ 捌要意你遮 ê 朋友𪜶 ê 人前人後捎五仁妝激面」我講。

Tī 我猶未徒岫進前我捌聽人分張德國人 tuì 職業佮學歷 ê 態度，總是彼陣 ê 我人無蹛踮遮 mā 無 tī 遮作穡 tuì 遮 ê 分張無啥特別 ê 感受，人徒岫來遮開始綴遮 ê 朋友感受𪜶 ê 無四序，總是凡勢我真清楚家己 ê 狀況，sòo-pái 我 m̄ 捌 uī-tio̍h 遮 ê 激面感覺無四序，顛倒若見著無洗身軀 ê 鳥鼠按呢，足鼠(趣)味。

一个人有法度因為別人 ê 職業轉變開始有無相仝 ê 態度，這 mā 是厲害。

是講，凡勢這是足四常 ê 代誌，總是我做 buē 出來，起因攏是工課，m̄ 管歡喜做抑是 uī-tio̍h 一頓飽 tsiah 做穡，攏是好代 ê 無宛 2 體，sòo-pái 我 buē 因為比論本底是醫生 ê 人，換頭路換到徛超市櫃檯就認為伊決定有啥物大問題，猶是替伊感覺卸面子。

Gún 翁朋友佮其他人 ê 故事寫到遮就好，畢竟彼是別人 ê 代 m̄ 是 gún-ê，gún 清楚知影家己需要啥物佮過啥物日子較重要，特別是 gún 翁某 m̄ 免 uī-tio̍h 退休擘腹錢無夠開，抑是揣無工課。

論真講，德國有 tsuē-tsuē 穡通做，總是面子大過遐 ê 無合身份 ê 工課，sóo-tí 愛 hōo gún 翁佮家己拍噗仔。

Gún 翁猶未行到退休，總是伊認為生活 mā m̄ 免過甲遐爾仔密，sóo-tí 伊換散工來做，無做散工 ê 日子就是 gún-ê 車日子露營，我 mā 做散工，起因一日閒甲掠蝨母相咬 mā m̄ 是辦法，無散工 ê 時間就寫 Blog 抑是翁某做陣出外行跤花佮車日子露營。

我佮 gún 翁攏 m̄ 是𠢕趁錢 ê 人，總是 gún 攏清楚知影面子正經無值甲需要惜命命愛拚勢展媠 ê 彼面 hőng 看，畢竟歲頭 ē 疊，面皮 mā-ē 皺，一日做仙有啥人 ē 要意咱拑牢 m̄ 願放 ê 面子。

好好過日子，享受生活比面子佮擘腹 m̄ 知 ê 未來閣較重要。

當家己較有耐性願意沓沓仔繩無仝語法故事 tsiah 發見新聞故事敢若無分角勢。 

像美國 CNN 講著社會經濟問題，德國 mā 出現 bueh 相仝 ê 議題，準做外表看起來無相仝，總是本質無宛 2 體，m̄ 願放下彼張紙𤆬 hōo 咱 ê 激派頭，人生猶是大腸告小腸 buē hōo 咱有時間食飽換枵，像這久 ê 我有法度食飽換枵 kā 寫過 ê 食譜拊掉提來仕上げ是因為我無才調得著彼張紙 m̄-koh 我願意放下激派頭鬥工課。

是，我 ē 講鬥工課，起因願意接受我 ê 工課，𪜶攏引𤆬我認捌家己 m̄ 捌抑是掠做理解，窮真是 m̄ 捌半項 ê 世界。