亂皂𥴊仔店 ⓂⒺⒾⓃⓀⒾⓄⓈⓀ

無事有事啉一杯溫泉窟上出名 ê 溫泉水來保康健兼紅膏赤蠘

德語號做 Karlsbad，捷克語號做 Karlovy Vary ê 卡羅維瓦利，雙爿 ê 意思齊是國王 ê 溫泉。神聖羅馬帝國皇帝兼波希米亞國王 Karl/Charles IV 14 世紀發現這个所在。

鹿仔發現溫泉 ê 角勢

溫泉 ê 起源有兩種講法，一个是國王 ê 狩獵犬跋落一个濆滾水 ê 水窟仔，護衛見著水坑有浡泡隨試水質並把水質狀況講 hōo 國王知影，國王凡勢知影先人傳落來 ê 記持，隨下令 tī 水窟仔附近建立鄉鎮。

一个講法是一隻喙焦喉渴 ê 鹿仔 uī-tio̍h 揣水啉 tī 遮用伊 ê 跤蹄挖塗揣水，押尾 tī Jelení skok(Teplá)坑崁挖著 Karlovy Vary 第一个溫泉窟。當地居民 uī-tio̍h 感念伊 ê 貢獻 tī Teplá 起造一座亭子做紀念。

Karlovy Vary ê 溫泉 mā 按傳說中 ê 國王窟交鹿仔窟湠甲目今 ê 14 仲溫泉窟。這 14 个溫泉窟 ê 水溫無一个無相𫝛，m̄-koh 有相款 ê 礦物鹽。我試過三窟，三窟溫度正港無相𫝛 m̄-koh 味素齊相𫝛 ê buē 敆我喙。我猶是佮意探訪 Hradec Králové 搪著 ê 山泉水，甜矣！！！ 

根據考古研究，Karlovy Vary tī 青銅時代就有人類定居，彼陣 ê 人 mā 凡勢發見燒燒 ê 水有特殊作用。

M̄ 知影遠古時期 ê 人敢愛啉這水，入鄉隨俗，入港隨灣，我認真綴人排隊承水來啉，我看每一个人啉甲心滿意足，我啉一喙隨吐出來 hōo 逐家笑咍咍咍 mā 算溫泉水 ê 另類療法。

根據 Karlovy Vary 出土 ê 文物 tī 日耳曼民族猶未遷徙到 Karlovy Vary 進前，遮是斯拉夫民族 ê 徛家，12 世紀尾日耳曼民族沓沓仔遷徙到 Karlovy Vary，遮就按斯拉夫文化轉做日耳曼文化。

這个無城市權利，規个城市 mā 齊是工匠交礦工遷徙 ê 鄉鎮 tī 1370 升格做自由城市，其權利交 Elbogen(Loket)相𫝛。Karlovy Vary mā 按一開始 ê 燒溫泉(Warmbad/Vary)庄，轉做 Kaiser-Karlsbad 卡爾皇帝溫泉閣轉做 Carlsbad，押尾確定以 Karlsbad 做主體。

上出名 ê 溫泉出泉窟

這溫泉本底是設定洗浴使用，像羅馬浴場，1522 一本記錄溫泉水有治療效果 ê 冊出世，本底是洗浴使用 ê 溫泉水就此升格做醫療等級 ê Trinkkuren，就是咱現此時行踏 Karlovy Vary 攏 ē 做 ê 慣勢，啉一杯溫泉水保健康。彼陣 ê 人是 kā 伊當做藥水 teh 啉。

1898 年，一位字名號做 Meyers 按呢紹介 Karlovy Vary ê 溫泉，遮 ê 溫泉水逐滴攏有飽滇 ê 礦物質，若逐日透早 kā 啉 3~6 杯兼浸溫泉做水煙浴 tuì 身體 kan-na 好無敗壞。

1582 ê 做大水交 1604. 8.13  ê 火厄 kā 繁華 ê Karlovy Vary 洗盪甲 kiōng-bueh 變死城，紲落來 ê 三十年戰爭(1618~1648) hōo 規个城市 ê 損蕩是愈嚴重，嚴重到送入加護病房插管治療猶是死殗殗，準做 1707 奧地利哈布斯堡皇帝 Joseph 一世賜 hōo 伊皇家自由市，伊 ê 病症猶原無啥起色，一直到露西亞皇帝 Peter 大帝 1707 探訪 Karlovy Vary，遮 tsiah 有機會按塗炭仔翻身做皇后。

1711 交 1712 露西亞皇帝 Peter 大帝來遮進行溫泉治療(Kurbetrieb)，大帝隨贊助 Karlovy Vary ê 溫泉醫療建設，總是 Karlovy Vary ê 命盤敢若行 tī 卯字，1759 火神又閣來相借問，Karlovy Vary 又閣一斗行入斷籬倒壁 ê 階段。

運途行 tī 卯字，只要相信有時星光，有時月光，卯字 mā-ē 成做錢字。

Karlovy Vary tī David Becher 醫生無停歇 ê 推捒溫泉療效交研究發表「遮 ê 溫泉有硫酸鈉，對身體真好」得著眾人支持，1795 Karlovy Vary 開始推出溫泉療養票券，Karlovy Vary 又閣按塗炭仔成做皇后。

 

一戰進前這座城市 99% 是德國人，一戰結束捷克斯洛划克成立，遮交 Kadaň 相𫝛當地德國人要求歸 tī 德方(德國抑是奧地利)，捷克斯洛划克軍隊派兵鎮壓，這場鎮壓無行向 Kadaň ê 結果，有人傷亡。 

1938 德國第三帝國侵入捷克，Karlovy Vary 交附近 ê 城市鄉鎮敆伊一大區，成做第三帝國 Eger 行政首府。

二戰造成 uī Karlovy Vary 𤆬來落坐 mā 𤆬來城市破壞，1944 ~ 1945 停戰進前，Karlovy Vary 食美軍 ê 炸彈交德國本土無宛 2 體，車頭空襲炸彈食甲無看樣，兩間有插紅十字 ê 病院 mā 愛食炸彈，規个城市又閣行入斷籬倒壁，不過行 tī 磅空，猶原揣有一絲光，彼就是溫泉設施區無受著任何損壞。這 m̄ 知影交指揮官敢有相干。

Ē 記得讀過 ê 資料捌講過，戰爭 ê 空襲軸心國交同盟國齊有共識(kiōng-sik)，準做 bueh tuì 歷史城市擲炸彈，炸彈 buē 使得擲 hōo 古蹟食，一直到德國 kā 炸彈擲去倫敦重要地標是西敏寺抑是聖保羅教堂，記性無好，閬過，這个你毀我古蹟，我 mā 無客氣 ê 互相請古蹟擲炸彈 tsiah 開始。德國 tsuē-tsuē 古都像來自海布隆 ê 小凱蒂(Das Käthchen von Heilbronn) ê Heilbronn 就食美國炸彈食甲變荒地，讀著 ê 資料講盟軍本底按算 mā bueh kā 科隆大教堂轟炸甲無見枝骨。唉，選舉選 m̄ 著人 m̄ 管有偌 tsuē 祖公仔產 mā 無較縒。

BMW 經銷店

戰後 Karlovy Vary ê 德國人 mā 行向 Kadaň ê 方向，按上大族群行向消失。本底私有化 ê 溫泉成做國營溫泉(1946)，出名 ê Karlovy Vary 電影節 mā tī 1946 年登場。

Karlovy Vary 電影節

Gún 來 ê 時間聽好拄著電影節，m̄ 知影是年歲行到 tuì 影星無遐爾仔迷抑是 tuì 電影 ê 熱情無閣 tshan-tshiūnn 烏貓姊遐爾仔熱情，所致見著影星無啥感覺，m̄-koh 見著少年囡仔逐影星 ê 烏頭車誠有感覺「囡仔，危險！」

猶未行踏 Karlovy Vary 進前，我掠伊加入聯合國世界文化遺產久長時間，這斗傍歌德 ê 福利 hōo 我有機會 kā 捌來遮探訪 ê 翁挐來遮熥跤跡，我 tsiah 知影伊加入聯合國俱樂部無到 3 冬 ê 時間。

人看待世事 ê 態度正港受廣告影響，我 ê 朋友 90% 來過 Karlovy Vary，我 ē 掠伊做聯合國俱樂部敢受朋友 ê 影響？

起因朋友見聽我去寡𪜶 m̄ 捌去過 ê 城市齊講，呔 buaih 去看文化遺產，像這像彼。

人人齊講愛去 ê 巴黎，我到今 mā m̄ 捌探訪，呔討按呢生，花缽仔種菜，無緣 ê 鉛粉掖無夠額。

蘇聯改體，自然資源帶動出外經濟，德國 ê Baden.Baden 成做露西亞人上愛探訪 ê 城市，交德國 Baden.Baden 𫝛款 ê Karlovy Vary mā 是，不過好日子敢若停跤 tī 太平年閣，行踏 Karlovy Vary ê 日子，我聽無半句俄語 m̄-koh tsuē-tsuē 英語，順這个趨勢來推斷，無露西亞遊客 ê Karlovy Vary 觀光人潮已經若青鱗仔插插插，有露西亞遊客 m̄ 就若羊仔疊做陣。

早前寫行尞行跤花錄看遮 ê 建築心內 kan-ta 這个想法「曷 m̄ 著是歐洲傳統建築」這久認真 kā 練過 ê 跤花栽做樹欉，我發見這 m̄ 是歐洲傳統建築 ê 簡單，這是一个城市經歷火厄、水厄、戰爭 ê 韌性，畢竟 m̄ 是每一个城市有才調跋倒閣徛起。像 Karlovy Vary 行過火厄 ê 復甦，1890.11.24 一戰進前 ê 24 冬又閣哲著水厄，紲落來 ê 一戰、二戰到今規个城市面肉猶原有才調維持，這 m̄ 是好字運，這需要眾人 ê 努力，當然 mā 需要一个有才調引𤆬逐家行向閣較好路途 ê 𠢕人，像 David Becher 醫生，以當地特性結合醫學研究 kā Karlovy Vary 按落坐推捒到繁華。

傳統甜路 Oblaten

猶未行踏捷克我掠做義美「法蘭酥」是法國餅，行踏捷克見著伊隨紮一盒轉來交 m̄ 來捷克行跤花 ê 翁做陣享受。

「這是法國餅，真好食哦」我那講那展寶 hōo gún 翁看。

「這是傳統捷克餅」伊連看都無看隨窒一喙講。

我 m̄ 信篤，伊隨泅網路揣資料 hōo 我讀，讀煞我隨講台灣講伊是「法國餅」來掩崁我 ê 看字生圖：「法蘭酥」ê 法蘭就是講法國。 

我印象中 ê「法蘭酥」成做朋友喙內 ê 無食無去過 Karlovy Vary ê 溫泉餅。

捷克倚 gún 兜駛車兩點外鐘就 bué ē 著伊，tī 遮想著朋友交代 ê 任務隨泅入去朋友交代有歷史 ê 店 bué 2 塊來食。有歷史 ê 店做出來 ê 味素交捷克一般超市做出來 ê 味素有啥無相𫝛？我舌鈍食 buē 出來，m̄-koh 我佮意超市 ê bué 賣氣氛 ê 免食人 ê 火氣。

準備牽車見著老朋友決定愛來翕一張相，gún 翁見著伊 mā 猶原這段話「gún 德國禁止這款酒，恁台灣竟然無禁止。」

我無食 buē 去要意酒按佗落來，一斗翁仔姐做陣去 bué 紅酒做紅酒燉肉，gún 翁見著伊隨講伊比高梁 58 度閣較恐怖，我 tsiah 知影伊原來按捷克來 mā 成做我 tuì 捷克少少智識外 ê 新智識。